Oi be Laloa Maoromaoro Painia Tauna, A?
TAMANA ena matana idia diaridiari, iena imana rua ia kehoa bona ena natuna kekeni maragina be nega ginigunana ia raka gwauraia ia naria. Kekeni ia moru neganai ia hagoadaia do ia tohoa lou. Ia diba nega sisina murinai, ena natuna kekeni be do ia raka maoromaoro diba mai ena goada ida.
Unai hegeregerena, painia matamata ia laloa maoromaoro totona, nega bona hagoadaia herevadia ia abia be namo; ful-taim Basileia harorolaia gaukarana lalonai ia kwalimu totona, unai be gau badana. Painia taudia momo be lagani 10 momo lalodiai mai moale ida idia gaukara noho. Haida be edia noho dalana ia idau haraga dainai, idia laloa maoromaoro lasi. Haida edia moale ia boio danu. Tano ta dekenai, painia gaukara idia hamatamaia taudia 100 100 amo 20 20 be lagani ginigunadia rua lalonai edia ful-taim hesiai gaukarana idia hadokoa. Painia tauna be inai moale hereadae hesiai gaukarana ia hadokoa ena badina be dahaka? Gau ta idia karaia diba unai ia vara lasi totona, a?
Ena be gorere, moni hekwakwanai, bona ruma bese maduna idauidau dainai haida be ful-taim hesiai gaukara idia rakatania, to ma haida be Keristani maduna idauidau idia laloa maoromaoro lasi dainai idia moru. Laloa maoromaoro ena anina be “kahana ta, gau ta, eiava siahu ta be ma kahana ta, eiava siahu ta ia hanaia lasi, eiava idia ta be ma kahana haida ia hanaia lasi.”
Iesu Keriso ese iena hahediba taudia ia hadibaia, haroro gaukara bona taunimanima be hahediba taudia ai idia halaodia gaukarana be edena bamona do idia karaia. Sibona ena gaukara amo ia hahedinaraia edena bamona ita laloa maoromaoro noho diba. Iesu ese ia hahedinaraia Iuda tomadiho gunalaia taudia be idia laloa maoromaoro lasi, ia hamaorodia ia gwau, “Aniani edia ava maragimaragi ibounai dekenai umui haria be kahana 10 umui karaia, kahana ta be boubou gauna dekenai umui halaoa. To taravatu ena hereva badadia, kota henia, bona bogahisihisi, bona abidadama, umui negea. Bema umui badinaia, bona kara namodia haida danu bema umui badinaia be ia namo.”—Mataio 23:23.
Guna bamona, inai hakaua herevana be mai anina hari inai negai bona painia gaukara dekenai ena anina be bada herea. Haida be lalo-goada bona ura bada dainai painia gaukara idia hamatamaia, to idia hegaegae namonamo lasi eiava iena kahana idauidau idia laloa namonamo lasi guna. (Luka 14:27, 28) Ma haida be haroro gaukara idia laloa bada dainai, Keristani maduna badadia ma haida idia reaia. Edena bamona do idia laloa maoromaoro noho diba?
Lauma Dalanai Oi Goada Noho!
Iesu ese iena goada lauma dalanai ia reaia lasi. Ena be taunimanima be iena hereva idia kamonai totona bona edia gorere ia hanamoa totona idia mai neganai, iena nega bada ia henidia, to nega ia atoa mai kudouna ibounai ida ia guriguri totona. (Mareko 1:35; Luka 6:12) Inai negai danu, ta ese mai laloa maoromaoro ida painia gaukara ia karaia totona, namona be lauma dalanai idia hagoadaia gaudia iboudiai ia gaukaralaia namonamo. Paulo ia gwau: “Oibe, taunimanima haida umui hadibaia, to dahaka dainai umui sibona umui hadibaia lasi?” (Roma 2:21) Momokani, bema ta ena nega ibounai be ma haida ia haroro henia karana dekenai ia atoa, to sibona ena stadi bona guriguri dekenai nega ia atoa lasi, unai be kerere badana.
Kumiko be lagani 20 bamona lalonai painia gaukara ia karaia. Ena be ena natudia be toi bona iena adavana be murimuri tauna, to ia tohoa karana amo ia davaria, Baibel ia duahia bona ia stadilaia negana namona be hanuaboi ai, ia do mahuta lasi neganai. Ia stadi neganai haroro gaukara dekenai do ia gaukaralaia diba gaudia ia laloa bada, unai amo iena dina ta ta haroro gaukarana ia hanamoa bona taunimanima edia lalona ia veria diba. Painia gaukara dekenai idia kwalimu taudia ma haida be edia ruma bese taudia idia do mahuta neganai idia toreisi bona unai daba hora namodia lalonai hagoadaia lauma gaudia idia moalelaia. Reana oi ese ma nega namodia haida oi atoa siri vadaeni hebou totona oi hegaegae bona Keristani buka bona magasin matamatadia oi duahia totona. Bema oi ura hesiai gaukara lalonai do oi moale noho, sibona ena stadi be haraga dalanai oi karaia lasi eiava oi reaia lasi gauna.
Ruma Bese Maduna Idauidau Oi Laloa Maoromaoro
Namona be painia gaukara idia karaia tama sina be inai idia laloatao, “Lohiabada ena ura gaudia” idia dekenai be edia ruma bese taudia idia naria tauanina, lalona, bona lauma dalanai. (Efeso 5:17; 6:1-4; 1 Timoteo 5:8) Nega haida, ena be adavana bona natudia be orea lalonai, to sinana be painia gaukara ia hamatamaia neganai, idia ia naria bona durua lasi garina idia gari. Unai lalohadai dainai, sinana ia ura painia gaukara ia hamatamaia be idia moalelaia momokani lasi. To laloa namonamo bona hegaegae namonamo karadia amo, idia laloa maoromaoro diba.
Painia taudia momo be be ruma taudia idia noho lasi negadiai edia haroro gaukara ibounai idia karaia toho. Kumiko, guna ita gwauraia painia taihuna, be iena adavana bona natudia danu ia noho daba aniani idia ania neganai bona ruma idia rakatania neganai, bena idia do giroa lasi neganai ruma ai ia giroa guna. Monday iboudiai aniani momo ia nadua gabeai do idia ania totona, bena aniani negadiai ia be kisini ai ia bisi lasi, to iena ruma bese taudia danu ia aniani hebou diba. Durua gauna ta be gau idauidau be nega tamona ia karaia, hegeregere aniani ia nadua neganai ruma gaukara ma haida danu ia karaia. Unai dalana ai Kumiko ena nega ia hegeregere, iena natudia edia turadia ia boiria bona moale karadia ia hegaegaelaia idia totona.
Natudia idia tubu neganai, edia lalona be lalohadai matamatadia, ura matamatadia, daradara matamatadia, bona gari matamatadia amo idia honu. Unai nega ai tama sina edia heduru be gau badana idia dekenai. Painia gaukara ia karaia tama o sina be unai totona ia gima noho bona ena sediual ia haidaua danu be namo. Mani Hisako oi laloa, ia be painia gaukara ia karaia sinana ta mai ena natudia toi. Ia ese dahaka ia karaia sikuli turadia be iena kekeni badana ena lalona idia veria, bena ia ena moale bona ura Keristani heboudia bona haroro gaukara dekenai idia manoka idia lao gwauraia neganai? Gau badana be, iena natuna kekeni ese hereva momokani do ia abia dae vaitani bona do ia lalo-parara vaitani tanobada amo gini siri karana be maoro.—Iamesi 4:4.
Hisako ia gwau: “Egu lalona lau hadaia dina ta ta ai, Mauri Hanaihanai bukana lalonai idia noho hereva badadia be ia danu lau stadilaia lou. Ai matamaia neganai be miniti haida sibona ai stadi diba, badina be stadi ena nega ai, egu natuna kekeni ia gwau ena bogana eiava kwarana ia hisihisi dikadika. To stadi ai karaia hanaihanai. Hua haida murinai ena lalona ena mamina ia namo ia lao bena nega sisina murinai iena mauri ia gwauhamatalaia Iehova dekenai bona ia bapatiso.” Hari Hisako ese ful-taim hesiai gaukarana be iena natuna kekeni ida ia moalelaia.
Painia gaukara idia karaia tamadia danu idia naria namonamo be gau badana. Edia natudia idia bada idia lao neganai, lalona hagoadaia heduruna bona taravatu herevadia idia abia be namo, to bema tamadia ese kamonai taudia bona edia kongregesen maduna idauidau sibona idia laloa bada, unai heduru idia henia diba lasi. Tau ese unai maduna be iena adavana dekenai do ia henia lasi. Iena mauri lalonai ia bisi Keristani elda tauna ta be lagani momo lalonai painia gaukara ia karaia bona bisinesi maragina ia naria danu, to iena nega ia haria namonamo bena iena natudia hani ta ta danu stadi ia karaia. (Efeso 6:4) Danu, ena ruma bese ida pura ta ta edia hebou iboudiai totona idia hegaegae. Laloa maoromaoro painia taudia ese edia ruma bese idia naria tauanina dalanai bona lauma dalanai, unai idia reaia lasi.
Moni Oi Laloa Maoromaoro
Namona be painia taudia ese dina ta ta ena tauanina heduru gaudia idia laloa maoromaoro danu. Unai gauna dekenai danu, Iesu ena haheitalai ese ita ia hadibaia. Ia gwau tauanina gaudia dainai ita lalo-hekwarahi bada lasi. To idau, iena hahediba taudia ia hagoadaia Basileia do idia atoa guna, ia gwauhamata Dirava ese idia do ia naria ia havaraia gaudia oredia ia naria bamona. (Mataio 6:25-34) Painia taudia momo be unai sisiba idia badinaia dainai lagani momo lalonai ful-taim hesiai gaukara idia karaia noho, bona Iehova ese edia hekwarahi ‘hari dina ena aniani’ abia totona, ia hanamoa.—Mataio 6:11.
Aposetolo Paulo ese Keristani taudia ia sisiba henia idia ese ‘edia manau bona manada karana be taunimanima ibounai edia vairanai idia hedinaraia.’ (Filipi 4:5) Momokani manada karana ta be iseda helt do ita naria namonamo, ani. Laloa maoromaoro painia taudia be edia mauri dalana lalonai bona kohu idia laloa dalana ai manada karana idia hedinaraia toho, badina be idia diba taunimanima ese edia kara idia raraia.—1 Korinto 4:9 itaia danu.
Namo lasi matamata taudia be painia gaukara idia hamatamaia neganai tama sina edia heduru bada idia gaukaralaia bada. Bema tama sina edia ruma dekenai idia noho, ruma gaukara idauidau lalonai idia durua bona ruma gaudia edia davana totona pat-taim moni gaukara idia karaia be namo, unai amo idia ese laloa maoromaoro karana bona tama sina edia heduru idia laloa bada karana idia hedinaraia.—2 Tesalonika 3:10.
Laloa Maoromaoro Painia Taudia be Hahenamo Badana
Reana oi be painia tauna ta bona laloa maoromaoro totona oi hekwarahi bada. Oi gari lasi be namo. Natuna maragina be raka maoromaoro dalana ia diba haraga lasi hegeregerena, lo painia taudia momo idia gwau edia maduna idauidau idia laloa maoromaoro totona nega sisina daudau idia hekwarahi.
Painia taudia idia hekwarahi bada inai gaudia haida idia laloa maoromaoro totona: Sibona ena stadi karana, edia ruma bese taudia idia naria karana, bona sibona edia tauanina gaudia idia abia karana. Sivarai idauidau ese idia hedinaraia painia taudia momo edia maduna huaia dalana be hereadae. Momokani, edia dekena taudia dekenai idia be hahenamo ta bona idia be Iehova bona ena orea idia abia isi.