Vadivadi ta be Namo Ia Havaraia Diba
1 Mai moale ida Sakaio ese Iesu ia abia dae iena ruma lalonai. Bona unai vadivadi ese namo bada ia havaraia!—Luka 19:2-9.
2 Hari inai negai, kongregesen ena Kwarana, Iesu Keriso, be elda taudia ia hamaoroa ‘Dirava ese idia ia henia mamoe orea do idia naridia namonamo.’ (1 Pet. 5:2, 3; Ioa. 21:15-17) Hebou dekenai hadibaia gaukara idia karaia bona haroro gaukara idia gunalaia, ma danu kongregesen ena elda taudia ese mai lalokau ida kongregesen ai idia noho taudia ta ta dekenai heduru idia henia. Unai dainai nega haida reana elda taudia be emu ruma dekenai, Kingdom Hall ai, umui haroro hebou neganai, eiava ma nega haida ai, oi dekenai heduru do idia henia. Elda taudia edia vadivadi oi garilaia be namo, a? Lasi vaitani. Namo lasi oi laloa gau ta oi karaia lasi dainai oi idia vadivadi henia. Lasi. Vadaeni, oi idia vadivadi henia ena badina be dahaka?
3 Paulo ia gwau ia ura tadikaka ia vadivadi henia ‘edia noho ia itaia, idia be edena bamona.’ (Kara 15:36) Oibe, lalokau mamoe naria taudia bamona, elda taudia idia ura diba oi be edena bamona. Idia ura lauma dalana ai oi idia durua bona hagoadaia. Iseda lalokau Mamoe Naria Tauna Iehova ia ura ita be unai bamona heduru ita abia.—Esek. 34:11.
4 Elda Taudia Edia Vadivadi Oi Abia Dae: Paulo ena tahua gauna tadikaka ia vadivadi henia neganai be ‘idia dekenai lauma helaga ena hanamoa do ia henia, vadaeni lauma ena goada do idia abia. Ia ura edia abidadama ese ia ia durua, bona iena abidadama ese idia ia durua. Inai bamona be goada idia abia nega tamona.’ (Roma 1:11, 12) Inai nega dokonai ita ibounai be lauma dalanai hagoadaia herevadia ita abia be namo, bona abidadama dekenai ita goada noho totona namona be heduru ita abia danu. Mamoe naria taudia edia vadivadi oi abia dae mai moale ida neganai, nega tamona oi bona elda taudia do umui hagoadaia heheni.
5 Namona be elda taudia edia mamoe naria gaukara ena hahenamo momo ita laloa bada. Bema gau ta eiava henanadai ta oi lalo-hekwarahilaia, namona be oi laloatao elda taudia be kongregesen dekenai idia noho oi idia durua totona. Bema gau haida ese oi emu namo lauma dalana ai idia hadikaia, namona be haraga elda taudia ida unai gaudia oi herevalaia. Inai lalokau dalana Iehova amo ita laloa bada be namo, bona unai vadivadi ta ese ia havaradia hahenamo do oi moalelaia.