Duahia Taudia Edia Henanadai
“Gima Kohorona,” August 15, 1996 gauna, ia gwau: ‘Hisihisi badana ena kahana ginigabena ai, Iehova ena kahanai idia heau lao “taudia” be hahemauri do idia abia.’ Unai hereva ena anina be hisihisi badana ena kahana ginigunana ia ore murinai, kamonai matamata taudia momo herea be Dirava ena kahana ai do idia hanaia lao, a?
Unai bamona gauna ai herevalaia lasi.
Iesu ena hereva Mataio 24:22 ai edia anina be dala badana ai do idia vara haida be hahemauri do idia davaria hisihisi badana ena kahana ginigunana ai tomadiho ibounai idia dagedage henia neganai. Unai Gima Kohorona ia gwau: “Oi laloatao ‘taunimanima,’ horoa orena taudia bona ‘hutuma bada herea’ taudia, be hisihisi badana ena kahana ginigunana ai Babulonia Badana do ia ore haraga neganai, hahemauri idia davaria vadaeni.”
Iesu bona ena guba tuari oreana be hisihisi badana ena kahana ginigabena ai kara ta idia karaia neganai, unai abidadama taudia be dika do idia davaria lasi. To daidia be unai hisihisi badana negana ena kahana amo do idia roho mauri? Apokalupo 7:9, 14 ia hahedinaraia tanobada dekenai idia ura idia noho hutuma badana taudia do idia roho mauri. Dirava ese ena lauma amo ia horoa Keristani taudia dekenai dahaka do ia vara? Gima Kohorona, February 1, 1991, ena hereva ladana “Duahia Taudia Edia Henanadai” ese dahaka dainai ita be horoa orena taudia be edena nega ai guba dekenai do idia lao ita gwauraia diba lasi ia herevalaia. Unai dainai vanegai ita abia herevana (August 15, 1996) ese unai gauna ia herevalaia dalana be unai bamona danu, nega ia atoa lasi, ia gwau sibona: ‘Unai hegeregerena, hisihisi badana ena kahana ginigabena ai, Iehova ena kahanai idia heau lao “taudia” be hahemauri do idia abia.’
To hisihisi badana ia matamaia murinai haida be hereva momokani do idia dibaia bona Dirava ena kahanai do idia hanaia lao eiava lasi herevana ita laloa totona, namona be Iesu ena hereva Mataio 24:29-31 ai oi itaia. Hisihisi badana ia hamatamaia murinai, taunimanima ena Natuna ena toana do ia hedinarai. Iesu ia gwau bese ibounai do idia tai, to ia gwau lasi taunimanima do idia noga bamona, do idia helalo-kerehai, Dirava ena kahanai do idia hanaia lao, bona hahediba taudia korikoridia ai do idia lao.
Unai hegeregerena, mamoe bona nanigosi parabole ai, taunimanima ena Natuna do ia hedinarai bona kota do ia karaia, taunimanima do ia hapararaia, guna dahaka idia karaia bona dahaka idia karaia lasi hegeregerena. Iesu ia gwau lasi nega daudau lalonai nanigosi bamona karadia idia karaia taudia be do idia helalo-kerehai haraga bona mamoe taudia ai do idia lao. Do ia mai bona taunimanima idia karaia vadaeni gaudia hegeregerena do ia kota henidia.—Mataio 25:31-46.
To danu, namona be unai gauna ai herevalaia mai goada ida lasi. Dirava ena taunimanima, horoa taudia bona hutuma bada taudia danu, idia diba edia gaukara be dahaka—haroro gaukara bona hahediba taudia karaia. (Mataio 28:19, 20; Mareko 13:10) Hari be nega namona iseda lalona dekenai inai hereva ita laloa bada: “Ai be Dirava danu ai gaukara hebou dainai, umui ai noia goada inai bamona, ‘Umui ese Dirava ena hariharibada umui abia vadaeni, be umui negea kava lasi.’ Badina Dirava be inai bamona ia hereva, ia gwau: ‘Lauegu hariharibada henia ena dina ia ginidae neganai, umui emui taitai lau kamonai. Lau ese mauri umui do lau henia dinana ia ginidae neganai, umui dekenai durua do lau henia.’ Umui kamonai! Dirava ena hariharibada ita abia ena nega namona be harihari! Hari dina hamauria ita abia dae be namo!”—2 Korinto 6:1, 2.