Mama​—Kahirakahira Egu Mauri Ia Hadikaia

LAU headava lou neganai, mama ese lau ia hadikaia. Egu adavana matamatana, Mark,a bona lau, ese iena natuna bona lauegu natuna ai naridia bona emai adavana gunadia itaia lou lou karana ai haheaukalaia. Nega haida emai noho lau haheaukalaia diba lasi. Famili lalonai heai idia vara negadiai, toana be Mark ese lau ia durua lasi. Lauegu mamina be ia ese ena adavana gunana ia do lalokau henia. Lauegu mama lau biagua lasi, to ia ese egu mauri ia biagua. Mark ena adavana gunana lau itaia negadiai, egu lalona ena mamina ia dika.

Nega ibounai Mark lau raraia, ena matana danu lau raraia, do lau diba ia be edeseni ia roharoha totona. Ena kara lau laloa kerere; ia laloa lasi gaudia be lau laloa ia lalodia. Nega haida lau gwau henia, lau hamaoroa ia ese ena adavana gunana ia do lalokau henia. Nega ta ena lalona ia hisihisi bada dainai, Keristani hebouhebouna ta ia rakatania. Iehova vairanai egu lalona ese lau ia samania. Lauegu kara amo egu famili ena noho lau hadikaia, badina be egu kara ese emai natuna ia hadikadia. Lauegu kara dainai sibogu lau inai henia, to ena be lau hekwarahi egu mama do lau biagua totona, to lau hegeregere lasi.

Mark ese lau ia durua lasi, to egu davana ia henia matamaia. Ena kara lau gwauraia dika negadiai, lau ia lolo henia, ia gwau, “Mama, oi mama inai.” Toana be kara haida ia karaia mai ena ura ida, do lau mama totona. Reana ia laloa unai dala amo egu mama do ia koua, to gauna be egu mama ia habadaia. Ia ese hahine idaudia ia hagerea matamaia bona edia hairai ia gwauraia. Ena kara dainai, lau laloa ena matana ai lau be hegeregere lasi bona lau ia ura henia lasi. Bena mamina ma ta​—badu​—lau abia. Unai neganai lau daradara bada, lau ura ia bona ena famili amo do lau siri vaitani.

Baibel ena hereva be momokani, ia gwau: “Mama ese oiemu gorere dikana do ia havaraia.” (Aonega Herevadia 14:30) Egu mauri ia dika ia lao. Egu bogana lalonai toto idia vara, bona idia namo lou haraga lasi. Mark lau abidadama henia lasi dainai ena kara iboudiai lau laloa kerere, bena unai ese egu lalona ia hahisia bada. Ena poketi lau tahua, bena telefon namba bema lau davaria, unai namba lau giroa, ia be daika ena namba do lau diba totona. Egu lalona ai sibogu egu kara lau hemarailaia bada dainai lau tai, badina be Iehova vairanai lau hemarai. To egu kara lau hadokoa diba lasi. Lau be sibogu egu inai tauna badana.

Lauma dalanai lau manoka lau lao ela bona lau guriguri diba lasi. Iehova lau lalokau henia bona lau ura dikadika do lau kara maoromaoro. Tatau bona hahine idia gwauraia Baibel siridia iboudiai lau diba, to lau badinaia diba lasi. Ena be lau be mai egu natuna namodia, to lau ura lasi mauri; unai be nega ginigunana unai lalohadai lau abia.

Keristani kongregesen ena elda taudia ese lau idia hagoadaia bona edia diba hegeregerena lau idia durua toho. To mama idia herevalaia neganai, lau hamaorodia lau mama lasi. Hemarai dainai, lau ura lasi lau gwau egu hekwakwanai be unai.

Gabeai, egu goada ia maragi ia lao, unai dainai lau lao hospital, opereisini abia totona. Unuseniai lau noho lalonai, egu lalona ia parara inai bamona ai noho be namo lasi. Mark bona lau ese emai lalona ai hadaia do ai parara, bena hua toi lalonai emai noho do ai tahua namonamo. Unai nega lalonai gau namona ta ia vara. Noga! magasin lalonai hereva ta ia hedinarai, ena sinado be “Heduru, Kekero Muramura Manadalaia Taudia Edia Natudia Totona.”b

Lauegu sinana ese kekero muramurana ia manadalaia. Ena be egu tamana bona sinana ese egu tauanina idia hadikaia lasi, to edia kara amo idia hahedinaraia lasi idia lalokau heheni eiava lau idia lalokau henia. Egu sinana ese lau ia rosia negana ta eiava lau ia hamaoroa lau ia lalokau henia negana ta be lau laloatao diba lasi. Unai dainai lau tubu daekau lalonai, lalokau henia karana bona lalokau abia karana be lau manadalaia lasi.

Nega momo egu sinana ese egu tamana ena lebulebu karadia be lau ia hamaorolaia, bona ia gwau ia abidadama henia diba lasi. Unai dainai lau tubu daekau lalonai tatau lau abidadama henidia lasi. Egu tamana bona sinana ese lau idia naria dalana dainai, nega ibounai lau laloa hahine bona ma haida ese lau idia hereaia. Unai hereva Noga! magasin lalonai ese lau ia durua, unai gau do lau lalo-pararalaia totona. Unai be nega ginigunana egu mama ena badina korikorina lau lalo-pararalaia.

Unai Noga! magasin ena hereva be lauegu adavana, Mark, dekenai lau hahedinaraia, bona unai ese ia durua lauegu kara do ia lalo-pararalaia totona. Nega daudau lasi ia bona lau ese Baibel ena sisiba, idia parara gwauraia taudia dekenai ia gwauraia sisibana, ai badinaia. Ai herohemaino lou. (1 Korinto 7:​10, 11) Hari emai headava be namo herea, guna negana ena namo ia hereaia. Keristani karadia bona gaukara ma momo ai karaia hebou. Mark ena hebogahisi be hari ia bada. Kahirakahira dina dina iboudiai lau ia hamaoroa lau ia lalokau henia, bona hari ena hereva lau abia dae momokani.

Bema lau diba Mark ena adavana gunana do ai hedavari henia, Iehova lau noia lau do ia hagoadaia bona lau do ia durua, lo Keristani hahinena hegeregerena do lau kara totona. Unai ese lau ia durua. Guna unai hahine lau inai henia bada, to hari be lasi. Lalona hamanokaia gaudia lau laloa noho lasi bona egu lalohadai lau biagudia.

Nega haida lau do mama sisina. Dirava ena tanobada matamatana lalonai mauri goevadaena sibona ese egu mama dikana do ia kokia vaitani. Unai nega be do lasi lalonai, mama ese lau ia biagua karana lau koua bona lau ese ia lau biagua karana lau manadalaia vadaeni. Oibe, mama ese egu mauri be kahirakahira ia hadikaia, to Iehova bona ena orea lau tanikiu henidia, badina be hari egu moale be bada, bona lau goada lou. Bona egu hetura karana egu Dirava, Iehova, ida be ia goada lou.​—Ta ena sivarai.

[Footnotes]