Dirava Idia Gari Henia Taudia ida Idia Hebou

“GABU ibounai dekenai taunimanima idia ura idia gari lasi​—dagedage, moni gaukara lasi, bona gorere garina idia ura lasi. Ita danu unai bamona ita ura. . . . Vadaeni, dahaka dainai, gari karana habadaia ita kikilaia?” June 1994 lalonai, “Dirava Gari Henia” Distrik Hebouheboudia idia hamatamaia, bona hereva badana ia henia tauna ese unai henanadai idauna ia henia.

Taunimanima milion momo be hebouhebou dekenai idia lao​—ginigunana be North America ai, murinai Europe, Central bona South America, Africa, Asia, bona davara motumotudia dekenai idia karaia​—idia iboudiai be gari karana habadaia dalana idia ura diba. Dahaka dainai? Badina Iehova Dirava ese iena taunimanima dekenai ia henia hahenamo do ita abia totona ia ita gari henia be gau badana. Dirava gari henia dalana do idia diba totona taunimanima be hebouhebou dekenai idia lao, bona hebouhebou ena dina toi lalodiai unai Keristen karana badana dekenai edia diba idia habadaia.

‘Dirava Gari Henia Bona Iena Hahegani Badinaia’

Unai be hebouhebou ena dina ginigunana ena hereva badana, bona Kohelete 12:13 amo idia abia. Dirava ita gari henia ena anina be dahaka? Program ena hereva ginigunana lalonai, hebouhebou ena seamani ese ia hahedinaraia Dirava gari henia karana ena anina be Iehova ena kara dainai ita hoa bona ita hamomokania, ia be helaga bona ita ura lasi momokani ita habadua. Unai bamona Dirava gari henia karana be hemami dikana ia havaraia lasi; to ia maoro bona mai ena namo.

Unai gari namona be edena bamona ita ia durua? Murinai idia henia hereva, “Oi Manoka Lasi Bona Oi Hesiku Lasi” lalonai, hereva henia tauna ese ia hahedinaraia Dirava gari henia karana ese ita ia hagoadaia mai moale danu Dirava ena taravatu do ita badinadia totona. Bona bema Dirava bona dekena taudia ita lalokau henidia neganai danu, lauma dalanai unai gari karana ese ita do ia hagoadaia. Oibe, Dirava gari henia karana ese ita ia durua, bena mauri hanaihanai ena heau helulu lalonai do ita manoka ita lao lasi.

Murinai, program dekenai haida idia henanadai henidia, bona unai taudia ese idia hahedinaraia goevagoeva bema Dirava ita gari henia ita goada noho diba. Idia henanadai henia taudia ese idia hahedinaraia Dirava gari henia mai hemataurai ida karana ese ia durudia edia hesiai gaukara idia karaia noho diba totona, ena be taunimanima idia ura lasi kamonai, edia hereva idia laloa bada lasi, eiava idia dagedage henidia, bona ena be edia mauri lalonai hekwakwanai idia davaria, to ia durudia idia haheauka totona.

To, dahaka dainai taunimanima haida be Dirava idia gari henia to ma haida be idia gari henia lasi? Hebouhebou ena sinado herevana ladana “Dirava Gari Henia Mamina Oi Habadaia Bona Ia amo Namo Oi Davaria” lalonai, henia tauna ese ia hahedinaraia Ieremia 32:​37-39 dekenai, Iehova ia gwauhamata, ia gwau Iena taunimanima be Dirava gari henia kudouna do Ia henidia. Iehova ese iseda kudouna lalonai Dirava gari henia urana ia atoa. Edena dala amo? Iena lauma helaga amo bona unai siahu amo ia havaraia bukana, Baibel, amo. To, ia hedinarai goevagoeva, gau badana be mai eda goada ida Dirava ena Hereva ita stadilaia bona lauma dalanai ita ia henia heduru gaudia momo ita gaukaralaia. Unai heduru gaudia haida be iseda hebouhebou bona kongregesen heboudia; unuseniai ita idia durua Dirava gari henia dalana do ita diba totona.

Adorahi kahana ena program ia kehoa herevana ese taunimanima ia hagoadadia Iehova bona iena Hereva do idia abidadama henia totona. Unai murinai, Basileia be edena dala badadia amo Keristen taudia edia mauri ia haidaua be namo idia herevalaia.

Murinai, hebouhebou dekenai mai ena kahana haida herevadia toi amo, ginigunana idia karaia. Unai hereva, “Dirava Garina Ita Gari Dainai, Iena Hahegani Ita Badinadia,” ese ruma bese ia herevalaia bada. Idia henia sisiba herevadia haida Revareva Helagadia amo​—bona idia karaia diba gaudia dekenai​—be inai.

□ Headava tatau totona: Dirava gari henia karana ese tau ia hasiahua ena adavana ia lalokau henia, sibona ena tauanina ia lalokau henia hegeregerena. (Efeso 5:​28, 29) Tau ese mai ena ura danu sibona ena tauanina ia hadikaia lasi, ena turadia vairanai sibona do ia hahemaraia lasi, bona sibona ena kerere do ia gwauraidia hedinarai lasi. Vadaeni, sibona ia matauraia hegeregerena, namona be iena adavana ia lalo-namo henia bona hemataurai dalana amo ia kara henia.

□ Headava hahine totona: Iesu ese Dirava ia gari henia dainai ‘nega ibounai iena ura ia karaia.’ (Ioane 8:29) Hahine ese edia adavadia dekenai unai kara namona idia tohotohoa.

□ Tama sina totona: Keristen tama sina ese edia maduna idia laloa bada karana amo idia hahedinaraia Dirava idia gari henia, idia diba edia natudia be harihari gaudia Iehova ena amo. (Salamo 127:3) Namona be tama sina edia gaukara badana be idia ura edia natudia idia hadibadia Keristen momokani taudia ai do idia lao totona.

□ Natudia totona: Iehova ese natudia ia sisiba henidia edia “tamana bona sinana do [idia] kamonai henia. Kara maorona be unai.” (Efeso 6:1) Vadaeni, edia tamana bona sinana idia kamonai henia neganai, Dirava idia kamonai henia unai.

Unai dina ena hereva ginigabena ese helai taudia edia lalona ia hamarerea bada, badina iseda lalohisihisi mamina ita lalokau henia tauna ta ia mase neganai ia kikilaia. Unai hereva ena huanai, gau namona ta ia vara. Hereva henia tauna ese buklet matamatana ladana Oiemu Lalokau Tauna ta Ia Mase Neganai ia halasia dainai hebouhebou taudia idia moale bada. Unai kala idauidau rau 32 buklet ena hereva amo, edia lalokau tauna ia mase dainai idia lalohisihisi bona idia lalo-metau taudia be heduru bada idia abia idia haheaukalaia totona. Tau ta ena lalokau tauna ia mase neganai, ia dekenai dahaka do oi hereva oi daradaralaia, a? Unai buklet ena kahana ta dekenai mase dainai idia lalohisihisi taudia ita durudia diba dalana ia herevalaia. Hereva ia henia tauna ena hereva idia kamonai henia lalonai, hebouhebou taudia momo be unai buklet matamatana ese do ia durua taudia idia laloa.

‘Tomadiho Henia mai Hemataurai Bona mai Gari Danu’

Unai be dina iharuana ena hereva badana, bona Heberu 12:28 amo idia abia. Daba ena program lalonai, mai ena kahana toi herevana iharuana idia karaia, ena ladana be “Kongregesen be Iehova Gari Henia Dalana ai Idia Raka.” Kahana ginigunana ese hebou lao henia karana ia herevalaia. Hebou dekenai ita lao neganai ita hahedinaraia Dirava ita matauraia bona ita ia henia heduru gaudia ita laloa bada. Ita hebou neganai, ita hahedinaraia iena ladana ita gari henia bona mai moale danu ita ura iena hereva ita badinaia. (Heberu 10:​24, 25) Kahana iharuana ia henia tauna ese ia hahedinaraia kongregesen taudia iboudiai be Iehova gari henia dalana ai idia raka totona, idia ta ta iboudiai ese kara namodia idia karaia noho be gau badana. Kahana ihatoina ia henia tauna ese ia herevalaia gauna be Keristen taudia iboudiai ese idia abia hahenamo bona maduna ta​—sivarai namona do idia harorolaia noho unai. Do ita haroro noho ela bona edena nega? Ela bona Iehova do ia gwau vadaeni.​—Isaia 6:11.

Murina herevana ena ladana be “Iehova Moalelaia Karana be Emui Goada Gauna,” bona unai be inai magasin ena stadi herevadia lalonai idia torea. (Nehemia 8:10) Dahaka dainai Iehova ena taunimanima be idia moale? Hereva henia tauna ese unai ena badina haida ia gwauraia hedinarai. Ena badina badana ta be Dirava ita tura henia momokani; unai dainai tanobada taudia iboudiai amo ita be moale bada taudia. Mani inai oi laloa, hereva henia tauna ese hebouhebou taudia idia laloatao totona, ia gwau, Iehova ese taunimanima ia veridia mai Iesu Keriso dekenai bona ita be unai taudia haida. (Ioane 6:44) Unai be ita moale ena badina badana ta!

Hebouhebou iboudiai dekenai bapatiso be mai anina bada, bona “Dirava Gari Henia” Hebouheboudia dekenai unai be ia momokani danu. Hereva ladana “Iehova Gari Henia Dalana ai Ita Gwauhamata Bona Bapatiso Ita Abia” lalonai, hereva ia henia tauna ese ia hahedinaraia idia bapatiso taudia ta ta iboudiai edia maduna be mai ena kahana hani: (1) Idia halasia bukadia edia heduru amo Dirava ena Hereva ita stadilaia, ena anina ita lalo-pararalaia bona ita badinaia totona be gau badana; (2) ita guriguri be gau badana; (3) kongregesen heboudia dekenai iseda orea taudia ita bamodia be gau badana; bona (4) Iehova ena ladana bona ena Basileia ita harorolaia be gau badana.

Saturday adorahi ena program idia kehoa totona hereva ladana “Iehova ese Ia Rakatanidia Lasi Besena” ese ita ia hamoalea bada. Lagani 3,500 gunanai, Israel besena be hekwakwanai idia davaria neganai, Iehova ese Mose dekena amo gwauhamata hereva ia henidia, ia gwau: “Iehova, emui Dirava . . . umui do ia laloaboio lasi, bona umui do ia rakatania lasi.” (Deuteronomi 31:6) Iehova ese ena gwauhamata herevana ia hagugurua, badina Israel taudia be Gwauhamata Tanona dekenai idia vareai neganai ia durudia bona unai tano idia abia idia edia. Hari inai negai danu, bema Iehova kahirakahira dekenai ita noho bona iena Hereva ita badinaia, hetoho aukadia ita abia neganai, ita diba Iehova ese ita do ia rakatania lasi.

Baibel duahia karana amo moale be edena bamona oi davaria diba? Hereva ta ladana “Dina ta ta Iboudiai Dirava Ena Hereva, Buka Helaga, Oi Duahia” lalonai, hereva ia henia tauna ia gwau Baibel ita duahia neganai namona be sivarai ena anina ita tahua bona inai bamona henanadai ita laloa: Inai hereva ese Iehova ena kara bona dala be edena bamona ia hahedinaraia? Edena bamona lau ese Iehova ena kara unai bamona do lau tohotohoa diba? Unai dala amo Baibel ita duahia neganai ita moale bona namo ita davaria diba.

Murinai, program dekenai mai ena kahana toi herevana ihatoina idia kamonai, ena ladana be “Iehova Idia Gari Henia Taudia Ia Durulaidia Gaudia.” Hari inai negai, ena hesiai taudia totona reana Iehova ese hoa karadia ia karaia lasi, to ia idia gari henia taudia ia durudia. (2 Petero 2:9) Unai kahana toi hereva amo inai hekwakwanai momo negana lalonai Iehova ese ita ia durua daladia hani idia gwauraidia: (1) Iena lauma helaga amo ita ia hasiahua kara haida do ita karaia totona, sibona eda goada dekenai ita karaia diba lasi karadia unai. (2) Iena Hereva amo, ita ia sisiba henia bona ita ia hakaua. (3) Ia henia boubou karana dainai, ita dekenai lalona ena mamina namona ia henia. (4) Iena orea, elda taudia danu, amo ita ia hakaua bona ita ia naria. (Luka 11:13; Efeso 1:7; 2 Timoteo 3:16; Heberu 13:17) Unai heduru gaudia iboudiai ita gaukaralaidia namonamo neganai, ita haheauka diba bona Iehova ese ita do ia lalo-namo henia.

Saturday adorahi ena hereva ginigabena ena ladana be “Iehova Ena Hahegari Dinana be Kahirakahira,” bona ia be Malaki ena peroveta herevana amo. Ia ore vadaeni histori ena sivarai lalonai, gari havaraia dina haida idia vara, hegeregere, lagani 70 C.E. ai, Ierusalem idia hahemaoro henia negana. To taunimanima ese do idia davaria gari bada havaraia dinana be ia kahirakahira, unai neganai Iehova ese “Dirava ura lasi taudia bona Lohiabada Iesu ena Sivarai Namona idia abia dae lasi taudia dekenai davana metau do ia henidia.” (2 Tesalonika 1:​6-8) Edena negai do ia vara? Hereva henia tauna ia gwau: “Dokona be kahirakahira! Iehova ese unai dina bona unai hora be ia diba. Do ia haidaudia lasi. Namona be do ita haheauka noho.”

Ita hoa badina hebouhebou ena dina rua idia ore vadaeni. Dina dokona dekenai dahaka ia vara?

“Dirava Gari Henia Bona Hanamoa Bada”

Dina ihatoina ena hereva badana be Apokalupo 14:7 amo. Daba ena program lalonai, idia henia hereva amo idia hahedinaraia tomadiho orea iboudiai amo Iehova ena Witness taudia idia idau, bona edia hahediba hereva haida edena bamona idia idau idia gwauraidia.

Hereva ladana “Kara Maoromaoro Taudia Do Idia Toreisi Lou” lalonai, hereva henia tauna be inai henanadai namona ta ia gwauraia: “Lagani 1,000 Hahemaoro Dinana lalonai, Satana ena tanobada ena lagani ginigabedia ai idia gini auka ela bona mase taudia, be edena negai do idia toreisi lou?” Haere be dahaka? Hereva henia tauna ia gwau: “Baibel ese unai ia gwauraia lasi. To, bema iseda negai idia mase taudia be maoromaoro Aramagedono murinai do idia toreisi lou, bena Hahemaoro Dinana lalonai idia roho mauri taudia ida hadibaia gaukara badana idia karaia, do ita hoa lasi, ani?” Taunimanima haida do idia roho mauri, a? Oibe. Baibel ena hahediba herevadia bona haheitalai namodia, murina hereva ladana “Hisihisi Bada Hereana Lalona amo Do Ia Hamauridia” dekenai, ese idia hahedinaraia goevagoeva dainai ita diba unai be momokani.

Nega daudau lalonai Iehova ena Witness taudia idia diba Baibel be taunimanima edia helaro rua ia gwauraia​—taunimanima milion momo be mauri hanaihanai tanobada paradaisona dekenai do idia abia bona haida sibona be mase diba lasi guba maurina do idia abia, idia be Keriso danu iena Basileia lalonai do idia lohia. Unai guba helarona be hereva ladana “Orea Maragi e, Umui Gari Lasi” lalonai, hereva henia tauna ese ia kikilaia. (Luka 12:32) Hari inai tanobada ena kara dainai, seri maragi taudia be gari lasi dekenai idia gaukara be gau badana; idia ta ta iboudiai idia haheauka ela bona dokona be gau badana. (Luka 21:19) Hereva henia tauna ia gwau: “Edia boga-auka ese hutuma bada herea ia hagoadadia. Namona be idia danu do idia gari lasi, Dirava ese tanobada ai do ia vara hisihisina bada hereana amo do ia hamauridia negana do idia naria noho lalonai.”

Daba kahana ena program be kahirakahira ia ore neganai, hebouhebou taudia be mai moale danu Baibel drama ladana Oi Abidia Hidi Diba Gaudia idia itaia. Iosua ena negai, bona peroveta tauna Elia ena negai danu, Israel taudia vairadiai dala rua idia noho. Ta idia abia hidi be gau badana. Elia ia gwau: “Lalo rua dekenai do umui raka gageva ela bona edena nega? Bema Iehova be Dirava [momokanina], ia murinai umui raka; to bema Baal, ia murinai umui raka.” (1 Hanua Pavapavadia 18:21) Hari inai negai danu, taunimanima vairadiai dala rua idia noho. Hari inai negai edia lalohadai idia rua be namo lasi. Edena dala idia abia hidi be ia maoro? Idaunegai, Iosua ia abia hidi dalana hegeregerena. Ia gwau: “Lau be egu ruma bese taudia danu Iehova ena hesiai gaukara do ai karaia.”​—Iosua 24:15.

Karaharaga, Sunday adorahi ia ginidae bona pablik haroro, ladana “Inai Dainai Dirava Momokanina Ita Gari Henia,” ena nega ia abia. Apokalupo 14:​6, 7 ai, taunimanima iboudiai ia hamaoroa, ia gwau: “Dirava do umui gari henia, ia do umui hanamoa bada.” Dahaka dainai harihari Dirava ita gari henia be gau badana? Badina unai siri ma ia gwau, “Dirava ese taunimanima ibounai do ia kota henia ena nega ia ginidae vadaeni.” Iena Natuna, Dirava ena guba Basileia Pavapavana ai ia lao tauna, amo Iehova ese hari inai nega ena miro, bona gwau-edeede karadia do ia haoredia. Hereva ia henia tauna ese ia hahedinaraia unai dala sibona amo Dirava idia gari henia taudia ese namo do idia davaria diba bona iseda tanobada be dika amo do ia hanamoa bona ia namo noho totona. Iseda nega be nega dokona ena dina oredia dainai gau badana be karaharaga Dirava momokanina ita gari henia!

Unai pura ena Gima Kohorona stadi ia kikilaia murinai, hereva henia tauna ginigabena ia mai platfom dekenai. Ia gwau hebouhebou ena program dainai, hebouhebou dekenai idia mai taudia be Dirava gari henia karana ena anina idia diba momokani. Ia hahedinaraia goevagoeva Dirava idia gari henia taudia ese hahenamo momo idia davaria. Ia ese vidio matamatana ladana​—United by Divine Teaching ia halasia. Unai vidio ese lagani 1993-94 dekenai “Dirava Ena Hahediba” Intenesenel Hebouheboudia dekenai idia vara gau badadia ia hahedinaraia. Unai hereva be kahirakahira ia doko neganai, helai taudia momo be inai idia laloa, ‘Lagani vaira ai dahaka do ia vara bona ita moalelaia?’ Gabu idauidau momo dekenai, dina toi distrik hebouheboudia do idia karaia.

Hereva dokona lalonai, hereva henia tauna ese Malaki 3:16 ia gwauraia. Unai siri ia gwau: “Unai neganai Iehova garina idia gari taudia be idia hereva heheni, ta ta ena bamona ena bamona ida idia hereva, bona Iehova ese ia hakala henidia bona edia hereva ia kamonai. Bena Iehova garina idia gari taudia bona ena ladana idia laloa taudia lalodia tao bukana idia torea matamaia ia vairanai.” Idia rakatanaia neganai, hebou taudia edia lalodia idia hadaia vadaeni Iehova ena ladana do idia laloa momo, bona mai edia gari danu Dirava ena hesiai gaukara do idia karaia.

[Picture on page 24]

Bapatiso idia abia taudia be Dirava garina idia gari noho be namo

[Picture on page 25]

Hari drama “Oi Abidia Hidi Diba Gaudia” ese kamonai taudia ia durudia bena idia diba edia lalodia idia hadaia haraga Iehova ena hesiai gaukara idia karaia totona be gau badana

[Picture on page 26]

Hebou taudia be idia moale bada badina buklet matamatana “Oiemu Lalokau Tauna ta Ia Mase Neganai” idia abia