Iehova Ena Witness Taudia ese Intenesenel Hebouheboudia Do Idia Karaia

Iehova ena Witness taudia edia Hakaua Oreana ese intenesenel hebouheboudia idia palanilaia, lagani 1998 lalonai do idia karaia totona. Saturday, October 5, 1996 ai, Watch Tower Bible and Tract Society of Pennsylvania ena lagani ta ta hebouna be Jersey City Assembly Hall dekenai, idia karaia neganai, unai hadibaia herevana idia moalelaia bada.

Lagani ta ta idia karaia distrik hebouheboudia sibona lasi, to intenesenel hebouheboudia danu be lagani 1998 huanai North America dekenai do idia karaia. Idia laloa tanobada ena kahana idauidau amo Witness taudia handred tausen momo be unai heboudia dekenai do idia mai. Tano idauidau momo amo taunimanima idia hebou diba totona, Watch Tower Society ena brens opesi ta ta ibounai 100 mai kahana amo North America ena intenesenel hebouhebou ena siti ta dekenai idia siaia diba taudia edia namba do idia gwauraia.

Ita diba, North America dekenai idia ura lao taudia iboudiai be do idia lao lasi to haida sibona. To, reana tausen momo be edia gabu kahirakahira ai intenesenel hebouhebou dekenai idia lao diba. Dala idia hegaegaelaia noho Europe ena tano rua o toi dekenai intenesenel hebouhebou do idia karaia bona ma haida be Africa, Asia, Latin America, South Pacific, bona Caribbean dekenai do idia karaia.

Nega maorona ai, Society ena brens opesi ese edia teritori ai idia noho kongregesen do idia hadibaia edena siti eiava siti haida dekenai do idia lao diba. Hebouhebou edia deit bona idia lao diba taudia abia hidi dalana do idia hadibaia. Hebou taudia abia hidi totona edia aplikesen do idia hahonua taudia ese unai heboudia totona edia moni idia haboua matamaia be namo.

Tanobada hegegemadai Iehova ena Witness taudia iboudiai be mai moale ida unai lagani 1998 ena intenesenel heboudia ai do idia vara gaudia idia naria diba. Tano iboudiai distrik hebouhebou edia program be tamona.