Keristani Taudia ese Hereva Dikadia Idia Haheaukalaia Dalana

TA ESE oi ia hereva dika henia eiava emu ladana hadikaia totona sivarai koikoina ia gwauraia loaloa neganai, emu mamina be edena bamona? Vaia, emu lalona ia hisihisi bada, ani? Hereva kererena o hereva gagevana amo niuspepa o reidio o TV dekenai Iehova ena Witness taudia idia gwauraia dika neganai, edia mamina danu be unai bamona. To Iesu be Mataio 5:​11, 12 ai ia hereva hegeregerena, idia moale diba.

Hegeregere, Germany lalonai Katolik magasin ta ia gwau: “Witness taudia edia orea ese ia haganidia idia ta ta iboudiai ese edia pei monina ena kahana, 17 ia lao 28 pesen bamona, be edia orea koikoina ena hedikwota do idia henia.” To Iehova ena Witness taudia be orea koikoina lasi bona edia gaukara be idia bona ma haida be sibodia edia ura hegeregeredia idia henia monina sibona amo idia karaia. Unai hereva koikoina ese magasin duahia taudia momo ia koia dainai, Iehova ena Witness taudia edia lalona idia hisihisi. To, niuspepa o reidio o TV ai edia ladana idia hadikaia neganai, Keristani korikori taudia be edena bamona do idia kara be namo?

Keristani Taudia ese Inai Haheitalai Idia Tohotohoa be Namo

Mataio karoa 23 ese ia hahedinaraia goevagoeva Iesu ese tomadiho taudia, ia idia inai henia taudia, ia gwau dika henidia, edia koikoi dainai. Hari inai negai haida ese idia gwauraidia dika neganai, Keristani taudia ese unai bamona idia kara henidia be namo, a? Reana lasi. Dirava ena Natuna be mai ena siahu idauna bona mai ena lalo-parara bada, unai dainai, tomadiho taudia, ia idia inai henia taudia, ia gwau dika henidia, ena hereva idia kamonaia taudia hutuma durudia totona.

Mataio 15:​1-11 ia gwau haida ese Iesu idia gwau henia, idia gwau ena hahediba taudia ese Iuda sene taudia edia taravatu idia utua. Iesu be edena bamona ia kara? Ia gini auka. Nega haida, Iesu ese ia idia gwauraia dika taudia ia hereva henidia mai ena goada ida, edia lalohadai kereredia ia hakoikoia. Hari inai negai haida ese edia gaukara bona edia hahediba herevadia idia gwauraia kerere negadia ai, bema Keristani taudia ese unai hereva kereredia hamaoromaoroa toho totona hereva maorodia idia gwauraia hedinarai goevagoeva, unai be kerere lasi. Unai bamona idia karaia, lalo-namo taudia do idia durua, bena do idia diba haida ese Iehova ena Witness taudia idia gwauraia herevadia be maoro lasi bona edia ladana idia hadikaia kava.

To Iesu ena kara mani oi laloa. Nega sisina murinai ena hahediba taudia ese idia hereva henia, idia gwau: “Oi diba Farisea taudia be oiemu hereva idia kamonai, vadaeni edia lalona idia hisihisi, a?” Unai Farisea taudia “edia lalona idia hisihisi” sibona lasi, to idia ese Iesu idia inai henia lalo-dika danu dainai, ia ese ia dadaraidia. Unai dainai ia haere, ia gwau: “Unai Farisea taudia do umui laloa lasi! Idia be matakepulu taudia, bona matakepulu taudia idia hakaua lao noho.” Unai bamona idia inai henia dikadika taudia do ia hereva henidia noho be anina lasi; unai ese ta do ia durua lasi, bona anina lasi hepapahuahuna do ia havaraia. (Mataio 7:​6; 15:​12-14; ma danu Mat 27:​11-14 itaia.) Iesu ena haere ese idia hahedinaraia “regerege lasi dekenai ita noho be mai ena nega, bona do ita herevahereva danu be mai ena nega.”​—Hadibaia Tauna 3:7.

Iehova ena Witness taudia idia diba taunimanima iboudiai ese do idia gwauraidia namo lasi. Iesu ena hereva idia laloatao; ia gwau: “Taunimanima ibounai ese umui do idia hanamoa neganai, madi umui be dika, badina be edia sene taudia ese peroveta koikoi taudia dekenai unai bamona idia hanamoa.” (Luka 6:26) Nega ta tau ta ese Watch Tower Society ena presiden ginigunana, C. T. Russell, ia nanadaia dahaka dainai taunimanima ese ia idia gwauraia dika negadiai, sibona ena maoro ia hamomokania toho lasi. Ia gwau: “Lau idia boiboi henia sisiadia iboudiai be egu aena amo do lau botaia totona bema lau gini, do lau raka daudau diba lasi.”

Unai dainai, ita idia inai henia lalo-dika taudia edia hereva ese iseda gaukara, Dirava ena hesiai lao henia gaukarana, amo ita idia veria oho be namo lasi. (Salamo 119:69) Namona be Keristani korikori taudia edia gaukara, sivarai namona harorolaia gaukarana, ita laloa bada. Unai gaukara ita karaia lalonai, taunimanima edia henanadai do ita haerelaidia, bona iseda gaukara ena anina do ita gwauraia hedinarai daladia do ita davaria. Do ita hadibadia diba unai gaukara amo taunimanima ita durua edia kara idia hamaoromaoroa totona bona Dirava ena Hereva ita hadibalaidia.​—Mataio 24:14; 28:​19, 20.

Ita Idia Gwauraia Dika Taudia Do Oi Haere Henidia be Namo, A?

Iesu ese ia murinai idia raka taudia ia hamaoroa, ia gwau: “Umui be tanobada ena lasi . . . Unai dainai tanobada ese umui do ia badu henia.” (Ioane 15:19) Niuspepa, reidio, bona TV edia sivarai, Iehova ena Witness taudia edia ladana hadikaia sivaraidia, momo be unai badu dainai idia gwauraia, unai dainai ita lalodia lasi be namo. To, reana nega haida niuspepa o reidio o TV amo idia halasia herevadia ese idia hahedinaraia, Witness taudia edia sivarai idia diba momokani lasi eiava idia mogea bona idia lalohadailaia kerere. Reana unai idia halasia herevadia idia torea taudia haida ese Witness taudia idia inai henia taudia edia amo unai hereva idia abia. Namona be inai ita laloa guna​—dahaka ia vara dainai unai sivarai idia torea, daika ese unai maumau herevana ia havaraia, bona ena ura be dahaka​—bena do ita diba, niuspepa o reidio o TV ai idia gwauraia herevadia koikoidia do ita laloa lasi be namo, eiava dala ta amo hereva momokani do ita hamomokania be namo.

Nega haida, bema ta ese revareva ta do ia torea namonamo bena do ia siaia niuspepa ena edita dekenai, bena edita ese unai revareva ibounai be niuspepa ai bema ia halasia, unai dala amo hereva kereredia do idia hamaoromaoroa diba. To reana unai bamona revarevana dainai dika do ia vara diba. Edena dala ai? Reana ia dainai hereva koikoina ginigunana do idia gwauraia lou, eiava dala do ia kehoa Witness taudia edia inai taudia edia, hereva koikoidia o edia ladana hadikaia herevadia idaudia be niuspepa ai do idia halasia lou. Nega momo aonega dalana be, unai gau idia diba elda taudia sibodia ese do idia laloa, revareva be edita dekenai do idia siaia be namo eiava lasi. Bema tano ta lalonai niuspepa ena hereva dikana ta dainai taunimanima ese Witness taudia idia lalo-dika henidia, Watch Tower Society ena brens opesi ese hereva maorona be kongregesen ia hadibadia diba; unai amo pablisa iboudiai ia durua, niuspepa ena hereva idia henanadailaia taudia do idia haere henidia maoromaoro diba totona.

Oi ese unai bamona hereva gagevadia haerelaia karana lalonai do oi vareai be namo, a? Iesu ena sisiba, idia “umui laloa lasi,” be mai anina unai bamona inai taudia kara henidia dalana dekenai. Baibel ena hereva dainai, Keristani taudia mai edia kamonai ese hereva momokani hadikaia taudia bona edia lalohadai idia dadaraia. (1 Korinto 5:​11-13; Tito 3:​10, 11; 1 Ioane 2:19; 2 Ioane 10, 11) Bema taunimanima be mai edia momokani ida idia ura do idia diba Witness taudia gwauraia dika herevadia be maoro eiava kerere, nega momo oi sibomu emu diba, dala maorona amo oi abia dibana, be hegeregere, ia amo do oi haere henidia.​—Gima Kohorona, December 1, 1986 gauna, rau 15 bona 16 itaia.

Bema hereva gagevana ta be niuspepa ai oi davaria, Aonega Herevadia 14:15 ena sisiba mani oi laloa; ia gwau: “Mai ena lalona kehoa lasi tauna ese, hereva ibounai ia hamomokania noho, to laloa kehoa tauna ese, iena raka dalana ia laloa namonamo noho.” Switzerland ai, taunimanima momo idia badu, niuspepa ta be inai sivarai ia halasia neganai: Witness kekenina ta ia mase, badina be ena varavara ese medikol taudia be gwaumaoro idia henidia lasi, rara do idia henia. Unai be momokani a? Lasi. Baibel ena hereva dainai kekeni ese rara ia dadaraia, to ia gwau ena lalona be hegeregere, heduru gauna idauna, rara lasi gauna, do ia abia. Unai idia henia haraga diba bona reana unai amo idia hamauria diba. To, hospital taudia idia naria kava ela bona kekeni ia mase. Niuspepa ena sivarai lalonai unai idia gwauraia hedinarai lasi.

Unai dainai, niuspepa edia hereva mani oi laloa namonamo; hereva momokani idia gwauraia vaitani eiava lasi. Unai idia henanadailaia taudia ita hamaoroa diba, kongregesen ena elda taudia ese unai gau be Baibel ena hereva hegeregerena idia tahudia mai edia lalokau ida. Taunimanima do ita haere henidia neganai, bema hereva maorodia ita badinaia, ita diba lasi gaudia be do ita gwauraia kava lasi.​—Aonega Herevadia 18:13.

Do Ita Hadibadia be Gau Badana

Iesu bona aposetolo edia nega lalonai, taunimanima ese Iesu Keriso ena ladana hadikaia totona sivarai koikoidia idia gwauraia loaloa, haida idia gwau ia ese gavamani siahuna ia hadikaia toho. (Luka 7:34; 23:2; ma danu Mataio 22:21 itaia.) Gabeai, gabu momo ai, tomadiho oreadia taudia bona murimuri taudia ese Keristani ekalesiana matamatana idia inai henia. “Tanobada ena kavakava gaudia be Dirava ese ia abia hidi” dainai, taunimanima momo ese iena hesiai taudia idia matauraia lasi. (1 Korinto 1:​22-29) Namona be hari inai negai Keristani korikori taudia idia diba haida ese do idia gwauraidia dika; unai be edia dagedage karana ta.​—Ioane 15:20.

To, bema idia ida ia herevahereva tauna be maka tamona amo taunimanima ia lalodia bona ena lalohadai be Paulo ena vadivadi taudia Roma dekenai edia lalohadai hegeregerena, Iehova ena Witness taudia idia moale. Unai vadivadi taudia ese Paulo idia hereva henia, idia gwau: “Ai ura oiemu laloa do ai kamonai, badina be ai diba gabu ibounai ese inai orea totona idia hereva ia dika.”​—Kara 28:22.

Hereva kererena idia kamonai taudia be hereva maorona oi hamaorolaidia toho mai emu manau ida. (Roma 12:14; ma danu 2 Timoteo 2:25 itaia.) Oi noidia, Iehova ena Witness taudia edia sivarai momokanina be idia edia amo do idia abia, bena idia kamonai vadaeni sivaraidia koikoidia ese do idia koidia noho lasi. Watch Tower Society ese ia halasia bukadia amo iseda orea ena sivarai bona ena hahediba herevadia be idia dekenai oi hahedinaraia diba danu.a Nega ta Filipo ese Natanaela ia hamaoroa, ia gwau: “Oi mai itaia.” (Ioane 1:46) Ita danu be unai bamona ita hereva diba. Bema ta ia ura Iehova ena Witness taudia edia kara bona edia hahediba herevadia do ia diba, iseda Kingdom Hall ai do ita abia dae mai eda momokani ida, unai do ia dibaia totona.

Oi Idia Inai Henia Taudia Oi Gari Henidia Lasi

Iseda lalona idia goada, badina be ita diba haida edia hereva dikadia ese taunimanima be Witness taudia ai idia lao dalana ia koua lasi! Germany ai, TV ena program ta lalonai, Witness taudia edia orea idia rakatania bena idia inai henia taudia ese hereva koikoidia momo amo idia gwauraidia dika. Unai ia itaia tauna ta ena lalona ia parara, idia be sibodia edia lalohadai kavakavadia hegeregerena hereva momokani idia hadikaia, bena unai dainai ia be Witness taudia ida Baibel ia stadilaia lou. Oibe, taunimanima edia hereva dikadia dainai nega haida namo ia vara!​—Filipi 1:​12, 13 itaia.

Aposetolo Paulo ia diba haida ese “gori kavakava” do idia kamonai henidia bada, hereva momokani do idia kamonai henia maragi. Unai dainai ia gwau: “Nega ibounai do oi laloa maoromaoro. Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.” (2 Timoteo 4:​3-5) Unai dainai, emu lalona do idia veria kerere gaudia oi dadaraia, bona oi idia inai henia taudia ‘oi gari henia lasi.’ (Filipi 1:28) Oi gini auka noho, oi lalo-hekwarahi lasi, bona sivarai namona oi harorolaia mai emu moale ida, bena taunimanima edia hereva dikadia do oi haheaukalaia diba. Oibe, Iesu ena gwauhamata oi laloatao; ia gwau: “Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo. Umui moale bada momokani, badina emui davana guba dekenai ia bada, badina be unai bamona danu, peroveta taudia gunadia be taunimanima ese idia dagedage henia.”​—Mataio 5:​11, 12.

[Footnotes]

[Blurb on page 27]

Taunimanima ese idia inai henia neganai, Iesu ese ena hahediba taudia ia hamaoroa, ia gwau: “[Idia] umui laloa lasi!” Ena hereva ena anina be dahaka?

[Blurb on page 29]

“Bema egu murinai umui raka dainai idia hadikaia umui, bona idia hisihisi henia umui, bona hereva dika mai koikoi danu idia gwauraia loaloa umui totona lau dainai, umui danu namo.”​—Mataio 5:11