Tomadiho Ibounai be Namo, A?

INAI tanobada ai tomadiho be idauidau. Ripoti ta ia gwau, tomadiho badadia be 19 bona maragidia be 10,000 bamona. Unai dainai, taunimanima be idia ura henia tomadihona idia abia hidi. To, oi abia dae tomadihona be maoro, a?

Haida idia gwau tomadiho idauidau be dala idauidau bamona, ororo tamona dekenai idia lao daladia unai. Idia laloa edena idia abia hidi be gau badana lasi, badina ibounai be gabu tamona dekenai idia lao. Idia gwau, Siahu Ibounai Diravana be tamona bona Ia ese tomadiho ibounai ia abia dae.

Dirava be Tomadiho Ibounai Ia Abia Dae, A?

Iesu Keriso be taunimanima ese idia matauraia bada bona ia be tomadiho hadibaia tauna hereadaena; to ia be dahaka ia gwau? Ia ese ena hahediba taudia ia hamaoroa: “Geiti maragina dekenai umui raka vareai.” Dahaka dainai? “Badina be mase ia lao dalana ena geiti ia bada bona lababa herea, bona momo be unuseniai idia raka vareai. To mauri ia lao henia dalana ena geiti be ia maragimaragi, bona haida sibona be unai dala idia davaria.”​​—⁠Mataio 7:​13, 14, The Holy Bible​​—⁠New International Version.

Iesu ia gwau, tomadiho haida be “mase ia lao dalana” dekenai idia raka, a? Eiava taunimanima ia hadibaia, Dirava idia abidadama henia lasi taudia sibona be dala badana ai idia raka, a? Bona ia gwau, Dirava idia abidadama henia taudia​—⁠herevana edena tomadiho⁠​—⁠​be mauri ia lao henia dala maragina dekenai idia raka, a?

Unai siri ai Iesu be dala rua sibona ia herevalaia murinai, ia gwau: “Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona.” (Mataio 7:​15) Gabeai ia gwau: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai.” (Mataio 7:​21) Bema haida ese tau ta idia gwauraia peroveta tauna eiava ia sibona ia gwau Iesu be ena “Lohiabada,” ita gwau diba unai tau be tomadiho ia laloa bada tauna bona Dirava ia abidadama henia. To, Iesu ese ita ia hadibaia gauna be inai: Tomadiho momo bona edia hadibaia taudia momo be koikoi.

Tomadiho Maorona Oi Davaria Diba, A?

Bema tomadiho momo be koikoi, vadaeni tomadiho maorona be edena bamona oi davaria diba? Mani inai haheitalai oi laloa: Oi be siti badana ta ai oi boio. Tatau foa oi nanadaia dala maorona be oi dekenai idia hadibaia totona. Tau ginigunana ia gwau ist kahana oi lao. Tau iharuana ia gwau west kahana oi lao. Tau ihatoina ia gwau, dala ibounai be hegeregere bona oi sibona ese ta oi abia hidi. To tau ihahanina be mapu namona ta ia kehoa bona oi dekenai dala maorona ia hahedinaraia. Bena unai mapu be oi dekenai ia henia, oi ia durua totona. Oi diba momokani gabu maorona do oi davaria, ani?

Unai hegeregerena, tomadiho maorona ita abia hidi totona, mapu bamona gauna ta ita gaukaralaia be namo. Unai bamona gauna ia noho, a? Oibe. Unai be Baibel, bona ia gwau: “Buka Helaga ena hereva ibounai be Dirava ena Lauma ese ia havaraia. Bona inai hereva be mai ena siahu, Dirava ena hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia.”​​—⁠2 Timoteo 3:​16.

Emu gado ai idia hahanaia vadaeni Baibel be mapu ta bamona, oi gaukaralaia diba tomadiho maorona oi davaria totona. Inai magasin idia karaia taudia​—⁠Iehova ena Witnes taudia​—⁠be Baibel namona ta ladana, New World Translation of the Holy Scriptures idia halasia. To, bema oi be Iehova ena Witnes lasi, reana Baibel ma ta oi gaukaralaia tomadiho namona bona dikana edia idau oi diba totona. Unai dainai, inai rau ia lao rau 9 ai Baibel idauidau edia hereva ai torea hanai​—⁠unai Baibel be tanobada hegegemadai tomadiho ma haida ese idia matauraia bada.

Inai rau ia lao rau 9 ena kahana oi duahia neganai, namona be oi diba vadaeni gaudia be Baibel ena hereva ida oi hahegeregerea. Iesu ese tomadiho namona bona dikana edia idau ia gwauraia dalana ita laloatao. Ia gwau: “Au namona ta ese huahua namona ia atoa, bona au dikana ta ese huahua dikana ia atoa.” (Mataio 7:⁠17, 18, Contemporary English Version) Baibel ese ia gwauraia “au namona” ena huahua namodia toi mani ita herevalaia.

[Blurb on page 3]

Mapu maorona bamona, Baibel ese ta ia durua diba tomadiho maorona ia davaria totona