Mase Murinai Idia Mauri​—⁠Edena Bamona, Edeseniai, Edena Negai?

TAUNIMANIMA edia Havaraia bona Mauri Henia Tauna ese sibona ena gwauhamata ia henia, ia gwau mase ese taunimanima ibounai edia mauri do ia hadokoa ela bona hanaihanai lasi. Dirava ese ita ia hamaoroa do ita mauri lou, nega kwadogina sibona lalonai lasi, to danu do ita mase lou lasi! Aposetolo Paulo be mai lalo-goada ida inai bamona ia hereva: “Dirava ese ia hamomokania taunimanima ibounai edia vairanai, unai Tau [Keriso Iesu] mase dekena amo ia hamauria dainai.”​—⁠Kara 17:⁠31.

To momokani, henanadai toi idia do noho: Mase tauna be edena bamona ia mauri lou diba? Edena negai unai do ia vara? Unai mauri matamatana be edeseniai do ia vara? Tanobada hegegemadai, unai henanadai edia haere be idauidau, to hereva momokanina ita dibaia dalana tamona be taunimanima idia mase neganai dahaka ia vara idia dekenai ita lalo-pararalaia be mai anina bada.

Haere be Soul Ia Mase Diba Lasi, A?

Momo idia abia dae taunimanima ibounai be mai edia mase diba lasi kahana ta bona edia tauanina sibona be ia mase diba. Reana unai hereva oi kamonai vadaeni. Unai kahana, idia laloa ia mase diba lasi gauna, be idia gwauraia “soul” eiava “lauma.” Idia gwau tauanina ia mase neganai, soul be gabu ma ta dekenai ia mauri noho. Hereva momokani be, unai lalohadai be Baibel amo ia mai lasi. Momokani, Baibel ena Heberu Revarevadia ese idia herevalaia idaunegai taudia idia laloa mase murinai do idia mauri, to unai mauri be mase diba lasi kahana ia roho mauri dainai lasi. Idia diba nega vairai tanobada dekenai hoa karana ta, toreisi lou karana amo do idia mauri lou.

Bese kwarana tauna Aberahamo be vaira negana mase taudia do idia toreisi lou ia abidadama henia tauna badana. Heberu 11:​17-19 be Aberahamo ena lalona ia hegeregere iena natuna Isako do ia bouboulaia totona ia herevalaia neganai, ia gwau: “Abidadama dainai Aberahamo ese iena natuna Isako ia abia, boubou gauna bamona Dirava dekenai ia henia. . . . To Aberahamo ia daradara lasi, ia laloa, ‘Bema Isako ia mase, Dirava be mai ena siahu do ia hatorea isi lou.’ To inai bamona ita herevalaia diba, ani? ‘Aberahamo ese Isako ia abia lou mase dekena amo’ ” badina Dirava ia ura lasi Isako do ia bouboulaia. Danu, idaunegai Israela taudia ese idia abia dae vaira negana ai mase amo do idia toreisi lou (to karaharaga lauma gabuna ta ai do idia mauri noho lasi) be peroveta tauna Hosea ese ia hamomokania, ia gwau: ‘Mase gabuna ena siahu dekena amo Israela taudia do lau veria mauri. Mase dekena amo idia do lau hamauria.’​—⁠Hosea 13:⁠14.

Vadaeni, taunimanima be mai edia mase diba lasi soul herevana be edena neganai Iuda taudia edia lalohadai bona tomadiho lalonai ia vareai? Encyclopaedia Judaica ia gwau “reana Greek taudia amo soul ia mase diba lasi hahediba herevana be Iuda tomadihona lalonai ia vareai.” Ena be unai ia vara, to unai nega amo ela bona Keriso ia mai, lauma dalanai idia goada Iuda taudia be vaira negana ena toreisi lou idia naria. Unai ita itaia goevagoeva diba Iesu ese Mareta dekenai, ena taihuna Lasaro ia mase neganai, ia hereva henia herevana amo: “Mareta ese Iesu ia hereva henia, ia gwau, ‘Lohiabada e, bema oi noho iniseni, be lauegu taihuna ia mase lasi.’ . . . Iesu ia gwau, ‘Oiemu taihuna be do ia toreisi lou.’ Mareta ia gwau, ‘Lau diba dina gabeai, toreisi lou dinana neganai, do ia toreisi lou.’ ”​—⁠Ioane 11:​21-24.

Mase Taudia Edia Noho Dalana

Unai danu do ita herevalaia kava be anina lasi. Baibel ese ia hahedinaraia hereva momokanina be inai: mase taudia be idia “mahuta,” gau ta idia diba lasi, gau ta idia mamia eiava diba ta idia abia lasi momokani. Unai hereva momokanina be Baibel ese auka dalanai o ta ia lalo-pararalaia diba lasi dalanai ia hahedinaraia lasi. Mani inai auka lasi Baibel siri oi lalodia: “Badina be mauri taudia idia diba do idia mase, to mase taudia be gau ta idia diba lasi. . . . Oiemu imana ese ia davaria gaukara ibounai, be do oi karaia mai oiemu goada ibounai danu. Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.” (Hadibaia Tauna 9:​5, 10) “King taudia do umui abidadama henia lasi, badina taunimanima ese umui do idia hamauria diba lasi. Idia mase neganai tano ena kahu dekenai idia giroa lou. Edia mase dina dekenai, idia ura do idia karaia gaudia be do idia doko.”​—⁠Salamo 146:​3, 4.

Ita lalo-parara diba dahaka dainai Iesu Keriso ese mase be mahuta bamona ia gwauraia. Aposetolo Ioane ese Iesu bona iena hadibaia taudia edia herevahereva ta ia torea: “Idia ia hamaoroa, ia gwau, ‘Iseda turana Lasaro be ia mahuta noho, to lau lao, do lau hanogaia.’ Iena diba tahua taudia idia gwau, ‘Lohiabada e, bema ia mahuta be do ia namo lou.’ Iesu ese Lasaro ena mase ia gwauraia. To idia laloa ia be laga-ani ena mahuta ia herevalaia. Unai dainai Iesu ese idia dekenai ia hereva maoro, ia gwau, ‘Lasaro be ia mase vadaeni.’ ”​—⁠Ioane 11:​11-14.

Tauanina Sibona Ia Mase Lasi

Tau ta ia mase neganai, ena kahana ibounai idia mase, iena tauanina sibona ia mase lasi. Baibel ena hereva ese idia hahedinaraia goevagoeva dainai, ita diba taunimanima be mai edia mase diba lasi soul, tauanina ia mase neganai do ia roho mauri gauna ta ia noho lasi. Baibel ese ia hahedinaraia goevagoeva soul ia mase diba. “Itaia! Soul ibounai-idia be lauegu. Tamana ena soul hegeregerena, natuna ena soul danu-idia be lauegu. Ia kara dika soul-ia sibona do ia mase.” (Esekiela 18:⁠4, NW) Baibel ena hereva ta ia gwau lasi tanobada taudia be mai edia “mase diba lasi soul” eiava “edia mauri ia doko diba lasi.”

New Catholic Encyclopedia ese Baibel lalonai “soul” ena Heberu bona Greek gado herevadia ia herevalaia, ia gwau: “TG [Taravatu Gunana] lalonai soul be nepeš, TM [Taravatu Matamatana] lalonai be [psy·kheʹ]. . . . Nepeš ena anina ta be hahodi, unai dainai . . . hahodi karana be mauri taudia edia kara, to mase taudia idia karaia diba lasi dainai, nepeš ena anina be mauri, o oi sibona o oi sibona emu mauri. . . . TG lalonai tauanina bona soul be gau rua bamona idia hapararaia lasi. Israela tauna ese gau ta ia itaia neganai ia be gau korikorina tamona sibona, unai dainai ia ese taunimanima ta ia itaia neganai ia laloa ia be gau idauidau lasi to tau tamona sibona. Ena be inai hereva nepeš be iseda gado ai idia torea hanai soul, to ena anina be ia be tauanina eiava tau ta amo ia idau lasi. . . . Inai hereva [psy·kheʹ] be TM lalonai bona ia be nepeš hegeregerena. Iena anina be mauri ena anina o badina, mauri sibona, eiava mauri tauna o animal ta.”

Unai amo ita itaia diba mase negana ai, guna ia mauri tauna, eiava ia mauri soul, be ia mauri lasi. Tauanina be idia guria bena ia bodaga neganai eiava idia gabua neganai “kahu” ai ia lao eiava tano dekenai ia giroa lou. Iehova ese Adamu ia hamaoroa: “Oi be tano dekena amo karaia gauna, bona tano dekenai do oi giroa lou.” (Genese 3:19) Vadaeni, taunimanima idia mase murinai edena bamona do idia mauri diba? Unai ia vara diba badina Dirava be mase tauna ia laloatao. Iehova be mai ena siahu bona diba bada taunimanima ia havaraia totona, unai dainai ia be hoa gauna lasi iena lalona dekenai mase tauna ena kara ia laloatao diba. Oibe, mase tauna ia mauri lou diba dalana be Dirava sibona dekenai ia noho.

Unai ese inai hereva “lauma” ena anina ia gwauraia, idia gwau ia giroa lou ia henia tauna, Dirava momokanina dekenai. Unai kara ia herevalaia neganai, Dirava ena siahu amo Hadibaia Tauna bukana ia torea tauna ia gwau: “Iseda tauanina be tanobada ena kahu dekenai do idia giroa lou, bona iseda lauma be ita dekenai ia henia Dirava dekenai do idia giroa lou.”​—⁠Hadibaia Tauna 12:⁠7.

Dirava sibona ese tau ta ia hamauria diba. Dirava be Eden umana lalonai Adamu ia karaia bona ena udu baubau lalonai “mauri ena lagana,” ia hiriria vareai neganai, Adamu ena baragi be hodahoda sibona amo ia hahonua lasi, to Iehova ese mauri siahuna ia gaukaralaia tauanina ena sel ibounai ia hamauridia totona. (Genese 2:⁠7) Unai mauri siahuna be tama sina ese edia natudia dekenai idia henia rogorogo bona mara negana amo, to ena be edia tama sina amo mauri siahuna idia abia, taunimanima edia mauri ena badina be Dirava amo.

Toreisi Lou​—⁠Moale Negana

Namona be toreisi lou karana be tauanina idauna lalonai mauri abia loulou lalohadaina ida ita hatamonaia lasi. Unai lalohadai be Baibel ena hahediba herevana ta lasi. Unai lalohadai idia abia dae taudia, idia gwau tau ta ia mase murinai, ia be nega tamona eiava nega momo lalonai ia mauri loulou. Idia gwau iena mauri gunanai ena kara bona ena noho hegeregerena, ia ese mauri namona eiava mauri dikana do ia abia. Unai hereva hegeregerena, tau ta be taunimanima ta o animal ta ai do ia “vara lou” diba. Unai be Baibel ena hadibaia herevana amo ia idau vaitani.

Inai hereva “toreisi lou” be Greek gado herevana a·naʹsta·sis amo idia hahanaia, bona iena anina be “gini tore lou.” (Gado hahanaia Heberu taudia ese Greek gado herevana a·naʹsta·sis be Heberu gado herevadia techi·yathʹ ham·me·thimʹ ida idia hahegeregerea, edia anina be “mase taudia hamauria lou.”) Dirava ese mase tauna ta ia hatorea isi lou, anina be unai tau ena mauri oromana, Dirava ese ia laloatao gauna, be ia ese ia havaraia lou. Dirava ena ura hegeregerena, mase tauna be tanobada tauanina ai eiava lauma tauanina ai do ia hatorea isi lou. To herevana edena dala ai ia toreisi lou, iena mauri korikori do ia abia lou bona ena mauri negana gunanai ia karaia karadia do ia laloatao.

Oibe, Baibel ese toreisi lou idauidau rua ia herevalaia. Toreisi lou ta be taunimanima haida sibodia totona, lauma tauanina ai guba dekenai do idia lao. Iesu Keriso be unai bamona toreisi lou ia abia. (1 Petero 3:18) Bona ia hahedinaraia unai toreisi lou do idia abia taudia be iena aena gabuna dekenai idia raka taudia amo do idia abia hidi; iena abidadama aposetolo taudia amo ia hamatamaia. Idia dekenai ia gwauhamata, ia gwau: “Lau be do lau lao, gabu ta do lau karaia hegaegae umui emui. . . . Do lau giroa mai, lau dekenai do lau abia dae umui, vadaeni lau noho gabuna dekenai be umui danu unuseni do umui noho.” (Ioane 14:​2, 3) Baibel ese unai ia gwauraia “toreisi lou ginigunana,” badina nega dekenai ia be ginigunana bona ia be mai anina bada. Baibel ese guba dekenai do idia toreisi lou taudia ia gwauraia Dirava ena hahelaga taudia bona Keriso Iesu ida do idia lohia taudia. (Apokalupo 20:⁠6) “Toreisi lou ginigunana” be namba maragina taudia sibona totona, bona Baibel ese ia hahedinaraia mai abidadama tatau bona hahine amo 144,000 sibona do idia abidia. Edia mauri lalonai idia ese Iehova Dirava bona Keriso Iesu idia badinaia goadagoada ela bona idia mase, bona mai goada ida idia abidadama henia gauna idia harorolaia ma taunimanima haida dekenai.​—⁠Apokalupo 14:​1, 3, 4.

Momokani, guba dekenai idia toreisi lou taudia be toreisi lou negana do idia moalelaia dikadika. To moale be unuseniai ia doko lasi, badina tanobada dekenai toreisi lou do ia vara gwauhamatana ia noho danu. Idia toreisi lou taudia ese inai tanobada dikana ena dokona amo idia roho mauri taudia, ta ese edia namba ia gwauraia diba lasi taudia unai, do idia hedavari henidia. Guba dekenai do idia toreisi lou taudia edia namba maragina ia itaia murinai, aposetolo Ioane be ena matahanai lalonai “hutuma bada herea, tau ta ese ia duahidia diba lasi, bese idauidau bona iduhu idauidau bona kopina idauidau bona gado idauidau amo” ia itaia. Taunimanima milioni, reana bilioni momo, be tanobada dekenai do idia mauri lou neganai, unai be moale negana momokanina!​—⁠Apokalupo 7:​9, 16, 17, NW.

Edena Negai Do Ia Vara?

Hari inai nega bamona bema heatu, ala-ala, hodahoda bona ranu dikana, bona dagedage ese tanobada do ia hadikaia noho​—⁠tanobada dekenai idia toreisi lou taudia edia moale be do ia daudau lasi. Toreisi lou negana be “tanobada matamata” haginia negana murinai do ia vara. Mani oi laloa, hari inai negai tanobada bona ena hairai idia hadikaia bona danu ena noholaia taudia hahisidia bada taudia bona oreadia be do idia ore vaitani.​—⁠2 Petero 3:​13; Apokalupo 11:⁠18.

Ita itaia goevagoeva, tanobada dekenai mase taudia do idia toreisi lou negana be do nega vaira ai. To sivarai namona be, unai be kahirakahira do ia vara. Momokani, inai tanobada dikana ena dokona do ita naria. To, idia vara gaudia momo ese idia hahedinaraia “hisihisi bada herea” be kahirakahira do ia vara, bena unai murinai “Siahu Ibounai Diravana ena Dina Badana” ena tuari​—⁠nega momo idia gwauraia Aramagedono​—⁠do ia vara. (Mataio 24:​3-14, 21; Apokalupo 16:​14, 16) Unai ese kara dika ibounai be inai gabu hereadaena, Tanobada, amo do ia kokia. Unai murinai Keriso Iesu ena Lagani 1,000 Lohia Negana do ia matamaia, unai nega lalonai tanobada be paradaiso ai do ia lao.

Baibel ia hahedinaraia unai Lagani 1,000 Lohia Negana lalonai, mase taudia do idia toreisi lou. Unai neganai, Iesu be tanobada dekenai ia noho neganai ia karaia gwauhamatana do ia guguru: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.”​—⁠Ioane 5:​28, 29.

Toreisi Lou Helarona ena Namo

Nega vaira toreisi lou do ia vara be helaro namo hereana​—⁠mase taudia do idia mauri lou negana unai! Unai ese ita ia hagoadaia bada ita buruka ita lao neganai, ita gorere, dika badadia idia vara neganai o ita lalohisihisi neganai, bona dina ta ta ai iseda mauri lalonai metau bona hekwakwanai ita davaria neganai! Ia ese mase ena hisihisi ia kokia​—⁠lalohisihisi ia kokia vaitani lasi to helaro lasi taudia amo ita ia hapararaia. Aposetolo Paulo ese toreisi lou helaro ena hahegoada karana be inai hereva amo ia gwauraia: “Aiemai varavara taudia e, ai ura lasi mase dekenai idia mahuta noho taudia totona umui lalohisihisi. Ia namo lasi umui be lalohisihisi bada, Keristani lasi taudia bamona. Idia ese Dirava idia abidadama henia lasi, bona idia ese mase amo toreisi lou mauri totona idia naria lasi. Badina be ita abidadama henia gauna be inai: Iesu ia mase, ma ia toreisi lou. Unai dainai ita Keristani taudia ita mase neganai, ita danu do ita toreisi lou. Dirava ese ita do ia hamauria lou, vadaeni Iesu danu do ita noho.”​—⁠1 Tesalonika 4:​13, 14.

Iobu ese ia gwauraia gauna ma ta reana ita mamia vadaeni, ia gwau: “Taunimanima be gau ta bamona ia bodaga ia lao, kaubebe ese idia ania ore dabua bamona. Hahine amo ia vara tauna ena dina be momo lasi bona hekwakwanai amo idia honu. Palaoapalaoa bamona ia tubu bena ia kakoro; ia boio haraga laulau bamona, ia noho daudau lasi.” (Iobu 13:​28–14:​2, New International Version) Ita diba danu iseda mauri lalonai ita diba lasi dahaka do ia vara bona inai tanobada dikana lalonai ita noho dainai, ita ibounai ese ‘nega dika ita davaria noho, bona inai dika ia vara kava noho.’ (Hadibaia Tauna 9:11) Momokani, ita ta be mai moale ida iseda mase negana ita laloa lasi. To, toreisi lou helarona ese ita ia durua mase ita garilaia lasi totona.

Unai dainai, oi goada noho! Mase ena mahuta negana do oi laloa lasi, to toreisi lou ena hoa karana amo mauri lou negana oi laloa. Nega vaira ai mauri hanaihanai do oi abia diba, bona oi diba unai nega namona be kahirakahira do ia vara dainai oi moale be namo.