Iehova Tomadiho Henia Dalana Goevana Dainai Idia Mama
“Iehova, iena ladana be Mama, be mama Diravana.”—ESODO 34:14, NW.
IEHOVA be sibona ia gwauraia “mama Diravana.” Reana unai oi hoalaia, badina be unai hereva “mama” be mai ena mamina dikana. Momokani, Dirava ena kara badana be lalokau. (1 Ioane 4:8) Unai dainai iena mama be taunimanima hanamodia gauna mo. Do ita itaia, guba bona tanobada do idia maino totona, Dirava ia mama be gau badana.
2. Heberu gado herevadia, edia anina be “mama,” hahanaia daladia haida be dahaka?
2 Inai hereva “mama” be Heberu gado herevadia haida ida idia hahegeregerea; Heberu Revarevadia ai unai hereva be nega 80 bona ma haida idia toredia. Nega rua rua amo ta ta be Iehova Dirava idia gwauraia. G. H. Livingston ia gwau: “Dirava ena mama idia herevalaia neganai, anina be Iehova ena lalona ena mamina dikana ta lasi, to anina be ia ura bada ia sibona mo do idia tomadiho henia.” (The Pentateuch in Its Cultural Environment) Unai dainai, nega haida unai Heberu gado herevana be inai bamona idia hahanaia Motu gado ai: “Lau ura umui be lau sibona egu.” (Deuteronomi 5:9) Idia hahanaia daladia maorodia ma haida be inai: “laloa siahu” bona “mama ena badu.”—Esekiela 5:13; Sepanaia 3:8.
3. Edena dala ai mama ese namo ia havaraia diba?
3 Dirava ese taunimanima ia karadia mama ena mamina do idia abia diba, to kara dika lalonai idia moru dainai, edia mama ia gageva. To, taunimanima edia mama ese namo ia havaraia diba. Mama dainai ta ese ena lalokau tauna ia gimaia, ma ta ese do ia hakererea garina. Inai danu, taunimanima be dala maorona ai Iehova bona ena tomadiho dainai idia mama diba. (1 King Taudia 19:10) Unai mama herevalaia maoromaoro totona, unai Heberu gado herevana be inai bamona idia hahanaia: ‘Ia ura lasi dirava idauna ta do idia tomadiho henia.’—Numera 25:11.
Golo Boromakauna
4 Sinai Ororona ai Israela taudia ese Taravatu idia abia murinai ia vara gauna ese mama maorona ena toana ia hahedinaraia. Iehova ese ia haganidia loulou vadaeni, taunimanima ese idia karaia diravadia do idia tomadiho henia lasi. Ma ia hamaorodia, ia gwau: “Lau [Iehova] emui Dirava be lau ura umui be lau sibona egu [eiava, “lau be mama (lalo-siahu) Diravana; lau ura lasi dirava idauna ta do umui tomadiho henia”].” (Esodo 20:5; ma Esodo 20:22, 23; 22:20; 23:13, 24, 32, 33 itaia danu.) Iehova be Israela taudia ida gwauhamata ta ia karaia, ia gwau do ia hanamodia bona Gwauhamata Tanona ai do ia hakaudia vareai. (Esodo 23:22, 31) Idia gwau: “[Iehova] ena oda hereva ibounai do ai karaia, bona do ai kamonai henia.”—Esodo 24:7.
5, 6. (a) Israela taudia be Sinai Ororona ai idia kamepa neganai, dahaka kara dikana badana idia karaia? (b) Sinai ai, Iehova bona ia idia badinaia taudia ese edia mama maorona be edena bamona idia hahedinaraia?
5 To, nega daudau lasi, Israela taudia be Sinai Ororona ena badina dekenai idia do noho neganai, Dirava idia kara dika henia. Mose be dina momo ororo ai ia noho, oda ma haida Dirava ena amo ia abia noho, bona idia ese Mose ena kakana, Arona, ena lalona idia ania, dirava ta do ia karaia edia. Arona ese ia kamonai henidia bona idia henia golona amo boromakau ena laulau ta ia karaia. Idia gwau unai be Iehova ena laulau. (Salamo 106:20) Bena kerukeru boubou gaudia idia henia bona “idia tomadiho henia.” Bena “idia gadara mai lebulebu danu.”—Esodo 32:1, 4, 6, 8, 17-19.
6 Israela taudia idia do gadara noho neganai, Mose be ororo amo ia diho. Edia lebulebu karadia ia itaia neganai, ia boiboi, ia gwau: “[Iehova] ena kahana taudia be lau dekenai do umui haboua mai.” (Esodo 32:25, 26) Levi ena natuna be Mose dekenai idia hebou, bena ia haganidia edia tuari kaiadia do idia abia bena kaivakuku idia tomadiho henia taudia do idia alaia mase. Bena Levi taudia idia hahedinaraia Dirava tomadiho henia dalana goevana dainai idia mama; edia varavara, kerere taudia, 3,000 bamona idia alaia mase. Bena Iehova ese unai panisi ia habadaia; kerere taudia oredia be gorere amo ia hahisidia. (Esodo 32:28, 35) Bena Dirava ese ena hahegani ia henidia lou, ia gwau: “Oi be dirava ma ta dekenai do oi tomadiho lasi, badina be Iehova, iena ladana be Mama, be mama Diravana.”—Esodo 34:14, NW.
Peoro Ena Dirava Bala
7 Lagani 40 murinai, Israela besena be Gwauhamata Tanona ai idia vareai gwauraia neganai, Moaba bona Midiana hahinedia mai hairaidia ese Israela taudia momo idia boiria mai edia koikoi ida. Unai tatau ese dirava koikoidia tomadiho henia taudia edia hebamo idia dadaraia be namo. (Esodo 34:12, 15) To ‘boromakau be aladia mase gabuna’ idia heau henia hegeregerena idia heau, bena unai hahine ida idia heudahanai bona Peoro ena dirava Bala idia tomadiho henia.—Aonega Herevadia 7:21, 22; Numera 25:1-3.
7, 8. (a) Peoro ena Bala dekenai, Israela taudia momo be kaivakuku tomadiho henia karana dika rohorohona lalonai edena bamona idia moru? (b) Iehova ena amo daihanai gorerena be edena bamona ia doko?
8 Iehova ese daihanai gorerena ta ia siaia, unai tomadiho karadia bodagadia idia karaia taudia hamasea totona. Dirava ese danu kerere lasi Israela taudia ia hagania, edia varavara, kerere taudia, do idia alaia mase. To Israela lohiana ta ladana Simiri ia gwau-edeede, Midiana lohia hahinena ta be ena kalaga lalonai ia hakaua vareai, do ia sihari henia totona. Hahelaga tauna Pineha, Dirava gari henia tauna, ese unai ia itaia neganai, ruaosi ia gwadaia mase. Unai amo daihanai gorerena ia doko, bena Dirava ia gwau: “Pineha . . . ese egu badu be Israela taudia edia amo ia hasiria oho; idia bogaragidiai mama ena badu ia hahedinaraia, lauegu hegeregerena, unai dainai egu mama dekenai Israela taudia lau hamasedia ore lasi.” (Numera 25:11, The New English Bible) Ena be unai bese ia haorea lasi, to Israela taudia 23,000 idia mase. (1 Korinto 10:8) Edia helaro, Gwauhamata Tanona ai do idia vareai helarona, ena anina idia abia lasi.
Edia Sivarai amo Ita Ia Sisiba Henia
9 Madi, Israela taudia ese unai matahakani idia laloaboio haraga. Iehova tomadiho henia dalana maorona dainai idia mama lasi. “Idia koroa kaivakukudia amo [Dirava] idia hamamaia noho.” (Salamo 78:58, NW) Unai dainai, lagani 740 B.C.E. ai Israela ena iduhu 10 be Asuria taudia ese idia abidia mauri neganai, Iehova ese ia durudia lasi. Gabeai, Iuda ena iduhu rua basileiana be unai bamona ia panisia, lagani 607 B.C.E. ai Babulonia taudia ese edia hanua badana Ierusalema idia hadikaia ore neganai. Idia momo idia hamasedia, bena oredia idia guia bona Babulonia dekenai idia hakaua lao. Unai sivarai amo Dirava ese Keristani taudia iboudiai hari inai negai ia sisiba henidia goevagoeva!—1 Korinto 10:6, 11.
10. Bema kaivakuku tomadiho henia taudia idia helalo-kerehai lasi, dahaka do ia vara idia dekenai?
10 Tanobada noholaia taudia iboudiai toi toi amo ta ta—milioni 1,900 bamona—be hari idia gwau idia be Keristani taudia. (1994 Britannica Book of the Year) Idia momo be tomadiho oreadia taudia—laulau, kaivakuku, bona korosi be edia tomadiho lalonai idia iusilaia oreadia unai. Gunaguna, Iehova ena bese taudia ese edia kaivakuku amo idia hamamaia neganai, ia hebogahisi henidia lasi. Bona ia ese sibodia idia gwauraia Keristani taudia, unai gau amo idia tomadiho taudia, do ia hebogahisi henidia lasi. Iesu Keriso ia gwau: “Dirava be Lauma, bona do idia tomadiho henia taudia ese, lauma bona momokani dekena amo do idia tomadiho henia.” (Ioane 4:24) Inai danu, Baibel ese Keristani taudia ia hagania do idia naria namonamo kaivakuku garidia. (1 Ioane 5:21) Edia kaivakuku tomadiho henia karana amo idia helalo-kerehai lasi taudia ese Dirava ena Basileia do idia abia lasi.—Galatia 5:20, 21.
11. Ena be Keristani tauna ta ese kaivakuku ta ia tomadiho henia lasi, to edena dala ai unai bamona karana dekenai ia kerere reana, bona dahaka ese ia durua, unai kara do ia karaia lasi totona? (Efeso 5:5)
11 Keristani tauna korikori ese kaivakuku ta ia tomadiho henia diba lasi. Unai sibona lasi, to Dirava ena matana ai idia be kaivakuku tomadiho henia karana bamona karadia, bona kara mirodia, bona kara dikadia, iboudiai amo ia siri danu be namo. Baibel ia gwau: “Tauanina ena ura kara, umui emui lalonai idia gaukara noho, be do umui hamasea. Gaudia be inai: Heudahanai, lebulebu, ura dikadia, matabodaga, bona kohu momo ura dikadika kara. Kohu momo ura dikadika kara be hegeregere kaivakuku tomadiho henia kara bamona. Badina be unai bamona idia karaia taudia edia latanai Dirava ena badu do ia ginidae momokani.” (Kolose 3:5, 6) Unai hereva idia badinaia taudia ese kara bodagadia idia dadaraia. Anina be, TV program bona vidio dikadia, hegahusi bodagana havaraia gaudia, edia amo idia siri. Keristani taudia korikori ese unai bamona hegahusina idia hagugurua lasi, to Dirava tomadiho henia dalana goevana dainai idia mama.
Dirava Ena Mama Hegeregerena ai Idia Mama Taudia Gabedia
12 Dirava tomadiho henia dalana goevana dainai ia mama tauna hereadaena be Iesu Keriso. Ena haroro gaukarana negana ena lagani ginigunana ai, ia ese bisinesi taudia ia itaia, dubu ena magu lalonai idia gaukara mai edia mataganigani ida. Reana Iuda taudia idau gabu amo ese edia moni be unai bisinesi taudia edia amo idia senisia be namo, dubu ena takisi do idia henia diba totona. Animal bona manu idia hoia danu be namo, Dirava ena Taravatu hegeregerena boubou gaudia do idia henia totona. To unai bisinesi karadia be dubu ena magu murimurinai idia karaia be namo. Unai bisinesi taudia edia kerere badana be, dava badadia idia gwauraia, unai amo edia tadikaka edia tomadiho karadia lalodiai idia koidia. Iesu ese Dirava tomadiho henia dalana goevana dainai ia mama dainai, hekwadi kwanauna ta amo mamoe bona boromakau ia lulua. Ia ese danu moni senisia taudia edia pata ia uhea hebubu, ia gwau: “Egu Tamana ena Ruma be hoihoi Rumana dekenai umui halaoa lasi.” (Ioane 2:14-16) Unai amo Iesu ese Salamo 69:9 ena hereva ia hamomokania: “Oiemu Dubu Helaga lau ura henia dikadika, bona inai ura [eiava, “mama,” Byington] ese lahi bamona lau ia gabua noho.”
12, 13. Dirava tomadiho henia dalana goevana dainai mama karana be Iesu ese edena bamona ia haheitalaia goevagoeva?
13 Lagani toi murinai Iesu ese mataganigani bisinesi taudia ia itaia lou, Iehova ena dubu dekenai idia gaukara noho. Ia ese nega iharuana do ia hagoevaia, a? Dirava tomadiho henia dalana maorona dainai ia mama bada, ena haroro gaukarana ia hamatamaia neganai hegeregerena. Ia ese animal idia hoia taudia bona edia davana idia abia taudia danu ia lulua. Bona ena kara ena badina badana ia gwauraia, ia gwau: “Buka Helaga lalonai inai bamona ia torea vadaeni: ‘Lauegu Ruma be bese ibounai edia guriguri Rumana gwauraia?’ To umui be henaoa taudia edia noho ruma umui halaoa vadaeni.” (Mareko 11:17) Mama, Dirava ena hegeregerena, be ia ese ia hahedinaraia goevagoeva lou unai!
14. Iesu be tomadiho dalana goevana dainai ia mama dainai, edena bamona ita kara be namo?
14 Lohiabada Iesu Keriso, Dirava ese hairai ia henia vadaeni tauna, ena lalona ia senisi lasi. (Heberu 13:8) Hari inai negai ia be ena Tamana tomadiho henia dalana goevana dainai ia mama, tanobada dekenai ia noho neganai ia dainai ia mama hegeregerena. Unai be Iesu ena hereva, kongregesen 7 dekenai ia siaia herevadia, lalodiai ia hedinarai. Unai hereva be aposetolo Ioane ese Apokalupo bukana lalonai ia toredia, bona hari inai negai, “Lohiabada ena Dina” ai, edia anina be dala badana ai idia vara. (Apokalupo 1:10; 2:1–3:22) Mata hanai lalonai Ioane ese Iesu Keriso ia itaia, Dirava ese hairai ia henia vadaeni, bona “iena matana be lahi ena hururuhururu bamona.” (Apokalupo 1:14) Unai ese ia hahedinaraia Keriso ese kongregesen ia itadia namonamo, do ia diba idia goeva noho bona idia hegeregere noho Iehova ena hesiai do idia lao henia, eiava lasi; gau ta lasi be iena matana edia amo ia hehuni. Namona be Keristani taudia hari inai negai ese Iesu ena sisiba, biaguna rua—Dirava bona kohu momo—edia hesiai do idia lao henia toho lasi herevana, do idia laloatao be namo. (Mataio 6:24) Laodikea kongregesen taudia, kohu idia ura henia bada taudia, be Iesu ese ia hamaoroa, ia gwau: ‘Umui be siahu sisina sibona, siahu lasi, keru lasi. Unai dainai lauegu uduna dekena amo umui do lau kanudia. . . . Kara namo do umui karaia mai goada danu, bona emui lalona do umui giroa.’ (Apokalupo 3:14-19) Namona be kongregesen edia elda taudia ese edia hereva bona edia haheitalai amo edia orea taudia idia durua, kohu ura henia tarapuna amo do idia raka siri totona. Namona be elda taudia ese danu mamoe oreana idia naria, tanobada ena matabodaga lalohadaidia ese do idia hakererea garina. Inai danu, Dirava ena orea taudia idia naria namonamo, Iesebele bamona hahinedia edia lalo-ani ese kongregesen ia hadikaia garina.—Heberu 12:14, 15; Apokalupo 2:20.
15. Iehova tomadiho henia dalana dainai mama karana ai, aposetolo Paulo ese Iesu be edena bamona ia tohotohoa?
15 Aposetolo Paulo ese Keriso ena kara ia tohotohoa. Bapatiso idia abia matamata Keristani taudia ia gimaia, lauma dalanai do idia hakereredia gaudia garina. Ia gwau: “Dirava ena mama namona hegeregerena, lau ese umui totona lau mama.” (2 Korinto 11:2) Guna, Paulo be tomadiho dalana goevana dainai ia mama dainai, unai kongregesen ia oda henia, ena heudahanai amo ia helalo-kerehai lasi tauna be kongregesen amo do idia atoa siri, badina be ia hamiroa dainai. Dirava ena lauma amo ia henidia sisibana ese elda taudia hari inai negai ia durua bada, Iehova ena Witness taudia edia kongregesen 75,500 bona ma haida be do idia goeva hanaihanai totona idia naridia noho lalonai.—1 Korinto 5:1, 9-13.
Dirava Ena Mama ese Ena Orea Taudia Ia Hanamoa
16 Dirava ese Iuda taudia ia panisia dalana be, Babulonia taudia ese idia abidia mauri bona idia hakaudia oho neganai, ia durudia lasi. Unai neganai edia inai taudia ese idia kirikirilaidia. (Esekiela 23:32) Edoma taudia ese Dirava ena bese taudia idia inai henia mai edia mama ida dainai, hadikadia karana lalonai Babulonia taudia idia durua, bona Iehova ese unai ia laloa. (Esekiela 35:11; 36:15) Israela taudia be edia igui ai idia helalo-kerehai, bena lagani 70 murinai Iehova ese edia tano ai ia hanohodia lou.
16, 17. (a) Dirava ese idaunegai Iuda besena ia panisia neganai, idau besedia be edena bamona idia kara? (b) Iuda besena be lagani 70 igui ai ia noho murinai, Iehova ese edena bamona ia hahedinaraia Ierusalema dainai ia mama?
17 Matamana ai, Iuda taudia idia hekwarahi bada. Ierusalema hanuana bona ena dubu be idia dika vadaeni. Dubu idia haginia lou toho negadiai, idia gegedia ahu besedia ese edia gaukara idia koua. (Esera 4:4, 23, 24) Iehova ese unai be edena bamona ia laloa? Buka Helaga ia gwau: “Tuari oreadia edia Iehova be inai bamona ia hereva: ‘Lau be Ierusalema bona Siona dainai lau mama bada herea. Idia noho namonamo besedia lau badu henidia dikadika; badina be sisina mo lau badu, to idia ese dika idia habadaia.’ Unai dainai Iehova be inai bamona ia gwau, ‘Momokani Ierusalema do lau lou henia, mai egu hebogahisi ida.’ Tuari oreadia edia Iehova ia gwau, ‘Sibogu egu ruma be ia lalonai do idia haginia.’ ” (Sekaraia 1:14-16, NW) Unai gwauhamata hegeregerena, dubu bona Ierusalema hanuana idia haginia lou mai edia kwalimu ida.
18. Tanobada ibounai tuarina ginigunana ena nega lalonai, dahaka be Keristani taudia momokanidia dekenai ia vara?
18 Lagani 80 bamona idia lao vadaeni Keristani ekalesiana korikorina dekenai ia vara gauna be unai hegeregerena. Tanobada ibounai tuarina ginigunana ena nega lalonai, Iehova ese ena orea taudia ia matahakani henia, badina be unai tuari amo idia gini siri momokani lasi. (Ioane 17:16) Gavamani ese idia hahisidia neganai, Dirava ese unai ia koua lasi, bona Kerisendom ese unai dika ia moalelaia. Momokani, Kerisendom ena haroro taudia ese gavamani taudia idia noia goadagoada, Bible Student taudia edia gaukara do idia taravatua. (Unai neganai Iehova ena Witness taudia idia gwauraidia Bible Student taudia.)—Apokalupo 11:7, 10.
19. Lagani 1919 amo ema bona hari, Iehova ese edena bamona ia hahedinaraia ena tomadiho dainai ia mama?
19 To, Iehova ese ia hahedinaraia ena tomadiho dainai ia mama. Iena orea taudia idia helalo-kerehai dainai, tuari murinai, lagani 1919 lalonai, ia lalo-namo henidia lou. (Apokalupo 11:11, 12) Unai dainai, Iehova hanamoa taudia idia momo daekau; lagani 1918 lalonai edia momo be 4,000 henunai, to hari idia be milioni ima bamona. (Isaia 60:22) Nega daudau lasi, Iehova ese kara badadia amo do ia hahedinaraia ena tomadiho dalana goevana dainai ia mama.
Dirava be Ena Mama Dainai Do Ia Karaia Karadia
20 Lagani handred momo lalodiai, Kerisendom ena tomadiho oreadia ese Iuda taudia, edia raka kerere amo Iehova idia hamamaia taudia, edia dala idia rakalaia. (Esekiela 8:3, 17, 18) Kahirakahira Iehova Dirava ese lalohadai idau hereana ta be United Nations oreana ena memba edia lalona ai do ia atoa. Unai ese unai gavamani do ia ha-uradia, bena idia ese Kerisendom bona tomadiho koikoi orena do idia hadikaia ore. (Apokalupo 17:16, 17) Dirava ena hahemaoro karana be unai hahegari dalana ai do idia karaia neganai, tomadiho momokani taudia ese unai amo do idia roho mauri. Guba taudia edia hereva hegeregeredia do idia kara; unai hereva be inai: “Aleluia! Dirava ita hanamoa! . . . Badina be . . . ia ese ariara hahine badana [tomadiho koikoi] ia kota henia vadaeni. Unai hahine ese, iena matabodaga kara [iena hahediba herevadia koikoidia bona ena heduru, gavamani dikadia ia henidia heduruna] dekena amo tanobada ia hadikaia. Dirava ese ia panisia, badina be unai hahine ese, Dirava ena hesiai taudia ia alaia mase dainai.”—Apokalupo 19:1, 2.
21 Tomadiho koikoi basileiana tanobada hegegemadai be do idia hadikaia ore murinai, dahaka do ia vara? Satani ese unai gavamani do ia ha-uradia dainai, tanobada ibounai lalonai Iehova ena orea taudia do idia tuari henidia. Satani ese tomadiho momokani be tanobada ena kopina amo unai bamona do ia haorea toho neganai, Dirava momokani be edena bamona do ia kara? Esekiela 38:19-23 ia gwau: “Egu badu [eiava, mama] ena siahu dainai, lau [Iehova] ese lau gwauraia inai . . . Hanaia gorere dikadia bona tuari dekena amo Goga [Satani] ena dika davana do lau henia. Medu bada herea bona aisi bamona medu, lahi bona salipa be Goga, bona iena orea taudia, bona ia idia durua besedia edia latanai do lau siaia diho. Unai dekena amo egu ladana ena namo herea bona egu helaga do lau hedinaraia, bona bese momo edia vairana dekenai egu kara do lau hedinaraia. Unai neganai do idia diba lau be [Iehova].”—Sepanaia 1:18; 3:8 danu itaia.
22. Edena bamona ita hahedinaraia diba Iehova tomadiho henia dalana goevana dainai ita mama?
22 Iseda lalona idia goada momokani, badina be ita diba guba bona tanobada edia Pavapava ese ia idia tomadiho henia taudia momokanidia ia naria mai ena mama ida! Iena hebogahisi ita laloa bada dainai, namona be Iehova Dirava tomadiho henia dalana goevana dainai do ita mama. Namona be sivarai namona do ita harorolaia noho mai eda lalo-siahu ida bona dina badana do ita naria; unai dina ai Iehova ese ena ladana badana be ma do ia habadaia bona do ia hahelagaia.—Mataio 24:14.
Inai Do Oi Laloa Namonamo
◻ Ta be Iehova dainai ia mama, anina be dahaka?
◻ Idaunegai Israela taudia edia haheitalai ese ita be dahaka ia hadibaia?
◻ Edena bamona do ita kara, Iehova ena mama do ita havaraia garina?
◻ Dirava bona Keriso be edena bamona idia hahedinaraia vadaeni tomadiho dalana goevana dainai idia mama?
1. Iehova ena kara badana be dahaka, bona ena anina iena mama dekenai be dahaka?
4. Dirava ese ena Taravatu be Israela ia henia neganai, mama maorona be edena bamona ia gwauraia?
9. Israela taudia bona Iuda taudia be Iehova tomadiho dalana maorona dainai idia mama lasi dainai, dahaka ia vara idia dekenai?
20. Nega daudau lasi Iehova ese dahaka do ia karaia, unai amo do ia hahedinaraia tomadiho dalana goevana dainai ia mama?
21. (a) Gavamani ese tomadiho koikoi do idia hadikaia ore murinai, Satani bona ena orea ese dahaka do idia karaia? (b) Unai dainai Iehova be edena bamona do ia kara?
[Box on page 12]
Lalokau Ia Mama Lasi
LAGANI 1800 C.E. murinai, Baibel ia tahua namonamo tauna Albert Barnes ese mama ia herevalaia, ia gwau: “Ia be kara dika idia hahedinaraia daladia badana ta, bona ia hahedinaraia goevagoeva taunimanima idia dika momokani.” Ma ia gwau: “Tuari bona hepapahuahu bona tanobada taudia edia palani iboudiai—anina be sibodia idia gwauraia Keristani taudia edia palani iboudiai danu, edia tomadiho idia hadikaia bona tanobada laloa bada taudia ai idia halaodia palanidia unai—bema ta ese edia badina ia tahua diba, do ia hoa, badina be do ia davaria, unai palani momo be mama dainai idia karaia. Iseda lalona idia hisihisi badina be haida edia kohu ena momo ese iseda kohu ena momo ia hanaia; ena be ita be mai eda maoro lasi do ita abia, to ita ura ma haida ese idia abia kohuna be ita danu do ita abia; bena dala kereredia amo ita ese edia kohu idia moalelaia moalena ita hamaragia toho, eiava ita abia toho siboda eda, eiava ena be idia laloa edia kohu be momo, to ita hahedinarai henidia toho ia be momo lasi. . . . badina be unai dala amo iseda mama ita hagugurua diba.”—Roma 1:29; Iamesi 4:5.
To, Barnes ese lalokau, ia ‘mama lasi’ gauna, ia gwauraia. (1 Korinto 13:4) Ia gwau: “Lalokau ese haida edia moale ia mama henia lasi; edia namo ia moalelaia; bona edia moale ia bada ia lao neganai . . . mai edia lalokau taudia ese . . . edia moale do idia hamaragia toho lasi; idia moale dainai do idia hahemaraidia toho lasi; edia moale do idia kokia toho lasi; edia hahenamo ese sibodia edia hahenamo idia hereaia dainai do idia maumau lasi. . . . Bema taunimanima ita lalokau henidia—bema edia moale ita moalelaia, namo lasi ita mama henidia.”
[Picture on page 10]
Pineha be Iehova tomadiho henia dalana goevana dainai ia mama