Ita Idia Badu Henia Kava
“Idia ese lau dekenai idia badu henia vadaeni, anina ta lasi.”—IOANE 15:25.
1, 2. (a) Keristani taudia idia gwauraidia dika neganai dahaka dainai haida idia daradara, to dahaka dainai unai hereva ita hoalaia lasi be namo? (b) Inai hereva “badu” ena anina idauidau amo, edena bamona badu karana be inai stadi lalonai do ita herevalaia? (Futnout itaia.)
IEHOVA ENA WITNES TAUDIA be idia hekwarahi Dirava ena Hereva ena hakaua herevadia hegeregerena idia noho totona. Unai dainai, tano momo lalonai, idia be mai edia ladana namona. To nega haida, taunimanima ese Iehova ena Witnes taudia idia laloa kerere. Hegeregere, St. Petersburg, Russia dekenai, gavamani tauna ta ia gwau: “Ai idia hamaoroa Iehova ena Witnes taudia be hehuni dalanai idia gaukara oreana, natudia idia bouboulaia bona sibodia idia hamasea noho taudia.” To, intenesenel hebouhebouna ta dainai unai gavamani tauna be Iehova ena Witnes taudia ida ia gaukara hebou murinai, ia gwau: “Hari lau be taunimanima namodia, mai edia moale lau itadia. . . . Idia ta ta idia lalokau henia bada bona idia be maino bona lalo-namo taudia.” Ma ia gwau: “Lau diba lasi dahaka dainai taunimanima ese unai bamona idia herevalaidia koikoi.”—1 Petero 3:16.
2 Dirava ena hesiai taudia be idia moale lasi bema taunimanima idia gwau idia be kara dika taudia, to unai kara dekenai idia hoa lasi. Iesu ese ena murinai idia raka taudia ia hamaorodia: “Tanobada taudia ese umui do idia badu henia, to umui diba vadaeni, idia ese lau dekenai idia badu henia guna vadaeni. . . . Unai dekena amo edia taravatu dekenai ia torea herevana ta ia momokani vadaeni, ia gwau, ‘Idia ese lau dekenai idia badu henia vadaeni, anina ta lasi.’ ”a (Ioane 15:18-20, 25; Salamo 35:19; 69:4) Guna ena hahediba taudia ia hamaorodia: “Taunimanima haida ese lau idia hadikaia, idia gwau lau be Belesebulo. . . . Idia ese biaguna inai bamona idia hadikaia dainai, umui danu, egu orea taudia, be do idia hadikaia, ani?” (Mataio 10:25) Keristani taudia idia lalo-parara, idia be Iesu ena murinai idia raka bona “satauro” idia abia dae dainai, unai bamona badu karana idia davaria.—Mataio 16:24.
3. Tomadiho momokani taudia dagedage henia karana be edena nega ai ia hamatamaia?
3 Tomadiho momokani taudia idia dagedage henia karana be idaunegai, “Abela, kara maoromaoro tauna” dekenai ia hamatamaia. (Mataio 23:34, 35) Ia be nega ta ta sibona ia vara gauna lasi. Iesu ia gwau ia murinai idia raka taudia be iena “ladana dainai taunimanima ibounai ese do idia badu henia.” (Mataio 10:22) Danu, aposetolo Paulo ia gwau Dirava ena hesiai taudia ibounai—anina be ita ta ta—do ita diba, taunimanima ese ita do idia dagedage henia. (2 Timoteo 3:12) Dahaka dainai unai bamona ia vara?
Ita Idia Badu Henia Kava Ena Badina
4. Baibel ese edena bamona ita idia badu henia kava ena badina ia hahedinaraia?
4 Dirava ena Hereva ese ia hahedinaraia, matamana negana amo, ita itaia diba lasi tauna ta ese dika ia havaraia noho. Kaino ese mai dagedage ida abidadama tauna ginigunana Abela ia alaia mase karana, mani oi laloa. Baibel ia gwau, Abela ena kakana, ala-ala tauna Kaino, be “dika tauna” Satani Diabolo, ena natuna. (1 Ioane 3:12, Buka Helağa) Kaino be Satani ena kara ia hahedinaraia, bona Diabolo ese Kaino ia gaukaralaia ena palani dikana ia hagugurua totona. Satani ese Iobu bona Iesu Keriso ia dagedage henia karadia be Baibel ese ia gwauraia hedinarai danu. (Iobu 1:12; 2:6, 7; Ioane 8:37, 44; 13:27) Apokalupo bukana ese Iesu ena murinai idia raka taudia dagedage henia karana ena badina ia hahedinaraia goevagoeva, ia gwau: “Satani ese umui haida dibura ruma dekenai do ia koua, umui do ia dibagania.” (Apokalupo 2:10) Oibe, haida ese Dirava ena taunimanima idia badu henia kava ena badina be Satani.
5. Dahaka dainai Satani ese tomadiho momokani taudia ia badu henia?
5 Dahaka dainai Satani ese tomadiho momokani taudia ia badu henia? Satani be sibona ena hairai ia laloa bada dainai, ia ese Iehova Dirava, “Noho Hanaihanai King” ia heai henia. (1 Timoteo 1:17; 3:6) Ia gwau Dirava ese taunimanima ia lohiaia dalana be auka, bona taunimanima be mai edia ura ida Iehova idia hesiai henia lasi, to sibona edia namo idia laloa dainai unai bamona idia karaia. Satani ia gwau bema taunimanima ia tohoa, idia ta ta ibounai ese Dirava hesiai henia karana do idia rakatania. (Genese 3:1-6; Iobu 1:6-12; 2:1-7) Satani ia gwau Iehova be dagedage, koikoi, bona gau namona ta do ia havaraia lasi. Satani ia ura ia hahedinaraia ia sibona be tanobada bona guba edia lohia tauna. Unai dainai, Dirava ena hesiai taudia ia badu henidia dikadika, badina ia ura taunimanima ese ia do idia tomadiho henia.—Mataio 4:8, 9.
6. (a) Edena dala ai Iehova ena lohia siahuna ena hepapahuahu be mai anina ita ta ta dekenai? (b) Ita gini goada totona, unai hepapahuahu ita lalo-pararalaia karana ese edena bamona ita ia durua? (Rau 10 ai ia noho mauana itaia.)
6 Oi itaia unai hepapahuahu be mai anina oi dekenai, ani? Oi be Iehova ena hesiai tauna, bona oi davaria vadaeni Dirava ena ura oi karaia be mai ena hekwarahi, to oi karaia neganai namo bada oi abia. Bema Iehova ena taravatu bona hakaua herevadia oi badinaia dainai emu noho dalana ia auka, reana hisihisi oi davaria be edena bamona? Bona toana be Ia amo hahenamo ta oi davaria lasi be edena bamona? Do oi gwau Iehova oi hesiai henia noho be anina lasi, a? Eiava Iehova oi lalokau henia bona iena kara hereadaedia oi abia dae momokani dainai, iena dala ibounai do oi badinaia noho, a? (Deuteronomi 10:12, 13) Iehova ese Satani ia koua lasi bona Satani ese ita dekenai hahetoho haida ia henia karana amo, Iehova ese ita ta ta dekenai dala ia kehoa Satani ita haere henia totona.—Aonega Herevadia 27:11.
‘Bema Idia Hadikaia Umui’
7. Diabolo be dahaka kara ta ia gaukaralaia Iehova amo ita ia veria oho totona?
7 Hari, ita be Satani ese ena kahana ia hagoadaia totona ia gaukaralaia koikoi karana ta, do ita tahua namonamo—koikoi hereva dikadia. Iesu ese Satani ia gwauraia “koikoi ibounai edia tamana.” (Ioane 8:44) Inai ladana Diabolo ena anina be “Ladana Hadikaia Tauna,” bona ia hahedinaraia ia be Dirava, ena hereva namodia, bona ena ladana helagana ia hadikaia tauna badana. Diabolo ese hadikaia hereva bona koikoi herevadia amo Iehova ena lohia siahuna ia hepapahuahulaia, bona Dirava ena abidadama hesiai taudia dekenai unai dala tamona ia gaukaralaia danu. Unai Witnes taudia latanai hadikaia herevadia momo ia gwauraia dainai, idia ese hahetoho idia haheaukalaia be auka.
8. Satani ese edena bamona Iobu ia hadikaia, bona dahaka ia vara?
8 Iobu, ena ladana anina be “Idia Inai Henia Tauna” dekenai ia vara gauna mani ita laloa. Satani ese Iobu ena animal, ena natudia, ena tauanina ena goada ia hadikaia sibona lasi, to Iobu be kara dika ta ia karaia dainai Dirava ese ia panisia lalohadaina ia havaraia danu. Ena be guna Iobu be idia matauraia bada, to hari iena varavara bona turana korikoridia ese ia idia ura henia lasi. (Iobu 19:13-19; 29:1, 2, 7-11) Danu, Satani ese durua koikoi taudia edia ‘hereva amo Iobu ia hahisia,’ guna idia gwau ia be kerere badana ta ia karaia bona gabeai idia gwau ia be kara dika tauna. (Iobu 4:6-9; 19:2; 22:5-10) Unai ese Iobu ia hamanokaia momokani!
9. Satani ese edena dala ai ia ura ia hahedinaraia Iesu be kara dika tauna?
9 Dirava ena Natuna be Iehova ena lohia siahuna ia durua tauna badana dainai, Satani ese ia dagedage henia bada. Iesu be tanobada dekenai ia mai neganai, Satani ia ura lauma dalanai Iesu ena ladana ia hadikaia, Iobu dekenai ia karaia hegeregerena, bona ia ura ia hahedinaraia Iesu be kara dika tauna. (Isaia 53:2-4; Ioane 9:24) Taunimanima idia gwau Iesu be inuinu kekero tauna, aniani momo tauna bona ‘lauma dikana be iena lalona dekenai ia noho.’ (Mataio 11:18; 19; Ioane 7:20; 8:48; 10:20) Mai koikoi ida idia gwau Iesu ese Dirava ia gwauraia dika. (Mataio 9:2, 3; 26:63-66; Ioane 10:33-36) Iesu ia lalohisihisi badina ia diba unai ese iena Tamana ena ladana ia hadikaia. (Luka 22:41-44) Dokonai, Iesu be taravatu utua tauna bamona idia hamasea. (Mataio 27:38-44) Iesu ia gini goada dainai, “kara dika taudia ese mai badu danu ia idia dagedage henia” karana ia haheaukalaia.—Heberu 12:2, 3.
10. Hari inai negai, edena dala ai Satani ese horoa orena taudia ia dagedage henidia noho?
10 Hari inai negai, Diabolo ese Keriso ena murinai idia raka horoa taudia ia dagedage henidia bada. Baibel ia gwau, Satani be “Dirava ena vairanai, dina bona hanuaboi . . . [Keriso] ena varavara ia samania” tauna. (Apokalupo 12:9, 10) Satani be guba amo idia negea diho bona tanobada dekenai ia noho negana amo, ia ura bada ia hahedinaraia Keriso ena tadikaka be kara dika rohoroho taudia. (1 Korinto 4:13) Aposetolo taudia edia nega bamona, tano haida dekenai, haida idia gwau, horoa taudia be tomadiho orea dikana ta. (Kara 24:5, 14; 28:22) Inai hereva ena matamanai ita herevalaia bamona, hereva koikoi amo edia ladana idia hadikaia. Ena be Keriso ena horoa tadikaka be ‘haida ese idia hanamoa, haida ese idia hahemaraia, haida idia gwau edia kara be dika, haida idia gwau idia be kara namo taudia,’ to edia turadia “mamoe idaudia” ida mai manau danu ‘Dirava ena taravatu idia badinaia momokani, bona Iesu ena hereva momokani idia gwauraia hedinarai’ noho.—2 Korinto 6:8; Ioane 10:16; Apokalupo 12:17.
11, 12. (a) Haida ese Keristani taudia idia hadikaia ena badina be dahaka? (b) Ena be kerere ta ia karaia lasi, to edena dala ai Keristani tauna be ena abidadama dainai hisihisi ia davaria?
11 Momokani, Dirava ena hesiai taudia ta ta ese idia davaria dika ibounai be “kara maoromaoro idia karaia” dainai sibona lasi. (Mataio 5:10) Reana, hekwakwanai haida idia vara badina ita be goevadae lasi taudia. ‘Bema ita kara dika dainai ita idia dadabaia bona ita haheauka,’ namo ta do ia vara lasi. To, bema Keristani tauna be “Dirava ia badinaia dainai hisihisi ia abia, Dirava ese unai tau do ia hanamoa.” (1 Petero 2:19, 20) Edena dala ai unai ia vara diba?
12 Haida idia dagedage henidia badina mase neganai idia karaia kastom karadia, Baibel ese ia taravatua karadia idia dadaraia. (Deuteronomi 14:1) Ma haida be Witnes memero kekeni dekenai hereva dikadia idia gwauraia hanaihanai, badina idia ese Iehova ena kara maoromaoro taravatudia idia badinaia. (1 Petero 4:4) Keristani tama sina haida be edia natudia edia gorere hanamoa totona, rara gaukaralaia lasi medikol daladia idia tahua dainai, haida idia gwau idia be “lalokau lasi” eiava “dagedage” tama sina. (Kara 15:29) Keristani taudia be Iehova ena hesiai taudia ai idia lao dainai, edia varavara bona dekena taudia ese idia dadaraidia. (Mataio 10:34-37) Idia ibounai ese peroveta taudia bona Iesu ena haheitalai idia tohotohoa, ena be kerere ta idia karaia lasi, to hisihisi idia haheaukalaia.—Mataio 5:11, 12; Iamesi 5:10; 1 Petero 2:21.
Oi Idia Hadikaia Neganai Haheauka Noho
13. Ita idia hadikaia neganai, dahaka ese ita ia durua diba lauma dalanai ita gini goada totona?
13 Iseda abidadama dainai ita idia hadikaia neganai, peroveta tauna Ieremia bamona, reana ita manoka diba bona ita mamia Dirava ita hesiai henia noho diba lasi. (Ieremia 20:7-9) Lauma dalanai ita gini goada totona, dahaka ese ita ia durua diba? Namona be Iehova ena lalohadai unai gauna dekenai ita tahua. Ia laloa hahetoho lalonai idia gini goada taudia be ma haida ese idia hadikadia taudia sibona lasi, to idia be kwalimu taudia. (Roma 8:37) Diabolo ese idia dekenai dika idauidau ia mailaia, to Iehova ena lohia siahuna idia badinaia tatau bona hahine, hegeregere Abela, Iobu, Iesu ena sinana Maria, bona guna abidadama goada taudia, bona hari inai negai iseda tadikaka bona taihu danu be emu lalona ena matana ai mani oi itaia. (Heberu 11:35-37; 12:1) Edia gini goada karana oi lalohadailaia. Idia gini goada taudia momo herea ese ita idia boiria, idia ida tanobada idia halusia kwalimu taudia edia gabu ai ita gini totona.—1 Ioane 5:4.
14. Edena dala ai guriguri goadagoada karana ese ita ia hagoadaia diba, ita gini goada totona?
14 Bema “iseda lalona ia hekwarahi momo neganai,” Iehova dekenai ita guriguri goada diba, bona Ia ese ita dekenai moale bona goada do ia henia. (Salamo 50:15; 94:19) Ia ese aonega do ia henia ita dekenai, unai amo ita davaria hahetoho ita haheaukalaia diba bona ita ia durua Iehova ena lohia siahuna do ita laloatao noho, badina unai hepapahuahu dainai iena hesiai taudia be haida ese idia badu henidia kava. (Iamesi 1:5) Bona Iehova ese ita dekenai ‘ena maino. . . iseda laloa gaudia, bona iseda kudouna idia mamia gaudia ibounai do ia gimaia namonamo’ mainona do ia henia. (Filipi 4:6, 7) Dirava ese ia henia mainona ese ita do ia durua nega aukadia lalonai do ita manau bona gini goada, bona ita daradara eiava gari lasi totona. Iena lauma helaga amo Iehova ese ita ia hagoadaia bona ia koua lasi hahetoho ita haheaukalaia diba.—1 Korinto 10:13.
15. Dika ita davaria neganai, dahaka ese ita ia durua diba ita badu lasi totona?
15 Dahaka ese ita ia durua diba ita idia inai henia kava taudia ita badu henidia lasi totona? Laloatao, iseda inai taudia badadia be Satani bona ena demoni. (Efeso 6:12) Ena be taunimanima haida idia diba bona mai edia ura ida ita idia dagedage henia, to momo be ita idia badu henia kava eiava haida ese idia doria dainai unai bamona idia karaia. (Daniela 6:4-16; 1 Timoteo 1:12, 13) Iehova ia ura “taunimanima ibounai ese mauri do idia davaria bona hereva momokani do idia diba.” (1 Timoteo 2:4) Oibe, guna ita idia badu henia taudia haida be iseda kara namo dainai hari iseda Keristani tadikaka ai idia lao. (1 Petero 2:12) Danu, ita ese Iakobo ena natuna Iosepa ena kara amo gau ta ita dibaia diba. Ena be iena kakadia ese ia idia kara dika henia, to Iosepa be idia ia badu henia lasi. Dahaka dainai? Badina ia diba Iehova ese idia vara gaudia ia biagua, unai amo Iena ura ia hagugurua diba. (Genese 45:4-8) Unai hegeregerena, Iehova ese ita davaria dika be iena ladana hanamoa totona ia haidaua diba.—1 Petero 4:16.
16, 17. Dahaka dainai ita idia badu henia taudia ese haroro gaukara idia koua toho neganai, ita lalo-hekwarahi lasi be namo?
16 Bema nega sisina lalonai ita idia badu henia taudia ese sivarai namona harorolaia dalana idia koua toho, namona be ita lalo-hekwarahi lasi. Tanobada hegegemadai haroro gaukarana amo Iehova ese hari tanobada besedia ia hamarerea noho, bona kohu namodia idia vareai noho. (Hagai 2:7) Mamoe Naria Tauna Namona, Iesu Keriso, ia gwau: “Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka. Mauri hanaihanai danu lau henia idia dekenai, . . . tau ta ia hegeregere lasi idia do ia kokia lauegu Tamana dekena amo.” (Ioane 10:27-29) Aneru helagadia danu be lauma dalanai ita karaia taunimanima gogoa gaukarana idia karaia. (Mataio 13:39, 41; Apokalupo 14:6, 7) Unai dainai, ita idia badu henia taudia edia hereva ta eiava kara ta ese Dirava ena ura do ia koua diba lasi.—Isaia 54:17; Kara 5:38, 39.
17 Nega momo, ita idia badu henia taudia edia kara dika amo gau namona ta ia vara. Africa tanona ta dekenai, Iehova ena Witnes taudia dekenai koikoi hereva dikadia momo idia gwauraia, hegeregere idia gwau idia be Diabolo tomadiho henia taudia. Unai dainai, Witnes taudia be Grace ena ruma dekenai idia haroro neganai, ia be ruma ena murimuri kahana ia heau lao bona ia komu ela bona idia raka oho. Dina ta ai, iena dubu ena pasto tauna ese iseda buka ta ia hahedinaraia bona idia helai taudia ibounai ia hamaorodia unai buka do idia duahia lasi, badina unai buka ese do ia veridia edia dubu idia rakatania totona. Grace be unai hereva ia laloa momo. Witnes taudia be ena ruma dekenai idia vadivadi lou neganai, ia komu lasi, to idia danu ia herevahereva bona unai buka ta ia abia. Baibel stadi ia hamatamaia, bena lagani 1996 ai bapatiso ia abia. Hari, Grace be ena nega ia gaukaralaia ma haida ia durudia, Iehova ena Witnes taudia hadikaia hereva koikoidia idia dadaraia totona.
Hari Oiemu Abidadama Hagoadaia
18. Dahaka dainai hahetoho badadia idia do vara lasi neganai iseda abidadama ita hagoadaia be namo, bona edena bamona unai ita karaia diba?
18 Satani be ita diba lasi negana ta ai ita ia dagedage henia kava diba dainai, hari iseda abidadama ita hagoadaia be gau badana. Edena bamona unai ita karaia diba? Iehova ena taunimanima idia dagedage henia tanona ena ripoti ta ia gwau: “Gau ta ia hedinarai goevagoeva: Lauma gaudia idia manadalaia bona Baibel ena hereva momokani idia laloa bada taudia ese hahetoho idia davaria neganai idia gini goada. To ‘nega namodia’ ai hebou idia reaia, haroro gaukara idia karaia hanaihanai lasi, bona hekwakwanai maragidia lalonai idia moru taudia be ‘lahi’ bamona hahetoho lalodiai idia moru.” (2 Timoteo 4:2) Bema oi itaia oi sibona ese kara haida oi hanamoa be namo, namona be unai oi karaia haraga.—Salamo 119:60.
19. Dirava ena hesiai taudia be haida ese idia badu henia kava to idia gini goada dainai, dahaka idia hamomokania?
19 Satani ese tomadiho momokani taudia ia inai henidia dikadika, to idia gini goada karana ese ia hamomokania Iehova ia lohia be maoro bona namo. Edia abidadama karana ese Dirava ena kudouna ia hamoalea. Ena be taunimanima ese idia gwauraidia dika, tanobada bona guba ataiai ia noho tauna “idia gwauraia edia Dirava, . . . be idia dainai ia hemarai lasi.” Oibe, unai bamona abidadama taudia ibounai dekenai, inai bamona ita gwau diba: “Tanobada noho taudia edia kara be hegeregere lasi unai abidadama taudia be edia huanai do idia noho.”—Heberu 11:16, 38.
[Footnote]
a Baibel lalonai inai hereva “badu” ena anina be momo. Siri haida lalonai, ena anina be, ta ura henia maragi karana. (Deuteronomi 21:15, 16) “Badu” ena anina ma ta be, ta ese ma ta ia ura henia lasi bona unai tauna dekenai dika ia havaraia lasi to ia dadaraia sibona. To, “badu” ena anina ma ta be, ta ese nega daudau lalonai ta ia dagedage henia. Inai stadi lalonai ita be unai bamona badu karana do ita herevalaia.
Anina Oi Gwauraia Diba, A?
• Dahaka ese tomadiho momokani taudia badu henia kava karana ia havaraia?
• Iobu bona Iesu edia gini goada karana ia hamanokaia totona, Satani be edena dala ia gaukaralaia?
• Iehova be edena bamona ita ia hagoadaia Satani ena badu karadia ita haheaukalaia totona?
[Box/Picture on page 16]
Hepapahuahu Ena Badina Korikorina Idia Diba
Lagani 50 mai kahana lalonai Basileia ena sivarai harorolaia gaukarana Ukraine dekenai idia taravatua, unuseniai Iehova ena Witnes tauna ta, ia gwau: “Iehova ena Witnes taudia ese idia davaria hekwakwanai be ma haida idia hetura henia dalana dekenai lasi. . . . Gavamani taudia momo be edia gaukara sibona idia karaia noho. Gavamani idia haidaua neganai, gaukara taudia edia badinaia karana idia haidaua danu, to ai be emai kara ai haidaua lasi. Ai lalo-parara emai hekwakwanai edia badina korikorina be Baibel ese ia hahedinaraia.
“Ai diba taunimanima ese ai idia dagedage henia be mai ena badina. Eden umana dekenai ia vara hepapahuahuna—Dirava be mai ena maoro ia lohia totona—ai lalo-pararalaia ese ai ia durua bena ai haheauka diba. . . . Taunimanima edia namo sibona dainai lasi to tanobada bona guba ena Lohia Tauna ena namo ai laloa bada dainai ai gini auka. Unai hepapahuahu ena anina ai lalo-pararalaia goevagoeva. Unai ese ai ia hagoadaia bona ai ia durua hisihisi bada negadiai ai gini goada totona.”
[Picture]
Victor Popovych, 1970 ai pulisi ese idia abia
[Picture on page 7]
Iesu ena ladana idia hadikaia karana be daika ese ia havaraia?
[Pictures on page 9]
Iobu, Maria bona inai negai Dirava ena hesiai taudia, hegeregere Stanley Jones ese Iehova ena lohia siahuna idia abia isi