Basileia Haroro Ripoti

Dirava Ena Hereva be mai Ena Siahu

“DIRAVA ena hereva be ia mauri noho, bona ia be mai ena siahu.” (Heberu 4:12) Tomadiho koikoi ese taunimanima ia koia bona Baibel ena hereva momokani idia diba neganai, hanaihanai unai hereva idia momokani. Henunai ia noho ekspiriens Dominican Republic amo ese unai ia hahedinaraia, Baibel be mai ena siahu taunimanima edia mauri dalana haidaua totona, bona idia dekenai helaro ia henidia.

Iehova ena Witness taudia be Katolik hahine badana idia vadivadi henia, vanegai ena natudia maragidia rua idia mase. Ia dara doko bona dina ta ta iboudiai ia dekenai ia vara gauna ia taitailaia. Witness taudia be Baibel ena hereva Ioane 5:​28, 29 dekenai, toreisi lou herevana unai, ia dekenai idia hahedinaraia. Nega ta ta ai Witness taudia ida ia kiki, bona gabeai, toreisi lou ena helaro dainai ia moale, to unai sibona lasi, ia lalo-parara ena Katolik tomadiho gunalaia taudia ese idia koia.

Karaharaga Katolik Dubu ia rakatania, bona Iehova ena Witness taudia ida pura ta ta iboudiai Baibel ia stadilaia. To, iena adavana be iena lalohadai ia abia dae lasi. Ia danu be Katolik tauna badana dainai, ena turadia, idia be politik bona tomadiho tau badadia, ia boiridia ena hahine do idia vadivadi henia totona bona ena lalohadai do idia haidaua toho bona Katolik tomadiho lalonai do ia vareai lou totona. Gabeai, tau ese ia hagaria, ia gwau edia headava do ia hadokoa, nega ta ai ena varavara bona ena tomadiho orea taudia ia hadibadia edia headava do idia hadokoa.

To tau ena ura hegeregerena ia vara lasi. Tau ena kara dainai hahine ese ena lalona ia hadaia Baibel stadi do ia karaia noho totona. Lauma dalanai ia goada ia lao dainai bona Keristen ena kara namodia ia badinaia dainai, ena tau ia laloa ia ida do ia noho, edia headava do ia hadokoa lasi. Dina ta ai, ia gwau ena hahine ia stadilaia buka do ia duahia​—to hereva ta ia gwauraia. Ia gwau sibona ena Katolik Baibel do ia gaukaralaia.

Vadaeni ia hoa, badina Iehova ena Witness taudia edia heduru bukadia dainai, ia sibona ena Baibel dekena amo gau matamatadia ia diba hamatamaia. Ia lalo-parara ena hahine be dala maorona ia abia hidi, bona daudau lasi murinai ia ese ena hahine ena kara ia tohotohoa. Oibe, ia lalo-parara ena mauri dalana ia haidaua be gau badana. Ena hekwakwanai ta be kuku ania karana do ia rakatania. Noga! magasin, Issue Number 1, 1990, ena ladana “Mase Hoihoilaia​—Kuku Ania Rakatania Daladia Ten,” ia duahia murinai, ena lalona ia hadaia Baibel ese ia gwauraia dika karana do ia rakatania totona. Guna, kuku paketi tamona be hanaihanai ena poketi lalonai ia noho, to murinai unai Noga! magasin ia atoa ena poketi lalonai. Bona kuku ania mamina ia abia neganai unai magasin ia kokia bona ia duahia. Unai ese ia durua momokani! Unai magasin ia duahia momo murinai, kuku ania karana ia hadokoa diba.

Harihari, unai tau mai adavana be Iehova ena bapatiso haroro gaukara karaia taudia. Ia hegeregere neganai, ful-taim haroro gaukara ia karaia, ena nega bada ia henia Dirava ena Basileia ena sivarai namona ia harorolaia totona, bona Iehova ena Witness taudia edia kongregesen lalonai hesiai tauna ena dagi ia abia. Ia bona ena adavana be toreisi lou negana idia naria noho, unai neganai edia natudia do idia hedavari lou tanobada matamatana dekenai do idia mauri lou neganai. Oibe, Dirava ena Hereva, Baibel, ia mauri noho bona ia be mai ena siahu!