Dirava Kamonai Henia Dalana Tomadiho Dainai Ia Parara Famili Lalonai

“HISIHISI ese egu tauanina idia botaia ena hisihisi ia hanaia. . . . Egu mamina be hegeregere egu tauanina ibounai ia bero, to ta ese ia itaia diba lasi.” “Nega haida egu mauri lau hesikulaia. . . eiava lau laloa ruma do lau rakatania bona lau giroa lou lasi.” “Nega haida, Lau lalohadai maoromaoro be auka.”

Unai lalohisihisi herevadia ese helaro lasi bona daradoko hemami idia hahedinaraia. Unai hereva idia gwauraia taudia be edia adavadia eiava edia ruma bese taudia ese edia hereva amo idia hadikadia​—⁠idia gwau-henidia, idia hagaridia toho, eiava idia dadaraidia bena idia hereva henidia lasi. Unai sibona lasi, to edia adavadia eiava ruma bese taudia ese idia botadia danu. Dahaka dainai unai taudia idia kara dika henia? Edia tomadiho be idau dainai. Tomadiho dalanai ia parara ruma bese lalonai unai bamona ia vara neganai, Iehova tomadiho henia be mai hekwarahi bada. To unai bamona idia hadikaia Keristani taudia momo ese Dirava idia do badinaia noho.

To, unai bamona lalohisihisi bona daradoko be tomadiho dalanai idia parara ruma bese haida lalonai idia vara lasi dainai ita moale. To unai kara be ia vara momokani. Oiemu ruma bese be atai ai gwauraia bamona, a? Vadaeni, reana oiemu adavana eiava emu tama sina oi matauraia be auka. Bema oi be hahine ta eiava natu ta bona oi dekenai unai bamona ia vara, emu tomadiho dainai ia parara ruma besena lalonai, Dirava kamonai henia karana be edena bamona oi hahedinaraia goevagoeva diba? Haida ese edena bamona oi idia durua diba? Bona Dirava be dahaka ia laloa unai kara dekenai?

Dahaka Dainai Dirava Kamonai Henia Karana Ia Auka?

Inai tanobada ena sibona laloa bada karana bona lalokau lasi karana be emu ura kereredia danu idia gaukara hebou neganai, Dirava oi kamonai henia be mai ena hekwarahi bada. Satani be unai ia diba bona ia ura oi ia hamorua. Nega momo ia ese Dirava ena taravatu idia laloa maragi eiava idia laloa lasi famili taudia ia gaukaralaidia. Oi ese tomadiho bona kara maoromaoro oi laloa bada dainai, nega momo emu lalohadai be emu famili taudia edia amo idia idau. Unai anina be kara idauidau dekenai edia lalohadai bona oiemu be idia idau. (1 Petero 4:⁠4) Oi do idia doria goadagoada emu Keristani kara oi rakatania totona, badina oi ese inai oda hereva oi badinaia dainai: “Dibura karadia, idia be anina lasi karadia, dekena amo do umui raka siri.” (Efeso 5:11) Idia laloa emu kara iboudiai be maoro lasi bona unai hekwakwanai idia vara emu tomadiho dainai. Sina ta be ena natudia idia gorere dainai ena adavana ia noia ia durua totona neganai, ena adavana ia haere ia gwau, “Oi be mai emu nega emu tomadiho totona; oi do lau durua ena badina ta be lasi.” Unai bamona hereva dainai Dirava kamonai henia karana be mai ena hekwarahi.

Reana nega haida Baibel ena taravatu idia utua lasi gaudia dainai umui heai. To oi diba oi be unai ruma bese tauna ta bona unai dainai oi be mai emu maduna. Connie ia gwau: “Egu tamana ese ai ia kara dika henia dalana lau laloa neganai lau lalohisihisi bada, badina lau diba ia laloa ia sibona ia noho. Nega momo sibona egu lalonai dekenai lau gwau egu tamana ena kara dika lau badulaia lasi be namo. Sibona egu lalona dekenai lau gwau unai bamona ia karaia o emai tomadiho ia ura henia lasi be mai ena badina. Satani be inai tanobada ia lohiaia.” Susan, ena adavana be murimuri tauna, ia gwau: “Guna, lau ura egu adavana lau rakatania​—⁠to hari lau ura lasi unai lau karaia. Lau diba Satani ese ia gaukaralaia lau ia tohoa totona.”

Reana toana be, Satani ese oi ia hamorua toho hanaihanai. Dina haida idia hanaia vadaeni, emu adavana ese oi ia hereva henia lasi. Emu mauri ena mamina be sibona oi noho bamona, bona oi lalohisihisi. Unai ese oiemu lalo-goada ia haorea bona Dirava oi kamonai henia karana ia tohoa. Natudia danu be idia lalohisihisi bona edia tauanina idia manoka. Famili ta lalonai, ena be edia tama sina ese idia koudia toho, to natu toi, Dirava ena hesiai taudia, ese Keristani heboudia idia lao henia hanaihanai. Hari idia ta be ful-taim hesiai gaukara ia karaia, bona ia gwau: “Ai daradoko bona ai hesiku; hanuaboi ai ai mahuta lasi; ai lalohisihisi bada.”

Dirava Ena Ura Oi Dekenai be Dahaka?

Dirava kamonai henia karana be gau ginigunana, bona namona be emu tau ena kwarana dagi oi matauraia Iehova ena hahegani hegeregerena. (Kara 5:29) Reana do ia auka, to oi karaia diba. Nega ibounai Dirava oi noia oi do ia durua. Ia ura oi ese “lauma bona momokani amo” do oi tomadiho henia bona ena hahegani do oi kamonai bona badinaia. (Ioane 4:24) Dirava ena Hereva amo ia mai dibana ese kudou namona ia hahonua neganai, Dirava kamonai henia karana ia havaraia. Ena be reana oiemu mauri lalonai gau haida do idia idau, to Iehova bona ena Hereva be idia idau lasi. (Malaki 3:6; Iamesi 1:17) Iehova ese tau dekenai kwara dagina ia henia. Herevana tau be Keriso ena kwarana dagi ia abia dae eiava lasi, to ia be do hahine ena kwarana. (1 Korinto 11:⁠3) Bema emu tau ese oi ia hereva dika henia loulou bona ia hahemaraia loulou, ena be unai bamona mauri be ia auka, to hadibaia tauna Iamesi ia gwau: “Dirava dekena amo [ia mai] aonega . . . [be] laloa manada bona gado namo.” (Iamesi 3:17) Emu tau ena kwara dagina ena anina oi lalo-pararalaia bona oi abia dae totona, Dirava ena lauma helaga ena huahua, lalokau ese oi do ia durua.​—⁠Galatia 5:​22, 23.

Dirava ese siahu ia henia tauna bema oi lalokau henia neganai, oi kamonai henia be auka lasi. Efeso 5:33 ena sisiba ia gwau: “Tau ese iena adavana do ia lalokau henia, ia sibona ia lalokau henia hegeregerena. Hahine danu ese iena adavana do ia matauraia.”

Mani Iesu oi laloa. Idia hereva dika henia bona idia botaia, to ia ese tau ta ia hereva dika henia lasi. Ia ese kara dika ta ia karaia lasi. (1 Petero 2:​22, 23) Ia dekenai idia vara dika bona hemarai karadia ia haheaukalaia totona, Iesu ia boga auka momokani bona ena Tamana, Iehova ia lalokau henia bada be namo. Badina be, lalokau be “metau ibounai lalonai ia gini goada noho.”​—⁠1 Korinto 13:​4-8.

Paulo ese ia ida ia gaukara hebou merona Timoteo ia hereva henia, bona ita ia hereva henia danu, ia gwau: “Dirava ese gari laumana ita dekenai ia henia lasi, to siahu bona lalokau bona aonega Laumana ita dekenai ia henia vadaeni.” (2 Timoteo 1:⁠7) Reana nega haida toana be oi haheauka diba lasi, to Iehova bona Iesu Keriso oi lalokau henidia bada dainai, unai ese oi do ia durua Dirava oi kamonai henia noho totona. Lalohadai maoromaorodia ese oi do idia durua Iehova bona Iesu Keriso do oi badinaia dalana oi laloa bada noho totona.​—⁠Filipi 3:​8-11 itaia.

Mai Kwalimu ida Dirava Idia Kamonai Henia Adavadia

Nega haida do oi naria daudau herea bena do oi itaia Iehova ese oiemu hekwakwanai edena bamona do ia hanamoa. To Iehova ena imana be ia kwadogi lasi. Dirava kamonai henia karana dekenai ia kwalimu noho hahinena ta ia gwau: “Iehova ese oi ia henia hahenamo karadia be nega ibounai oi karaia​—⁠hebou maragidia bona hebouhebou badadia dekenai oi lao, oi stadi, oi lao haroro bona oi guriguri henia.” Oi karaia diba karadia sibodia lasi, to emu hekwarahi unai gaudia karaia totona be Iehova ese ia hanamoa danu. Aposetolo Paulo be 2 Korinto 4:17 dekenai ia gwau, ita ‘abia noho hisihisi be do idia noho nega daudau lasi; idia ore murinai, Dirava ese ita do ia hanamoa bada herea ela bona hanaihanai.’ Unai oi lalohadailaia. Oi do ia hagoadaia. Hahine ta ia gwau: “Egu ruma bese ena mauri ia namo lasi, bona nega haida Iehova be lau dekenai ia moale eiava lasi be lau daradaralaia. To lau diba Iehova ese lau ia hanamoa, badina unai hekwarahi amo lau goada, egu adavana lau hereaia. Ita diba Iehova ese iseda kara ia moalelaia neganai, hekwarahi ita haheaukalaia be mai anina bada.”

Iehova ia gwauhamata ia ese oi do ia naria dainai oi haheaukalaia diba lasi hetohona do oi davaria lasi. Oi abidadama henia. Iehova ena diba ese oiemu diba ia hanaia, bona oi ia diba bada, to oi be sibona oi diba maragi. (Roma 8:​35-39; 11:33; 1 Korinto 10:13) Hekwarahi lalonai Iehova guriguri henia karana ese oi do ia durua. Bema oi diba lasi dahaka do oi karaia be namo, eiava hekwakwanai ta be edena bamona do oi hamaoromaoroa be namo neganai, oi noia ena lauma helaga amo oi do ia hakaua. (Aonega Herevadia 3:5; 1 Petero 3:12) Emu ruma bese ena kwarana tauna oi kamonai henia totona, nega ibounai Iehova oi noia oi do ia durua do oi haheauka, emu tauanina ena ura do oi koua bona do oi manau totona. Salamo torea tauna ia gwau: “Lohiabada be egu Nadi Badana. Ia be egu magu, bona egu hamauria Tauna.” (Salamo 18:⁠2) Tomadiho dalanai idia parara famili lalonai idia noho taudia ese unai do idia laloatao neganai, do ia hagoadadia.

Mai anina bada gauna be, emu headava maurina lalonai moale oi havaraia toho goadagoada. Oibe, Iesu ia diba sivarai namona ese taunimanima do ia hapararadia. To oi guriguri, unai be emu lalohadai eiava emu kara dainai ia vara garina. (Mataio 10:​35, 36) Gaukara hebou lalohadaina ese headava mauri ena hekwakwanai momo ia hamaragidia. Ena be oi sibona ese unai lalohadai maorona oi hahedinaraia, to unai ese badu bona hepapahuahu do ia koua. Haheauka bona lalokau be mai anina bada. Oi “heai lasi” bona oi “goada bona oi haheauka.”​—⁠2 Timoteo 2:24.

Aposetolo Paulo ese ‘taunimanima idauidau ibounai edia mauri dalana ia abia dae, dala idauidau ibounai dekenai amo.’ (1 Korinto 9:22) Unai hegeregerena, ena be oiemu Keristani maduna oi dadaraia lasi, to reana namona be nega haida nega bada oi atoa emu adavana bona emu famili taudia ida do umui noho hebou totona. Emu mauri ibounai lalonai ia ida do oi noho hebou totona oi abia hidi tauna dekenai nega bada oi henia be namo. Keristani hebogahisina oi hahedinaraia. Unai be Dirava kamonai henia dalana.

Dirava ia gari henia bona ena adavana ia kamonai henia hahinena be ia manau bona ia hebogahisi neganai, Dirava ia kamonai henia be auka lasi. (Efeso 5:​22, 23) Mai lalo-namo bona “gado namo” ida oi hereva neganai, do umui hepapahuahu momo lasi.​—⁠Kolose 4:6; Aonega Herevadia 15:⁠1.

Dirava amo ia mai aonegana ese oi do ia durua, umui hepapahuahulaia gaudia oi hamaoromaoroa totona bona hahegoada hereva namodia amo maino oi karaia totona: namo lasi mai “badu” danu oi mahuta. (Efeso 4:​26, 29, 31) Unai ia vara totona oi manau be namo. Iehova dekenai oi tabekau oi goada totona. Keristani hahine ta be mai manau ida ia gwau: “Lau guriguri goadagoada murinai, Iehova ena lauma ese lau ia durua egu adavana lau rosia totona.” Dirava ena Hereva ena sisiba ia gwau: “Tau ta ese umui dekenai ia kara dika henia neganai, iena kara dika davana do umui henia lasi. . . . Umui ese kara namo dekena amo dika do umui halusia.” (Roma 12:​17-21) Unai be aonega sisiba bona Dirava kamonai henia dalana.

Dirava Idia Kamonai Henia Natudia

Umui memero kekeni, tomadiho dalanai idia parara famili lalonai umui noho, Iehova ena sisiba umui dekenai be inai: “Memero, kekeni e, nega ibounai emui tamana bona sinana do umui kamonai henia, badina inai kara be Dirava ia ura henia.” (Kolose 3:20) Oi itaia, Lohiabada Iesu Keriso ia herevalaia danu. Unai dainai tama sina kamonai henidia karana be mai ena hetoana. Unai dala ai Keristani memero kekeni danu ese Kara 5:29 ena sisiba hereva idia badinaia danu; ia gwau: “Dirava ai kamonai henia be namo, taunimanima ai kamonai henia be dika.” Nega haida oi ese Baibel ena hereva hegeregerena emu lalona do oi hadaia. Reana oi do idia panisia, badina tomadiho koikoi karana ta oi karaia lasi dainai. Unai oi laloa neganai, oi moale lasi, to hisihisi do oi abia neganai emu lalona do ia goada diba bona do oi moale diba danu, badina be oi diba Dirava vairanai oi kara maoromaoro dainai oi abia.​—⁠1 Petero 2:​19, 20.

Oiemu lalohadai be Baibel ena taravatu hegeregerena dainai, reana oiemu tama sina edia lalohadai amo ia idau. To idia be oiemu inai taudia lasi, edia lalohadai be idau dainai. Ena be idia be Iehova ena gwauhamata hesiai taudia lasi, to oi matauraidia be namo. (Efeso 6:⁠2) Solomona ia gwau: “Oiemu tamana, ia ese oi ia havaraia tauna, do oi kamonai henia, bona oiemu sinana ia buruka neganai do oi matauraia.” (Aonega Herevadia 23:22) Idia lalohisihisi oi ese tomadiho idauna ta oi badinaia dainai, bona edia lalohisihisi oi lalo-pararalaia toho be namo. Oi be idia ida umui herevahereva, bona “emu manau bona manada karana” idia vairanai oi hahedinaraia. (Filipi 4:⁠5) Oi lalohisihisilaia gaudia bona oi laloa bada gaudia oi hamaorodia. Dirava ena taravatu oi badinadia goadagoada, to bema ia hegeregere, “maino karaia daladia [oi] tahua dala idauidau ibounai dekenai, taunimanima danu mai maino danu do [oi] noho totona.” (Roma 12:18) Iehova ese ia itaia, oi ese emu tama sina oi kamonai henidia neganai, oi hahedinaraia oi ura Basileia ena siahu henunai do oi noho.

Haida ese Dahaka Idia Karaia Diba

Tomadiho dainai idia parara ruma bese lalonai idia noho Keristani taudia be edia tomadiho oreana taudia ese idia durudia bona idia lalodia be namo. Hahine ta ena hereva ese unai ia hahedinaraia, ia gwau: “Lau daradoko bona lau laloa lau be dala lasi, badina ma haida ese idia hanamoa diba lasi, bona lau haidaua totona gau ta lau karaia diba lasi. Lau diba lasi dahaka do ia vara, to Iehova lau naria noho, egu ruma bese lalonai ena ura do ia karaia.”

Keristani hebou dekenai oi be tadikaka bona taihu ida umui hebamo ese oi ia hagoadaia diba. Hari hahine ia gwau ena mauri be “mai ena kahana rua. Ta be taravatu dainai ia noholaia bona ta be ia noholaia mai ena ura ida.” Tadikaka bona taihu edia lalokau ese unai bamona idia lalohisihisi taudia ia durudia, nega idauidau ibounai lalonai idia haheauka bona Dirava ena hesiai idia lao henia totona. Emu guriguri lalonai oi herevalaidia. (Efeso 1:16) Nega ibounai, hahegoada hereva namodia amo oi hereva henidia bona oi durudia. (1 Tesalonika 5:14) Bema ia hegeregere bona bema idia mai diba, oi boiridia haroro gaukara lalonai eiava moale karadia dekenai oi do idia bamoa.

Dirava Kamonai Henia Karana amo Oi Abia Hahenamo Bona Heduru

Tomadiho ese ia hapararaia famili lalonai, Dirava oi kamonai henia dainai oi abia heduru bona hahenamo be dina iboudiai oi lalodia. Dirava oi kamonai henia noho totona oi gaukara goada. Oi “manoka lasi.” (Galatia 6:⁠9) Nega dikadia bona kara kereredia idia haheaukalaia neganai, “bema kerere lasi tauna ta ese Dirava ia badinaia dainai hisihisi ia abia, Dirava ese unai tau do ia hanamoa.” (1 Petero 2:​19, 20) Emu ruma bese ena kwarana oi kamonai henia, to Iehova ena taravatu bona hahegani maoromaorodia oi utua lasi. Unai ese ia hahedinaraia oi be Iehova ese ia gwauraia dalana oi badinaia. Reana, emu kara maoromaoro amo oi ese emu adavana, emu natudia, eiava emu tama sina do oi hamauridia.​—⁠1 Korinto 7:16; 1 Petero 3:⁠1.

Tomadiho dalanai ia parara famili ena ura karadia oi karaia neganai, oi laloaboio lasi, Iehova Dirava bona Iesu Keriso do oi kara maoromaoro henidia noho be mai anina bada. Reana nega momo emu famili taudia edia hereva oi kamonai be kerere lasi, to bema emu kara maoromaoro oi negea, oi ese gau ibounai oi haboioa unai, oiemu mauri danu oi haboioa. Aposetolo Paulo ia gwau: “Dirava ese . . . inai dina dokodia neganai. . . iena Natuna dekena amo ita ia hereva henia. Iena Natuna dekena amo Dirava ese tanobada ibounai ia karaia. Bona Dirava ese iena Natuna ia abia hidi, vadaeni inai nega dokona neganai, gau ibounai be ia ese ia biagua noho.” Unai ‘hahemauri karana badana’ bema oi lalo-pararalaia, unai ese oi do ia hagoadaia Dirava do oi kamonai henia totona.​—⁠Heberu 1:​1, 2; 2:⁠3.

Bema Dirava oi kamonai henia goevagoeva bona kara maoromaoro oi badinaia noho, unai ese oi bona emu adavana, murimuri tauna, do ia naria. Emu adavana oi badinaia momokani karana ese emu ruma bese do ia hatamonaia. Ena adavana ia badinaia hahinena be Aonega Herevadia 31:11 ese ia gwauraia, ia gwau: “Iena adavana ese ia dekenai ia abidadama henia noho.” Reana emu kara namo bona emu hemataurai karadia ese emu adavana, murimuri tauna, ena matana do idia kehoa. Reana unai dainai Dirava ena Hereva momokani do ia abia dae.

Dirava kamonai henia karana be mai anina bada bona mauri ia naria gauna. Emu ruma bese lalonai do ia noho totona oi gurigurilaia. Unai ese lalo-maino do ia havaraia bona Iehova do ia hanamoa.