Keristen Lalo-Tamona Badinaia Bisinesi Karaia Hebou Negadiai
“Itaia!Tadikaka be lalo-tamona dekenai idia noho, unai be namo bona mai moale danu!”—SALAMO 133:1.
1. Dahaka dainai Keristen lalo-tamona be gau namo hereana?
MOMOKANI, ‘Keristen tadikaka be lalo-tamona dekenai idia noho, unai be namo bona mai moale danu,’ bona hari inai negai unai be mai anina bada, badina be tanobada be heiriheiri amo ia honudae. Lalo-tamona momokanina ia noho gabunai, ia be hairai gauna ai ia lao; ia dainai taunimanima idia lalokau heheni tadikaka bamona, bona idia hebamo heheni negadiai idia moale bada. To heiriheiri be idau; ena toana be namo lasi bona ia ese badu bona lalo-dika ia havaraia bona idia hetura heheni taudia ia hapararadia.
2. Iseda lalohadai tamona Bible ena taravatu dekenai ese iseda lalo-tamona edena bamona ia habadaia, bisinesi karadia lalodiai danu?
2 Keristen taudia iboudiai idia diba Bible ena taravatu idia badinaia be namo, unai dainai idia be bisinesi karadia idia karaia hebou neganai idia be tadikaka bamona idia lalo-tamona diba. Iehova ena Witness taudia edia kongregesen ta ena naria tauna ta ia gwau: “Tanobada dekenai abidadama ia maragi ia lao noho lalonai, Keristen taudia ma haida ida ita gaukara hebou neganai ita moale, badina be idia ese taravatu idia badinaia. Ita be nega ibounai ita ‘gima’ lasi, ita do idia kara dika henia garina. Bisinesi taudia goevadia mai edia kara maoromaoro be momo lasi inai tanobada dekenai. To kara maoromaoro taudia ida ita gaukara hebou, unai be mai moale bada, badina be kuku idia ania lasi, hereva mirodia idia gwauraia lasi, edia lalona idia biagua, bona kohu bona moni idia mataganiganilaia lasi!”
3. (a) Ita be iseda orea taudia ida ita karaia hebou bisinesi karadia haida be dahaka? (b) Dahaka taravatu be bisinesi karadia lalodiai ita badinaia be namo?
3 Keristen taudia be edia orea taudia ida edena dala amo bisinesi karadia idia karaia hebou? Dala ta be, Keristen taudia rua eiava ma haida be kampani ta idia haheaua hebou. Dala ma ta be, idia ta be gaukara biaguna bona ma ta be iena gaukara tauna ta. Dala ma ta be, Keristen tauna ta ese gau ta o gaukara ta ia hoia ena orea tauna ma ta dekenai. Unai bamona bisinesi karadia iboudiai lalodiai, namona be kara maoromaoro taravatudia Iehova ena Buka Helaga lalonai idia torea be idia badinaia. Inai dala amo idia be tadikaka bamona do idia lalo-tamona bona do idia gaukara hebou mai edia moale ida.—1 Korinto 10:31.
4. Keristen taudia be bisinesi lalonai edena bamona idia hekwakwanai diba?
4 To, reana haida be Keristen lalohadaina hereadaena idia badinaia noho lasi. Reana idia be sibodia edia namo idia laloa bada matamaia. (Filipi 2:4) Reana moni laloa bada, Keristen lalo-tamona idia laloa maragi. To bema ta be bisinesi lalonai ia mataganigani, unai ese hetura do ia hadikaia, bena ia be ena tadikaka bona Iehova ida do idia hetura heheni namonamo diba lasi. Ita ura lasi unai dika do ia vara!—Ioane 13:34, 35; Heberu 13:5; 1 Timoteo 3:2, 3; 1 Ioane 3:16; 4:20, 21.
Kontraka Korikorina Karaia be Gau Badana
5. Abraham ese tano ia hoia sivaraina be edena bamona ia hahedinaraia kontraka korikorina ita karaia be namo?
5 Hekwakwanai be bisinesi karadia lalodiai do idia vara lasi totona, mani oi ese Abraham be tano ta ia hoia dalana oi laloa. “Aberahamo ese Epron ena hereva ia kamonai, Het taudia edia vairana dekenai tano ena davana unai bamona ia gwauraia, vadaeni siliva monina 400 ia duahia, bena ia henia. Inai siliva moni ena metau be hoihoi taudia idia gaukaralaia noho moni ena metau hegeregerena. Unai dainai Epron ena tano Makapela dekenai, Mamare ena badibadinai, mai ena kohua bona au danu ibounai be, Aberahamo ena tano korikori dekenai ia halaoa, Het taudia edia vairana dekenai bona iena hanua lalonai idia haboua taudia ibounai edia vairana dekenai ia hoia.” Unai be kara hehunina ta lasi. Ia be kontraka korikorina ta, taunimanima vairadiai idia hamomokania. Abraham ese tano hida ia hoia eiava ena davana be hida be idia daradaralaia lasi.—Genese 23:2-4, 14-18.
6. Keristen taudia ese bisinesi karadia badadia edena bamona idia hamomokania be namo?
6 Unai hegeregerena, namona be Keristen taudia ese edia bisinesi karadia badadia, idia kara heheni karadia, idia hamomokania be namo. Bema idia ta ese gau ta iena bamona ena amo ia hoia, namona be kohu ia hoia tauna bona davana ia abia tauna ruaosi ese unai gau idia torelaia be namo; ena davana, davana henia dalana, henia negana bona dalana bona idia gwauhamatalaia heheni vadaeni gaudia ma haida be pepa rua dekenai idia torelaia danu be namo. Bema ta ese ma ta ena gaukara ia karaia gwauraia, namona be idia ruaosi ese unai gaukara ena oromana be pepa dekenai idia torea, bona do ia haorea negana, bona ena davana, bona ma gau haida danu idia torelaia be namo. Inai pepa ruaosi idia sainia bona idia sainia dinana danu idia torea be namo, bena idia ta ta ena pepa ena pepa idia abia be namo. Keristen taudia be bisinesi ta idia haheaua hebou neganai, unai bamona kontraka idia torea be mai anina bada. Ia dainai idia lalo-parara idia be edena bamona do idia kara heheni, bona idia be Iesu ena sisiba idia badinaia diba; ia gwau: “Inai bamona oiemu hereva do oi gwauraia, ‘Oibe’ sibona, eiava ‘Lasi’ sibona.” (Mataio 5:37) Bema kontraka karaia dalana be auka herea, reana loia taudia edia heduru umui tahua be namo, kontraka umui torea maoromaoro totona.
7. (a) Kontraka idia torea neganai, dahaka danu idia laloa namonamo be namo? (b) Keristen taudia be dahaka lalohadai idia badinaia be namo, bisinesi karadia lalodiai?
7 Namona be kontraka idia torea taudia ese edia ura karadia do idia karaia dalana sibona idia laloa lasi, to kontraka be nega dikana lalonai do idia hadokoa dalana danu idia laloa guna be namo. (Hereva Lada-isidia 21:5) Bisinesi karadia iboudiai lalodiai dika idia davaria diba, bona do idia vara diba gaudia iboudiai be kontraka pepana dekenai idia torea diba lasi. Bema gabeai gau haida idia idau, reana do idia ura kontraka do idia haidaua. Reana gabeai ta ia lalo-parara unai bisinesi karana ia karaia matamaia be aonega karana lasi, bona ia ura dala maorona ta amo do ia rakatania. To bema ia sibona be moni ia negea kava eiava ena bisinesi ia naria namonamo lasi dainai ena abitorehai be bada herea, namona be unai bisinesi ia heautania kava lasi. Namona be unai kerere be kontraka taudia ese idia hereva heboulaia, bena do idia diba kontraka be do idia hadokoa diba eiava, bona kerere tauna be moni hida do ia haloua be maoro. To, momokani, lalo-maoromaoro tauna be ena diba hegeregerena dala do ia tahua ena gwauhamata iboudiai hamomokanidia totona; ena be unai dainai nega taina ogogami tauna hegeregerena ai do ia lao, to ena gwauhamata do ia hamomokania. (2 Tesalonika 3:12) Bema Keristen tauna ia ura do ia raka goevagoeva bona kara maoromaoro do ia karaia, ena be ena gwauhamata ia hamomokania neganai ia be unai amo sibona ena namo ia habadaia lasi, to do ia hamomokania, Iehova ese do ia lalo-namo henia noho totona. “Ia sibona hadikaia gwauhamatana ia gwauraia neganai ma ia idau lasi.” (Salamo 15:1-4) Unai bamona kara iboudiai lalodiai, Iehova ena hesiai taudia be ‘lalokau dekenai do idia karaia’ be namo.—1 Korinto 16:14.
8. Ta be bisinesi ta lalonai ia do vareai lasi neganai, dahaka dainai ia laloa namonamo guna be namo?
8 Inai dainai, ta ese bisinesi kontraka ia do sainia lasi neganai, namona be ia laloa namonamo guna. (Luka 14:28-30) Reana haida ese edia vanagi be bisinesi ena davara dekenai idia haheaua ma edia moale ida, to gabeai edia vanagi be unai davara ena nadi hehunidia dekenai idia tatakau bena idia mutu. Haida ese edia gaukara biagudia idia vagege henidia, idia laloa bema idia sibodia be unai bamona, bisinesi do idia haheaua, moni momo do idia davaria, edia gaukara biagudia hegeregeredia. To idia lalo-parara lasi, inai tanobada lalonai bisinesi idia gaukara helulu mai edia dagedage danu dainai bisinesi naria be auka herea. Lagani ta ta iboudiai, tanobada hegegemadai bisinesi momo herea idia moru. Unai dainai, Keristen taudia momo be bisinesi dekenai idia lusi mai edia lalohisihisi danu, bena unai murinai moni gaukara idia abia dae lou mai edia moale ida, badina idia diba edia pei be fotnait iboudiai do idia abia.
Bisinesi Karadia Karaia mai Hemataurai Ida
9. Keristen taudia be edena dala idauidau amo idia hemataurai heheni diba, edia gaukara gabudia dekenai?
9 Roma 12:10 ia gwau: “Umui ta ta danu do umui matauraia.” Bema Keristen gaukara taudia haida edia biaguna danu be Witness tauna ta, namona be idia koia lasi; ena be tanobada taudia idia gwau gaukara biaguna be mai ena moni momo dainai iena gaukara taudia edia kerere ia laloa momo lasi be namo, to Keristen taudia be unai lalohadai do idia abia lasi. To idau, edia lalohadai maorona bona edia gaukara namona amo edia gaukara biaguna do idia matauraia. (1 Timoteo 6:2) Unai hegeregerena, Keristen gaukara biagudia ese edia gaukara taudia, Witness taudia, do idia hereva henidia bona do idia kara henidia mai edia hemataurai danu. Namo lasi Keristen biaguna ta be ena lalona dekenai ia gwau ia ese ena Keristen gaukara tauna ia hereaia, to namona be ia laloatao idia ruaosi be Iehova ena hesiai taudia dainai, Iena matana ai idia hegeregere. (Efeso 6:9) Danu, namona be gaukara biaguna bona gaukara tauna ruaosi be nega ibounai inai sisiba Galatia 6:10 dekenai idia laloatao: “Taunimanima ibounai dekenai kara namodia do ita karaia. To Keriso idia abidadama henia taudia do ita durua bada herea be namo.”
10. Keristen taudia edia lalo-manau ese edena bamona ia durudia idia hemataurai heheni totona?
10 Bema ita lalo-manau momokani, taunimanima ita matauraidia be auka lasi. Keristen tauna ta, kongregesen lalonai dagi ia abia lasi tauna unai, bema bisinesi lalonai ia be kongregesen ena elda ta ena biaguna ai ia lao, unai elda mai ena lalo-manau ese do ia kamonai henia haraga diba. Unai hegeregerena, unai gaukara biaguna mai ena lalo-manau ese ena gaukara tauna, elda unai, do ia kamonai henia haraga, kongregesen ena kara idauidau dekenai. Idia ruaosi idia lalo-manau dainai, edia kerere maragidia do idia maumaurai heheni lasi, badina be “ita ibounai ita kara dika vadaeni, bona Dirava ena hairaina ita abia be hegeregere lasi.”—Roma 3:23; 12:3.
11. Bisinesi karadia lalodiai, Keristen taudia be edena bamona idia laloa maoromaoro diba?
11 Bible ena hahegani ma ta be: “Emui manau bona manada kara taunimanima ibounai edia vairanai do umui hedinaraia.” (Filipi 4:5) Namo lasi Keristen tauna ta ese ena lalona dekenai ia gwau, gaukara be ia totona ia karaia tauna be Keristen tauna dainai gaukara hereadae sibona do ia karaia eiava davana maragi herea do ia gwauraia be maoro. Bona namona be Keristen gaukara tauna be ena lalona dekenai ia gwau lasi, iena biaguna be Keristen tauna dainai gwaumaoro do ia henia livi do ia abia kava totona, eiava masini o motuka do ia iusilaia kava totona. Reana ta ese heduru do ia henia kava, eiava gaukara namo herea do ia karaia, eiava davana maragi do ia gwauraia, eiava laga-ani do ia henia kava, to namo lasi iseda lalona dekenai ita gwau unai bamona ia karaia lasi neganai ia kerere. Bema Keristen tauna ta ia laloa namonamo lasi dainai ia laloa iena bamona ese do ia durua bada be namo, reana unai dainai idia ruaosi do idia badu heheni bona edia hetura do ia dika.—Hereva Lada-isidia 18:19.
12. Basileia harorolaia gaukarana dekenai, Keristen taudia be edia gaukara gabuna dekenai edena bamona idia naria namonamo be namo?
12 Iena Keristen taudia idia ura Dirava ena Basileia ena sivarai namona be murimuri taudia do idia hadibadia, to namona be idia naria namonamo, unai bamona Basileia haroro gaukarana be nega korikori ai do idia karaia totona. (Kohelete 3:1, 7) Bema idia ura gaukara negana lalonai idia karaia, namona be edia gaukara biaguna ena gwaumaoro idia abia guna. Bema lasi, reana do ia badulaia, bona inai ese Iehova ena ladana bona Iena orea taudia edia ladana do ia hadikaia diba. (1 Timoteo 6:1) Nega idaudia ai, aniani negadiai eiava laga-ani negadiai, unai bamona haroro gaukara idia karaia diba. Danu, bema Witness taudia haida be gabu tamona dekenai idia gaukara hebou, Dirava ena hereva o hesiai gaukara be edia gaukara negana lalonai idia herevalaia hebou lasi be namo.
Oi Naria Namonamo, Bisinesi Lalohadaidia Kereredia Garina
13. Paulo bona ena bamona Korinto dekenai ese edia moni davaria gaukarana edena bamona idia laloa?
13 Aposetolo Paulo be Korinto dekenai ia noho neganai, ia be Keristen taudia, Akula bona Priskila, edia ruma dekenai ia noho, bona idia toiosi be bisinesi idia karaia hebou. (Kara 18:1-3) Idia gaukara edia mauri durua gaudia abia totona, to unai gaukara idia laloa maragi, Iehova tomadiho henia karana habadaia karana idia laloa bada. Momokani, ta ese ia samanidia diba lasi, ia gwau diba lasi “idia laloa Dirava badinaia kara be moni davaria dalana.” (1 Timoteo 6:5) Idia toiosi be Iehova ese ia hanamodia bada bona Bible lalonai idia edia ladana ia hanamoa.—Roma 16:3-5.
14. (a) Dahaka dainai ta be sibona ena lalohadai ia tahua namonamo be namo, bisinesi ta lalonai ia do vareai lasi neganai? (b) Witness taudia toi ese edia hekwakwanai edena bamona idia kokia?
14 Keristen tauna ta be bisinesi karana ta lalonai ia do vareai lasi neganai, bema sibona ena ura ia tahua namonamo guna, hekwakwanai momo amo do ia raka siri diba. Hegeregere, reana Keristen tauna ta ia ura nega ia abia Basileia gaukaradia ia karaia badabada totona, to iena bamona ia ura kohu momo do ia abia. Reana ta ia ura bisinesi amo ia abia vadaeni monina be bisinesi lalonai do ia atoa lou ia habadaia totona, to ena bamona ena lalona ia hegeregere, takisi moni momo do ia henia bona ia abia vadaeni monina be bisinesi dekenai do ia atoa lou lasi, badina be ia ura lasi ena ahuna bisinesi lalonai do ia habadaia. Tano ta dekenai Iehova ena Witness taudia toi, tau ta mai ena varavara rua unai, be bisinesi dekenai idia gaukara hebou matamaia. To gabeai edia lalohadai unai bisinesi dekenai be tamona lasi dainai, idia toiosi be edia lalona idia hadaia hebou, edia bisinesi do idia hapararaia bena idia ta ta ena kahana ena kahana do idia abia. Inai dala amo idia be lauma gaudia dekenai idia lalo-tamona noho, bona varavara bamona idia hetura heheni noho. Idia ese Bible ena sisiba herevana ta idia badinaia, unai hereva ia gwau: “Maino daladia do ita tahua, bona ita ta ta ese iseda bamona ta ta edia abidadama do ita hagoadaia.”—Roma 14:19.
15. Dahaka dainai iseda lalohadai moni dekenai ita naria namonamo be namo?
15 Gau badana be ita naria namonamo, lalohadai kererena moni dekenai ita abia garina. Bible ia gwau: “Kara momokani tauna ese hahenamo momo do ia abia, to kohu momo abia totona ia haragaharaga tauna be do ia kerere.” (Hereva Lada-isidia 28:20) Bema Keristen tauna ta be “kohu momo abia totona ia haragaharaga,” reana ia ese ena Keristen varavara edia hebamo namona do ia laloa maragi. Inai ese heiriheiri kongregesen lalonai ia havaraia diba, badina be reana haida idia badu, moni ia laloa bada bona Basileia gaukaradia ia laloa maragi dainai. Unai dainai Bible ese ita ia sisiba henia, ia gwau: “Kohu momo idia ura henia taudia be hedibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura taudia do idia koia bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama [henia] kara idia rakatania vadaeni, bona mai lalohisihisi momo edia mauri idia hadikaia ore vadaeni.”—1 Timoteo 6:9, 10.
16. Bisinesi karadia iboudiai be edena bamona ita karaia be maoro ?
16 “Moni ura henia kara” ese Keristen tauna ia hakaua kerere dalana be inai: Unai kara ese ia dibagania, bisinesi karadia kereredia ia karaia totona. Bema unai kara amo Keristen taudia haida ia hadikadia, heiriheiri do ia vara diba. Bona ta ese unai bamona kara ia karaia dainai, Iehova ese do ia lalo-namo henia lasi. Bema ta ia ura heiriheiri be ena bisinesi amo do ia havaraia lasi, namona be ia laloatao, taunimanima na bisinesi karadia amo koidia karana be “gau dika hereana Iehova dekenai.” (Hereva Lada-isidia 11:1; 20:23) To, namona be Keristen taudia idia hereva diba, aposetolo Paulo ia hereva hegeregerena, ia gwau: “Aiemai lalona be maoromaoro Dirava ena vairanai. Ai ura be nega ibounai kara maoromaoro do ai karaia.”—Heberu 13:18.
Bisinesi edia Hekwakwanai Kokia Dalana
17. Bisinesi edia hekwakwanai maragidia haida be edena bamona ita kokidia diba?
17 Keristen taudia be bisinesi idia karaia hebou karadia iboudiai lalodiai hekwakwanai idia vara diba. Hekwakwanai maragidia haida idia kokia haraga diba, 1 Petro 4:8 (NW) ena sisiba idia badinaia neganai; unai sisiba be inai: “Gau hereadaena be inai: umui lalokau heheni mai emui lalona ibounai danu, badina be lalokau ese kara dika momo ia hunia.” Bema hekwakwanai be unai dala amo ita kokia diba lasi, namona be dala idauna amo ita kokia, toto bamona idia bada idia lao bona hemataurai bona hetura idia hadikaia garina. Hekwakwanai momo kokia dalana be inai: Idia do bada lasi neganai, ita herevalaia hebou mai eda hebogahisi bona mai eda momokani danu. Bible ia gwau namona be iseda heai ita haorea haraga.—Mataio 5:23-25; Efeso 4:26, 27.
18. Bema Keristen tauna ta ia laloa Keristen tauna ma ta ese bisinesi dekenai ia kara dika henia bada, dahaka do ia karaia diba?
18 To, bema Keristen tauna ta ia laloa ma Keristen tauna ta ese ia kara dika henia bada, namona be Mataio 18:15-17 ena hereva ia badinaia namonamo. Unai siri ese idia gwauraia karadia ginigunana ese hekwakwanai do ia kokia diba reana, eiava idia gwauraia karadia iharuana ese. Bema lasi, kara ihatoina be, kongregesen ena elda taudia ese unai hekwakwanai ena anina do idia tahua. Bema inai bamona ia vara, elda taudia ese tadikaka do idia sisiba henidia goadagoada, kota dekenai do idia samani heheni lasi totona. Paulo ia gwau, unai bamona idia samani heheni ena anina korikori be ‘edia ekalesia mauri ia moru momokani.’ Ma ia gwau: “Haida ese umui idia hadikaia neganai, o emui gau idia henaoa neganai, umui haheauka diba lasi, a? Hisihisi umui ania diba lasi, a?” (1 Korinto 6:1-8) Iseda moni ia boio be namo, iseda orea tauna ta ita kota henia dainai Iehova ena ladana bona kongregesen ena ladana ita hadikaia bona iseda lalo-tamona ita hadikaia be dika. Momokani, bema ta ese ena bamona ia koia bona ena moni o kohu ia abia kava, bena ena be ena bamona ese kota dekenai ia samania lasi, to reana kongregesen naria taudia ese do idia hahemaoro henia be namo.
19. Dahaka sivarai namodia Bible dekenai idia torea be elda taudia ese idia gwauraia diba, bisinesi ena hekwakwanai idia sisibalaia neganai?
19 Bisinesi idia hekwakwanailaia taudia idia sisiba henidia neganai, elda taudia ese Abraham ena kara idia hamaorolaidia diba. Ena be Abraham be vara guna tauna bona Lot be vara gabe tauna, to hepapahuahu be tano dainai ia vara neganai, Abraham ese sibona ena namo ia tahua lasi; mai ena hebogahisi ida ia ese Lot ia hamaoroa, ia ura henia tanona do ia abia hidi, idia ruaosi do idia hepapahuahu garina. (Genese 13:5-11) Elda taudia ese danu Sakaio ena kara namona idia herevalaia diba. Iena lalona ia hegeregere, ena kohu ena kahana be ogogami taudia do ia henidia bona ena kohu orena amo ia ese edia kohu be samani koikoi herevadia amo ia abia taudia be nega 4 do ia henidia lou.—Luka 19:1-10; 1 Korinto 10:24 danu itaia.
20, 21 Moni davaria gaukarana be edena bamona ita laloa be namo?
20 Keristen taudia ese Bible ena sisiba idia badinaia namonamo neganai edia bisinesi hekwakwanai idia kokia, unai be namo herea! Inai dala amo, ena be edia bisinesi idia moru, to idia lalo-tamona noho. Unai moale karana ia vara totona, namona be nega ibounai ita laloatao, Keristen taudia dekenai moni davaria gaukarana be mai anina maragi, to Basileia gaukaradia bona lalo-tamona be mai anina bada. Danu, namona be bisinesi karadia karaia negadia ita abia hidi namonamo, Basileia ena gaukara idauidau ita karaia momo diba totona.—Mataio 6:33; Filipi 1:9, 10 danu itaia.
21 Vadaeni, gau badana be Iehova bona iseda Keristen varavara ita badinadia. (Mataio 22:36-39) Ita ura lasi tanobada ena lalo-ani dikadia eiava bisinesi karadia ese inai hebamo namona do idia hadikaia, badina be Iehova badinaia karana bona ita be iseda tadikaka ida ita lalo-tamona karana be gau ta lasi ese ia hanaia!
Henanadai Haida
□ Dirava ena Hereva badinaia Karana ese bisinesi karadia edena bamona ia hanamodia?
□ Dahaka dainai bisinesi karadia badadia be kontraka amo ita hamomokania be namo?
□ Gaukara gabudia dekenai Keristen taudia be edena bamona idia hemataurai heheni diba?
□ Dahaka dainai iseda lalohadai bisinesi dekenai ita tahua namonamo be namo?
□ Dahaka lalohadai ita hahedinaraia be namo, bisinesi ena hekwakwanai ita kokia toho neganai?
[Picture on page 18]
Abraham be kontraka amo ia hamomokania tano be Epron ia hoia
[Picture on page 20]
Paulo, Akula bona Priskila ese edia moni davaria gaukarana idia laloa bada lasi