Idia Buruka, To Iehova Idia Hesiai Henia

Málaga, Spain ena saut kahana dekenai, hahine buruka ta ladana Ana bona ena natuna hahine ena ladana danu be Ana, be December 19, 2009 ai idia bapatiso. Idia ruaosi be lagani 2009 ai Spain dekenai bapatiso idia abia taudia 2,352 huanai idia noho. To hoa gauna be, sinana ena mauri lagani be 107 bona natuna hahine ena mauri lagani be 83!

Dahaka dainai edia mauri be Iehova dekenai idia gwauhamatalaia bona bapatiso idia abia? Lagani 1970 lalodiai, Ana (maragina) be ena dekena hahinena ese ia boiria ena ruma ai idia karaia Kongrigeisen Buka Stadi dekenai ia lao totona. To, Ana (maragina) be ena moni gaukara dekenai ia bisi bada dainai, nega haida sibona ia lao.

Lagani 10 murinai, Ana (maragina) ena natuna haida be Baibel idia stadilaia bona Iehova ena Witnes taudia ai idia lao. Idia ta, Mari Carmen ese ena sinana ia hagoadaia Baibel stadi ia abia dae totona. Bena Mari Carmen ena tubuna Ana (badana) danu ia ura Baibel ia stadilaia. Gabeai, unai bese taudia ten be bapatiso idia abia.

Bapatiso idia abia neganai, Ana (badana) bona Ana (maragina) idia moale bada herea. Ana (badana) ia gwau: “Iehova ena kara be namo herea lau dekenai, badina dala ia kehoa ia lau dibaia totona.” Ana (maragina) ia gwau: “Paradaiso ia do ginidae lasi neganai, lau ura Iehova lau hesiai henia, ena ura lau karaia, bona sivarai namona lau harorolaia goadagoada.”

Unai vabu ruaosi be hebou lao henia karana idia moalelaia bada. Edia kongrigeisen elda ta ia gwau: “Hebou ta idia reaia lasi. Hanaihanai Gima Kohorona stadi dekenai haere idia henia.”

Edia haheitalai namona be Baibel negadiai ia noho vabu ta ladana Ana bamona. Baibel ia gwau: “[Ana] be Dubu Helaga ia rakatania lasi, Dirava dekenai ia tomadiho henia, ia guriguri noho, bona aniani ania lasi ena taravatu ia badinaia noho.” Ena be Ana ena mauri lagani be 84, to Iehova ia hesiai henia noho, unai dainai ia be Iesu ia itaia. (Luka 2:​36-38) Hari danu, ena be Ana (badana) bona Ana (maragina) be idia buruka vadaeni, to Iehova idia hesiai henia noho.

Emu varavara haida be idia ura Baibel ena hereva idia kamonai, a? Eiava ruma-ta-ruma-ta gaukara ai buruka tauna ta oi davaria bona ia ura bada sivarai namona ia kamonai, a? Idia be ita herevalaia vadaeni Ana (badana) bona Ana (maragina) bamona; ena be idia buruka to Dirava momokanina Iehova idia hesiai henia diba.

[Blurb on page 25]

“Iehova ena kara be namo herea lau dekenai”

[Blurb on page 25]

“Paradaiso ia do ginidae lasi neganai, lau ura Iehova lau hesiai henia”