Iehova ese Maino Bona Hereva Momokani Ia Henia Badabada
“Lau ese maino momokani, bona noho namo idia dekenai do lau henia bada.”—IEREMIA 33:6.
MAINO! Taunimanima ese idia ura henia, to matamana amo ema bona hari ia be bada lasi! Idia hanai laganidia 90 bamona, be maino laganidia lasi. To, unai nega lalonai tuari badadia rua idia vara, edia dika ena bada ese tuari gunadia edia dika ia hereaia. Tanobada ibounai tuarina ginigunana murinai, League of Nations oreana idia haginia, tanobada ena maino naria totona. Unai orea ia kwalimu lasi. Tanobada ibounai tuarina iharuana murinai, United Nations oreana idia haginia, tanobada ena maino naria totona. Bema niuspepa ita duahidia, ita diba unai orea danu ia kwalimu lasi.
2 Taunimanima edia orea ta ese maino ia havaraia diba lasi dainai, unai do ita hoalaia a? Lasi. Lagani 2,500 bamona idia lao vadaeni, Iehova ese ia abia hidi besena, Israela, be unai ia hadibalaia. Lagani 600 B.C.E. be do lasi neganai, siahu bada ia abia basileiana, Babulonia, ese Israela ena maino ia kokia gwauraia. Israela ese Aigupito ena heduru ia tahua, maino ai do ia noho totona. Aigupito ia kwalimu lasi. (Ieremia 37:5-8; Esekiela 17:11-15) Lagani 607 B.C.E. ai, Babulonia ena tuari oreadia ese Ierusalema ena magu idia hamakohidia bona Iehova ena dubu helaga idia gabua ore. Unai amo Israela ia diba, taunimanima edia orea abidadama henia karana be anina lasi. Unai bese ese maino idia moalelaia lasi, to tuari taudia ese idia abidia mauri, Babulonia idia laohaia.—2 Sivarai 36:17-21.
3 To, Ierusalema ia do moru lasi neganai, Iehova ese ia hahedinaraia, Aigupito ese maino korikorina be Israela do ia henia lasi, to ia ese do ia henia. Ieremia ena amo ia gwauhamata, ia gwau: “Ena taudia be do lau hagoadaia lou. Lau ese maino momokani, bona noho namo idia dekenai do lau henia bada. Iuda bona Israela edia noho namo be do lau henidia lou, bona do lau haginidia lou, guna idia gini hegeregerena.” (Ieremia 33:6, 7) Iehova ena gwauhamata be lagani 539 B.C.E. ai ia momokani matamaia. Unai lagani ai haida ese Babulonia idia halusia bena Babulonia ai idia noho Israela taudia ruhaia herevana idia gwauraia. (2 Sivarai 36:22, 23) Lagani 537 B.C.E. ena dokona kahana ai Israela taudia haida ese Au Raurau Ruma Maragidia Ariana idia badinaia; lagani 70 lalonai Israela tanona ai idia badinaia negana ginigunana be unai! Aria murinai, Iehova ena dubu helaga idia haginia lou matamaia. Unai gaukara be edena bamona idia laloa? Baibel ia gwau: “Idia ibounai ese [Iehova] idia hanamoa henia, mai gado bada, bona mai boiboi bada danu, badina be Dubu Helaga ena badina nadidia idia haginia hamatamaia vadaeni dainai.”—Esera 3:11.
4 Dubu helaga idia haginia matamaia mai edia moale ida, to gabeai edia inai taudia ese edia lalona idia hamanokaia bena unai gaukara idia hadokoa. Lagani haida murinai, Iehova ese peroveta taudia Hagai bona Sekaraia ia abia hidi, idia ese Israela taudia do idia hagoadaia, haginia gaukarana do idia hagugurua totona. Hagai ia gwau Iehova ese do idia haginia dubuna be inai bamona ia gwauraia: “Inai Dubu Helaga matamatana ena hairai ese Dubu Helaga gunana ena hairai do ia hereaia. Bona inai gabu dekenai, egu bese taudia dekenai noho namo bona maino do lau henia. Lau, Siahu Ibounai Lohiabada inai, lau hereva vadaeni.” Unai idia kamonai neganai idia moale bada!—Hagai 2:9.
Iehova ese Ena Gwauhamata Ia Hamomokanidia
5 Dirava ese ia henia mata hanaidia bona peroveta herevadia momo, lagani 600 B.C.E. murinai iena bese taudia idia hagoadaia herevadia, be Baibel bukana Sekaraia lalonai ita duahia. Unai peroveta herevadia ese ita idia hadibaia noho Iehova ese ita do ia durua. Idia dainai ita abia dae, hari inai negai danu Iehova ese maino be ena orea taudia do ia henidia. Peroveta tauna Sekaraia ese ia torea bukana ena karoa 8 lalonai, nega 10 bamona ia gwau: ‘Lohiabada ia gwau.’ Unai hereva ia gwauraia negadia ta ta iboudiai murinai, Dirava ena hereva, iena bese taudia edia maino ia gwauraia herevana, ia gwauraia. Unai gwauhamata haida be Sekaraia ena negai idia momokani. Idia iboudiai be hari inai negai idia momokani vadaeni eiava ia hamomokanidia noho.
“Siona Do Lau Durua”
6 Unai hereva be Sekaraia 8:1, 2 ai ia torea guna, ia gwau: “Siahu Ibounai Lohiabada . . . ia gwau, ‘Siona do lau durua totona egu lalona ia hekwarahi bada noho, badina be Ierusalema lau lalokau henia bada noho. Inai lalokau ia goada dainai, lau ese Siona idia hadikaia gwauraia taudia lau badu henidia noho.’ ” Iehova ia gwauhamata iena bese taudia do ia durua mai ena lalo-goada bada ida, anina be edia maino do ia havaraia lou. Unai lalo-goada ia hahedinaraia dalana be inai: Israela be ena tano dekenai ia loulaidia bena dubu helaga idia haginia lou.
7 To, Iehova ena bese taudia idia inai henidia taudia dekenai dahaka ia vara? Iena bese taudia ia lalokau henidia bada, to edia inai taudia ia “badu henidia” dikadika. Iuda taudia mai edia kamonai be idia haginia lou dubuna ai idia tomadiho neganai, basileia goadana, Babulonia, dekenai ia vara gauna idia laloa diba, unai neganai ia moru vadaeni. Inai danu idia laloa diba: Edia inai taudia ese dubu helaga haginia lou gaukarana idia koua toho, to idia kwalimu lasi, idia lusi vaitani. (Esera 4:1-6; 6:3) Bona Iehova idia tanikiu henia diba, badina be iena gwauhamata ia hamomokania. Iena lalo-goada ese ia hakwalimudia!
“Abidadama Ena Hanua”
8 Ma nega ta, nega iharuana, Sekaraia ia gwau: “Lohiabada ese inai bamona ia hereva.” Unai neganai Iehova be dahaka ia gwau? Ia gwau: “Siona dekenai do lau giroa lou, Ierusalema, egu hanua helagana, ena huana dekenai do lau noho. Unai neganai Ierusalema ena ladana do idia atoa, Abidadama Ena Hanua, bona Siahu Ibounai Lohiabada ena ororo, ma do idia gwauraia, Ororo Helagana.” (Sekaraia 8:3) Lagani 607 B.C.E. ia do ginidae lasi neganai, Ierusalema be abidadama hanuana lasi. Iena hahelaga taudia bona peroveta taudia idia kara dika, bona iena taunimanima ese Dirava idia badinaia lasi. (Ieremia 6:13; 7:29-34; 13:23-27) To gabeai, Dirava ena bese taudia ese dubu helaga idia haginia lou, unai amo idia hahedinaraia tomadiho goevana idia badinaia. Unai neganai Iehova be Ierusalema ai ia noho lou, lauma dalana ai. Tomadiho goevana ena hereva momokani be ia lalonai idia herevalaia lou, unai dainai Ierusalema be “Abidadama Ena Hanua” idia gwauraia diba. Ia be ororo ai ia noho, unai dainai “Siahu Ibounai Lohiabada ena ororo” idia gwauraia diba.
9 Unai hereva ruaosi be mai anina idaunegai Israelana dekenai, bona hari inai negai idia be mai anina ita dekenai danu. Lagani 80 bamona gunanai, tanobada ibounai tuarina ginigunana negana lalonai, horoa taudia tausen haida, “Dirava ena Israela” taudia haida unai, be lauma dalanai idia guidia, idaunegai Israelana be Babulonia ai idia guia bamona. (Galatia 6:16) Peroveta herevana ta ese ia gwauraidia, idia be mase tauanidia dala ai idia hekure. To, idia do ura dikadika Iehova be “lauma bona momokani” ai do idia tomadiho henia. (Ioane 4:24) Unai dainai, lagani 1919 ai, Iehova ese igui amo ia ruhadia. Guna idia be lauma dalana ai idia mase bena unai lagani ai unai mase amo ia hatoredia isi lou. (Apokalupo 11:7-13) Unai dala amo Iehova ese Isaia ena peroveta henanadaina, “[Tano] ta be dina tamona sibona lalonai do ia vara, a? Bese ta be nega sisina lalonai do idia havaraia, a?” ia haerelaia, ia gwau Oibe. (Isaia 66:8) Iehova ena orea taudia be bese ta lauma dalana ai, bona lagani 1919 ai sibodia edia “tano,” edia noho gabuna lauma dalana ai tanobada dekenai, idia noholaia lou.
10 Horoa Keristani taudia be unai tano ai idia noho namo bona Iehova ena lauma dubuna badana ai idia gaukara. Baibel ese ‘hesiai tauna mai ena kamonai bona mai ena kara maoromaoro’ ia gwauraidia, bona Iesu ena kohu tanobada ai naria gaukarana idia abia dae; lagani 2000 ia mai kahirakahira negana ai unai gaukara idia do karaia noho mai edia moale ida. (Mataio 24:45-47) Idia diba goevagoeva Iehova be “maino ena Dirava.”—1 Tesalonika 5:23.
11 To, Dirava ena Israela ena inai taudia dekenai dahaka ia vara? Iehova ese ena orea taudia ia lalokau henidia bada, to edia inai taudia ia badu henidia dikadika. Tanobada ibounai tuarina negana lalonai, Kerisendom ena tomadiho gunalaia taudia idia gaukara goada, unai orea maragina, hereva momokani idia gwauraia Keristani taudia edia orea, do idia haorea vaitani totona, to idia kwalimu lasi. Tanobada ibounai tuarina iharuana negana lalonai, Kerisendom ena haroro taudia ese gau tamona idia lalo-tamonalaia: Idia tuari heheni besedia lalonai, idia ese gavamani idia ha-uradia Iehova ena Witness taudia do idia koua. Hari inai negai danu, tano momo lalodiai tomadiho gunalaia taudia ese gavamani idia ha-uradia Iehova ena Witness taudia edia Keristani haroro gaukarana do idia koua sisina eiava do idia taravatua vaitani.
12 Iehova ese edia kara ia itaia. Tanobada ibounai tuarina ginigunana murinai, Kerisendom bona Babulonia Badana orena danu, idia moru. (Apokalupo 14:8) Lagani 1922 ai, taunimanima be ena moru idia dibaia matamaia, badina be unai lagani ai haida ese hisihisi be Kerisendom latanai idia bubua diho matamaia; taunimanima idia hadibadia lauma dalana ai ia mase bona kahirakahira do ia ore vaitani. (Apokalupo 8:7–9:21) Unai hisihisi idia do bubua noho. April 23, 1995 ai, haroro herevana ta, ena sinado be “Tomadiho Koikoi Ena Dokona be Kahirakahira,” be tanobada hegegemadai idia harorolaia, bena Basileia Sivaraina pepana matamatana ena kopi milioni momo herea idia hariharilaia.
13 Hari inai negai, Kerisendom ena noho ia dika. Idia hanai laganidia 90 bamona lalodiai, ena orea taudia be tuari dikadia ai idia ala-ala heheni bona ena pris bona haroro taudia ese unai tuari idia hanamodia. Tano haida ai, ena siahu be sisina sibona mo. Ia bona Babulonia Badana orena danu be do idia hadikaia ore.—Apokalupo 18:21.
Iehova Ena Orea Taudia ese Maino Idia Abia
14 To Iehova ena orea taudia be idau. Hari lagani 1996 ai, idia noholaia tanona ai maino bada idia moalelaia, Iehova ena hereva ihatoina ia gwauraia bamona: “Siahu Ibounai Lohiabada ma ia gwau, ‘Tau burukadia bona hahine burukadia be Ierusalema hanua ariara lalonai ma do idia helai, idia ta ta mai edia raka audia, idia buruka herea vadaeni dainai. Bona unai hanua ariara be memero bona kekeni ese do idia hahonua, ariara edia lalonai do idia gadara.’ ”—Sekaraia 8:4, 5.
15 Unai hereva namona ese hoa gauna ta ia hahedinaraia—taunimanima haida be maino ai idia noho, inai tanobada, tuari ese ia hadikaia tanobadana, lalonai. Lagani 1919 amo, Isaia ena peroveta herevana ena anina ia vara: “Lohiabada ma ia gwau, ‘. . . Idia ibounai dekenai maino do lau henia, daudau idia noho, bona kahirakahira idia noho taudia danu. Bona lau ese idia do lau hanamoa lou. To . . . kara dika taudia dekenai, maino ia noho lasi.’ ” (Isaia 57:19-21) Momokani, ena be Iehova ena orea taudia be inai tanobada ena lasi, to bese edia heiriheiri ese ia hahisidia. (Ioane 17:15, 16) Tano haida lalodiai, hisihisi bada idia haheaukalaia, bona idia haida be haida ese idia alaia mase danu. To, Keristani taudia korikoridia be mai edia maino, dala badadia rua ai. Ginigunana be, “Dirava danu maino [idia] abia, Iesu Keriso [edia] Lohiabada dainai.” (Roma 5:1) Iharuana be, idia bogaragidiai maino ia noho. ‘Dirava dekena amo aonegana’ idia habadaia; iena toana ginigunana be “laloa goevagoeva,” unai murinai “maino.” (Iamesi 3:17; Galatia 5:22-24) Inai danu, nega vaira, maino do idia moalelaia guguru negana, idia naria mai edia moale ida, badina be unai nega lalonai “manau taudia ese noho gabuna tano do idia abia, do idia helai namonamo, mai moale bona mai maino danu.”—Salamo 37:11.
16 “Tau burukadia bona hahine burukadia,” Iehova ena orea ena kwalimu gunadia idia laloatao horoa taudia unai, be Iehova ena orea taudia bogaragidiai idia do noho. Edia abidadama bona edia haheauka ita laloa bada. Buruka lasi horoa taudia ese Iehova ena orea taudia idia gunalaia, lagani 1930 murinai dagedage ia vara negana ai bona Tanobada Ibounai Tuarina Iharuana negana ai, bona unai murinai Dirava ena orea ia bada ia lao haraga negana ai danu. Ma danu, lagani 1935 amo, “mamoe idaudia” “hutuma bada herea” idia hedinarai. (Ioane 10:16; Apokalupo 7:9, NW) Horoa Keristani taudia idia buruka idia lao bona edia momo ia diho negana ai, mamoe idaudia ese haroro gaukarana idia goadalaia bona tanobada hegegemadai idia karaia. Idia hanai laganidia lalodiai, mamoe idaudia be Dirava ena orea taudia edia tano lalonai idia aru vareai. Lagani 1995 ai, taunimanima 338,491 ese bapatiso idia abia, edia gwauhamata Iehova dekenai ena toana unai! Unai bapatiso matamata taudia be matamata momokani lauma dalana ai. ‘Iseda Dirava, helai gabu badana dekenai ia helai Diravana, bona Mamoe ena Natuna’ hanamolaia anedia idia abia taudia ida ane idia abia lalonai, edia goada matamatana ita laloa bada.—Apokalupo 7:10.
17 Hari inai negai, ‘hanua ariara be memero bona kekeni ese idia hahonua’; idia be Witness taudia mai edia goada, memero kekeni hegeregeredia. Hesiai laganina 1995 ai, Society ese tano bona motumotu 232 amo ripoti ia abidia. To Witness taudia tano idauidau ai idia kara helulu lasi, bese idauidau ai idia inai heheni lasi, bona horoa taudia bona mamoe idaudia be idia mama heheni lasi. Lalokau ese ia hatamonadia bona lauma dalana ai idia tubu daekau hebou. Tanobada hegegemadai Iehova ena Witness taudia be tadikaka bamona idia noho, unai dala ai idia be idau, taunimanima oredia hegeregeredia lasi.—Kolose 3:14; 1 Petero 2:17.
Iehova ese Ia Karaia be Auka, A?
18 Lagani 1918 ai, horoa orena taudia edia lalona idia goada lasi bona lauma dalana ai idia guidia bona idia be tausen haida sibona neganai, ta ese gabeai do ia vara gauna ia diba lasi. To, Iehova ia diba—ena peroveta herevana namba 4 ese ia hahedinaraia hegeregerena: “Siahu Ibounai Lohiabada ia gwau, ‘Sedira umui momo lasi, do mauri noho taudia be umui gwau, “Inai bamona kara be ia vara diba lasi,” to lau be lau diba inai kara be momokani do ia vara.’ ”—Sekaraia 8:6.
19 Lagani 1919 ai, Iehova ena lauma ese ena orea taudia ia hamauria lou, iena ura gaukarana do idia karaia totona. To, ta ese Iehova tomadiho henia taudia edia orea maragina ia badinaia totona, abidadama be gau badana. Idia be haida mo, bona gau momo idia do hedinarai goevagoeva lasi. To, sisina sisina Iehova ese edia orea ia hagoadaia bona ia hahegaegaedia, idia ese Keristani gaukarana, sivarai namona harorolaia bona taunimanima be hahediba taudia ai halaoa gaukarana, do idia karaia totona. (Isaia 60:17, 19; Mataio 24:14; 28:19, 20) Metairametaira ia durudia, bena tanobada amo idia gini siri karana bona iena lohia siahuna badana idia lalo-pararalaia. Iehova ese unai Witness taudia edia orea maragina amo ena ura ia hagugurua be auka, a? Lasi vaitani! Inai magasin ena rau 12 ela bona 15 ese unai ia hahedinaraia. Unuseniai be Iehova ena Witness taudia edia hesiai laganina 1995 ena ripoti ia noho.
‘Lau be Edia Dirava ai Do Lau Lao’
20 Hereva namba 5 ese Iehova ena Witness taudia edia noho namo hari inai negai ia herevalaia. Iehova ia gwau: “Lau ese unuseni idia noho tano idauidau dekena amo egu bese taudia do lau hamauria lou. Dina daekau kahana, bona dina diho kahana dekena amo idia do lau mailaia lou. Ierusalema dekenai do idia noho. Idia be egu bese taudia do idia lao, bona lau be edia Dirava do lau lao. Idia do lau biagua, mai laloa maoromaoro bona kara momokani danu.”—Sekaraia 8:7, 8.
21 Lagani 1996 ai, mai eda momokani ida ita gwau diba, sivarai namona be tanobada hegegemadai idia harorolaia vadaeni, “dina daekau kahana” amo ela bona “dina diho kahana.” Bese iboudiai taudia be hahediba taudia ai idia halaoa vadaeni, bona Iehova ena gwauhamata ena anina idia itaia vadaeni, ia gwau: “Lau sibona ese oiemu noho taudia do lau hadibaia, vadaeni mauri namona bona maino do idia davaria.” (Isaia 54:13) Iehova ese ita ia hadibaia dainai ita be mai eda maino. Diba do ita abia totona, buka bona magasin be gado 300 bamona ai idia printaia vadaeni. Lagani 1995 ai, gado ma 21 ai idia printaia. Gima Kohorona, edia anina be hegeregere gaudia, be gado 111 ai idia halasia hebou, bona Noga! magasin be gado 54 ai idia halasia hebou. Nesenel bona intenesenel hebouheboudia amo Dirava ena orea taudia edia maino be taunimanima edia vairanai ia hedinarai. Pura ta ta ai ita karaia heboudia ese ita idia hatamonaia bona ita idia hagoadaia, do ita gini auka totona. (Heberu 10:23-25) Oibe, Iehova ese ena orea taudia be “laloa maoromaoro bona kara momokani” ia hadibalaia. Ia ese maino be ena orea taudia ia henidia. Unai maino bada ita abia be hahenamo badana!
Inai Oi Gwauraia Diba A?
◻ Inai nega lalonai, Iehova be edena bamona ena orea taudia “ia lalokau henia bada” dainai, ia “badu”?
◻ Tuari idia vara gabudia ai danu, Iehova ena orea taudia ese maino be edena bamona idia moalelaia?
◻ Edena dala ai ‘ariara be memero bona kekeni ese idia hahonua’?
◻ Iehova ese ena orea taudia do ia hadibaia totona, dahaka ia henidia?
[Study Questions]
1, 2. (a) Tanobada besedia edia sivarai hegeregeredia, edia maino be edena bamona? (b) Lagani 607 B.C.E. ai Iehova ese Israela be maino edena bamona ia hadibalaia?
3. Iehova ese Ieremia ena amo ia gwauraia herevana hegeregerena, dahaka ia vara bena unai kara amo ia ese Israela be maino ia hadibalaia lou?
4. Edena dala amo Iehova ese Israela taudia ia hagoadaia dubu do idia haginia totona, bona maino be edena bamona ia gwauhamatalaia?
5. Sekaraia karoa 8 ese dahaka ia herevalaia momo?
6, 7. Edena dala ai Iehova be ‘Siona ia lalokau henia bada dainai,’ ia “badu”?
8. Sekaraia ena negai, Ierusalema be abidadama ena hanua ai edena bamona ia lao, to guna ia be edena bamona?
9. Lagani 1919 ai, “Dirava ena Israela” ena noho be edena dala badana ai ia idau?
10. Lagani 1919 amo, horoa Keristani taudia be edia “tano” ai dahaka hahenamo idia moalelaidia?
11. Kerisendom ena tomadiho gunalaia taudia ese edena dala amo idia hahedinaraia idia be Dirava ena orea taudia idia inai henia taudia?
12, 13. Iehova ese Kerisendom ia badu henia dainai dahaka ia vara?
14. Edena peroveta herevana ese taunimanima edia maino toana ia gwauraia?
15. Ena be tanobada besedia idia tuari, to Iehova ena hesiai taudia ese dahaka maino idia moalelaia?
16, 17. (a) “Tau burukadia bona hahine burukadia” bona “memero bona kekeni” danu ese Iehova ena orea be edena bamona idia hagoadaia? (b) Dahaka ese Iehova ena orea taudia edia maino ia hahedinaraia?
18, 19. Taunimanima idia laloa ia vara diba lasi karana be lagani 1919 amo Iehova ese edena bamona ia karaia?
20. Peroveta herevana hegeregerena, Dirava ese ena orea taudia be edeseni amo ia gogodia?
21. Dahaka ese Iehova ena orea taudia edia maino bada ia naria bona ia habadaia?
[Chart on page 12-15]
1995 SERVICE YEAR REPORT OF JEHOVAH’S WITNESSES WORLDWIDE
(See bound volume)
[Picture on page 8, 9]
Dubu helaga be lagani 515 B.C.E. ai idia haginia guguru lou taudia, idia diba Iehova sibona ese maino ia havaraia diba