Sivarai Namodia Nega Vaira Ai!

BEMA sivarai ta be mai ena anina dikana ita dekenai ita kamonaia neganai, ita ibounai ita lalohisihisi. To bema sivarai ta be mai ena anina namona ita dekenai eiava iseda lalokau taudia dekenai​—⁠sivarai namona unai, ita moale bada. To bema taunimanima haida dekenai ia vara dika ena sivarai ita kamonai, nega momo taunimanima idia ura diba dahaka ia vara; ma haida be taunimanima haida dekenai idia vara dika idia moalelaia. Reana, sivarai dikadia momo idia hoihoilaia ena badina ta be unai!

Tanobada Ibounai Tuarina Iharuana ia matamaia murinai, ia hedinarai goevagoeva taunimanima haida idia ura dikadika ma haida dekenai idia vara dika do idia diba. Lagani 1939 lalonai, Germany ena ami taudia ese tuari sisimana ta mai ena tuari kohu momo, ladana Graf Spee idia heagilaia. Pura momo lalodiai, unai sisima ese South Atlantic davarana bona Indian davarana dekenai Germany ena inai taudia edia bisinesi sisimadia ia hamutua. Gabeai, Britain ena tuari sisimadia toi ese Graf Spee idia davaria bena idia pidia. Idia hadikaia bona kuru taudia haida idia hamasea danu, oredia ese unai sisima be idia haheaua lao ela bona Montevideo ena hetu gabuna, Uruguay dekenai, unuseniai idia hanamoa totona. Uruguay ena gavamani ese unai tuari sisimana ena kapena ia oda henia karaharaga sisima do ia giroa lou davara dekenai, bema lasi, do idia dogoatao. Toana be tuari do ia vara bona Britain taudia do idia kwalimu.

United States dekenai taga bada bisinesi taudia ese unai idia kamonai neganai, idia ta ta be K3,575 idia henia peleini ta ena davana, Uruguay dekenai do idia lao, unai rara bada do ia bubua tuarina idia itaia totona. To unai tuari ia vara lasi dainai idia lalohisihisi. Adolf Hitler ese oda ia karaia Graf Spee ena kuru taudia ese do idia hamutua. Taunimanima tausen momo be kone dekenai idia lao, davara dekenai do ia vara tuarina idia itaia totona, to bomu ia pou regena bada herea idia kamonai, bona Graf Spee be davara henunai ia mutu lao. Kuru taudia ese edia sisima idia hamutua. Kapena be ena kwarana dekenai sibona ia pidia mase.

Ena be taunimanima haida idia ura kara dika edia sivarai idia kamonai, to momo be idia ura sivarai namodia idia kamonai. Oiemu ura be unai bamona, a? Vadaeni, dahaka dainai, histori ese sivarai dikadia momo ia ripotilaia to sivarai namodia be ta ta sibona? Unai kara do ia idau diba, a?

Sivarai Dikadia Edia Badina

Baibel ese sivarai namodia sibona idia noho negana ta ia herevalaia. Sivarai dikadia ta be lasi, ta ese ia kamonaia lasi. Iehova Dirava ese tanobada ia karaia ore murinai, tanobada be ia hegeregere taunimanima bona animal ese do idia moalelaia. Genese ese ia sivarailaia, ia gwau: “Dirava ese ia karaia vadaeni gaudia ibounai ia itaia, bona momokani idia be namo herea.”​—⁠Genese 1:⁠31.

Dirava ese taunimanima ia karaia murinai, nega daudau lasi lalonai sivarai dikadia idia vara matamaia. Adamu bona Heva be natudia idia do havaraia lasi neganai Dirava ia kamonai, Ia bona tanobada bona guba lalonai ia gaukaralaia namonamo dalana be haida ese idia inai henia. Dirava ena natuna ta, mai ena dagi bada aneruna, ese Dirava ia inai henia, sibona ena dagina be koikoi dalanai ia gaukaralaia bona taunimanima ginigunadia rua ia veridia, ia ida Dirava idia inai henia totona.​—⁠Genese 3:​1-6.

Taunimanima ese idia kamonaia sivarai dikadia momo edia matamana be unai negai ia vara. Unai dainai, tiriki karadia, bona hereva koikoidia idauidau be inai tanobada ena sivarai lalonai idia hedinaraia momo, be hoa gauna lasi. Iesu Keriso be iena nega lalonai idia noho tomadiho gunalaia taudia ia hereva henidia neganai, ia hahedinaraia Satani Diabolo be sivarai dikadia hamatamaia tauna, ia gwau: “Umui be emui tamana Satani dekena amo umui mai, bona umui ura emui tamana ena ura dikadia do umui karaia. Hamatamaia nega dekena amo ia be alaia tauna, bona hereva momokani be ia badinaia lasi, badina iena lalona dekenai hereva momokani be lasi. Ia be hereva koikoi ia gwauraia, iena kara momokani be unai, badina ia be koikoi tauna, bona ia be koikoi ibounai edia tamana.”​—⁠Ioane 8:⁠44.

Taunimanima idia momo idia lao neganai, sivarai dikadia danu idia momo daekau. Ena be unai ia vara, to mauri lalonai gau momo herea ese moale idia havaraia diba, unai dainai nega haida taunimanima idia moale. To hekwakwanai bona hisihisi edia mamina be taunimanima edia uru iboudiai lalonai idia hedinarai ema bona hari.

Inai dika ena badina ma ta be, ita be mai eda kara dika ida ita vara bona ita ura kara dika ita karaia. Iehova ese, unai sivarai dikadia idia vara ena badina, be inai bamona ia herevalaia, ia gwau: “Taunimanima . . . be maragi negana dekena amo, edia laloa be dika.”​—⁠Genese 8:⁠21.

Badina be Dahaka Sivarai Dikadia Idia Momo Idia Lao?

To, inai nega lalonai, sivarai dikadia idia momo idia lao be mai ena badina. Baibel ese unai badina ia gwauraia hedinarai. Ia gwau lagani 1900 murinai taunimanima be nega idauna lalonai do idia noho; unai nega ia gwauraia, “nega ena dokona” eiava ‘dokona neganai.’ (2 Timoteo 3:1; Daniela 12:⁠4) Baibel ena peroveta herevadia bona ena lagani duahia dalana ese ia hahedinaraia unai ‘dokona negana’ be lagani 1914 dekenai ia matamaia. Unai siri ibounai oi dibaia totona, mani Watchtower Bible and Tract Society of New York, Inc. ese ia printaia bukana, Diba ese Mauri Dekenai Ita Ia Hakaua Lao bukana, ena karoa 11 oi itaia.

Baibel ia gwau, nega ena dokona do ia matamaia neganai, kara ta do ia vara bena unai dainai karaharaga tanobada dekenai sivarai dikadia do idia momo idia lao. Unai kara be dahaka? Ia be Satani Diabolo bona iena demoni be guba amo idia negedia diho karana. Unai kara ena sivarai be Apokalupo 12:​9, 12 dekenai oi duahia diba. Ia gwau: “Unai huala badana, be Dirava ena aneru ese idia negea diho. Ia be unai idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho gauna. Oibe, ia, mai ena aneru ibounai danu, be idia ese tanobada dekenai idia negea diho. . . . Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.”

Unai dainai, inai nega ena dokona dina oredia lalonai, sivarai dikadia be do idia momo idia lao ela bona inai nega do ia ore.

Inai Bamona Do Ia Vara Hanaihanai Lasi

Tanobada idia noholaia taudia be do idia moale diba, badina hari inai negai sivarai dikadia idia havaraia hisihisidia be do idia vara hanaihanai lasi. Mai lalo-goada ida ita gwau diba, sivarai dikadia edia nega be kahirakahira do ia ore. Ena be ena toana be sivarai dikadia do idia noho hanaihanai, to unai be do ia vara lasi. Sivarai dikadia edia nega ena dokona be kahirakahira bona Dirava ese ia abia hidi negana ai do ia ginidae.

Unai ita diba momokani, badina be peroveta herevadia ese idia hahedinaraia dokona ai Dirava ese sivarai dikadia idia havaraia gaudia iboudiai do ia hadikaia ore bona do ia kokia. Hepapahuahu o tuari idia havaraia bona edia dala kererena idia rakatania lasi bona idia helalo-kerehai lasi taudia be ia ese do ia kokidia. Unai negana ai Siahu Ibounai Diravana ena dina badana ena tuari ladana Aramagedono do ia vara. (Apokalupo 16:16) Unai murinai, Satani Diabolo bona iena demoni do idia guidia. Apokalupo 20:​1-3 ese sivarai dikadia ibounai ia havaraia tauna, Satani, do idia kwatua negana ia gwauraia, ia gwau: “Aneru ta lau itaia, guba dekena amo ia diho. Iena imana dekenai guri dobu masemase ena ki ia dogoatao, bona auri seini badana ta danu. Inai aneru ese unai huala, unai idaunegai gaigaina, ma iena ladana be ‘Diabolo’ bona ‘Satani’ ia dogoatao, seini dekenai ia guia. Vadaeni do ia guia noho, ela bona lagani 1,000 idia ore. Aneru ese unai huala be guri dobu masemase lalonai ia negea diho. Vadaeni unai guri ia lokaia bona koua toana ia karaia. Satani be unai bamona ia koua, tanobada bese do ia koia diba lasi totona.”

Unai hoa karadia murinai, tanobada bona ia dekenai idia noho taudia ese sivarai namodia sibona do idia kamonai. Guna unai bamona ia vara lasi. Unai taudia be tuari ginigabena Aramagedono amo idia roho mauri taudia milioni momo, bona gara gabudia dekenai mase ena mahuta amo idia toreisi lou taudia bilioni momo. Unai sivarai namo hereana be Baibel ena buka ginigabena ese ia gwauraia, ia gwau: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—⁠Apokalupo 21:​3, 4.

Unai moale negana oi laloa toho diba, a? Momokani, unai be nega vaira namo hereana, unai negana ai sivarai dikana ta do ia noho lasi. Oibe, sivarai dikadia ibounai do idia ore bona do ita kamonaia lou lasi. Sivarai namodia sibona do idia halasidia ela bona hanaihanai.