‘Ai Oi Hamaoroa, Hari Gau be Edena Negai Do Idia Vra?’

“Harihari gau matamatadia lau gwauraidia hedinarai. Idia do hedinarai lasi neganai, umui lau hamaorolaia.”​—ISAIA 42:9.

1, 2. (a) Iesu ena aposetolo ese vaira negana edena bamona idia nanadailaia? (b) Iesu ese ia gwauraia toana mai ena kahana idauidau ena anina be edena bamona ia vara?

ITA ia hadibaia Diravana, Iehova, ia gwau: “Matamana negana ai dokona lau gwauraia.” (Isaia 46:10) Inai hereva ia gunalaia herevana ese ia hahedinaraia aposetolo ese unai bamona dibana be Iesu dekenai idia tahua. Idia nanadaia, idia gwau: “Mani oi hamaoroa ai dekenai, inai gau ibounai edena negai do idia vara? Do idia mai kahirakahira toana be dahaka?”​—Mareko 13:4.

² Iesu ese toa ta mai ena kahana idauidau ia gwauraia, do idia hahedinaraia Iuda besena be kahirakahira do ia ore. Unai hereva ia momokani, Ierusalem be lagani 70 C.E. ai idia hadikaia ore neganai. To nega daudau murinai Iesu ena peroveta herevana ena anina be dala badana ai do ia vara. “Idau bese edia nega” be lagani 1914 ai do ia ore neganai, toa ta be dala badana ai do ia hedinarai, do ia hahedinaraia hari inai nega dikana be ‘hisihisi badana’ ai kahirakahira do ia ore.a (Luka 21:24) Taunimanima milion momo hari idia mauri noho ese idia hamomokania diba, idia hanai laganidia 90 bamona lalodiai hari toa be tanobada ibounai tuaridia bona gau badadia ma haida lalodiai ia hedinarai. Unai gau ese danu idia hahedinaraia Iesu ena peroveta herevana be dala badana ai ia momokani, gunaguna dala maragina ai lagani 33 ela bona 70 C.E. ai ia momokani hegeregerena.

³ Luka ese idau bese edia nega ia gwauraia murinai, gau ma haida ia gwauraidia, Mataio bona Mareko danu ese idia gwauraidia gaudia unai. Idia ta be ‘tanobada dokona ena toana’ mai ena kahana idauidau lasi, to ia be “toa” ma ta. (Mataio 24:3) (Rau 15 ai inai hereva be laini toutoudia rua amo ai koua.) Mataio ia gwau: “Unai nega dikana do ia ore, vadaeni maoromaoro dina be do ia dibura, hua danu do ia diari lasi, hisiu guba dekena amo do idia moru, bona guba dekenai idia noho siahu gaudia do idia mareremarere. Vadaeni Taunimanima ena Natuna ena toana guba dekenai do ia hedinarai. Unai neganai tanobada ena bese ibounai do idia tai, badina be Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu. Vadaeni ia ese ena aneru do ia siaia, mai kibi ena regena bada danu, lai edia gabuna 4 dekena amo, bona guba kahana ena dokona dekenai ia lao bona guba kahana ena dokona dekenai . . . iena abia hidi taudia do idia gogoa.”​—Mataio 24:​29-31.

Hisihisi Bona Hoa Gaudia Guba Ai

⁴ Edena negai unai do ia vara? Evanelia sivaraidia toi idia gwau dina bona hua do idia dibura bona hisiu do idia moru. Iesu ia gwau “nega dikana” do ia ore murinai unai do ia vara. Lagani 70 C.E. ai ia ore negana dikana ia laloa a, eiava ia ese hisihisi badana, iseda nega lalonai do ia vara gauna, be ia herevalaia a?​—Mataio 24:29; Mareko 13:24.

5. Guna, Dirava ena orea taudia ese inai nega ena hisihisi badana be edena bamona idia laloa?

⁵ Idau bese edia nega be lagani 1914 ai ia ore negana amo ema bona hari, Dirava ena orea taudia ese hisihisi badana idia laloa mai edia ura bada ida. (Apokalupo 7:14) Guna, lagani momo lalodiai idia laloa inai nega ena hisihisi badana be mai ena kahana toi​—matamana, lagani 1914-18 ai, nega padana, bona dokona, “Siahu Ibounai Diravana ena Dina Badana” tuarina unai. Bema unai be momokani, “tanobada dokona” negana ena matamana bona ena dokona padadiai dahaka do ia vara?​—Apokalupo 16:14; Mataio 13:39; 24:3; 28:20.

6. Idia laloa dahaka dahaka ese Iesu ena hereva, guba toadia herevana, idia hamomokania?

⁶ Guna idia laloa unai nega padadiai toa mai ena kahana idauidau do ia hedinarai, ena kahana ta be Dirava ese ia gogodia taudia edia haroro gaukarana. Bona idia laloa Iesu ese ia perovetalaia gaudia, guba ai do idia hedinarai toadia, be hisihisi ena matamana, lagani 1914-18, murinai do idia vara. (Mataio 24:29; Mareko 13:​24, 25; Luka 21:25) Roketi be guba padanai siaidia karadia bona guba amo idia mai siahudia danu idia lalodia.

7. Dahaka lalohadai idauna hisihisi badana dekenai idia abia?

⁷ To, Gima Kohorona, February 1971 ena, ese Iesu ena peroveta herevana, hisihisi badana herevana, ia tahua lou. Ia hahedinaraia aposetolo edia negai ia vara hisihisina be mai ena kahana toi lasi, unai dainai hari inai nega ena hisihisi be mai ena kahana toi lasi​—matamana, lagani 1914-18 ai, nega padana, bena gabeamo dokona. Unai magasin ia gwau: ‘ “Hisihisi bada hereana” be do lasi, badina be ena anina be tomadiho koikoi basileiana tanobada hegegemadai do idia hadikaia ore, bena unai murinai “Siahu Ibounai Diravana ena dina badana tuarina” be Aramagedono ai do ia vara.’

8. Unai lalohadai matamatana hegeregerena, Mataio 24:29 ena anina be edena bamona idia gwauraia?

⁸ To Mataio 24:29 ia gwau hisihisi do ia ore bena “maoromaoro” dina bona hua do idia dibura bona hisiu do idia moru. Unai be edena bamona ia vara diba? Gima Kohorona, October 1, 1976 ena, be ia gwau unai siri ese ia gwauraia hisihisina be ia bada ia lao ela bona lagani 70 C.E. ai ia ore gauna. To edena bamona idia gwau diba, unai be lagani 70 C.E. ai ia vara bena “maoromaoro” unai guba toadia be hari inai negai idia vara? Idia gwau, lagani 70 C.E. ema bona hari idia ore laganidia handred handred be Dirava vairanai nega kwadogina mo. (Roma 16:20; 2 Petero 3:8) To inai peroveta herevana Mataio 24:29-31 ai ena anina be hari ai tahua dobu neganai, anina idauna ai davaria. Inai ese ia hahedinaraia diari be edena bamona “ia bada ia lao ela bona dina ia hedinarai momokani.” (Hereva Lada-isidia 4:18)b Inai anina idauna ma ta ena badina mani ita tahua.

9. Iesu ena hereva, guba toadia herevana, ena badina be Heberu Revarevadia ese edena bamona idia hahedinaraia?

⁹ Iesu ese ena aposetolo hani ia hamaorodia ‘dina do ia dibura, hua do ia diari lasi, bona hisiu do idia moru.’ Idia be Iuda taudia, unai dainai idia diba unai hereva be Heberu Revarevadia amo. Sefania 1:15 ia gwau Dirava ena hahemaoro negana be “lai-gubana bona hadikaia ore dinana, dibura bona gabora dinana, ori koremadia bona dibura masemase dinana.” Unai hegeregerena, Heberu peroveta taudia ma haida idia gwau dina do ia dibura, bona hua bona hisiu do idia diari lasi. Unai bamona herevadia amo idia ese Dirava ena hahemaoro herevadia na Babulono, Edom, Aigupito, bona not kahana basileiana Israel latadiai idia gwauraidia.​—Isaia 13:​9, 10; 34:​4, 5; Ieremia 4:28; Esekiel 32:​2, 6-8; Amos 5:20; 8:​2, 9.

10, 11. (a) Ioel ia gwau guba ai dahaka do ia vara? (b) Edena gau Ioel ese ia perovetalaidia, be lagani 33 C.E. ai idia vara, bona edena be unai neganai idia vara lasi?

¹⁰ Petero bona ena bamona toiosi ese Iesu ena hereva idia kamonai neganai, reana idia ese Ioel ena peroveta herevadia karoa 2:28-31 bona 3:15 ai be idia lalodia: “Lauegu lauma do lau bubua diho taunimanima idauidau iboudiai latadiai, bena emui natudia memerodia bona kekenidia do idia peroveta. . . . Toa gaudia danu do lau hahedinaraidia, guba ai bona tanobada ai, rara bona lahi bona kwalahu tubu-daena. Dina do ia dibura, hua be rara ai do ia lao, Iehova ena dina badana mai garina ida ia do mai lasi neganai.” “Dina bona hua do idia dibura, bona hisiu do idia diari lasi.”

¹¹ Aposetolo edia Kara 2:1-4 bona 14-21 edia hereva hegeregeredia, Pentekoste 33 C.E. ai, Dirava ese lauma helaga na hahediba taudia 120, tatau bona hahine, latadiai ia bubua diho. Petero ia gwau Ioel ese ia perovetalaia gauna be unai. To dina do ia dibura bona hua be rara ai do ia lao bona hisiu do idia diari lasi herevadia be edena bamona? Gau ta lasi ese ia hahedinaraia unai hereva edia anina be lagani 33 C.E. ai eiava Iuda besena ena dokona laganidia 37 lalodiai ia vara.

12, 13. Ioel ese ia perovetalaia gaudia, hoa gaudia guba ai, be edena bamona idia vara?

¹² Ioel ena peroveta herevana ena dokona kahana ai, ia ese “Iehova ena dina badana mai garina ida” do ia ginidae negana ia perovetalaia, Ierusalem do idia hadikaia ore negana unai. Ierusalem ai lagani 70 C.E. lalonai ia vara hisihisina be The Watchtower, November 15, 1966 ena, ese ia gwauraia, ia gwau: “Momokani unai be ‘Iehova ena dina’ ta, Ierusalem bona ena natuna edia. Unai dina ai ‘rara bona lahi bona kwalahu’ be bada, bona dina ese hanua ena dibura ia hadiaria lasi, bona hua ena toana be ia hebubu rarana ena bamona.”c

¹³ Oibe, ai herevalaidia peroveta herevadia haida hegeregeredia, Ioel ena peroveta herevadia, guba ai do idia vara gaudia herevadia, be idia momokani, Iehova ese Iuda besena ena davana ia henia neganai. Dina, hua, bona hisiu idia dibura, Iuda besena ena dokona negana ibounai lalonai lasi, to tuari oreadia ese Ierusalem idia tuari henia negana lalonai mo. Unai dainai ita diba Ioel ena peroveta herevana be dala badana ai do ia momokani, Iehova ese hari inai tanobada ena davana do ia henia matamaia neganai.

Edena Hisihisi Do Ia Vara Guna, Bena Guba ai Hoa Gaudia Do Idia Vara?

¹⁴ Unai bamona peroveta herevadia ma haida hegeregeredia, Ioel ena peroveta herevana ena anina ia vara ese ita ia durua, Mataio 24:29 ena hereva do ita lalo-pararalaia totona. Iesu ena hereva, ‘dina do ia dibura, hua do ia diari lasi, bona hisiu do idia moru’ herevadia, amo ia ese roketi be guba padanai siaidia karadia, inai nega ena dokona ena lagani 30 bamona lalodiai idia karaia karadia, be ia herevalaidia lasi. Lasi, ia ese “Iehova ena dina badana mai garina ida” ai do idia vara gaudia ia herevalaidia, inai tanobada ena oromana dikana do ia hadikaia ore dinana unai.

14, 15. Ioel ena peroveta herevana ese ita edena bamona ia durua, Mataio 24:29 ena anina do ita diba totona?

¹⁵ Unai ese ita ia durua, Iesu ena hereva, “unai nega dikana do ia ore, vadaeni maoromaoro” unai gau be guba ai do idia vara herevana, ena anina ita lalo-pararalaia totona. Ia bada ia lao ela bona lagani 70 C.E. hisihisina ia herevalaia lasi, to ia ese hisihisi badana, nega daudau murinai tanobada ibounai do ia vara hisihisina, ia herevalaia, do ia “giroa mai” murinai do ia vara hisihisina unai. (Mataio 24:3) Unai hisihisi be do vairai.

16. Mareko 13:24 ese edena hisihisi ia gwauraia, bona dahaka dainai unai ita diba?

¹⁶ Mareko 13:24 ena hereva be edena bamona? Iesu ia gwau: “Unai neganai, nega dikana ia ore murinai, dina do ia dibura, hua danu ia diari lasi.” Inai hereva “unai” be Greek gado herevana e·keiʹnos ida idia hahegeregerea, unai hereva amo Greek taudia ese idaunegai gauna o nega daudau murinai do ia vara gauna idia gwauraia. (Mataio 3:1; 7:22; 10:19; 24:38; Mareko 13:​11, 17, 32; 14:25; Luka 10:12; 2 Tesalonika 1:​10) Unai hegeregerena, Mareko 13:24 ese Roma taudia idia havaraia hisihisina ia gwauraia lasi, to Iehova ena kara badana ia gwauraia, inai nega ena dokona ai do ia karaia karana unai.

17, 18. Hisihisi badana do ia vara dalana be Apokalupo ese edena bamona ia gwauraia?

¹⁷ Inai lalohadai matamatana Mataio 24:​29-31, Mareko 13:​24-27, bona Luka 21:​25-28 edia anina dekenai, be Apokalupo ena karoa 17 ela bona 19 ese idia hamomokania. Evanelia bukadia ese idia hahedinaraia, hisihisi badana do ia matama murinai ia be maoromaoro do ia doko lasi. Ia matama murinai gwau-edeede taudia haida do idia mauri noho, ela bona “Taunimanima ena Natuna ena toana” do idia itaia, bona ia dainai do idia tai, bona, Luka 21:26 ena hereva hegeregerena, “edia kudouna dekenai do idia gari momokani, edia laloa danu do idia doko, unai idia vara gaudia dainai.” Do idia gari dikadika, badina be ‘toa’ do idia itaia, do ia hahedinaraia Iesu be kahirakahira do ia hamasedia ore.

¹⁸ Apokalupo ena hereva ese ia hahedinaraia, “dagedage gauna” ena “doana” ese “ariara hahine,” Babulono Badana, do idia tuari henia neganai, hisihisi badana do ia matama. (Apokalupo 17:​1, 10-16) To taunimanima momo do idia noho; pavapava, hoihoi taudia, sisima edia kapena taudia, bona ma haida be tomadiho koikoi ena dokona do idia taitailaia. Idia momo do idia diba unai murinai edia davana henidia negana do ia kau.​—Apokalupo 18:​9-19.

Nega Vairai Dahaka Do Ia Vara?

¹⁹ Mataio, Mareko, bona Luka edia hereva bona Apokalupo karoa 17-19 danu, ese kahirakahira do idia vara gaudia idia hahedinaraidia. Dirava ese ia gwauraia hidi negana ai, hisihisi badana do ia matama; tomadiho koikoi basileiana tanobada ibounai lalonai (Babulono Badana) do idia tuari henia. Kerisendom, kamonai lasi hanuana Ierusalem hegeregerena oreana, be do idia tuari henia dikadika. Hisihisi be unai bamona do ia matama, bena “maoromaoro” “dina, hua, hisiu dekenai toa do idia vara, bona tanobada besedia be do idia hisihisi bona edia kudouna dekenai do idia gari dikadika.”​—Mataio 24:​29; Luka 21:25.

20. Dahaka hoa gaudia be guba ai do idia vara?

²⁰ ‘Dina do ia dibura, hua do ia diari lasi, hisiu be guba amo do idia moru, bona guba ena siahu do ia mareremarere,’ anina be dahaka? Momokani, hisihisi badana ena matamana ai, tomadiho gunalaia taudia momo mai ladadia bada, “diari halasia taudia” idia gwauraidia, edia kerere be ‘doa 10’ ese do idia hahedinaraidia bena unai kerere taudia do idia haoredia. (Apokalupo 17:16) Politikol siahudia danu do idia marere. Vadaeni, hahegari gaudia be guba ai do idia vara danu a? Momokani do idia vara diba, bona edia hahegari siahuna ese Iuda besena ena dokona ai idia vara gaudia, Josephus ese ia gwauraidia gaudia, edia hahegari siahuna do ia hereaia momokani. Ita diba gunaguna Dirava ese ena siahu ia hahedinaraia unai bamona gaudia havaradia totona, bona do ia hahedinaraia lou diba.​—Esodo 10:​21-23; Iosua 10:​12-14; Hahemaoro Taudia 5:20; Luka 23:​44, 45.

21. ‘Toa’ gabena be edena bamona do ia vara?

²¹ Evanelia toredia taudia toiosi ese unai murinai do ia vara gauna be Greek gado herevana toʹte amo idia gwauraia matamaia. “[Bena] Taunimanima ena Natuna ena toana guba dekenai do ia hedinarai.” (Mataio 24:30; Mareko 13:26; Luka 21:27) Tanobada Ibounai Tuarina Ginigunana negana amo, Iesu ena hahediba taudia momokanidia ese iena noho hehunina ena toana be idia lalo-pararalaia, to taunimanima momo ese idia lalo-pararalaia lasi. To Mataio 24:30 ese ‘toa’ ma ta, nega vairai do ia hedinarai gauna, ia herevalaia; “Taunimanima ena Natuna ena toana,” bese iboudiai ese do idia itaia gauna, be unai. “Ori latanai [do] ia mai noho” neganai, do ia hedinarai lasi, to iena inai taudia tanobada hegegemadai be do idia diba ia “mai noho” (Greek gado, er·khoʹme·non), badina be ena pavapava siahuna be hoa dalanai do ia hahedinaraia dainai.​—Apokalupo 1:7.

22. Mataio 24:30 ese ia gwauraia “toana” do idia itaia neganai, dahaka do idia karaia?

²² Mataio 24:30 ese toʹte ia gwauraia lou, unai murinai do ia vara gauna herevalaia matamaia totona. Tanobada besedia do idia tai, reana badina be do idia diba dika do idia davaria. To ita Dirava ena hesiai taudia ese eda kwaradia do ita abidia isi, badina be do ita diba eda hahemauri be ia kahirakahira vadaeni! (Luka 21:28) Apokalupo 19:​1-6 ese danu ia hahedinaraia tomadiho momokani taudia guba ai bona tanobada ai ese ariara hahinena badana ena dokona do idia moalelaia.

23. (a) Iesu ese iena abia hidi taudia edena bamona do ia kara henidia? (b) Orena taudia do ia abidia daekau guba dekenai neganai, dahaka do ia vara?

²³ Iesu be ma ia peroveta, Mareko 13:27 ai ia gwau: “[Bena (toʹte)] ia ese ena aneru do ia siaia, lai 4 gabudia dekena amo, iena abia hidi taudia do idia haboua, tanobada gabudia ibounai bona guba gabudia ibounai dekena amo.” Iesu ese “iena abia hidi taudia” 144,000 oredia, tanobada ai idia do mauri noho taudia, ia gwauraidia unai. Inai nega ena dokona ena matamana ai, hari horoa taudia be Dirava ena orea lalonai idia haboudia. To Mareko 13:27 bona Mataio 24:31 ese aneru be unai murinai do idia karaia karana ma ta idia gwauraia. Tanobada ena dokona amo do idia gogodia “mai kibi ena regena bada danu.” Edena bamona do idia gogodia? Momokani, “maka” be edia bagudia ai do idia karadia, bona Iehova ese do ia hahedinaraia goevagoeva ‘ia boiridia bona ia abidia hidi, bona idia ese ia idia badinaia.’ Dirava ese ia gwauraia hidi negana ai, guba ai do ia gogodia dae, bena pavapava bona hahelaga taudia ai do idia lao.d Unai ese idia bona edia bamodia gunadia mai edia kamonai, “hutuma bada herea,” do ia hamoaledia. Idia danu be aneru ese do idia makadia, ‘hisihisi badana amo do idia mai’ totona, bena paradaiso tanobadana ai hahenamo do idia moalelaidia ela bona hanaihanai.​—Mataio 24:22; Apokalupo 7:3, 4, 9-17; 17:​14, NW; 20:6; Esekiel 9:​4, 6.

24. Mataio 24:​29-31 ese ia hahedinaraia dahaka dahaka be ena nega ena nega ai do idia vara?

²⁴ Aposetolo ese Iesu idia nanadaia, idia gwau, “Mani oi hamaoroa ai dekenai” neganai, iena haere ena anina idia lalo-pararalaia diba lasi. To edia nega lalonai idia moale, badina be ena peroveta herevana be dala ta ai ia momokani be idia itaia dainai. Iena haere ena anina be hari ita tahua neganai, kahirakahira do idia momokani herevadia be ita tahudia bada. (Mataio 24:​29-31; Mareko 13:​24-27; Luka 21:​25-28) Ita diba vadaeni iseda hahemauri be kahirakahira momokani. Hisihisi badana ena matamana ita naria mai eda ura ida. Unai do ia vara guna, bena taunimanima ena Natuna ena toana do ia hedinarai, bena Dirava ese ia abidia hidi taudia do ia gogodia. Dokonai, iseda Pavapava, Tuari Tauna badana, Iesu, ese ena kwalimu be Aramagedono ai do ia hagugurua. (Apokalupo 6:2) Unai Iehova ena dina ai, dava henia dinana ai, “tanobada dokona” negana, Lohiabada Iesu ena dina lalonai lagani 1914 amo ia hesiriu negana, ena dokona momokanina be do ia ginidae.

25. Luka 21:28 ena hereva be edena bamona do ita hagugurua diba?

²⁵ Namona be Dirava ena hahediba amo oi be sibomu do oi hanamoa noho, bena gabeai oi ese ‘inai gaudia do idia vara hamatamaia neganai be emu kwarana do oi abia isi. Badina be umui emui hahemauri be ia kahirakahira vadaeni.’ (Luka 21:28) Iehova ese ena ladana helagana do ia hahelagaia matamaia neganai, ia abidia hidi taudia bona hutuma bada danu edia vaira dinadia namo hereadia be idia vairadiai do idia hure!

[Footnotes]

Oi Laloatao A?

◻ Mataio 24:29 ese edena hisihisi ia gwauraia, bona dahaka dainai unai bamona ita laloa?

◻ Mataio 24:29 ese dahaka guba toadia ia gwauraidia, bona hisihisi do ia vara bena edena bamona unai hoa gaudia be maoromaoro do idia vara?

◻ Luka 21:​26, 28 ena anina be nega vairai edena bamona do ia vara?

3. Toa ma ta ia gwauraia neganai, Iesu ese dahaka danu ia perovetalaia?

4. Guba toadia Iesu ese ia herevalaidia be edena bamona ita henanadailaidia?

19. Hisihisi badana do ia matama neganai, dahaka do ia vara?

[Picture on page 16, 17]

Dubu ena gabu

[Credit Line]

Pictorial Archive (Near Eastern History) Est.