Lalo-Parara ese Oi Do Ia Gimaia
“Oiemu laloa kehoa bona oiemu diba maoro ese, oiemu mauri do idia naria namonamo.”—AONEGA HEREVADIA 2:11.
1. Lalo-parara ese dahaka amo ita ia gimaia diba?
IEHOVA ia ura do oi kara mai emu lalo-parara ida. Badina be dahaka? Badina be ia diba lalo-parara ese dika idauidau bona hekwakwanai idauidau amo oi do ia gimaia. Aonega Herevadia 2:10-19 ena hereva ginigunadia be inai: “Oi ese aonega do oi davaria, bona inai diba ese oiemu laumana do ia hamoalea. Oiemu laloa kehoa [“lalo-parara,” NW] bona oiemu diba maoro ese, oiemu mauri do idia naria namonamo.” Lalo-parara ese dahaka gaudia edia amo oiemu mauri do ia gimaia? “Kara dikadia,” kara maoromaoro daladia idia rakatania taudia, bona edia kara ibounai be gagevagageva taudia edia amo oi do ia gimaia.
2. Lalo-parara be dahaka, bona Keristani taudia ese edena idia ura henia bada?
2 Reana oi laloatao lalo-parara be darana ena gaukara ta, bona unai gaukara ai gau ta be ma ta amo ena idau ia laloa. Lalo-parara tauna be lalohadai eiava gau idauidau edia idau ia itaia diba bona ia laloa namonamo. Ita Keristani taudia be lalo-parara lauma dalanai ita ura henia bada; ia be diba maoromaoro Dirava ena Hereva amo. Baibel ita stadilaia neganai, ia be hegeregere lalo-parara lauma dalanai do ita haginia nadidia ita geia bamona. Ita diba gaudia ese ita idia durua diba Iehova hamoalea dalana ita abia hidi totona.
3. Lalo-parara lauma dalanai be edena bamona ita abia diba?
3 Dirava ese King Solomona ia nanadaia dahaka hahenamo ia ura abia neganai, unai lohia matamata tauna ia gwau: “Mani emu kara aonega lau dekenai do oi henia, oiemu bese taudia do lau biagua mai maoromaoro danu. Bona mani emu kara, lau dekenai aonega do oi henia, namo bona dika edia idau do lau diba totona.” Solomona ese lalo-parara ia noia, bena Iehova ese ia henia badabada. (1 King Taudia 3:9; 4:30) Lalo-parara ita abia totona, ita guriguri be gau badana, bona ‘hesiai tauna mai ena kamonai bona kara maoromaoro’ amo idia mai lalo-diari bukadia amo Dirava ena Hereva ita stadilaia be namo. (Mataio 24:45-47) Unai ese iseda lalo-parara lauma dalanai do ia durua ‘laloa dobu gaudia do ita laloa,’ bona ‘maoro bona kerere edia toana ita diba namonamo.’—1 Korinto 14:20; Heberu 5:14.
Lalo-Parara Abia be Namo
4 Bema lalo-parara maorona ita abia, Iesu ena hereva ita badinaia diba; ia gwau: “Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.” (Mataio 6:33) Danu, Iesu ia gwau: “Tauanina ena lamepa be matana. Unai dainai bema emu matana do ia namo, emu tauanina ibounai do ia diari.” (Luka 11:34) Oibe, ta ena matana be iena lamepa bamona. Bema iseda matana ia “namo,” dala tamona ia raraia namonamo sibona. Iseda matana be unai bamona neganai, do ita raka mai lalo-parara ida bona lauma dalana ai ita hekwakwanai lasi.
5. Bisinesi gaudia ita laloa neganai, namona be dahaka ita laloatao Keristani kongregesen ia noho ena badina dekenai?
5 Haida be edia matana idia namo noho totona idia gimaia lasi, to lalona ania bisinesi herevadia amo idia sibodia idia hahekwarahia bona ma haida idia hahekwarahia danu. To namona be ita laloatao Keristani ekalesia be “hereva momokani ena du, bona hereva momokani ia gimaia maguna.” (1 Timoteo 3:15) Ruma ta ena du hegeregeredia, ekalesia ese hereva momokani ia abia isi, to ta ena bisinesi karadia ia durua lasi. Iehova ena Witness taudia edia kongregesen idia haginidia lasi, hoihoi karadia o bisinesi karadia idauidau habadaia totona. Namona be ita sibona eda bisinesi karadia be Kingdom Hall lalonai do ita tahua lasi. Lalo-parara karana dainai do ita itaia diba Kingdom Hall, Kongregesen Buka Stadi rumadia, bona Iehova ena Witness taudia edia hebouhebou idauidau be Keristani dalana ai do idia hebamo heheni bona lauma gaudia do idia herevalaia gabudia. Bema iseda Keristani hebamo ita gaukaralaia bisinesi karana ta habadaia totona, unai ese do ia hahedinaraia lauma gaudia ita laloa bada lasi, ani? Iseda hebamo kongregesen lalonai ita gaukaralaia lasi iseda moni habadaia totona.
6. Dahaka dainai hoihoi gaudia bona daladia be kongregesen heboudia dekenai ita hoihoilaia bona herevalaia badabada lasi?
6 Haida ese Dirava ena orea taudia edia hebamo idia gaukaralaia, gau idauidau hoihoilaia totona, hegeregere gorere hanamoa o kopi hahairaia muramuradia, telefon gaukaradia, ruma haginia gaudia o daladia, ruma o motuka naridia gaukaradia eiava gaudia, laolao edia palani, kompiuta edia program bona edia gau idauidau, bona ma gau haida. To, kongregesen heboudia be bisinesi gaudia o karadia habadaia eiava hoihoilaia gabudia lasi. Inai hereva ena badina ita lalo-pararalaia diba bema ita laloatao Iesu ese hoihoi taudia be “Dubu Helaga dekena amo ibounai ia luludia, mamoe bona boromakau danu. Moni idia senisia taudia danu edia moni ia bubua negea, bona edia pata ia bubua. Vadaeni pune manu hoia taudia dekenai ia gwau henia, ia gwau, ‘Unai be umui kokia lao, egu Tamana ena Ruma be hoihoi Rumana dekenai umui halaoa lasi.’”—Ioane 2:15, 16.
Bisinesi ta Lalonai Moni Atoa be Edena Bamona?
7 Iseda moni be bisinesi ta lalonai do ita atoa gwauraia neganai, namona be do ita naria namonamo mai eda lalo-parara ida. Reana ta do ia ura moni do ia abia torehai, bena inai bamona ia gwauhamata: “Lau gwauhamata momokani profit do oi abia.” “Emu moni ta do ia boio lasi. Inai be gau momokanina.” Ta be unai bamona ia gwauhamata neganai, oi naria namonamo. Unai hereva amo ia hahedinaraia ia laloa namonamo lasi, badina be bisinesi idia hadikaia diba gaudia be momo. To momokani, unai bamona hereva manada bona kara gageva taudia haida ese kongregesen taudia idia koia. Edia kara dainai guna “Dirava negea taudia” ita laloa lou, idia be Keristani taudia ginigunadia edia ekalesia lalonai idia vareai bona “Dirava ena hariharibada idia hadibaia kerere, edia lebulebu karadia do idia karaia diba totona.” Idia be ranu henunai idia noho nadi mai edia matana bamona, digu taudia idia ivaia bona hamasea diba. (Iuda 4, 12) Momokani, moni abia koikoi taudia edia ura badana be edia amo ia idau sisina, to idia danu be kongregesen taudia idia gaukaralaia.
8. Toana be profit namona do idia karaia bisinesi haida dekenai dahaka ia vara?
8 Keristani taudia haida mai edia ura namona be tadikaka ma haida dekenai bisinesi daladia haida idia herevalaia, badina be toana be unai bisinesi amo profit monina do idia abia, to gabeai idia davaria idia bona edia kara idia tohotohoa taudia danu ese unai bisinesi lalodiai idia atoa monina idia haboioa. Unai dainai, Keristani taudia haida ese edia dagi kongregesen lalonai be idia haboioa. Moni momo abia haraga daladia be koikoi daladia dainai anina ia vara lasi neganai, profit monina ia abia tauna tamona be unai koikoi tauna, bona nega momo karaharaga ia heau boio. Vadaeni, lalo-parara ese ita edena bamona do ia gimaia, unai bamona hekwakwanai amo do ita raka siri totona?
9. Dahaka dainai bisinesi gwauhamata herevadia ita laloa neganai lalo-parara be gau badana?
9 Lalo-parara ena anina ta be hunia gaudia do ita laloa diba. Unai bamona do ita lalo-parara be namo, bisinesi daladia lalonai gwauhamata herevadia edia anina do ita laloa namonamo totona. Keristani taudia idia abidadama heheni, bona unai dainai reana tadikaka haida do idia laloa edia tadikaka ese edia moni be do ia moru haraga bisinesi ta lalonai do idia gaukaralaia lasi. To ena be bisinesi tauna ta be Keristani tauna, ita gwau diba lasi unai dainai ia be bisinesi haheaua daladia ia diba namonamo eiava ena bisinesi do ia heau namonamo.
10. Dahaka dainai Keristani taudia haida be edia Keristani tadikaka amo bisinesi totona moni idia abia torehai, bona unai bisinesi dekenai dahaka ia vara diba?
10 Keristani taudia haida ese bisinesi totona moni be tadikaka edia amo idia abia torehai toho, badina be moni henia torehai oreadia idia ura lasi moni do idia henidia, edia moru haraga diba bisinesi dekenai edia moni do ia boio garina. Momo be haida ese idia koidia dainai, idia laloa bema edia moni be bisinesi lalonai idia atoa, do idia hekwarahi lasi to moni momo do idia abia haraga. Haida be unai bisinesi dalana ena hairai koikoina ese idia ia veria dainai, edia moni, nega daudau herea lalonai idia haboua gauna, idia haboioa vadaeni! Keristani tauna ta ese moni momo herea be bisinesi ta lalonai ia atoa, ia laloa pura rua sibona murinai ena moni do ia abia lou neganai ena kina 100 100 ida ma kina 25, profit monina, do ia abia. To unai kampani ia gwau ia abia torehai monina ibounai haloua dalana be lasi neganai, unai tadikaka ena moni ibounai ia haboio! Bisinesi gaukarana ma ta lalonai, ruma haginidia gaukarana ena biaguna ta ese moni bada herea be kongregesen taudia ma haida edia amo ia abia torehai. Profit monina bada herea ia gwauhamatalaia. To ena bisinesi ia moru bena ia abia torehai monina ibounai be ia boio.
Bisinesi Gaukarana Ia Moru Neganai
11 Bisinesi idia moru neganai lalohisihisi ia havaraia bona moni abia palani dikadia lalonai idia vareai haraga Keristani taudia haida be lauma dalana ai idia manoka idia lao danu. Edia lalona idia hisihisi bona idia badu badina lalo-parara idia gaukaralaia lasi idia do ia gimaia totona. Mataganigani ese taunimanima momo ia tarapua vadaeni. Paulo ia gwau: “Umui huanai . . . mataganigani karana umui herevalaia lasi momokani, helaga taudia edia kara be unai.” (Efeso 5:3, NW) Bona sisiba ia henia, ia gwau: “Kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama henia kara idia rakatania vadaeni, bona mai lalohisihisi momo danu, edia mauri idia hadikaia ore vadaeni.”—1 Timoteo 6:9, 10.
12. Bema Keristani taudia be ta ta ida bisinesi idia karaia hebou, dahaka idia do laloatao be namo?
12 Bema Keristani tauna ta ese moni ia ura henia bada, lauma dalana ai ia be sibona ia hadikaia bada diba. Farisea taudia ese moni idia ura henia bada, bona unai be taunimanima edia kara ta, inai “nega ena dokona” lalonai. (Luka 16:14; 2 Timoteo 3:1, 2) To Keristani tauna ena mauri dalana be idau, ia ese ‘moni do ia ura henia dikadika lasi’ be namo. (Heberu 13:5) Vaia, Keristani taudia be ta ta ida bisinesi karadia idia karaia hebou diba. To unai kara idia herevalaia bona karaia neganai, namona be kongregesen karadia amo idia hapararadia. Bona inai laloatao: Ena be lauma dalana ai iseda orea taudia be iseda tadikaka, to idia bogaragidiai danu, bisinesi gwauhamatadia ibounai be pepa ai ita torea be namo. Unai kara ia sisibalaia namo herea gauna be hereva ta ladana, “Oi Torea Hedinarai!” Noga! 1984 Issue 2 lalonai idia torea, rau 14 ela bona 17 ai.
13 Aonega Herevadia 22:7 ese ita ia hamaoroa, ia gwau: “Moni ia abiatorehai tauna ese, heniatorehai tauna ena hesiai gaukara ia karaia noho.” Unai dala ai hesiai tauna ai ita lao eiava iseda tadikaka unai bamona ita halaoa be nega momo aonega karana lasi. Bema ta ese ita ia noia iena bisinesi karana durua totona moni do ita henia torehai, namona be do ita laloa namonamo ia be hegeregere unai moni do ia haloua diba eiava lasi. Taunimanima ese ia idia abidadama henia, a? To, momokani, namona be ita lalo-parara, bema moni ita henia torehai, reana unai moni do ita haboioa, badina be bisinesi momo idia moru. Kontraka hamomokania karana ese ia hahedinaraia lasi bisinesi do ia kwalimu. Bona, bema ta ia diba ia henia torehai gwauraia monina bema ia boio unai ese ogogami do ia havaraia, do ia henia be aonega karana lasi.
14. Dahaka dainai mai eda lalo-parara ida ita laloa be namo bema moni ita henia torehai tadikakana ena bisinesi ia moru?
14 Bema ita ese moni be bisinesi totona iseda tadikaka o taihu ta ita henia torehai, bena ena be kara kereredia ia karaia lasi, to unai moni ia boio, namona be lalo-parara ita hahedinaraia. Bema unai bisinesi ia moru be ita amo moni ia abia torehai tauna, iseda tadikaka, ena kerere lasi, ita gwau diba dala ta amo ita ia hadikaia, a? Lasi, badina be ita sibona eda ura hegeregerena moni ita henia torehai, reana atoa kau monina ita abia vadaeni, bona ia be kara kererena ta ia karaia lasi. Abitorehai tauna ia kara kerere lasi dainai, kota dekenai ita samania be badina lasi. Bisinesi ta, lalo-maoromaoro Keristani tauna ese mai ena ura namona ida ia karaia gauna, bema ia moru neganai kota taudia ia hamaorodia ia bankrap, o ia abia torehai monina ibounai haloua dalana be lasi, kota dekenai do ita samania ena namo be dahaka?—1 Korinto 6:1.
15. Dahaka gaudia do ita laloa be namo bema ta ia gwau ena bisinesi ia bankrap?
15 Nega haida, taunimanima edia bisinesi idia moru neganai, edia hekwarahi hamaragia totona idia ese kota taudia idia hamaorodia idia bankrap. Keristani taudia be edia abitorehai do idia laloaboio lasi dainai, idia haida be kota taudia ese edia abitorehai haida idia gwauatao murinai, edia lalona ese idia doridia dainai, idia laloa bema henia torehai taudia ese unai moni ena davana do idia abia dae, henia lou dalana idia tahua. To abitorehai tauna ta ese ena tadikaka ena moni ia haboioa murinai, bema moni momo tauna bamona ia noho namonamo, unai be edena bamona? Eiava, bema moni ia davaria dainai ena abitorehai ena davana ia henia diba bona ia henia be maoro, to ia henia lasi, unai be edena bamona? Bema ia be unai bamona ia kara, reana ia dekenai do idia daradara, hegeregere, kongregesen lalonai dagi do ia abia eiava lasi.—1 Timoteo 3:3, 8; Gima Kohorona, September 15, 1994, rau 30-1 itaia.
Bema Koikoi Dalana ta Ia Vara be Edena Bamona?
16 Ita lalo-parara dainai, ita diba nega haida bisinesi daladia amo profit monina idia davaria lasi. To, bema koikoi karana, fraud, ia vara vadaeni be edena bamona? Unai koikoi karana ena anina be “ta be mai ena ura ida ma ta ia koia o dala maorona ia hagagevaia iena dava bada gauna ta ia haboioa totona eiava unai gau ia biagua ena maoro do ia haboioa.” Iesu ese kara haida ia gwauraia, unai kara be Keristani tauna ese do ia karaia be namo bema ia laloa ma Keristani tauna ta ese koikoi dalana amo ena moni ia abia neganai. Mataio 18:15-17 ai, Iesu ia gwau: “Oiemu tadikakana ese kara dikana bema ia karaia oi dekenai, do oi lao ia dekenai, iena kerere do oi hedinaraia, umui ruaosi sibona do umui herevalaia. Bema oiemu hereva ia kamonai henia neganai, oi be oiemu tadikakana ena lalona oi hamaoromaoroa vadaeni. To bema oiemu hereva ia kamonai lasi, tau ta, o tau rua danu do umui lao, vadaeni oiemu samani hereva do oi hamomokania inai taudia edia vairana dekenai. To umui rua o umui toi emui hereva bema ia kamonai lasi neganai, ekalesia ena hebou dekenai do umui hamaoroa. Ekalesia hebou danu ena hereva bema ia kamonai lasi, oi dekenai idau bese tauna o takisi gogoa tauna hegeregerena do oi halaoa.” Iesu ese unai murinai ia gwauraia parabolena ese ia hahedinaraia ia ese moni dainai idia vara kara dikadia, hegeregere koikoi karadia, ia laloa.—Mataio 18:23-35.
17, 18. Bema sibona ia gwauraia Keristani tauna ta ese ita ia koia, lalo-parara ese edena bamona ita ia gimaia diba?
17 Momokani, bisinesi karadia lalodiai bema koikoi karana hamomokania o hahedinaraia gauna ta be lasi, Mataio 18:15-17 ia gwauraia karadia karaia be badina lasi. To, bema sibona ia gwauraia Keristani tauna ta ese koikoi amo iseda moni ia abia vadaeni be edena bamona? Lalo-parara ese ita do ia gimaia diba, bena kongregesen ena ladana ia hadikaia diba karana ta do ita karaia lasi. Aposetolo Paulo ese Keristani taudia ia sisiba henidia, bema tadikaka ta ese ia hadikadia o edia moni ia abia kava, unai hisihisi do idia haheaukalaia be namo, ia do idia kota henia be dika.—1 Korinto 6:7.
18 Iseda tadikaka bona iseda taihu momokanidia be ‘koikoi bona dika ibounai dekenai idia honu’ lasi, meamea tauna ladana Bariesu hegeregerena lasi. (Kara 13:6-12) Unai dainai namona be do ita kara mai eda lalo-parara ida, iseda moni be iseda tadikaka edia bisinesi lalonai do ia boio neganai. Bema kota henidia dalana ita laloa, namona be unai ena anina ita sibona dekenai, unai tau o taudia dekenai, kongregesen dekenai, bona murimuri taudia dekenai, be do ita laloa namonamo. Kompensesen ita tahua neganai, reana iseda nega, iseda goada, bona iseda moni momo be unai kara dekenai do ita haorea. Reana loea taudia bona bisinesi taudia ma haida edia taga do ita habadaia sibona. Madi, Keristani taudia haida ese edia dagi Dirava ena orea lalonai be idia haboiodia, badina be unai gaudia idia tahua goadagoada dainai. Unai dala ita abia hidi neganai Satani ia moale, to ita be ita ura Iehova ena lalona do ita hamoalea. (Aonega Herevadia 27:11) To danu, ita halusia gaudia ita laloa nege neganai reana iseda lalo-hisihisi do ita hamaragia bona ita bona elda taudia eda nega bada do ita haorea kava lasi. Unai ese kongregesen lalonai maino ia noho karana do ia durua bona ita ia durua Basileia ita tahua guna noho.
Lalo-Parara Bona Dala Abia Hidi Karana
19 Moni bona bisinesi gaudia dekenai dala abia hidi be lalo-hekwarahi sisina bada ia havaraia diba. To lalo-parara lauma dalanai ese ita ia durua diba kahana idauidau ita laloa namonamo bona aonega dalana ita abia hidi. Danu, guriguri amo Iehova dekenai oi tabekau neganai, “Dirava ena maino” do ita abia diba. (Filipi 4:6, 7) Unai lalo-maino bona laga-ani mamina be Iehova tura henia momokani karana amo ia vara. Momokani, bema dala ita abia hidi be mai ena hekwarahi neganai, unai bamona maino ese ita ia durua diba bena do ita laloa namonamo noho.
20. Namona be iseda lalona ita hadaia dahaka do ita karaia bisinesi gaudia bona kongregesen gaudia dekenai?
20 Namona be iseda lalona do ita hadaia auka, bisinesi hepapahuahu ese iseda maino bona kongregesen ena maino do idia hadikaia lasi. Namona be do ita laloatao Keristani kongregesen ena gaukara korikori be lauma dalana ai ita ia durua; ia be bisinesi karadia karaia gabuna lasi. Nega ibounai, bisinesi gaudia bona kongregesen gaudia do ita hapararaia be namo. Bisinesi karadia do ita hamatamaia neganai, namona be do ita naria namonamo mai eda lalo-parara ida. Bona namona be nega ibounai unai bamona gaudia do ita laloa maoromaoro; anina be Basileia gaudia do ita tahua guna. Bema iseda tadikaka edia bisinesi ta ia moru, namona be iboudiai edia namo habadaia dalana do ita tahua.
21. Edena dala ai ita mai eda lalo-parara ida Filipi 1:9-11 ena hereva hegeregerena do ita kara?
21 Namona be moni gaukaralaia daladia bona anina bada lasi gaudia ita lalo-hekwarahilaia badabada lasi, to ita ibounai be eda kudouna amo lalo-parara do ita ura henia, Dirava ena hakaua dalana totona ita guriguri, bona Basileia gaudia ita atoa guna. Namona be Paulo ena guriguri herevana hegeregerena, ‘iseda lalokau be do ia bada lao noho, mai eda laloa diari, bona mai eda aonega [o lalo-parara] danu. Unai dekena amo gau namodia edia toana do ita diba.’ Bona namona be ita sibona eiava ma haida do ita hahekwakwanaia lasi. Hari inai negai Keriso iseda King be guba ai ena terona latanai ia helai dainai, namona be lauma dalanai ita abia lalo-pararana do ita gaukaralaia iseda mauri ena kahana iboudiai lalonai. Bona namona be ‘iseda kara ibounai be do idia namo momokani. Iesu Keriso sibona ese inai bamona kara ia havaraia diba,’ Siahu Ibounai Lohiabadana, Iehova, ese “hanamoa bona hairai do ia abia totona.”—Filipi 1:9-11.
Edena Bamona Do Oi Haere?
◻ Lalo-parara be dahaka?
◻ Dahaka dainai Keristani taudia huanai bisinesi daladia idia laloa neganai mai edia lalo-parara ida idia kara be gau badana?
◻ Lalo-parara ese edena bamona ita ia durua diba bema ita laloa iseda tadikaka ta ese ita ia koia?
◻ Lalo-parara ena anina dala abia hidi karana dekenai be dahaka?
4. Ta ena matana ia “namo” ena anina be dahaka, bona edena dala ai iseda namo ia havaraia diba?
7. Dahaka dainai bisinesi karadia ita laloa neganai mai eda lalo-parara ida ita naria namonamo be gau badana?
11. Paulo ese mataganigani bona moni ura henia karadia dekenai dahaka sisiba ia henia?
13. Aonega Herevadia 22:7 ena anina be edena bamona oi herevalaia diba bisinesi karadia lalonai?
16. Dahaka kara haida do ita karaia diba bema bisinesi lalonai ita idia koia?
19. Dala abia hidi totona ita lalo-hekwarahi neganai, lalo-parara lauma dalanai bona guriguri ese dahaka ia havaraia diba?
[Picture on page 18]
Lalo-parara ese ita do ia durua bena Iesu ena sisiba do ita badinaia, hanaihanai Basileia do ita tahua guna
[Picture on page 20]
Hanaihanai bisinesi gwauhamatadia be pepa ai umui torea