Sekema—Koura Hanuana

DIRAVA ese iena bese taudia totona ia abia hidi tanona ena ihuanai, Ebala Ororona bona Gerisima Ororona padadiai, be Sekema hanuana. Unuseniai—lagani 4,000 bamona idia lao vadaeni​—⁠Iehova ese Aberahamo ia gwauhamata henia, ia gwau: “Inai tano be oiemu tubuna dekenai do lau henia.”​—⁠Genese 12:​6, 7.

Unai gwauhamata hegeregerena ai, Aberahamo ena tubuna Iakobo be Sekema ai ia kamepa; unuseniai boubou patana ta ia haginia, bona ena ladana ia hatoa “Dirava be Israela ena Dirava.” Toana be Iakobo ese ranu gurina ta be unuseniai ia geia, ena famili bona ena mamoe edia ranu abia totona. Lagani handred momo murinai unai guri be “Iakobo ena ranu guri” idia gwauraia.​—⁠Genese 33:​18-​20; Ioane 4:​5, 6, 12.

To Iakobo ena ruma bese taudia haida ese tomadiho momokanina idia goadalaia lasi. Iena natuna kekenina, Daina, ese Kanana kekenidia ia bamodia Sekema ai. Daina be do kekeni neganai, ia ese ena noho namo iena famili edia palai rumadia ai be ia rakatania, unai hanua kahirakahirana ia lao loulou bona hanua kekenidia ia tura henia.

Toana be unai haneulato be sibona unai hanua ia lao loulou; vadaeni unai hanua ena uhau ese edena bamona ia idia laloa? Lohia ta ena natuna ese “ia itaia, ia rosia, vadaeni ia kara dika henia.” Badina be dahaka Daina ese Kanana taudia, lebulebu taudia, edia hebamo dikana ia tahua? Badina be ia laloa sibona ena uru kekenidia do ia bamodia be namo, a? Iena taihuna haida hegeregeredia, ena lalona ia auka bona ia hekokoroku, a? Genese ena sivarai mani oi duahia, bona Iakobo bona Lea edia lalohisihisi bona edia hemarai, edia natuna be Sekema ia lao loulou dainai ia vara gauna dikana dainai idia abia gaudia, be mani oi lalo-pararalaia toho.​—⁠Genese 34:​1-​31; 49:​5-7; ma danu The Watchtower, June 15, 1985 gauna, rau 31 itaia.

Lagani 300 bamona idia ore murinai, Dirava ena sisiba herevadia laloa lasi karana ena anina be ia hedinarai lou. Sekema ai, Iosua ese hebou ta ia karaia, Israela sivaraina lalonai mai anina bada herea gauna unai. Koura ai ia vara gauna be emu lalona ena matana amo mani oi itaia. Taunimanima milioni ta mai kahana​—⁠tatau, hahine, bona memero kekeni​—⁠Israela ena iduhu 6 taudia, be Gerisima Ororona vairanai idia gini. Koura unai kahanai iduhu oredia 6 taudia be Ebala Ororona vairanai idia gini; unai orea ruaosi edia bada be hegeregere.a Bona henuai, gwauhamata mauana badinai, Israela taudia edia orea badadia ruaosi padadiai, be hahelaga taudia bona Iosua idia gini. Unai ena toana be namo herea!​—⁠Iosua 8:​30-​33.

Unai hutuma bada herea ataiai, unai ororo ruaosi idia hedinarai—ta be mai hairaina, ma ta ia kaukau bona dika. Gerisima ena atai kahana ena tano namona ena toana be namo, to Ebala ena be nadi gabuna sibona. Israela taudia be Iosua do ia hereva matamaia negana idia naria noho lalonai mai edia moale ida idia herevahereva maragimaragi, edia moale ena mamina oi abia, a? Unai steidiam bamona gabuna ai, regerege iboudiai idia giroa mai.

Hora 4 ia lao 6 lalonai Iosua ese ‘Mose ena taravatu bukana’ ia duahia neganai, unai taunimanima danu idia hereva. (Iosua 8:​34, 35) Toana be hanamoa herevadia ta ta murinai Israela taudia Gerisima Ororona vairanai be idia gwau Amen!, bona Ebala vairanai idia gini taudia edia Amen! ese hadikaia herevadia ta ta idia hamomokania. Reana Ebala Ororona ena toana dikana dainai gwau-edeede ena anina dikana idia laloa lou.

Iosua ia gwau: “Iena tamana bona sinana ia matauraia lasi tauna be Dirava ese do ia hadikaia momokani.” Bena nega tamona gado milioni ta mai kahana idia haere, idia gwau: “Amen.” Iosua ia naria ela bona edia gado regena, guba ena boiboi regena bamona, be ia ore, bena ma ia gwau: “Iena badibadinai ia noho tauna ena tano hetoana maka ia kokia tauna be Dirava ese do ia hadikaia momokani.” Bena iduhu 6, bona idau bese taudia momo danu, idia boiboi lou, idia gwau, “Amen.” (Deuteronomi 27:​16, 17) Bema oi be unuseniai, unai hebou, ororo padadiai idia karaia gauna, be gabeai do oi laloaboio, a? Ia dainai do oi laloaboio diba lasi Dirava do oi kamonai henia be namo, ani?

Lagani 20 bamona murinai Iosua ia mase. Ena mase be kahirakahira neganai, unai bese taudia be Sekema ai ia haboudia lou, edia lalona hagoadaia totona. Dala rua be idia vairanai ia atoa, idia ta ta iboudiai ese ta do idia abia hidi be namo. Ia gwau: “Hari dina do umui abia hidi be namo. Edena dirava ena hesiai gaukara do umui karaia? . . . To lau, bona lauegu famili taudia, ai ese Lohiabada sibona ena hesiai gaukara do ai karaia.” (Iosua 24:​1, 15) Toana be unai hebouhebou, Sekema ai idia karaia gaudia, ese edia abidadama idia hagoadaia momokani. Iosua ia mase murinai, lagani momo lalodiai Israela taudia ese ena kamonai karana idia tohotohoa.​—⁠Iosua 24:​31.

Lagani 1,500 bamona murinai, Iesu be Gerisima Ororona ena kerukeruna ai ia laga-ani neganai, herevahereva namona ta ia vara. Ena laolao daudauna dainai Iesu be ena tauanina ia manoka, bena Iakobo ena ranu gurina badinai ia helai neganai, Samaria hahinena ta mai ena hodu be ia raka mai. Iesu ese ia noia ranu do ia henia neganai, hahine ia hoa bada, badina be Iuda taudia ese Samaria taudia idia hereva henia lasi, bona edia hodu amo idia inuinu diba lasi momokani. (Ioane 4:​5-9) Iesu ena hereva gabedia ese ma idia hahoaia bada herea.

“Inai ranu do idia inua taudia ibounai be do idia ranu mase lou. To lau ese do lau henia ranuna do ia inua tauna be do ia ranu mase lasi ia lao bona hanaihanai. Lau ese do lau henia ranuna be inai tau lalonai, sinavai bamona do ia heau noho. . . . Ma mauri hanaihanai danu do ia henia.” (Ioane 4:​13, 14) Mani oi laloa, hahine ese unai gwauhamata ia ura henia, badina be ranu be unai guri dobuna amo ia utua be mai hekwarahi. Iesu ese ma ia hahedinaraia, ena be idaunega amo Ierusalema bona Gerisima Ororona idia laloa bada, to unai tomadiho gabudia ruaosi be anina lasi, Dirava tomadiho henia karana lalonai. Ta ena lalona bona ena kara be mai anina, iena tomadiho gabuna be anina lasi. Ia gwau: “Tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho.” (Ioane 4:​23) Unai hereva ese hahine ena lalona idia hagoadaia momokani! Bena unai koura lalonai taunimanima ia hagoadadia Iehova ena hesiai do idia lao henia, gunaguna Iosua ia karaia hegeregerena.

Hari inai negai Nablus hanuana be idaunegai hanuana Sekema ena nadi senudia badinai ia noho. Gerisima Ororona bona Ebala Ororona be unai koura ataiai idia do noho, idaunegai idia vara gaudia edia toana hegeregeredia. Unai ororo edia badina ai, Iakobo ena ranu gurina be ia do noho. Unuseniai idia vara gaudia ita laloa neganai, ita diba Iosua bona Iesu ese ita idia hadibaia hegeregerena tomadiho momokani do ita goadalaia be mai anina bada.​—⁠Isaia 2:​2, 3 itaia.

[Footnotes]

[Picture Credit Line on Page 31]

Pictorial Archive (Near Eastern History) Est.