Iseda Abidadama Ena Maoro Ita Hamomokania

‘Emui kudouna dekenai Keriso do umui abia dae, emui Lohiabada ai do umui halaoa, bona haida ese emui abidadama idia nanadaia neganai, nega ibounai do umui naria hegaegae noho, idia do umui haere henia totona.’​—1 PETERO 3:15.

1, 2. Badina be dahaka Iehova ena Witness taudia be dagedage idia davaria neganai idia hoa lasi, to dahaka idia ura?

TANO momo dekenai, taunimanima idia abia dae Iehova ena Witness taudia be kara momokani bona kara maoromaoro taudia. Momo idia laloa idia be dekena taudia namodia, hekwakwanai idia havaraia lasi taudia. To, tuari bona maino negadia lalonai, unai maino idia ura henia Keristani taudia idia kerere lasi to dagedage idia davaria. Unai dagedage dainai idia hoa lasi. Momokani, idia diba do ia vara. Oibe, idia diba taunimanima ese Keristani taudia ginigunadia idia “badu henia,” unai dainai hari inai negai Keriso murinai idia raka toho taudia ese idia diba, dagedage do idia davaria danu, ani? (Mataio 10:22) Danu, Baibel ia gwau: “Keriso Iesu danu idia hakapua dainai, Dirava badinaia idia ura taudia ibounai ese dagedage ena hisihisi do idia abia.”​—2 Timoteo 3:12.

² Iehova ena Witness taudia ese dagedage idia tahua lasi, bona dagedage ia havaraia hekwakwanai​—faini, dibura, eiava kara dika​—idia moalelaia lasi. Idia ura ‘mai maino ida do idia noho namonamo,’ Dirava ena Basileia sivaraina namona idia harorolaia namonamo diba totona. (1 Timoteo 2:​1, 2) Tano momo dekenai edia tomadiho idia badinaia totona tomadiho ena ura kwalimu idia abia dainai idia moale, bona idia hekwarahi ‘taunimanima danu mai maino ida do idia noho totona,’ gavamani taudia ida danu. (Roma 12:18; 13:​1-7) Unai dainai, taunimanima ese idia ‘badu henidia’ ena badina be dahaka?

3. Iehova ena Witness taudia idia kerere lasi to taunimanima ese idia badu henia ena badina ta be dahaka?

³ Iehova ena Witness taudia idia kerere lasi to taunimanima ese idia badu henia ena badina be Keristani taudia ginigunadia idia dagedage henia ena badina hegeregerena. Gau ginigunana be, Iehova ena Witness taudia edia tomadiho karadia dainai, taunimanima haida ese idia ura henidia lasi. Hegeregere, idia ese Dirava ena Basileia ena sivarai namona idia harorolaia mai edia lalo-goada ida, to nega momo taunimanima ese edia ura badana idia lalo-pararalaia kerere, idia laloa edia gaukara be “ta ena tomadiho haidaua toho karana aukana.” (Kara 4:​19, 20 itaia.) Danu, idia be bese edia politikol karadia amo bona tuari amo idia gini siri, bona unai dainai nega haida taunimanima idia laloa Witness taudia ese gavamani idia badinaia lasi.​—Mika 4:​3, 4.

4, 5. (a) Edena dala ai Iehova ena Witness taudia idia samania koikoi? (b) Nega momo, daidia ese Iehova ena hesiai taudia dekenai dagedage idia havaraia?

⁴ Gau iharuana be, taunimanima ese Iehova ena Witness taudia idia samania koikoi​—koikoi hereva dikadia idia gwauraia bona Witness taudia ese idia abia dae herevadia idia mogea. Unai dainai, tano haida lalonai idia gwau Witness taudia be dika ia havaraia hehuni oreana ta. Danu, idia ura Baibel ena taravatu, ‘rara umui dadaraia’ taravatuna, idia badinaia dainai, idia ese rara lasi medikol heduruna idia tahua, bona unai dainai haida idia gwau idia be “natudia hamasea taudia” bona “sibona hamasea taudia edia oreana ta.” (Kara 15:29, NW) To Iehova ena Witness taudia ese mauri idia laloa bada, bona idia ura idia sibodia bona edia natudia totona medikol heduruna namona idia tahua. Samania herevana ta ia gwau, lagani ta ta ibounai Iehova ena Witness taudia edia natudia momo herea idia mase, badina rara henia hanai karana idia dadaraia, to unai be koikoi hereva badana. Danu, ruma bese taudia ibounai ese Baibel ena hereva momokani idia abia dae lasi dainai, haida idia gwau Witness taudia ese ruma bese idia hadikaia. To, Iehova ena Witness taudia idia diba namonamo taudia be idia diba Witness taudia ese ruma bese maurina idia laloa bada bona Baibel ena taravatu, tau bona ena adavana idia lalokau heheni bona idia matauraia heheni, bona natudia ese edia tama sina idia kamonai henia taravatudia, idia badinaia toho, herevana ruma bese taudia ma haida be abidadama taudia eiava lasi.​—Efeso 5:⁠21–​6:⁠3.

⁵ Nega momo, Iehova ena hesiai taudia idia inai henia tomadiho taudia ese dagedage idia havaraia. Idia ese politikol siahu taudia bona televisen, reidio, bona niuspepa idia halasia taudia edia lalona idia ania, Witness taudia edia gaukara idia koua totona. To ita, Iehova ena Witness taudia, be ita abia dae herevadia bona tomadiho karadia dainai, eiava samania koikoi herevadia dainai be unai bamona dagedage ita davaria neganai, dahaka ita karaia be namo?

“Emui Manau Bona Manada Kara Taunimanima Ibounai Edia Vairanai Do Umui Hedinaraia”

6. Badina be dahaka Keristani kongregesen murimuri ai idia noho taudia ita laloa maoromaoro be namo?

⁶ Namona be lalohadai maorona​—Iehova ena lalohadai​—iseda tomadiho idia abia dae lasi taudia dekenai ita abia. Bema ita abia lasi, reana ma haida ese ita do idia badu henia eiava do idia gwauraia dika. Aposetolo Paulo ia gwau: “Emui manau bona manada kara taunimanima ibounai edia vairanai do umui hedinaraia.” (Filipi 4:5) Unai dainai, Baibel ese ita ia hagoadaia Keristani kongregesen murimuri ai idia noho taudia ita laloa maoromaoro.

7. “Tanobada ena kara mirodia dekena amo” do ita raka siri ena anina be dahaka?

⁷ Danu, Baibel ese ia hahedinaraia goevagoeva “tanobada ena kara mirodia dekena amo do [ita] raka siri” be namo. (Iamesi 1:​27; 4:4) Iniseniai, bona Baibel ena kahana ma haida ai, unai hereva “tanobada” be Keristani taudia momokanidia lasi to taunimanima ma ibounai gwauraia totona idia gaukaralaia. Ita be unai taunimanima bogaragidiai ita noho; gaukara gabuna ai, sikuli ai, bona ita noho gabuna ai ita bamodia. (Ioane 17:11, 15; 1 Korinto 5:​9, 10) To tanobada ena kara mirodia dekena amo ita raka siri ena anina be Dirava ena kara maoromaoro idia utua lalohadai, hereva, bona kara ita dadaraia. Danu, gau badana be ita lalo-parara tanobada ita tura henia karana amo dika ita davaria diba, bona Iehova ena taravatu idia dadaraia vaitani taudia ita tura henia neganai reana dika do ita davaria haraga.​—Aonega Herevadia 13:20.

8. Badina be dahaka tanobada ena miro amo ita raka siri sisibana ese gwaumaoro ia henia lasi taunimanima ita laloa maragi totona?

⁸ To tanobada ena miro amo ita raka siri sisibana ese gwaumaoro ia henia lasi Iehova ena Witness lasi taudia ita laloa maragi totona. (Aonega Herevadia 8:​13) Hereva gunana lalonai ita herevalaia Iuda tomadiho gunalaia taudia edia haheitalai mani ita laloa. Idia haginia tomadihona ese Iehova ena lalo-namo ia abia lasi; danu, ia ese idia bona Iuda lasi taudia huanai turana karana namona ia havaraia lasi. (Mataio 21:43, 45) Sibodia edia kara maoromaoro idia laloa bada dainai, unai taravatu badinaia auka taudia ese Idau Bese taudia idia matauraia lasi. Ita be idia bamona lasi, ita ese mai hekokoroku ida Witness lasi taudia ita laloa bona ita kara henia lasi. Aposetolo Paulo bamona ita ura Baibel ena hereva momokani idia kamonai taudia ibounai ese Dirava ena lalo-namo do idia abia.​—Kara 26:29; 1 Timoteo 2:3, 4.

9. Baibel ena lalohadai maorona dainai edena dala ai iseda abidadama idia abia dae lasi taudia ita herevalaia?

⁹ Namona be Baibel ena lalohadai maorona dainai dala namona ai Witness lasi taudia ita herevalaia. Paulo ese Tito ia hagoadaia Kerete motumotu dekenai idia noho Keristani taudia do ia hadibaia lou, idia ese “tau ta do idia gwauraia dika lasi, bona do idia heai lasi, to do idia manau. Nega ibounai taunimanima ibounai dekenai manada kara do idia karaia.” (Tito 3:2) Mani oi itaia, namona be Keristani taudia ese “tau ta” idia gwauraia dika lasi​—Kerete dekenai idia noho Keristani lasi taudia danu, ena be idia haida be koikoi taudia, aniani sibona idia laloa taudia, bona lahedo taudia. (Tito 1:​12) Unai dainai, bema iseda abidadama idia abia dae lasi taudia be hereva dikadia amo ita gwauraia, Baibel ita dadaraia unai. Hekokoroku lalohadaina ese Iehova ena tomadiho dekenai taunimanima edia lalona ia veria lasi. To Iehova ena Hereva dekenai idia noho hakaua herevadia namodia hegeregerena ma haida ita kara henia neganai, Dirava ena ‘sivarai namona dekenai hairai bona mataurai ita havaraia.’​—Tito 2:​10.

Edena Negai Ita Hereva Lasi, Edena Negai Ita Hereva

10, 11. Iesu ese edena dala ai ia hahedinaraia ia diba edena nega be (a) ‘hereva lasi ena nega’? (b) ‘hereva ena nega’?

¹⁰ Hadibaia Tauna 3:7 ia gwau ‘hereva lasi be mai ena nega bona hereva be mai ena nega.’ Vadaeni, hekwakwanai be inai: Edena negai ita ese dagedage taudia edia hereva ita laloa lasi bona edena negai idia ita hereva henia be namo, iseda abidadama ena maoro ita hamomokania totona. Nega ibounai aonega goevadaena ia hahedinaraia tauna​—Iesu​—ena haheitalai amo gau momo ita dibaia diba. (1 Petero 2:​21) Ia diba edena nega be ‘hereva lasi ena nega.’ Hegeregere, dubu biagudia bona tau badadia ese Pilato vairanai ia idia samania neganai, Iesu “ia haere lasi.” (Mataio 27:11-​14) Ia ura lasi Dirava ena palani ia totona ia koua herevana ta ia gwauraia. To ia ura ena kara amo haere ia henia. Ia diba hereva momokani danu be edia hekokoroku lalona bona kudouna do ia haidaua lasi. Edia samania herevana ia laloa lasi bona hereva ta ia gwauraia lasi.​—Isaiah 53:7.

¹¹ To danu, Iesu ia diba edena nega be ‘hereva ena nega.’ Nega haida, ia idia maumauraia taudia ia hereva henia mai gari lasi ida, bona edia samania herevadia ia hakoikoia. Hegeregere, taravatu hadibaia taudia bona Farisea taudia ese taunimanima hutuma vairanai Iesu ena kara idia hakoikoia totona idia samania idia gwau ia ese Belesebulo ena siahu henunai demoni ia luludia, bona unai neganai Iesu ese idia ia haere henia. Hereva namona bona haheitalai mai anina bada amo, edia hereva ia hakoikoia. (Mareko 3:​20-​30; mani Mataio 15:​1-​11; 22:17-​21; Ioane 18:37 itaia.) Unai hegeregerena, Iesu ena mase dalana idia hegaegaelaia bona ia idia dogoatao murinai, Kaunsolo taudia vairanai Iesu idia abia lao neganai, Hahelaga Tauna Badana Kaiapa ia nanadaia: “Mauri Dirava ena ladana dekenai lau hereva oi dekenai, oi hamaoroa ai dekenai, oi be Keriso, Dirava ena Natuna, o?” Unai danu be ‘hereva ena nega,’ bema ia hereva lasi do idia laloa ia be Keriso lasi. Unai dainai Iesu ia haere, ia gwau: “Lau inai.”​—Mataio 26:63, 64; Mareko 14:61, 62.

12. Dahaka ia vara bena Paulo bona Banaba be Ikonio dekenai idia hereva goada?

¹² Paulo bona Banaba edia haheitalai mani ita laloa danu. Kara 14:​1, 2 ia gwau: “Ikonio dekenai Paulo bona Banaba be Iuda taudia edia dubu lalonai idia raka vareai, idia haroro. Bona edia hereva siahu dainai Iuda taudia bona Helene taudia momo herea ese abidadama taudia idia halaoa. To Iuda taudia haida ese idia abidadama henia lasi, vadaeni idia ese idau bese taudia dekenai idia hereva, edia lalona idia ania, ela bona idia badu unai Keristani varavara dekenai.” The New English Bible ia gwau: “To Keristani tomadiho idia abia dae lasi Iuda taudia ese Idau Bese taudia edia lalona idia ania, Keristani taudia do idia badu henia totona.” Iuda dagedage taudia ese sivarai namona idia dadaraia, to unai sibona lasi, idia ura Idau Bese taudia ese Keristani taudia do idia lalo-dika henia danu bona unai dainai samania koikoi herevadia idia gwauraia.a Oibe, idia ese Keristani taudia idia badu henia momokani! (Kara 10:28 itaia.) Paulo bona Banaba idia laloa unai be ‘hereva ena nega,’ hahediba taudia matamatadia be taunimanima edia hadikaia herevana dainai idia lalo-metau garina. Unai dainai ‘idia ruaosi [Paulo bona Banaba] be nega daudau unuseni idia noho. Idia hereva goada Iehova ena siahu dekenai,’ bona Ia ese ena lalo-namo ia hahedinaraia, oibe, siahu ia henia hoa gaudia idia karaia totona. Unai dainai “haida be Iuda taudia danu laloa tamona, haida be aposetolo danu laloa tamona.”​—Kara 14:3, 4.

13. Ita idia hereva dika henia neganai, edena bamona nega be ‘hereva lasi ena nega’?

¹³ Vadaeni, ita idia hereva dika henia neganai, dahaka ita karaia be namo? Unai be idia vara gaudia hegeregerena do ita abia hidi. Nega haida inai hakaua herevana, ‘hereva lasi be mai ena nega,’ ita badinaia be namo. Dagedage goada taudia ese hepapahuahu kava lalonai ita idia veria toho neganai, unai hakaua herevana ita badinaia be namo. Namona be ita laloaboio lasi, herevana dahaka ita karaia, to taunimanima haida be hereva momokani idia ura henia lasi. (2 Tesalonika 2:​9-​12) Mai edia kudouna ibounai ida hereva momokani idia dadaraia hekokoroku taudia ida ita herevahereva be anina lasi. To unai sibona lasi, bema samania koikoi taudia ibounai ida ita herevahereva momo, reana moale ia havaraia mai anina bada gaukarana​—Baibel ena hereva idia ura idia dibaia kudou-maoro taudia durua gaukarana​—amo ita raka siri. Unai dainai, mai edia ura ida ita idia samania koikoi taudia ita davaria neganai, Dirava ena lauma amo ia vara sisibana be inai: “Idia dekena amo do umui raka siri.”​—Roma 16:17, 18; Mataio 7:6.

14. Edena daladia amo taunimanima vairanai iseda abidadama ena maoro ita hamomokania?

¹⁴ To momokani, ita gwau lasi unai ena anina be iseda abidadama ena maoro ita hamomokania lasi. Lasi, badina ‘hereva be mai ena nega’ danu. Samania koikoi herevadia idia kamonai lalo-momokani taudia ita laloa be maoro. Ita moale bema mai iseda kudouna ibounai ida ita abia dae herevadia be ma haida dekenai ita hahedinaraia goevagoeva diba; oibe, ita moale bada bema dala ia kehoa unai ita karaia totona. Petero ia gwau: ‘Emui kudouna dekenai Keriso do umui abia dae, emui Lohiabada ai do umui halaoa, bona emui abidadama idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.’ (1 Petero 3:15) Bema kamonai taudia momokanidia idia ura ita abia dae bona ita laloa bada hahediba herevadia edia badina idia diba, bona dagedage taudia idia gwauraia samania koikoi herevadia idia henanadailaia, iseda maduna be Baibel ena hereva momokanidia amo iseda abidadama ena maoro ita hamomokania. Ma danu, iseda kara namo ese haere namona ia henia diba. Bema lalohadai idaudia idia dadaraia haraga lasi taudia be idia itaia Dirava ena kara maoromaoro taravatudia ita badinaia noho, do idia lalo-parara haraga unai samania herevadia be koikoi.​—1 Petero 2:​12-​15.

Iseda Ladana Idia Hadikaia Herevadia be Edena Bamona?

15. Niuspepa dekenai Iehova ena Witness taudia idia gwauraia kerere ena haheitalai ta be dahaka?

¹⁵ Nega haida, televisen, reidio, bona niuspepa dekenai Iehova ena Witness taudia idia gwauraia kerere. Hegeregere, August 1, 1997 ai, Russia ena niuspepa ta ese ladana hadikaia herevana ta ia halasia, ia gwau Witness oreana ese ena memba taudia ia doria ‘edia adavadia bona edia tama sina idia dadaraia, bema idia ese edia abidadama idia lalo-pararalaia lasi eiava idia abia dae lasi.’ Iehova ena Witness taudia idia diba namonamo taudia ibounai be idia diba unai be samania koikoi herevana. Baibel ia gwau Keristani taudia ese abidadama lasi ruma bese taudia idia lalokau henia bona idia matauraia be gau badana, bona Witness taudia ese unai sisiba idia badinaia toho. (1 Korinto 7:​12-​16; 1 Petero 3:​1-4) To, unai hereva idia printaia, bona duahia taudia momo idia hadibaia kerere. Ita idia gwauraia dika neganai, edena bamona iseda abidadama ena maoro ita hamomokania diba?

16, 17, bona rau 16 ai ia noho mauana. (a) Nega ta Gima Kohorona ese ia hahedinaraia televisen, reidio, eiava niuspepa dekenai idia halasia sivarai kereredia dainai dahaka ita karaia be namo? (b) Reana edena nega ai Iehova ena Witness taudia ese televisen, reidio, eiava niuspepa dekenai idia halasia ripoti dikadia dainai kara ta do idia karaia?

¹⁶ Unai neganai danu ‘hereva lasi be mai ena nega bona hereva be mai ena nega.’ Nega ta Gima Kohorona ia gwau: “Namona be inai ita laloa guna​—dahaka ia vara dainai unai sivarai idia torea, daika ese unai maumau herevana ia havaraia, bona ena ura be dahaka​—bena do ita diba, niuspepa o reidio o TV ai idia gwauraia herevadia koikoidia do ita laloa lasi be namo, eiava dala ta amo hereva momokani do ita hamomokania be namo.” Reana nega haida aonega karana be unai hereva ita laloa lasi, bena taunimanima ese unai koikoi herevadia do idia laloa noho lasi.

¹⁷ Reana nega ma ta be ‘hereva ena nega.’ Ena maduna ia huaia namonamo niusi torea tauna eiava niusi gwauraia tauna be reana sivarai kererena ia kamonai Iehova ena Witness taudia dekenai, bona reana do ia moale bema hereva momokani do ia dibaia. (“Samania Herevana Idia Hamaoromaoroa” mauana itaia.) Bema televisen, reidio, eiava niuspepa dekenai idia halasia hereva dikana ese taunimanima edia lalona ia veria bona iseda haroro gaukarana ia hadikaia, reana Watch Tower Society ena brens opesi taudia ese dala namona ai hereva momokani ena maoro idia hamomokania.b Hegeregere, reana lo elda taudia ese televisen program ta ai hereva momokani idia hahedinaraia diba, badina bema idia karaia lasi reana haida do idia laloa Iehova ena Witness taudia ese haere ta idia henia diba lasi. Unai bamona gaudia idia vara neganai, Witness taudia ta ta ese Watch Tower Society bona ia abia hidi taudia do idia kamonai henia.​—Heberu 13:17.

Taravatu Hegeregerena Sivarai Namona Ena Maoro Ita Hamomokania

18. (a) Dahaka dainai ita haroro totona taunimanima edia gavamani edia gwaumaoro ita abia eiava lasi ita laloa bada lasi? (b) Haroro gaukara idia taravatua neganai, dahaka ita karaia?

¹⁸ Dirava ena Basileia ena sivarai namona harorolaia gaukarana ita karaia ena gwaumaoro be guba amo ita abia. Iesu, ita dekenai unai gaukara ia henia tauna, ese ‘siahu ibounai guba dekenai bona tanobada dekenai ia abia vadaeni.’ (Mataio 28:18-​20; Filipi 2:​9-​11) Unai dainai, ita haroro totona taunimanima edia gavamani edia gwaumaoro ita abia eiava lasi ita laloa bada lasi. To, ita lalo-parara tomadiho ena ura kwalimu ese Basileia ena sivarai harorolaia gaukarana ia durua. Iseda tomadiho idia taravatua lasi tanodia dekenai, edia taravatu ita gaukaralaia unai ura kwalimu ita gimaia totona. Unai ura kwalimu ita abia lasi gabudiai, edia taravatu ia gwauraia daladia ita gaukaralaia unai ura kwalimu do ita abia totona. Ita tahua gauna be taunimanima edia noho dalana haidaua karana lasi, to ita ura ‘sivarai namona ena momokani ita gwauraia.’c​—Filipi 1:7.

19. (a) ‘Dirava ena gau be Dirava dekenai ita henia’ dainai reana dahaka do ia vara? (b) Dahaka ita karaia totona iseda lalona ita hadaia vadaeni?

¹⁹ Ita be Iehova ena Witness taudia bona ita abia dae Iehova be Guba bona Tanobada edia Lohia Badana. Iena taravatu be hereadaena. Mai iseda lalona ibounai ida tanobada gavamanidia ita kamonai henia, unai amo ‘Kaisara ena gau be Kaisara dekenai ita henia.’ To iseda maduna ginigunana​—‘Dirava ena gau be Dirava dekenai ita henia’​—ita huaia karana idia koua gaudia ibounai ita dadaraia. (Mataio 22:21) Ita lalo-parara momokani, unai ita karaia dainai tanobada besedia ese ita do “idia badu henia,” to ita abia dae unai be hahediba taudia ai ita lao ena davana. Hari iseda negai, Iehova ena Witness taudia idia karaia kota karadia edia sivarai ese idia hahedinaraia iseda abidadama ena maoro ita hamomokania totona iseda lalona ita hadaia vadaeni. Iehova ena heduru dainai, ita ese ‘sivarai namona ita gwauraia noho, bona unai gaukara ita hadokoa lasi.’​—Kara 5:​42.

[Footnotes]

Oi Laloatao, A?

◻ Taunimanima ese Iehova ena Witness taudia idia “badu henia” ena badina be dahaka?

◻ Iseda tomadiho idia abia dae lasi taudia be edena bamona ita laloa be namo?

◻ Dagedage taudia kara henia karana dekenai, Iesu ena haheitalai namona be dahaka?

◻ Ita idia hereva dika henia neganai, inai hakaua herevana, ‘hereva lasi be mai ena nega bona hereva be mai ena nega,’ be edena bamona ita badinaia be namo?

[Box on page 16]

Samania Herevana Idia Hamaoromaoroa

“Yacuiba, Bolivia ai, tomadiho orea ta ese dala ia karaia televisen steiseni ta dekenai muvini piksa ta do idia hahedinaraia totona, bona toana be hereva momokani negea taudia ese unai muvini piksa idia karaia. Unai program ese ia havaraia dika dainai, elda taudia idia laloa idia be televisen steiseni rua do idia vadivadi henia, bona moni do idia henia taunimanima dekenai vidio rua Jehovah’s Witnesses​—The Organization Behind the Name bona The Bible​—A Book of Fact and Prophecy idia hahedinaraia totona. Society ena vidio ia itaia murinai, reidio steiseni ena biaguna ta be hereva momokani idia negea taudia edia program ena hadikaia herevadia dainai ia badu, bona ia gwau reidio dekenai Iehova ena Witness taudia edia distrik hebouhebou ena hadibaia herevana do ia halasia mai davana lasi. Hebouhebou dekenai idia mai taudia be momo herea, bona lalo-momokani taudia momo ese henanadai namodia idia henia Witness taudia ese haroro gaukara lalonai edia ruma dekenai idia lao neganai.”—Lagani 1997 Yearbook of Jehovah’s Witnesses, rau 61-2.

[Picture on page 17]

Nega haida, Iesu ese taunimanima vairanai ia idia gwauraia dika taudia edia hereva ia hakoikoia