Hereva Momokani Oi Abia Dae Vaitani, A?
“Emui lalona umui hamatamataia amo umui idau, vadaeni umui sibona dekenai do umui hamomokania Dirava ena ura namona bona umui abia dae diba gauna bona goevadaena be dahaka.”—ROMA 12:2, NW.
1, 2. Dahaka dainai hari inai negai Keristani momokani maurina badinaia be mai ena hekwarahi?
HARI inai nega dokona ai—“metau dikadia momo” edia nega lalonai—Keristani momokani maurina badinaia be mai ena hekwarahi. (2 Timoteo 3:1) Momokani, ta ese Keriso ena haheitalai ia tohotohoa totona tanobada ia halusia be gau badana. (1 Ioane 5:4) Iesu ese Keristani dalana ia herevalaia mani oi laloa, ia gwau: “Iduara maragina dekenai do umui raka vareai. Badina [mase gabuna] ia lao dalana ena iduara ia bada, bona ena dala danu lababa herea. Bona ia auka lasi dainai, taunimanima momo herea be unai dala dekenai idia raka vareai. To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.” Ia be ma ia gwau: “Tau ta bema ia ura lauegu murina dekenai do ia mai, ia ese sibona dekenai do ia laloa lasi, dina ibounai iena satauro do ia abia isi, lauegu murina dekenai do ia raka.”—Mataio 7:13, 14; Luka 9:23.
2 Keristani tauna ese mauri ena dala aukana ia davaria murinai, unai dala dekenai ia noho totona do ia hekwarahi. Dahaka dainai unai be mai ena hekwarahi? Badina ita be gwauhamata bona bapatiso taudia dainai, Satani ia ura ena koikoi karadia amo ita ia hamorua. (Efeso 6:11) Iseda manoka gaudia ia tahua bona ia gaukaralaia, lauma dalanai ita ia hamorua totona. Momokani, ia ese Iesu ia hamorua toho, unai dainai ita laloa diba lasi ita do ia rakatania, ani?—Mataio 4:1-11.
Satani Ena Koikoi Karadia
3. Edena dala ai Satani ese Heva ena lalona dekenai daradara ena uhe ia hadoa?
3 Satani ese ia gaukaralaia dalana ta be, iseda lalona dekenai daradara ena uhe ia hadoa. Iseda lauma tuari dabua dekenai manoka gaudia ia tahua. Matamanai, ia ese unai dala ia gaukaralaia Heva ia hamorua totona, ia nanadaia: “Momokani, uma gabu ena au huahua ta ania lasi taravatu Dirava ese ia atoa o lasi?” (Genese 3:1) Satani ena hereva ena anina be, ‘Momokani Dirava ese umui dekenai unai bamona taravatu ia henia, a? Unai bamona gau namo hereana umui amo ia koua, a? Dirava ia diba unai au amo umui ania dinana dekenai emui matana be do idia kehoa bona Dirava bamona do umui noho, kara namo bona kara dika do umui diba!’ Satani ese daradara ena uhe ia hadoa bona ia naria unai uhe be do ia tubu.—Genese 3:5.
4. Hari inai negai edena bamona daradara gaudia idia vara diba?
4 Satani ese hari inai negai unai dala be edena bamona ia gaukaralaia? Bema iseda Baibel duahiduahi, sibona eda stadi, iseda guriguri, bona iseda Keristani hesiai gaukara bona hebou ita rakatania, dala ita kehoa bena ma haida edia daradara gaudia ese ita idia hamorua diba. Hegeregere: “Edena bamona ita diba inai hereva momokani be Iesu ese ia hadibaia bamona?” “Hari inai nega be nega dokona momokani, a? Badina ita be lagani tausen negana ihatoina lalonai ita noho vadaeni.” “Aramagedono be kahirakahira, eiava nega daudau murinai do ia vara?” Bema unai bamona daradara gaudia idia vara, dahaka ita karaia diba ita hanaia totona?
5, 6. Bema daradara gaudia be iseda lalona dekenai idia vara, dahaka ita karaia be namo?
5 Iamesi ese sisiba namona ia henia, ia gwau: “Bema umui ta be aonega lasi, namona be Dirava do ia noia . . . Badina be Dirava ese taunimanima ibounai dekenai gau namodia ia henia noho. . . . To unai tau ia noinoi neganai, namona be ia abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao, doria mai, ia be gini gabuna lasi. Bema daradara tauna ia laloa, gau ta Lohiabada dekena amo do ia abia diba, iena laloa be anina lasi. Badina be laloa rua tauna be iena kara ibounai lalonai, ia ese dala tamona sibona ia badinaia diba lasi.”—Iamesi 1:5-8.
6 Unai dainai, dahaka ita karaia be namo? Namona be guriguri amo ‘Dirava ita noia’ abidadama bona lalo-parara do ia henia, bona henanadai eiava daradara gaudia kokia totona sibona eda stadi karana ita habadaia. Abidadama goada taudia amo heduru ita noia diba danu, bona ita daradara lasi Iehova ese mai anina bada heduruna ita do ia henia. Iamesi be ma ia gwau: “Unai dainai Dirava ena ura do umui karaia. Satani do umui tuari henia, vadaeni umui dekena amo do ia heau boio. Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” Oibe, stadi bona guriguri amo Dirava kahirakahira dekenai ita lao neganai, iseda daradara gaudia be do idia ore.—Iamesi 4:7, 8.
7, 8. Dahaka gaudia ita laloa be namo, Iesu ia hadibaia tomadiho dalana ita diba totona, bona daidia ese unai gaudia idia badinaia?
7 Hegeregere, inai henanadai oi laloa: Edena bamona ita diba ita badinaia tomadiho be Iesu ese ia hadibaia hegeregerena? Unai ita haerelaia totona, dahaka gaudia ita laloa be namo? Baibel ese ia hahedinaraia Keristani taudia momokanidia huanai lalokau korikorina ia noho. (Ioane 13:34, 35) Dirava ena ladana, Iehova, idia hahelagaia. (Isaia 12:4, 5; Mataio 6:9) Bona unai ladana idia hadibaia.—Esodo 3:15; Ioane 17:26.
8 Tomadiho momokani ena toana ma ta be, Dirava ena Hereva, Baibel, idia matauraia. Ia be Dirava ena kara bona ena ura ia hahedinaraia buka badana. (Ioane 17:17; 2 Timoteo 3:16, 17) Danu, Keristani taudia momokanidia ese Dirava ena Basileia idia harorolaia, idia hahedinaraia ia be tanobada paradaisona lalonai mauri hanaihanai do ita abia dalana tamona. (Mareko 13:10; Apokalupo 21:1-4) Idia be inai tanobada ena politikol karadia dikadia bona ena kara mirodia amo idia gini siri. (Ioane 15:19; Iamesi 1:27; 4:4) Hari inai negai daidia ese unai gaudia idia badinaia? Gau momo ese idia hahedinaraia haere be tamona sibona—Iehova ena Witnes taudia.
Daradara Gaudia Idia Noho be Edena Bamona?
9, 10. Dahaka ita karaia diba idia noho daradara gaudia hanaia totona?
9 Bema ita ese gau haida ita daradaralaia be edena bamona? Dahaka ita karaia be namo? Aonega King Solomona ese haere ia henia, ia gwau: “Egu natuna e, lau, aonega, egu hadibaia hereva do oi tahua, bona egu oda do oi laloaboio lasi. Aonega herevadia do oi kamonai, bona oiemu kudouna ese laloa kehoa do ia ura henia. Bema oi ese aonega totona oi noinoi, bona bema laloa kehoa totona oi boiboi goada, bema oi tahua, siliva do oi tahua bamona, bema oi tahua goada, kohu momo, idia hunia gaudia, do oi tahua bamona, unai neganai Lohiabada gari henia kara do oi diba, bona Dirava do oi diba.”—Aonega Herevadia 2:1-5.
10 Unai lalohadai ese iseda lalona ia veria, ani? Bema mai eda ura ida Dirava ena aonega ita badinaia, ita ese ‘Dirava do ita diba.’ Oibe, guba bona tanobada ena Siahu Ibounai Lohiabadana ita dibaia diba, bema mai eda ura ida ena hereva ita abia dae bona ita laloa bada. Unai ena anina be guriguri bona sibona eda stadi karana amo Iehova dekenai ita lao. Iena Hereva lalonai idia noho hereva namodia ese daradara gaudia ibounai idia kokia diba, bona ita ia durua hereva momokani ena diari ita itaia totona.
11. Dahaka dainai Elisaia ena hesiai tauna ia daradara?
11 Dirava ena hesiai tauna ta, ia gari bona ia daradara tauna, be guriguri amo heduru ia abia, unai haheitalai be 2 King Taudia 6:11-18 lalonai ita davaria. Elisaia ena hesiai tauna ese lauma gaudia ia itaia namonamo lasi. Ia lalo-parara lasi guba anerudia idia noho Dirava ena peroveta tauna do idia durua totona, ia be Suria ena tuari taudia ese idia koua hagegea vadaeni. Unai hesiai tauna be mai gari ida ia boiboi: “Lohia e, madi ita be dika! Edena bamona do ita karaia?” Elisaia be dahaka ia gwau? “Oi gari lasi, badina be ita idia durua taudia be momo, to unai orea idia durua taudia be momo lasi.” To unai hesiai tauna ena abidadama be edena dala ai ia hagoadaia diba? Ia ese unai guba anerudia ia itaia lasi.
12. (a) Edena dala ai unai hesiai tauna ese ena daradara ia hanaia? (b) Edena dala ai iseda daradara ita hanaia diba?
12 “Vadaeni Elisaia ia guriguri, ia gwau, ‘Lohiabada e, oi dekenai lau noinoi, iena matana do oi kehoa, ia itaia diba totona.’ Unai dainai Lohiabada ese unai hesiai tauna ena matana ia kehoa, ia itaia, ororo be lahi kariota dekenai idia honu, idia ese Elisaia ia noho gabuna idia hagegea noho.” Unai nega ai Iehova ese unai hesiai tauna ena matana ia kehoa bona Elisaia idia gimaia guba anerudia ia itaia diba. To, namo lasi ita laloa hari inai negai danu Dirava ese unai bamona dala ai ita do ia durua. Mani oi laloatao, unai hesiai tauna dekenai Baibel ibounai ia noho lasi, ia stadi bona ena abidadama ia hagoadaia totona. To ita dekenai Baibel ia noho. Bema ita gaukaralaia namonamo, iseda abidadama do ia hagoadaia. Hegeregere, Iehova be ena noho gabuna guba dekenai idia herevalaia sivarai momo ita laloa diba. Idia dainai ita daradara lasi Iehova be mai ena guba oreana bona ia ese hari inai negai tanobada ibounai hadibaia gaukarana lalonai ena hesiai taudia ia durua.—Isaia 6:1-4; Esekiela 1:4-28; Daniela 7:9, 10; Apokalupo 4:1-11; 14:6, 7.
Satani Ena Koikoi Karadia Dainai Oi Naria Namonamo!
13. Satani ese dahaka ia karaia hereva momokani ita dogoatao auka lasi totona?
13 Satani ese dahaka dala ma haida ia gaukaralaia, lauma dalanai ita ia hamanokaia totona bona hereva momokani ita dogoatao auka lasi totona? Idia ta be matabodaga karadia idauidau. Matabodaga tanobada lalonai, heudahanai eiava sihari kava be dina ta ta iboudiai idia vara, badina inai uru taudia idia ura dikadika nega namona idia moalelaia, davana be herevana. Muvini piksa, televisen, bona vidio ese unai bamona mauri idia abia isi. Matabodaga sivarai bona laulau idia hahedinaraia noho, bona Internet lalonai idia hahedinaraia momo. Bema ta ia ura ia itaia toho sibona, hedibagani do ia davaria.—1 Tesalonika 4:3-5; Iamesi 1:13-15.
14. Dahaka dainai Satani ena koikoi karadia ese Keristani taudia haida idia hamorua?
14 Keristani taudia haida idia ura idia itaia toho sibona, bena lebulebu eiava matabodaga laulaudia amo edia lalona idia hamiroa. Dala idia kehoa Satani ena tarapu lalonai idia vareai totona. Unai dainai lauma dalanai idia moru momokani. Unai bamona taudia be “dika karaia totona natuna maragi bamona” idia laloa lasi. “Laloa dobu gaudia totona, tau badadia bamona” idia laloa lasi. (1 Korinto 14:20) Lagani ta ta ibounai, taunimanima tausen momo ese davana dikana idia abia, badina Dirava ena Hereva ena hakaua herevadia bona taravatu idia badinaia lasi. Idia be “Dirava ese ia henia tuari dabua” idia atoa lasi bona idia naria lasi.—Efeso 6:10-13; Kolose 3:5-10; 1 Timoteo 1:18, 19.
Ita Abia Gauna Laloa Bada
15. Reana dahaka dainai haida ese lauma dalanai idia abia ahuna idia laloa bada be auka?
15 Iesu ia gwau: “Hereva momokani be do umui diba, bona hereva momokani ese umui do ia ruhaia.” (Ioane 8:32) Witnes taudia momo ese edia mauri dalana gunana bona tomadiho gunana idia rakatania. Unai dainai, hereva momokani ese idia ia ruhaia karana idia laloa bada. To, hereva momokani lalonai idia noho tama sina ese idia naria matamata taudia momo ese reana lauma dalanai idia abia ahuna idia laloa bada be auka. Idia be tomadiho koikoi eiava moale tahua bada, drag ania kava, bona matabodaga karadia ia abia isi tanobadana lalonai guna idia noho lasi. Unai dainai, reana idia itaia lasi gauna be Satani ena tanobada dikana bona iseda lauma paradaisona be idau momokani. Reana haida be tanobada ena poisini ena mamina abia totona hedibagani idia davaria neganai idia moru, badina idia ura itaia dahaka gaudia idia reaia.—1 Ioane 2:15-17; Apokalupo 18:1-5.
16. (a) Edena henanadai ita laloa be namo? (b) Ita idia hadibaia bona hagoadaia dahaka ita karaia totona?
16 Hisihisi ena mamina ita dibaia totona lahi amo iseda ima kwakikwaki do ita gabua, a? Ma haida dekenai idia vara gau dikadia amo diba ita abia diba, a? Inai tanobada ena “kopukopu” dekenai do ita giroa gau ta ita reaia ita diba totona, a? (2 Petero 2:20-22) Petero ese aposetolo edia negai Satani ena tanobada lalonai guna idia noho Keristani taudia ia hereva henia, ia gwau: “Gunaguna umui be Dirava diba lasi taudia hegeregerena umui noho. Emui kara gunadia be inai: Matabodaga, sihari kava, kekero, lebulebu, uaina umui inua momo, bona kaivakuku dikadia umui tomadiho henia.” Momokani, mauri ena kahana dikana do ita lalo-pararalaia totona tanobada ena “lebulebu karadia” ita karaia be anina lasi. (1 Petero 4:3, 4) To, Iehova ena kara maoromaoro taravatudia be iseda Kingdom Hall, Baibel hadibaia gabudia badadia, dekenai ita idia hadibaia. Bona ita idia hagoadaia iseda lalona ita gaukaralaia dalana amo, sibona dekenai ita hamomokania ita ese hereva momokani ita abia, bona unai dala ai hereva momokani ita abia dae vaitani.—Iosua 1:8; Roma 12:1, 2; 2 Timoteo 3:14-17.
Iseda Ladana be Ladana Sibona Lasi
17. Edena dala ai ita be anina idia havaraia Iehova ena Witnes taudia ai ita lao diba?
17 Bema hereva momokani ita abia dae vaitani, ita hekwarahi dala ia kehoa negadia ibounai ma haida dekenai ita herevalaia. Ita gwau lasi unai ena anina be idia ura lasi kamonai taudia ita doria toho. Lasi. (Mataio 7:6) To, ita hemarai lasi bona ita hahedinaraia ita be Iehova ena Witnes taudia. Bema ta ese ura sisina ia hahedinaraia bona mai momokani ida henanadai ia henia eiava buka o magasin ta ia abia, do ita gini hegaegae iseda helaro ita herevalaia totona. To momokani, unai ita karaia diba totona herevana edeseniai ita noho—ruma ai, gaukara ai, sikuli ai, sitoa ai, eiava moale gabudia ai—buka, magasin, eiava pepapepa be hanaihanai ita abia lao.—1 Petero 3:15.
18. Bema ita hahedinaraia ita be Keristani taudia, edena dala ai unai ese iseda mauri lalonai namo ia havaraia diba?
18 Bema ita hahedinaraia goevagoeva ita be Keristani taudia, sibona ita hagoadaia Satani ena koikoi karadia ita dadaraia totona. Bema ta ena vara dinana idia moalelaia, Kerisimasi pati idia karaia, eiava opesi dekenai laki gadara idia karaia, nega momo gaukara turadia do idia gwau, “Ia oi laloa lasi. Ia be Iehova ena Witnes ta.” Unai badina tamona dainai, reana taunimanima idia ura lasi ita noho neganai hevaseha hereva dikadia idia gwauraia. Unai dala ai, ita hahedinaraia ita be Keristani tauna neganai, iseda mauri lalonai namo ia havaraia, bona aposetolo Petero ia gwau bamona: “Bema kara namodia umui karaia noho mai goada danu, daika ese umui do ia hadikaia diba? Ta lasi, ani? To, bema kara maoromaoro umui karaia, bona unai dainai hisihisi umui abia neganai, vadaeni do umui moale.”—1 Petero 3:13, 14.
19. Edena dala ai ita diba ita be inai tanobada ena dina gabedia momokani lalonai ita noho?
19 Hereva momokani ita abia dae vaitani karana ena namo ma ta be ita diba momokani, hari inai nega be inai tanobada ena dina gabedia momokani. Do ita diba Baibel ena peroveta herevadia momo be iseda nega lalonai idia guguru momokani.a Paulo ena hereva “nega ena dokona dekenai, metau dikadia momo do idia vara,” be lagani handred gunadia lalonai idia vara gau dikadia ese idia hamomokania. (2 Timoteo 3:1-5; Mareko 13:3-37) Vanegai sibona niuspepa ta lalonai lagani gunadia handred ia herevalaia kahana ta ena sinado be “Do Ita Laloatao Ia be Kara Dika Rohoroho Ena Nega.” Unai hereva ia gwau: “Ia hedinarai ala-ala laganidia handred edia lagani 50 lalodiai, lagani 1999 be ala-ala momo herea idia vara laganina.”
20. Hari be nega namona dahaka ita karaia totona?
20 Hari ita daradara lasi be namo. Ia hedinarai goevagoeva Iehova ese tanobada ibounai lalonai bese ibounai dekenai Baibel hadibaia gaukarana badana ia hanamoa. (Mataio 24:14) Namona be hereva momokani oi abia dae vaitani, bona ma haida dekenai oi hahedinaraia. Hari oi karaia gaudia be mai anina bada oiemu mauri hanaihanai helarona dekenai. Lahedo karana amo Iehova ena hahenamo do oi abia lasi. (Luka 9:62) To, hari be nega namona ‘ita gini goada, ita marere lasi, bona Lohiabada ena gaukara ita karaia goadagoada totona, bona do ita diba Lohiabada ena gaukara lalonai, eda hekwarahi be hekwarahi kava lasi momokani.’—1 Korinto 15:58.
[Footnote]
a Gima Kohorona, January 15, 2000, rau 12-14 itaia. Paragraf 13-18 ese gau 6 idia hahedinaraia, lagani 1914 amo ema bona hari ita be dina gabedia lalonai ita noho idia hamomokania goevagoeva.
Oi Laloatao, A?
• Edena dala ai daradara ita hanaia diba?
• Elisaia ena hesiai tauna dekenai ia vara gauna amo dahaka ita dibaia diba?
• Dahaka kara mirodia dainai ita naria namonamo be gau badana?
• Dahaka dainai namona be ita hahedinaraia goevagoeva ita be Iehova ena Witnes taudia?
[Pictures on page 10]
Baibel ita stadilaia bona ita guriguri hanaihanai ese ita ia durua daradara ita hanaia totona
[Picture on page 11]
Elisaia ena hesiai tauna ena daradara be matahanai ta amo ia hanaia
[Picture on page 12]
Iehova ena kara maoromaoro taravatudia be Kingdom Hall dekenai, inai Benin dekenai ia noho gauna bamona ai, ita idia hadibaia