Duahia Taudia Edia Henanadai

Iesu ia gwau: “Edia dika do umui gwauatao taudia edia dika be do idia gwauatao, to edia dika do umui gwauatao lasi taudia edia dika be do idia noho.” Unai hereva ena anina be Keristani taudia ese dika idia gwauatao diba, a?

Baibel ia gwau lasi kongregesen ena elda taudia eiava Keristani taudia oredia be mai edia siahu Dirava ena amo, taunimanima edia dika gwauatao totona. To, Iesu ese ena hahediba taudia ia hamaoroa herevana, ataiai ai torea sirina Ioane 20:23 ai ia noho herevana, ese ia hahedinaraia Dirava ese siahu idauna be aposetolo ia henidia, unai do idia karaia totona. Bona reana Iesu ena hereva unai siri lalonai ena anina be Mataio 18:18 ai ia gwauraia herevana ena anina hegeregerena; unai siri ese Dirava ena hahemaoro ia herevalaia.

Paulo ena sisiba Efeso 4:32 ai hegeregerena, Keristani taudia ese kara dika haida idia gwauatao diba; ia gwau: “Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.” Paulo ese Keristani taudia bogaragidiai idia vara hekwakwanaidia ia herevalaia, idia ta be hereva kava karana. Namona be unai hekwakwanai idia hamaoromaorodia toho bona edia dika idia gwauatao heheni. Iesu ena hereva mani oi laloa; ia gwau: “Unai dainai, oiemu harihari gauna pata helaga dekenai oi atoa gwauraia neganai be do oi laloa guna, oiemu tadikakana dekenai mai emu kerere. Bema unai bamona, oiemu harihari gauna pata helaga ena vairana dekenai do oi rakatania, oi lao, oiemu tadikakana danu maino do umui ruaosi karaia guna, gabeai oi giroa lou, oiemu harihari gauna Dirava dekenai do oi henia.”​—⁠Mataio 5:​23, 24; 1 Petero 4:8.

To, Ioane karoa 20 ena hereva ma haida ese idia hahedinaraia Iesu ese kara dika badadia ia herevalaia iena hahediba taudia dekenai. Mani ita tahua.

Iesu ia toreisi lou dinana ai, iena hahediba taudia be Ierusalema ai ruma ta lalonai idia noho; ena iduara idia lokaia vadaeni, to Iesu be idia dekenai ia hedinarai. Baibel ia gwau: “Iesu ma ia hereva henia lou idia dekenai, ia gwau, ‘Maino umui abia. Tamana ese lau ia siaia hegeregerena, lau danu umui do lau siaia.’ Unai bamona ia hereva, vadaeni uduna dekena amo ia hahodi henia idia dekenai, ia gwau, ‘Lauma Helaga umui abia. Edia dika do umui gwauatao taudia edia dika be do idia gwauatao, to edia dika do umui gwauatao lasi taudia edia dika be do idia noho.’ ”​—⁠Ioane 20:21-​23.

Toana be, unai hahediba taudia momo be aposetolo taudia mai edia kamonai. (Siri 24 itaia.) Iesu ese ia hahodi henidia bona ia gwau “Lauma Helaga umui abia” neganai, ia hadibadia nega daudau lasi lauma helaga be idia latanai do ia bubua diho. Bena Iesu ia gwau siahu do idia abia, kara dika do idia gwauatao totona. Vadaeni, iena hereva ginigunana be mai anina ena hereva iharuana dekenai.

Iesu ia toreisi lou, bena dina 50 murinai, Pentekoste dinana ai, lauma helaga ia bubua diho. Unai ese dahaka ia havaraia? Gau ta be, lauma idia abia taudia idia vara lou, Dirava ena lauma natuna ai idia lao, bona edia helaro be guba lalonai Keriso ida do idia lohia hebou. (Ioane 3:​3-5; Roma 8:​15-​17; 2 Korinto 1:​22) To unai lauma ese ma gaukara haida ia karaia danu. Idia abia taudia haida be siahu idauna idia abia. Ia dainai idia diba lasi gadodia idaudia ai idia hereva diba. Haida idia peroveta diba. Haida ese gorere taudia idia hamauria diba eiava mase taudia idia hatorea isi lou diba.​—⁠1 Korinto 12:​4-​11.

Iesu ena hereva Ioane 20:22 ai ese lauma helaga be hahediba taudia latanai bubua karana ia herevalaia, unai dainai toana be Ioane 20 siri 23 ena hereva, dika gwauatao karana herevana, ena anina be lauma helaga amo Dirava ese siahu idauna be aposetolo ia henidia, dika do idia gwauatao o do idia gwauatao lasi totona.​—⁠The Watchtower, March 1, 1949 gauna, rau 78 itaia.

Aposetolo taudia ese unai siahu idia gaukaralaia negadia iboudiai edia sivarai be Baibel ese ia gwauraia lasi, hoa dalana ai gado idaudia ai idia hereva, o idia peroveta, o gorere taudia idia hamauria negadia iboudiai edia sivarai ia gwauraia lasi hegeregerena.​—⁠2 Korinto 12:12; Galatia 3:5; Heberu 2:4.

Anania bona Sapira, lauma helaga idia koia taudia, dekenai ia vara gauna ese ia hahedinaraia aposetolo be mai edia siahu, dika do idia gwauatao o do idia gwauatao lasi totona. Petero, Iesu ese Ioane 20:​22, 23 ai ia gwauraia herevana ia kamonai tauna, ese Anania bona Sapira edia koikoi ia hahedinaraia. Petero ese Anania ia hereva henia guna, bena maoromaoro Anania ia mase. Unai murinai Sapira ia raka vareai bona ia danu ia hereva koikoi, bena Petero ese ia hahemaoro henia. Petero ese ena dika ia gwauatao lasi, to ia gwau: “Itaia, oiemu adavana idia guria memero be idia raka mai inai, bona oi danu do idia huaia lao.” Ia danu be maoromaoro ia mase.​—⁠Kara 5:​1-​11.

Unai neganai aposetolo Petero ese ena siahu hereana ia gaukaralaia. Hoa dalana ai ia diba Dirava ese Anania bona Sapira edia dika do ia gwauatao lasi, unai dainai ia gwauraia hedinarai. Bona toana be aposetolo ese Dirava ena amo diba idia abia dainai, idia diba momokani Keriso ena boubou dainai Dirava ese haida edia dika ia gwauatao vadaeni. Unai dainai unai aposetolo, lauma ese ia hasiahua taudia, idia gwau diba, taunimanima edia dika ia gwauatao eiava ia gwauatao lasi.a

Unai hereva ena anina be inai lasi: Unai nega lalonai idia noho elda taudia, lauma ese ia horoa taudia, iboudiai ese unai siahu idauna idia abia. Lasi. Aposetolo Paulo ese Korinto kongregesen murimurinai idia atoa tauna ia gwauraia herevana amo unai ita diba. Paulo ia gwau lasi, ‘Unai tau ena kara dika lau gwauatao’ eiava ‘Lau diba guba ai idia ese iena dika idia gwauatao, unai dainai umui abia dae lou.’ Lasi, to Paulo ese kongregesen taudia iboudiai ia noia, kongregesen lalonai idia abia vareai lou Keristani tauna ena dika do idia gwauatao bona do idia lalokau henia. Paulo be ma ia gwau: “Umui ese tau ta ena dika umui gwauatao neganai, lau danu ese iena dika do lau gwauatao.”​—⁠2 Korinto 2:​5-​11.

Unai tau be kongregesen lalonai idia abia vareai lou murinai, Keristani tadikakadia bona taihudia iboudiai ese ena dika idia gwauatao diba dalana be inai: Ia karaia karana dainai idia lalo-dika henia lasi. To, ia helalo-kerehai bona kongregesen lalonai idia abia vareai lou guna be namo. Edena dala ai unai ia vara?

Kongregesen ena elda taudia ese kara dika badadia, hegeregere henaohenao, hereva koikoi, bona matabodaga karadia idia hahemaoro henidia. Unai kara dika taudia idia matahakani henidia bona idia sisiba henidia, unai amo idia ha-uradia toho, do idia helalo-kerehai totona. To, bema ta ia helalo-kerehai lasi bona kara dika badana ta ia karaia loulou, elda taudia ese Dirava ena hakaua herevana hegeregerena unai kara dika tauna be kongregesen murimurinai do idia atoa. (1 Korinto 5:​1-5, 11-​13) Iesu ena hereva Ioane 20:23 ai be mai anina lasi unai gau dekenai. Unai elda taudia ese lauma ena harihari gaudia, hegeregere hoa dalana ai gorere taudia hamauria bona mase taudia hatorea isi lou siahuna, idia abia lasi; aposetolo edia negai unai harihari gaudia ese edia anina idia havaraia bena idia doko. (1 Korinto 13:​8-​10) Inai danu: Hari inai negai elda taudia ese siahu be Dirava ena amo idia abia lasi, kara dika badana ia karaia tauna ena dika do idia gwauatao bona do idia hamaoroa Iehova ena matana ai ia goeva vadaeni. Dika be unai dala amo gwauatao karana ena badina tamona be mauri davalaia boubouna, bona Iehova mo sibona ese dika be unai dala amo ia gwauatao diba.​—⁠Salamo 32:5; Mataio 6:​9, 12; 1 Ioane 1:9.

Idaunegai Korinto ai ia vara gauna hegeregerena, kara dika badana ia karaia tauna bema ia ura lasi do ia helalo-kerehai, kongregesen murimurinai do idia atoa be maoro. Gabeai bema ia helalo-kerehai bona helalo-kerehai karadia ia karaia, Dirava ese ena dika ia gwauatao diba. (Kara 26:20) Unai ia vara neganai, Baibel ena hereva dainai elda taudia idia abia dae diba, Iehova ese unai tau ena dika ia gwauatao vadaeni. Bena, unai tau be kongregesen lalonai idia abia vareai lou murinai, elda taudia ese lauma dalana ai idia durua diba, ena abidadama do ia goada ia lao totona. Kongregesen taudia oredia ese ena dika idia gwauatao diba, Korinto Keristani taudia ese kongregesen murimurinai idia atoa bena gabeai idia abia vareai lou tauna ena dika idia gwauatao hegeregerena.

Elda taudia be unai bamona idia kara neganai, sibodia edia hahemaoro taravatudia idia haginia lasi. Iehova ese Baibel lalonai ia gwauraia daladia idia badinaia goevagoeva. Unai dainai, bema ta ena dika idia gwauatao o idia gwauatao lasi, unai be Iesu ese Mataio 18:18 ai ia gwauraia herevadia edia anina hegeregerena: “Umui lau hamaoroa momokani, tanobada dekenai do umui taravatua gaudia ibounai be guba dekenai danu do idia taravatua, bona tanobada dekenai maoro do umui henia gaudia ibounai be guba dekenai danu maoro do idia henia.” Elda taudia edia kara ese Iehova ena lalohadai, Baibel lalonai ia hahedinaraia lalohadaina, sibona idia hahedinaraia.

Unai dainai, Iesu ena hereva Ioane 20:23 ai ese Baibel ena hereva oredia ia hakoikoia lasi, to ia hahedinaraia aposetolo be Keristani ekalesiana ena matamana neganai idia abia dagina hegeregerena, idia be mai edia siahu idauna, kara dika do idia gwauatao totona.

[Footnotes]