Ura Kwalimu Ia Lao Henia Dalana Maragina
AONEGA taudia ese tanobada bona guba gaudia idia haheaua taravatudia idia abia dae. Unai taravatu ese gau ibounai idia biagua, gau maragimaragidia ela bona hisiu oredia badadia. Bema unai taravatu idia noho lasi, palani ita karaia diba lasi bona ita lalo-parara diba lasi; mauri danu do ia noho lasi. Taunimanima ese tanobada ia biagua taravatudia idia lalo-pararalaia bona idia gaukaralaia dainai, hoa karadia idia karaia. Hegeregere, hua dekenai idia raka loaloa bona tanobada ena gabu ta amo eiava guba amo kala piksa idia siaia mai bena iseda ruma lalonai televisen amo ita itaia diba.
To mauri ena taravatu goevadia be edena bamona? Ita badinaia neganai hahenamo do ita abia danu, a? Momo idia laloa mauri ena taravatu goevadia be lasi dainai, edia ura ida ia hegeregere lalohadaina, eiava tomadihona ta idia abia hidi.
To, taunimanima haida ese dala ma ta idia abia hidi, Baibel ese ia gwauraia ‘mauri ia lao henia dalana maragina’ unai. Haida sibona ese unai dala idia abia hidi be do ita hoa lasi, badina Iesu ese unai dala maragina be inai bamona ia gwauraia: “Unai dala idia davaria taudia be momo lasi.” (Mataio 7:14) Dahaka dainai momo ese idia davaria lasi?
Badina dala maragina be Dirava ena taravatu bona hahegani ese ia biagua. Dirava ena taravatu ia ura badinaia tauna sibona ese unai dala do ia ura henia. Ia be dala lababana amo ia idau, unai dala ese ura kwalimu toana koikoina ia hahedinaraia, to rakalaia taudia ia guidia. Dala maragina ena toana be ia auka, to ia ese taunimanima be mai anina bada daladia idauidau ai ura kwalimu ia henidia. “Taravatu namona bona goevagoeva momokani” ese iena hetoa ia makaia.—Iamesi 1:25.
Dala Maragina ese Ura Kwalimu Ia Henia Dalana
Momokani, dala maragina dekenai raka noho be ia auka. Taunimanima ta ta ibounai be kara dika taudia bona idia lalonai kara dika karaia urana ia noho. Unai dainai reana nega ta ta be do ia raka maoromaoro lasi. To ena be unai ia vara, unai ‘dala maragina’ dekenai do ita abia hahenamodia dainai ita hekwarahi bona iseda kara ita haidaua be namo, badina Dirava ese ‘iseda namo habadaia dalana, be ita dekenai ia hadibaia noho.’—Isaia 48:17; Roma 3:23.
Haheitalai be inai bamona: Aonega tama sina ese edia natudia idia ania anianidia idia abia hidi namonamo, unai be ‘dala maragina’ bamona. Anina be nega haida aniani neganai do idia kara auka idia aniani totona. To natudia idia bada neganai, edia tama sina edia lalokau hahediba karana do idia abia dae. Taunimanima badadia ai idia lao neganai, idia ese aniani namodia do idia ura henia. Bona, tauanina hagoadaia aniani namodia momo idia noho dainai, do idia gwau lasi gau ta dekenai idia dabu.
Dirava ese mauri ia lao henia dala maragina dekenai idia raka taudia be lauma dalanai unai bamona ia kara henidia. Ia ese ura namodia ia havaraia manau taudia edia lalona dekenai, unai ese moale bona ura kwalimu ia havaraia. Iena Hereva, Baibel amo unai ia karaia. Danu, ia ese ita ia boiria guriguri amo iena lauma helaga do ita noia, ita ia durua totona. Bona ita ia oda henia Keristani tadikaka ida ita hebamo; idia ese ita do idia hagoadaia dala maragina dekenai ita noho totona. (Heberu 10:24, 25) Oibe, Dirava be lalokau, bona iena ura bona ena kara ibounai be unai kara namo hereana dainai ia karadia.—1 Ioane 4:8.
Lalokau, maino, kara namo, tauanina ena ura koua karana, bona Dirava ena lauma ena huahua ma haida idia noho neganai, dala maragina dekenai raka be ia auka lasi. Baibel ia hereva bamona, “inai bamona karadia idia karaia taudia be taravatu ta ese ia koudia diba lasi.” (Galatia 5:22, 23) “Bema Lohiabada ena Lauma be tau ta dekenai ia noho neganai, . . . ia dekenai ura kwalimu ia noho.” (2 Korinto 3:17) Hari danu, Keristani taudia momokani ese ura kwalimu mamina idia abia. Idia be hari inai nega lalonai taunimanima ese idia garilaia gaudia momo amo ia ruhadia; hegeregere, nega vaira bona mase. Mai moale ida ita ese nega vaira ita laloa diba, unai neganai “tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona”! (Isaia 11:9) Unai neganai danu, kara dika garina be lasi. Loka bona auri be do idia ore vaitani. Ibounai be ura kwalimu bona noho namo do idia davaria, dina bona hanuaboi, ruma lalodiai bona murimuri ai danu. Unai be ura kwalimu korikorina!
Dirava ese Ita Do Ia Durua
Momokani, Dirava ena taravatu hegeregerena ita noho be mai ena hekwarahi, to “iena taravatu be metau lasi” ita mai, eda kara dika taudia dekenai danu. (1 Ioane 5:3) Iseda kara ita haidaua, dala maragina dekenai do ita raka totona bona ena hahenamo ita abia neganai, dala lababana ena kara bona lalohadai do ita inai henia matamaia. (Salamo 97:10) Ita ibounai dekenai Dirava ese ita ia henia lalona ena mamina ia ura Dirava ena taravatu ita badinaia. Ena be momo idia “lalohisihisi bada” bona edia ‘laumadia be idia laloa hekwarahi momokani’, to Dirava ia gwau: “Kamonai! Egu hesiai taudia ese ane do idia abia, edia moale be bada dainai.” Oibe, Iehova ese ia hadibaia kudouna be do ia moale bona ia ura kwalimu.—Isaia 65:14.
Iesu ia mase, ura kwalimu korikori ita abia totona. Baibel ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita, dekenai do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Hari, Iesu be Dirava ena guba Basileia ena Pavapava, bona ia ese unai boubou ena hahenamo henia gaukarana ia naria noho. “Hisihisi bada herea” ia ore murinai, dala lababana bona idia rakaia taudia ibounai be idia ore vadaeni neganai; Iesu ese mai manau ida dala maragina dekenai, kamonai taudia do ia hakaudia ela bona dala ena dokona, taunimanima do idia goevadae momokani negana unai. (Apokalupo 7:14-17; Mataio 24:21, 29-31) Unai neganai, ita ese inai gwauhamata ia momokani do ita itaia: “Dirava ese dina ta ia karadia gaudia be do ia ruhaia, dika ena bodaga dekena amo, vadaeni Dirava ena natuna edia hairaina bamona do idia abia, ma Dirava ese edia dala do ia kehoa, vadaeni kwalimu momokani do idia abia.” Dirava ese ia henia ura kwalimuna be gau ta ese ia hanaia diba lasi. Mase danu be do ia ore vaitani.—Roma 8:21; Apokalupo 21:3, 4.
Ta ese dala maragina be edeseniai ia lao ia itaia bona ia lalo-pararalaia namonamo neganai, do ia abia hidi bona unai dala dekenai do ia raka noho. Matamata taudia ai durudia, namo lasi hari sibona idia laloa bona idia laloa Dirava ena taravatu be auka bona idia badulaidia. Idia diba unai be Dirava ena lalokau toana bona dala lababana ena kara dikadia amo ia koudia. (Heberu 12:5, 6) Oibe, namona be ita haheauka, ita diba kara bona ura namodia be haraga herea do ita havaraia lasi to nega daudau murinai, hegeregere au ta be haraga herea huahua ia atoa lasi. To bema ita hagoevaia bona ranu ita henia, huahua do ia atoa.
Unai dainai, Dirava ena Hereva oi stadilaia, Keristani tadikaka bona taihu ida oi hebamo, bona lauma helaga totona “nega ibounai do [oi] guriguri.” (1 Tesalonika 5:17) Dirava oi abidadama henia “vadaeni ia ese dala maorona, be oi dekenai do ia hadibaia.” (Aonega Herevadia 3:5, 6) To unai ita karaia diba a? Ita do ia durua momokani diba, a? Oibe, hereva ginigunana lalonai ai herevalaia taudia, Tom bona Mary ia durudia.
Dala Lababana Idia Rakatania
Tom ia gwau: “Lagani 1975 bamona lalonai, emai ruma dekenai Iehova ena Witness tauna ta ia mai neganai, idia ai diba matamaia. Ai herevahereva bena Baibel stadi ai abia dae. Sisina sisina, egu mauri lau hagoevaia matamaia. Lagani 1982 lalonai lau bapatiso bona hari emai gabu ena kongregesen lalonai hesiai gaukara lau karaia. Hari, emai natuna mero danu ia bapatiso. Egu adavana lau tanikiu henia bada badina hereva momokani lau do davaria lasi laganidia momo lalonai ia haheauka dainai. Bona gau badana be Iehova bona iena Natuna, Iesu Keriso lau tanikiu henidia badina ai idia durua bada bona emai vaira negana totona helaro namona idia henia dainai.”
Bona Mary be edena bamona? Ia laloa Dirava ese do ia gwauatao henia diba lasi, to iena natudia dainai ia ura Dirava ia dibaia. Ia kamonai Iehova ena Witness taudia ese iena dekena hahinena dekenai Baibel idia hadibaia neganai, ia noidia ia idia durua totona. To ia manadalaia kara dikadia ese ena tubu lauma dalanai idia koua. Ena stadi be nega haida ia namo ia lao bona nega haida ia rakatania. To, iena natuna kekeni maragina, ena lagani be 7 ese ia hagoadaia. Ia gwau: “Oi goada, Sinagu. Do oi karaia diba!” Bena ia goada karaia unai kara ia rakatanidia totona.
Ena adavana, idia noho hebou sibona tauna, ia giroa mai neganai, ia danu stadi lalonai ia helai. Bena, idia ruaosi ese idia manadalaia kara dikadia idia rakatanidia. Bena, edia headava idia hamaoromaoroa bona idia bapatiso murinai, idia moale bada badina nega ginigunana edia mamina be idia be famili korikorina ta. Madi, Mary be AIDS gorerena dainai ia mase, to ia mase lasi neganai ena lalona dekenai ia diba, Baibel ena gwauhamata hegeregerena do ia toreisi lou bona tanobada dekenai paradaiso lalonai do ia noho, unuseniai dala lababana ena kara ibounai be idia ore vaitani.
Oibe, mase ia lao henia dala lababana bona badana amo oi raka siri diba. Iesu Keriso ia gwau: “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Unai dainai, namona be emu lalona oi hadaia mauri ia lao henia dala maragina dekenai do oi raka, ani? Dirava ena Hereva amo oi diba gaudia be emu kudouna lalonai oi abia dae bona oi badinaia neganai, inai Baibel gwauhamatana do oi mamia: “Hereva momokani be do [oi] diba, bona hereva momokani ese [oi] do ia ruhaia.”—Ioane 8:32.