Hisihisi Idia Ania Taudia be Maino Do Idia Davaria, A?

OI URA oiemu hisihisi sibona lasi to taunimanima iboudiai edia hisihisi do ia ore, a? Mani inai haheitalai oi lalodia:

Sonia ena mauri lalonai hisihisi bada ia ania.a Guna ia davaria ena tau be lagani 10 lalonai heudahanai karana ia karaia noho. Gabeai ena mero ginigabena ese HIV ia abia bona AIDS dainai ia mase. Lagani rua murinai ena mero ma ta ia gorere, bena nega daudau lasi murinai ia danu be AIDS dainai ia mase. Sonia ia gwau: “Ena gorere ena dokona negana be daudau herea. Ia lalo-metau momokani, ena huina idia moru, bona ia itaia namonamo lasi. Ai lalohisihisi bada.”

Fabiana, iunivesiti stiuden ta Brazil ai, ese tanobada ena kara gagevagageva ia lalodia bada. Bena sibona ena mauri lalonai hisihisi gauna badana ia vara. Ena tadina be ia lalo-metau bada dainai sibona ia hamasea. Fabiana be ena gaukara ia haboioa neganai, ena turana ta ia gwau pai-​de-​santo (meamea tauna) ena heduru ia tahua be namo, ia laloa Fabiana ese hisihisi bada ia ania badina ta ese meamea karana ia karaia ia dekenai! To pai-de-santo ese ia durua diba lasi. To idau, Fabiana ena mamina ia dika ia lao, badina ena hekwakwanai dainai ia mahuta diba lasi.

Ana ena hisihisi be ia maragi negana amo ia matamaia. Ia gwau: “Egu mauri lagani be tamona neganai, egu sinana ese lau ia rakatania, unai dainai egu tubuna hahine ese lau ia ubua.” Bena, Ana ena lagani be toi neganai, ena tubuna hahine ia mase. Tamana bona sinana lasi natudia idia naria gabuna dekenai, Rio de Janeiro ai, Ana idia atoa, bona unuseniai ia noho ela bona ena mauri lagani be 13. Ia gwau: “Unuseniai ai idia kara henia namonamo lasi, bona lau gwau-edeede matamaia. Lau tubu negana lalonai, gau iboudiai lau dagedage henia.”

Toana be taunimanima iboudiai be dala idauidau ai hisihisi idia ania. Momokani, dina ta ta taunimanima edia hisihisi edia sivarai ita kamonai​—nius ita itaia, duahia, eiava kamonai neganai. Dr. Mary Sykes Wylie ia gwau: “Hari iseda . . . nega ai, diba idia halasia momo negana ai, nius dikadia kamonai loulou karana ita koua diba lasi. Tuari, idia vara kava dika badadia, faktori dainai idia vara dika badadia, motuka aksiden, raskol karadia, hagaria karadia, matabodaga karadia, hahine hadikaia karadia, ruma dekenai idia vara dagedage karadia​—unai iboudiai dainai lagani 1900 murinai lalo-metau be dina ta ta ita davaria dika badana.” Keristani aposetolo Paulo ese taunimanima edia sivarai ia gwauraia namonamo, ia gwau: “Dirava ese ia karadia gaudia ibounai be idia hisihisi noho.”​—Roma 8:22.

Oi be edena bamona? Oi ese hisihisi oi ania noho, a? Edena heduru oi naria diba? Maino momokanina do oi davaria diba, a? Sonia, Fabiana, bona Ana be heduru bona maino momokanina idia davaria! Hereva gabena ai unai oi duahia diba.

[Footnotes]