Lagani 2003 Ena Intenesenel Hebouheboudia
SATURDAY, October 6, 2001 ai, Watch Tower Bible and Tract Society of Pennsylvania ena memba taudia ese edia lagani ena hebou be Jersey City, New Jersey, U.S.A. dekenai idia karaia. Unai hebou murinai, unai memba taudia bona edia vadivadi taudia ese mai anina bada program idia moalelaia. Unai dina murinai, Canada bona United States edia siti foa dekenai idia karaia hebou ma haida ai, Iehova ena Witnes taudia edia Hakaua Oreana taudia ese edia hereva dokona lalonai inai hadibaia herevana idia henia:
“Vaira negana ita laloa neganai, gau badana be Dirava ena taunimanima iboudiai ese edia hebou karana do idia rakatania lasi. Aposetolo Paulo ese ita ia hagoadaia, unai hebou bona ita ta ta ita hagoadaia karadia be Iehova ena dina badana mai garina ia mai kahirakahira ita naria noho lalonai do ita habadaia. (Heberu 10:24, 25) Unai Baibel ena hahegani hegeregerena, ai ura vaira lagani [2002] lalonai tanobada ena kahana iboudiai dekenai distrik hebouhebou do ai karaia. Bena lagani 2003 lalonai, bema Iehova ia ura, tanobada ena kahana haida dekenai intenesenel hebouhebou do ai karaia diba danu. Hari ita noga noho bona ita gima noho be namo, bona tanobada dekenai idia vara gaudia ita itaia noho.”
Herevana inai tanobada ena dokona ia mai kahirakahira noho lalonai daradara bona badu idia bada idia lao, to Dirava ena taunimanima ese edia gaukara idia karaia noho be gau badana. Basileia ena sivarai namona, bona Baibel ena sisiba herevana be bese, iduhu, gado, bona taunimanima iboudiai dekenai do idia hadibaia, do idia hamaorodia idia ese ‘Dirava do idia gari henia bona hanamoa badina iena kota negana ia kahirakahira vadaeni.’ (Apokalupo 14:6, 7) Unai dainai, iseda guba Tamana ena ura hegeregerena, tanobada ena kahana haida dekenai lagani 2003 totona intenesenel hebouhebou idia palanilaia.
Matamanai, unai bamona hebouhebou be North America ena siti haida totona idia palanilaia bona nega sisina murinai Europe dekenai do idia abia. Gabeai lagani 2003 lalonai, dala do idia hegaegaelaia vadivadi taudia ese siti haida Asia dekenai do idia lao totona; bona lagani ena dokona kahanai, grup haida be Africa, South America, bona Pacific dekenai do idia lao. Brens haida sibona do idia noia vadivadi taudia haida sibona be hebouhebou gabudia haida dekenai do idia siaia, unai dainai iboudiai ai boiria be hegeregere lasi. To, vadivadi taudia haida tano idauidau amo be gabu ta ta dekenai do idia lao be hagoadaia gauna.
Daudau lasi murinai Iehova ena Witnes taudia edia kongregesen ese unai hebouhebou totona hadibaia herevadia do idia abia. Deit bona vadivadi taudia idia lao henia siti edia ladana be edia brens ese do idia hadibaia. Unai dainai, oi ai noia unai hadibaia herevadia totona ai oi tore henia lasi eiava oi henanadai henia lasi.
Do idia abia hidi vadivadi taudia be gwauhamata bona bapatiso Witnes taudia, idia be haheitalai namodia bona unai gabu edia tadikaka dekenai lalokau idia hahedinaraia diba. Unai dala amo unai gabu tadikakadia dekenai dala do ia kehoa, vadivadi taudia dekenai heabidae karana idia hahedinaraia totona. (Heberu 13:1, 2) Unai amo idia ibounai ‘edia abidadama ese ma haida do ia durua.’ (Roma 1:11, 12) Tano ta eiava tano haida dekenai vadivadi taudia do idia siaia brens ese unai gaudia totona hereva ma haida do idia hadibaia.
Hanaihanai ita karaia bamona, tano momo dekenai lagani 2003 totona dina toi distrik hebouheboudia do idia hegaegaelaia. Ita hebou neganai, ibounai be do idia ‘kamonai, diba idia abia, bona goada do idia davaria.’ (Deuteronomi 31:12; 1 Korinto 14:31) Unai amo Dirava ena taunimanima idia diba momokani “Lohiabada be namo momokani.” (Salamo 34:8) Intenesenel hebouhebou iboudiai lalonai, bona distrik hebouhebou momo ai, misinari taudia do idia noho, haida be program lalonai do idia gaukaralaidia.
Lagani 2002 lalonai, ita be “Basileia Harorolaia Goadagoada Taudia” Distrik Hebouheboudia ita moalelaia, unai ese ita do ia hagoadaia dala badana ai ita haroro totona. Unai ita karaia noho neganai, vaira lagani totona Iehova ese ia hegaegaelaia gaudia dekenai iseda ura do ia habadaia. Hari inai nega dikana lalonai unai ese ita do ia durua, ita ‘naria noho, noga noho, bona ita hegaegae noho’ totona.—Mataio 24:42-44, NW.