Guriguri Ena Siahu
Nahoro ena siti dekenai, Middle East ai, dina be kahirakahira ia diho. Suria tauna ta ladana Eliesere be mai ena kamelo 10 danu unai siti murimurinai ia noho ranu gurina ta dekenai ia ginidae. Ena be ia hesiku bona ia ranu mase, to Eliesere ese haida edia namo ia laloa guna. Ia be tano idauna amo ia mai ena biaguna ena natuna ena adavana ta ia tahua totona. Danu, unai hahine be ena biaguna ena varavara edia huanai do ia davaria be namo. Ia ese unai gaukara aukana be edena bamona do ia hagugurua diba?
ELIESERE be guriguri ena siahu ia abia dae. Abidadama idauna, natuna ese ia hahedinaraia diba abidadama bamona, ia hahedinaraia bona mai manau danu Dirava ia noia: “Lohiabada e, lauegu biaguna Aberahamo ena Dirava e, oi dekenai lau noinoi, hari dina lauegu gaukara mani oi hanamoa, bona oiemu gwauhamata lauegu biaguna Aberahamo dekenai mani oi hamomokania. Lau be iniseni, ranu guri dekenai lau noho, bona hanua kekeni be do idia mai, ranu utua totona. Lau be kekeni ta dekenai do lau hereva, do lau gwau, ‘Mani emu kara oiemu hodu oi atoa diho lao, bona ranu sisina lau dekenai do oi henia, do lau inua.’ Bema ia gwau, ‘Namo, oi inua, bona oiemu kamelo dekenai danu ranu do lau henia.’ Lau ura unai kekeni be oiemu abia hidi kekeni oiemu hesiai tauna Isako dekenai. Bema inai bamona ia vara neganai, do lau diba oiemu gwauhamata lauegu biaguna dekenai be oi hamomokania vadaeni.”—Genese 24:12-14.
Eliesere ese guriguri ena siahu ia abia dae karana ese anina ia havaraia. Kekeni ginigunana unai ranu gurina dekenai ia mai be Aberahamo ena kakana ena tubuna kekenina! Ena ladana be Rebeka, bona ia be headava lasi kara maoromaoro kekenina mai ena hairai. Hoa gauna be, ia ese Eliesere sibona dekenai ranu ia henia lasi to mai hemataurai danu ia gwau ena kamelo iboudiai dekenai ranu do ia henia. Gabeai, ruma bese danu idia herevahereva murinai, Rebeka be mai ena ura ida Eliesere danu tano daudauna dekenai do ia lao bona Aberahamo ena natuna Isako ena adavana ai do ia lao. Unai be Eliesere ena guriguri ia haerelaia karana idauna ta, unai nega lalodiai Dirava ese nega haida hoa karadia ia karaia!
Eliesere ena guriguri amo gau haida ita dibaia diba. Ia hahedinaraia Eliesere ena abidadama be bada herea, ia manau, bona sibona ena namo lasi to haida edia namo ia laloa bada. Danu, Eliesere ena guriguri ese ia hahedinaraia ia be mai ena ura ida Iehova ese taunimanima ia kara henidia dalana ia badinaia. Ita daradara lasi ia ese Dirava ena hetura karana Aberahamo ida ia diba, bona ia diba Dirava ese ia gwauhamatalaia vaira negana lalonai taunimanima ibounai be Aberahamo ena amo namo do idia davaria. (Genese 12:3) Unai dainai, Eliesere ese ena guriguri be inai hereva amo ia hamatamaia: “Lohiabada e, lauegu biaguna Aberahamo ena Dirava e.”
Aberahamo ena bese amo ia mai tauna Iesu Keriso amo kamonai taudia ese hahenamo do idia abia. (Genese 22:18) Bema ita ura hari inai negai eda guriguri edia haere ita abia, namona be mai manau ida Dirava ese ena Natuna amo taunimanima ia kara henidia dalana ita abia dae. Iesu Keriso ia gwau: “Bema lau do umui badinaia, bona egu hereva be emui lalona dekenai idia noho neganai, emui ura gaudia dekenai do umui noinoi, vadaeni unai gaudia do umui abia.”—Ioane 15:7.
Keriso ena murinai ia raka tauna ta, ena mauri lalonai unai hereva idia guguru tauna be aposetolo Paulo. Guriguri be mai ena siahu ia abia dae karana ese anina ia havaraia. Ena Keristani tadikaka ia hagoadaia edia lalo-hekwarahi gaudia ibounai be guriguri amo Dirava dekenai do idia atoa bona ia gwau: “Keriso ese lau ia hasiahua, vadaeni gau ibounai lau goadalaia diba.” (Filipi 4:6, 7, 13) Unai ena anina be Paulo ese Dirava dekenai ia noia gaudia ibounai ia abia, a? Mani ita itaia.
Noinoi Gaudia Ibounai be Ia Henia Lasi
Paulo be sibona ena namo ia tahua lasi dalanai hesiai gaukara ia karaia lalonai, ia gwauraia “ginigini ta” ese ia hahisia. (2 Korinto 12:7) Reana unai gauna be ia idia dagedage henia taudia bona “varavara koikoi taudia” ese idia havaraia hemami dikana bona lalo-metau. (2 Korinto 11:26; Galatia 2:4) Eiava ena matana ia dika momokani dainai ia abia hisihisi. (Galatia 4:15) Herevana ia be dahaka, to unai “ginigini” ese Paulo ia hamanokaia. Paulo ia gwau: “Nega toi Lohiabada dekenai lau guriguri, lau noia ia ese inai hisihisi do ia kokia.” To, Paulo ese ena noinoi gauna ia abia lasi. Dirava ese Paulo dekenai ia hahedinaraia Ia amo lauma dalanai ia abia vadaeni hahenamo, hegeregere, siahu ia abia hahetoho do ia haheaukalaia totona, be ia hegeregere. Ma danu, Dirava ia gwau: “Lauegu siahu be manokamanoka tauna lalonai ia hedinarai momokani.”—2 Korinto 12:8, 9.
Eliesere bona Paulo edia haheitalai amo dahaka ita dibaia? Momokani Iehova Dirava ese mai edia manau ida ena hesiai gaukara idia karaia taudia edia guriguri ia kamonai. To ita gwau lasi ena anina be nega ibounai ia ese edia noinoi gaudia ia henia badina Dirava be vaira ai do idia vara gaudia ia diba. Iseda namo do idia havaraia gaudia be ita diba lasi to ia be ia diba namonamo. Bona mai anina bada gauna be, hanaihanai ia ese iena ura, Baibel ese ia hahedinaraia urana, hegeregerena ia karaia.
Lauma Dalanai Hanamoa Negana
Dirava ia gwauhamata ena Natuna ena Lagani 1000 Lohia Negana lalonai, tauanina, laloa, bona hemami dalanai taunimanima edia gorere ibounai do ia hanamoa. (Apokalupo 20:1-3; 21:3-5) Keristani taudia momokanidia ese mai edia ura bada ida ia gwauhamatalaia vaira negana idia naria noho, idia abia dae momokani Dirava ena siahu be hegeregere unai gauna do ia havaraia totona. Hari inai nega ai idia laloa lasi Dirava ese hoa dalanai gau ibounai do ia hanamoa, to idia ese Dirava idia guriguri henia, goada ia henidia hahetoho idia haheaukalaia diba totona. (Salamo 55:22) Idia gorere neganai, Dirava idia noia diba do ia durudia edia moni hegeregerena heduru maorona do idia davaria totona.
Dubu haida ese gorere taudia idia hagoadaia idia guriguri Dirava ese hari edia gorere ia hanamoa totona, idia laloa unai be maoro badina Iesu bona ena aposetolo taudia ese hoa dalanai gorere idia hanamoa. To unai bamona hoa karadia idia karaia be mai ena badina idauna ta. Idia hahedinaraia Iesu Keriso be Mesia momokanina bona Dirava ena lalo-namo be Iuda besena amo ia hanaia lao Keristani kongregesen matamatana dekenai. Unai nega ai, hoa karadia be mai ena badina, idia haginia matamata Keristani kongregesen ena abidadama hagoadaia totona. Unai kongregesen matamata be ia bada ia lao bona ia goada neganai, unai hoa karadia “idia doko.”—1 Korinto 13:8, 11.
Inai mai ena anina bada negana lalonai, Iehova Dirava ese ia idia tomadiho henia taudia be mai anina bada lauma hanamoa gaukarana dekenai ia hakaua. Taunimanima dekenai nega ia do noho lalonai, namona be idia ese inai hahegani idia badinaia: “Lohiabada do umui tahua, umui do davaria diba neganai. Ia dekenai do umui noinoi, ia be do kahirakahira ia noho neganai. Kara dika taudia ese edia dala do idia rakatania, bona edia laloa dikadia do idia rakatania danu. Namona be Lohiabada, iseda Dirava dekenai idia giroa lou. Badina Lohiabada be mai ena bogahisihisi, bona ia ese dika do ia gwauatao momokani.”—Isaia 55:6, 7.
Unai lauma dalanai hanamoa karana, helalo-kerehai kara dika taudia dekenai, be Dirava ena Basileia ena sivarai namona harorolaia karana amo ia guguru noho. (Mataio 24:14) Iehova Dirava ese ena hesiai taudia ia hasiahua unai hamauria gaukarana idia karaia totona, unai amo bese idauidau taudia ia durua inai nega dikana ena dokona ia do vara lasi negana lalonai edia kara dika amo idia helalo-kerehai bona ia danu edia turana karana idia hanamoa totona. Unai bamona lauma hanamoa karana totona idia guriguri taudia bona unai lauma hanamoa karana karaia totona ena heduru idia noia taudia be momokani edia guriguri ena haere idia abia noho.
[Picture Credit Line on page 3]
Eliezer and Rebekah /The Doré Bible Illustrations/Dover Publications