Murimuri ai Atoa Karana​—Lalokau Karana, A?

“HELAGA, Helaga, Helaga. Lohiabada Dirava be mai Siahu Ibounai.” (Apokalupo 4:8) Unai hereva hegeregerena, Iehova be taravatu helagadia edia Badina korikori. Unai taravatu helagadia be “Buka Helagadia” lalonai idia torea, bona Keristani taudia edia maduna be do idia badinaia. Iehova ena matana ai idia miro gaudia ibounai idia dadaraia be maoro.​—2 Timoteo 3:15; Isaia 52:11.

Baibel ena hahegani be ia hedinarai goevagoeva: “To emui kara ibounai lalonai do umui helaga, umui ia boiria Diravana ese ia helaga hegeregerena. Badina be Buka Helaga lalonai Dirava sibona ia gwau, ‘Do umui helaga, badina lau be lau helaga noho.’ ” (1 Petero 1:​15, 16) Lagani 1,900 gunanai, Keristani kongregesen ia hamatamaia negana amo, Keristani taudia momokanidia be idia gaukara goada unai orea idia naria totona; lauma dalanai bona mauri ena kara goevadia dekenai ia miro garina.​—Iuda 3.

Idia Naria Ena Badina

Dirava ena hesiai taudia iboudiai ese idia hekwarahilaia gauna be lauma dalanai bona mauri ena kara goevadia dekenai idia miro lasi. Unai idia karaia totona, namona be siahu dikadia toi idia dadaraia​—Satani, iena tanobada, bona iseda kara dika tauanina ena ura dikadia. (Roma 5:12; 2 Korinto 2:11; 1 Ioane 5:19) Satani ena tanobada be oi do ia dibagania oi matabodaga totona, emu lalona do ia ania ena dala oi badinaia totona, bona oi dekenai taga, ladana bada, dagi, hairai, bona siahu do ia henia toho. To tomadiho momokani idia ura badinaia taudia be Satani ese ia henia gaudia idia dadaraia bona “tanobada ena kara mirodia dekena amo do [idia] raka siri.” Dahaka dainai? Badina idia ura Iehova ena orea goevana ena henari bona lalokau henunai idia noho.​—Iamesi 1:27; 1 Ioane 2:​15-17.

Bema Keristani kongregesen tauna ta be ia manoka dainai Satani ena hedibagani lalonai ia moru, Iehova be dala ia karaia ia durua totona. Elda taudia, lauma dalanai idia goada tadikakadia unai, be idia abidia hidi kongregesen idia naria bona mai edia lalokau ida idia ese kerere taudia do idia durua edia kara dika amo idia helalo-kerehai bona edia kara do idia hamaoromaoroa totona. Kerere lalonai ia vareai Keristani tauna be mai haheauka ida heduru idia henia be namo, ia helalo-kerehai bona ena kara ia haidaua totona.​—Galatia 6:​1, 2; Iamesi 5:​13-16.

Murimuri Ai Atoa Karana be Lalokau Karana

Bema Iehova ena hesiai taudia, idia bapatiso vadaeni taudia, be mai edia ura ida dala dika rohorohona ta idia badinaia bona idia ura lasi edia kara idia haidaua, unai taudia idia gwauraia helalo-kerehai lasi taudia be maoro bona Keristani taudia ese do idia bamodia lasi. (Ioane Ginigunana 2:19 itaia.) Keristani kongregesen goevana lalonai unai bamona taudia idia do noho bena do idia hamiroa be namo lasi. Murimuri ai idia atoa be maoro.

Kara dika rohoroho idia karaia taudia murimuri ai idia atoa ena badina maorona be inai dala amo ita hahedinaraia diba: The Globe and Mail, Toronto, Canada, ena niuspepa ta, ia gwau stiuden taudia kara dika henidia bona dagedage henidia karadia idia bada idia lao dainai, sikuli haida dekenai idia atoa taravatuna be “dagedage kohudia idia gaukaralaia eiava idia ura gaukaralaia stiuden taudia be sikuli amo do idia hadokoa vaitani.” Unai idia karaia badina idia ura unai edukeisini dalana ena namo idia ura abia taudia idia naria bena dagedage do idia davaria lasi.

Dahaka dainai ia helalo-kerehai lasi tauna idia atoa kongregesen murimurina ai be lalokau karana? Badina unai ese Iehova lalokau henia bona ena dala ura henia karana ia hahedinaraia. (Salamo 97:10) Unai be kara maoromaoro dalana idia ura badinaia taudia lalokau henia karana badina idia edia huanai amo edia lalona do ia ania kerere tauna idia kokia. Unai be kongregesen ena lalo-goevagoeva naria karana danu. (1 Korinto 5:​1-13) Bema kara dika rohorohodia eiava lauma dalanai miro havaraia karadia idia kokia lasi to kongregesen lalonai idia do noho, kongregesen do idia hamiroa bona Iehova, helaga Diravana, dekenai hesiai gaukara helagana ia karaia be hegeregere lasi. Unai sibona lasi, to kerere tauna be murimuri ai idia atoa dainai ia be ena ura kererena ena dika ia lalo-pararalaia diba, ia helalo-kerehai, bona ena kara ia haidaua, bena unai amo kongregesen lalonai do idia abia vareai lou diba.

Ma Haida Dekenai Ia Havaraia Gaudia

Kongregesen ena memba ta ese kara dikana ta, hegeregere heudahanai, ia karaia neganai, ia be Iehova ena lalona ia hamoalea lasi. (Aonega Herevadia 27:11) Matabodaga karadia lalonai ia vareai Keristani tauna be guna, Potifara ena adavana ese Iosepa ia dibagania idia heudahanai totona neganai, Iosepa ia laloa bamona ia laloa lasi. Iosepa be inai bamona ia hereva: “Inai kerere badana do lau karaia, bona Dirava ena vairana dekenai inai bamona do lau kara dika be edena bamona?” (Genese 39:​6-12) Iosepa be Iehova ena taravatu helagadia ia laloa bada, unai dainai hedibagani gabuna ia heautania. Unai sibona lasi, to ia heudahanai tauna ena lalokau Iehova dekenai be bada lasi dainai ena tauanina ena ura hagugurua karana ia dadaraia lasi.​—Galatia 5:​19-21.

Dirava ena taravatu ia utua bapatiso tauna be ena varavara taudia, mai edia kamonai taudia, dekenai do ia havaraia dika bona hisihisi ia laloa bada lasi. Ia havaraia hemami dikana ena hisihisi idia haida dekenai be bada herea. Keristani hahinena ta ia davaria ena natuna be ia matabodaga neganai, mai lalohisihisi ida ia gwau: “Tadikaka bona taihu haida sibona ese aiemai lalohisihisi bona hemami dikana ena bada idia lalo-pararalaia. . . . Aiemai lalona ia hisihisi bada herea.” Reana taunimanima ese ruma bese ta ena kara namodia be do idia abia dae momokani lasi. Reana lalo-metau bona hemarai ena mamina ese mai edia abidadama ruma bese taudia do ia hahisia. Momokani, tau ta ena kara dika ese ruma bese dekenai lalohisihisi ia havaraia.

Lalokau Heduruna, Ruma Bese Taudia Dekenai

Namona be murimuri ai idia atoa tauna ena ruma bese taudia, mai edia abidadama taudia unai, idia laloatao murimuri ai atoa karana be lalokau bona ma haida naria karana. Elda taudia be idia karaia diba karadia idia karaia, kerere tauna durua totona. To bema ia hahedinaraia ia be Dirava ia gwau-edeede henia bona ia ura lasi ia helalo-kerehai, kongregesen idia naria be gau badana bona ma dala ta be lasi to Dirava ena Hereva hegeregerena do idia karaia: “Unai kara dika tauna be emui orea dekena amo umui atoa siri.” (1 Korinto 5:13) Witness tauna ta ia gwau, “murimuri ai atoa karana ese Iehova badinaia karana ena anina ia hahedinaraia.”

Ta idia atoa siri, murimuri ai, neganai, ena Keristani varavara be hisihisi mamina idia abia. Namona be idia abia hidi elda taudia ese edia goada idia henia, unai varavara taudia be lauma dalanai idia hagoadadia totona. (1 Tesalonika 5:14) Elda taudia be idia totona bona idia ida idia guriguri diba. Nega momo dala ia noho unai abidadama Keristani taudia idia vadivadi henidia bona hahegoada Baibel siridia idia kikilaia. Namona be mamoe naria taudia ese dala idia tahua unai taudia be lauma dalanai idia hagoadaia totona, Keristani heboudia vairanai bona murinai. Haroro gaukara dekenai idia bamodia neganai ma idia hagoadadia diba. (Roma 1:​11, 12) Lauma dalanai mamoe idia naria taudia ese unai abidadama hesiai taudia, Iehova ena hesiai taudia, dekenai lalokau bona laloa bada karana idia hahedinaraia be namo.​—1 Tesalonika 2:​7, 8.

Ta ese kara dika ia badinaia dainai kongregesen taudia ese iena ruma bese taudia, idia abidadama noho taudia, idia hereva henia lasi be badina maorona lasi. Israela ena pavapava dikana Saulo be Iehova ese ia dadaraia, to Davida be unai kara dainai ena lalokau Saulo ena natuna, Ionatana, dekenai ia hadokoa lasi. To momokani, unai neganai edia hetura karana ia goada momokani. (1 Samuela 15:​22, 23; 18:​1-3; 20:41) Unai dainai kongregesen taudia iboudiai ese Dirava idia kara dika henia taudia edia varavara, Keristani taudia, idia durudia bona lalokau henidia be namo.

Unai bamona abidadama taudia ita hereva henia lasi bona hebogahisi henia lasi be lalokau karana lasi momokani! Ruma bese taudia oredia, Dirava badinaia taudia unai, ese hagoadaia hereva idia abia be heduru bada. Reana idia be turana lasi hemamina do idia abia bona reana idia davaria edia noho dalana ia auka. Reana oi be telefon amo idia ida lauma dalanai moale sivaraina ta eiava hagoadaia ekspiriens ta umui kikilaia diba. Bema murimuri ai idia atoa tauna ese telefon ia abia isi, iena varavara, Keristani tauna, hereva henia totona oi henanadai sibona. Reana unai abidadama taudia oi boiridia diba umui moale hebou totona eiava oiemu ruma dekenai do umui aniani totona. Bema idia hoihoi noho lalonai oi davaridia, unai nega oi gaukaralaia diba oi hagoadadia totona. Namona be oi laloatao, murimuri ai idia atoa taudia edia varavara, kamonai Keristani taudia, be Iehova ena orea goevana lalonai idia do noho. Do idia ura sibodia idia noho bona do idia lalo-manoka haraga diba. Unai dainai, oi hegaegae idia dekenai hebogahisi bona lalokau hahedinaraia totona. Hanaihanai ‘Keriso abidadama henia taudia’ umui kara namo henidia noho.​—Galatia 6:10.

Iehova Ia Henia Gaudia Laloa Bada

Iehova ita tanikiu henia bada badina ia ese ia idia tomadiho henia besena taudia ta ta tanobada hegegemadai ai ia laloa. Ena orea amo ita ia durua dalana ia hegaegaelaia iena vairanai do ita raka maoromaoro totona. Ena be ruma bese tauna ta be mai ena ura ida ia kara dika bona kongregesen murimuri ai idia atoa, to bema ia helalo-kerehai momokani, dala ia noho ia vareai lou totona. Inai haheitalai amo unai ita hahedinaraia diba:

Elda taudia be hahine ta, do ita gwauraia Anna idia durua toho, to ia be kuku ia ania, ia inuinu, bona drag ia ania. Ia helalo-kerehai lasi dainai kongregesen lalonai ia noho lasi. To, daudau lasi murinai, Anna be Iehova ena kongregesen goevana ena lalokau hebamona ia reaia, unai dainai heduru totona Iehova ia guriguri henia. Sibona ia gwau ia be guna elda taudia ese idia raka kerere taudia idia laloa karana ia laloa bada lasi. Anna be hebou ia lao henia matamaia lou, bena unai murinai ia helalo-kerehai. Gabeai, ia be lalokau bona naria dalana ia hahedinaraia kongregesen lalonai ia vareai lou. Hari, Anna be Iehova ena taravatu hereadia mauri ena goeva karadia dekenai ia badinaia lou. Elda taudia ese idia hahedinaraia lalokauna ia moalelaia bona ia gwau: “Keristani bukadia edia heduru ena bada lau dekenai be lau gwauraia diba lasi. Momokani Iehova be ita idia durua gaudia ia laloa bada.”

Oibe, Iehova be dala ia kehoa murimuri ai idia atoa bena gabeai idia helalo-kerehai taudia be kongregesen lalonai idia vareai lou totona. Ita itaia murimuri ai atoa karana be lalokau karana. To iseda Dirava helagana ena dala maoromaorodia ita badinaia amo unai mai ena hisihisi karana ita koua be namo bada herea! Hanaihanai Iehova ena orea goevana, lalokau bona naria dalana ia hahedinaraia oreana, lalonai ita noho dainai Iehova ita hanamoa diba hahenamona ita moalelaia bada.

[Picture on page 26]

Kongregesen murimuri ai idia atoa taudia edia varavara, mai edia abidadama taudia, dekenai lalokau oi hahedinaraia, a?