Sivarai Dikadia Idia Momo Idia Lao

NIUSPEPA ese sivarai namodia idia halasia neganai, taunimanima ese idia laloa lasi, to sivarai dikadia idia halasia neganai, taunimanima momo idia ura niuspepa idia hoia; oi be unai bamona kara oi itaia, a? Herevana niuspepa ena hereva kwarana ese ia vara kava dika ta ia herevalaia, eiava magasin ta ena vaira hereva kwarana ese udu mauri herevana ta ia hahedinaraia, to toana be sivarai dikadia dainai taunimanima ese niuspepa momo idia hoidia.

Hari, sivarai dikadia be momo herea momokani. Tau ta be inai bamona ia henanadai diba: Nius tahua taudia be idia hadibadia sivarai namodia do idia tahua lasi, to sivarai dikadia sibona do idia tahua bona idia hahedinaraia, a?

Histori Lalonai Sivarai Dikadia Momo Herea

Momokani, gunaguna ema bona hari sivarai dikadia edia momo ese sivarai namodia edia momo ia hanaia. Taunimanima edia histori sivaraidia lalodiai, sivarai momo ese taunimanima edia lalohisihisi, edia lalo-hekwarahi, bona edia daradoko idia hahedinaraia.

Mani haheitalai haida ita laloa. Jacques Legrand ese buka ta ladana Chronicle of the World lalonai nega gunadia ta ta ai idia vara gaudia sivaraidia ia torea, hegeregere niuspepa edia sivarai torea taudia hari inai negai ese idia torea bamona. Unai ripoti amo tanobada ai taunimanima edia lalo-hekwarahi maurina ibounai lalonai idia kamonai sivarai dikadia idauidau ita itaia diba.

Ginigunana be Greece dekenai lagani 429 B.C.E. lalonai ia vara gauna ena ripoti ita itaia. Unai ripoti ese Athens bona Sparta edia tuari ia ripotilaia. Ia gwau: “Athens taudia ese Potidaea siti idia tuari henia lalonai, aniani ia ore dainai Potidaea taudia ese edia mase taudia edia tauanidia idia ania. Unai amo Athens taudia ese tuari dekenai idia kwalimu.” Unai be sivarai dika rohorohona!

Keriso ena nega be do lasi neganai, March 15, 44 B.C. ai, Julius Caesar idia alaia mase ena ripoti ita duahia. Ia gwau: “Haida ese Julius Caesar idia alaia mase vadaeni. Hari inai dina, March 15 ai ia be Gavamani Rumana dekenai ena helai gabuna dekenai ia helai diho gwauraia neganai, iena mase dalana idia karaia taudia bona iena turadia korikoridia ese kaia amo idia gwadaia mase.”

Gabeai idia hanaia lagani handred handred lalodiai, sivarai dikadia edia momo ia bada daekau. Mai gari bada sivaraina ta be lagani 1487 lalonai Mexico dekenai ia vara gauna ena sivarai. Ia gwau: “Aztec ena siti badana, Tenochtitlan dekenai, guna idia karaia lasi boubou karana badana ta idia karaia. Taunimanima 20,000 edia kudouna idia kokia bona tuari diravana, Huitzilopochtli dekenai idia bouboulaidia.”

Taunimanima edia dagedage karadia sibona lasi to edia kava karadia danu ese sivarai dikadia idia havaraia. Toana be London dekenai ia vara lahi badana be unai kava karana ta dainai ia vara. London, England amo ripotina, September 5, 1666 gauna, be inai: “Dina hani bona hanuaboi hani murinai, York ena lohia tauna ese ipidi pauda idia gaukaralaia ami taudia ia abia mai, lahi ia gabua lao gabuna vairana ai idia noho rumadia idia hapoudia. Unai dala amo London ena lahi idia habodoa. Tano hekitera 160 dekenai, lahi ese dubu 87 bona ruma 13,000 ia hadikaia ore vaitani. To hoa gauna be taunimanima 9 sibona idia mase.”

Unai sivarai dikadia edia lista dekenai namona be tanobada ena kahana momo dekenai idia vara daihanai goreredia do ita torea kau danu​—⁠hegeregere, lagani 1830 ia lao 1835 lalonai ia vara kolera gorerena. Niuspepa ena hereva kwarana ia gwau: “Kolera gorerena ese Europe ia hagaria.” Unai ripoti ese gabeai ia herevalaia gauna be sivarai dika rohorohona momokani. Ia gwau: “Kolera gorerena be Europe dekenai ia vara lasi ela bona lagani 1817 ai Asia amo ia hanaia mai. Russia ena siti hegeregere Moscow bona St. Petersburg dekenai taunimanima momo idia mase vadaeni​—⁠idia momo be ogogami taudia.”

Vanegai Laganidia Lalonai Ia Bada Momokani

Momokani sivarai dikadia be vaia taunimanima edia mauri ibounai lalonai idia vara gaudia. To vanegai laganidia, 1900 amo ema bona hari, ese idia hahedinaraia kara dika edia sivarai idia momo daekau haraga.

Momokani, iseda nega lalonai tuari edia sivarai be sivarai dika rohorohodia. Idia vara tuari badadia ruaosi​—⁠Tanobada Ibounai Tuarina Ginigunana bona Iharuana ese mase bona hisihisi bada edia sivarai dika rohorohodia idia havaraia momo. To, unai be inai nega ena sivarai dikadia edia kahana maragina sibona.

Sivarai edia hereva kwaradia haida, Chronicle of the 20th Century bukana amo ai abia hidi, mani oi laloa. Idia be inai:

September 1, 1923: Tano mareremarere ese Tokyo ia hadikaia​—⁠300,000 idia mase; September 20, 1931: Hekwakwanai​—⁠Britain ena moni ena siahu ia maragi ia lao; June 25, 1950: North Korea tuari taudia idia hanaia lao South Korea dekenai; October 26, 1956: Hungary taudia ese Soviet ena lohia siahuna haorea totona idia tuari; November 22, 1963: John Kennedy, be Dallas dekenai idia pidia mase; August 21, 1968: Russia taudia ena ami tanika idia lao Prague dekenai, unai taudia edia sibona naria karana idia koua totona; September 12, 1970: Idia henaoa peleinidia be tano gagaena dekenai idia hapoudia; December 25, 1974: Lai gubana ladana Tracy ese Darwin ia hadikaia bada​—⁠66 idia mase; April 17, 1975: Komiunis tuari taudia ese Cambodia idia abia; November 18, 1978: Guyana dekenai momo ese sibodia idia hamasea hebou; October 31, 1984: Mrs. Gandhi idia pidia mase; January 28, 1986: Guba dekenai ia lao roketi ia roho gwauraia neganai, ia pou; April 26, 1986: Lahi ese Soviet ena niuklia paoa faktori ia gabua; October 19, 1987: Bisinesi momo idia moru; March 25, 1989: Oela ese Alaska ia hadikaia; June 4, 1989: Ami taudia ese Tiananmen Square dekenai gavamani idia inai henia stiuden taudia idia alaia mase.

Oibe, histori ese ia hahedinaraia sivarai dikadia be momo, to sivarai namodia be momo lasi. Lagani momo idia hanaia lalonai, sivarai dikadia idia momo daekau noho, bona lagani ta ta lalonai sivarai namodia edia momo ia diho.

Dahaka dainai unai bamona ia vara? Unai bamona do ia vara noho hanaihanai, a?

Hereva gabena ese unai henanadai do ia haerelaidia.

[Picture Credit Line on page 3]

WHO/League of Red Cross