Inai Oi Laloatao, A?
Vanegai ai halasia Gima Kohorona magasin edia hereva oi lalodia namonamo, a? Bema oi gwau io, henunai idia noho hereva do oi laloa lou mai moale ida.
◻ Hari inai negai edena bamona headava taudia momo ese Akwila bona Prisikila edia haheitalai namona idia tohotohoa?
Akwila bona Prisikila be kongregesen idauidau ai idia gaukara. Idia hegeregerena, inai nega ena Keristani taudia goadadia momo be heduru ai idia dabu gabudia dekenai idia lao vadaeni. Idia moale bona edia lalona idia hegeregere, badina Basileia gaudia idia itaia idia tubu daekau, bona Keristani taudia namodia be edia turadia ai idia halaoa dainai.—12/15, rau 24.
◻ Baibel ena hereva kekero muramura dekenai be dahaka?
Baibel ese kekero muramuradia edia namo bona edia dika ia gwauraia. Ia gwau uaina be harihari gauna Iehova Dirava amo. (Salamo 104:1, 15) To, Baibel ese uaina inua momo karana ia gwauraia dika. (Luka 21:34; 1 Timoteo 3:8; Tito 2:3; 1 Petero 4:3) —12/15, rau 26, 27.
◻ Dahaka mai anina bada gauna ia noho Baibel bukana Hagai lalonai?
Ena be Hagai bukana lalonai siri 38 sibona idia noho, to Dirava ena ladana be nega 35 ia gaukaralaia. Unai peroveta herevana be mamina lasi gauna bamona, bema ia lalonai dava bada ladana Iehova ena gabu dekenai dagi ladana “Lohiabada” idia atoa.—1/1, rau 6.
◻ Dahaka ita diba Davida bona Manase edia kara dika amo?
Ena be Iehova ese Davida bona Manase edia kara dika ia gwauatao, unai tatau ruaosi—bona Israela besena idia ida—be edia kara dika dainai idia vara anina dikadia idia koua diba lasi. (2 Samuela 12:11, 12; Ieremia 15:3-5) Unai hegeregerena, Iehova ese helalo-kerehai taudia edia kara dika ia gwauatao neganai, reana edia kara dainai idia vara anina dikadia do idia koua diba lasi.—1/1, rau 27.
◻ Edena dala ai Dirava ena Basileia ‘sivarai namona ena moale idia mailaia taudia edia aena be namo herea momokani’? (Isaia 52:7)
Ta be ena aena amo ia raka lao ma haida haroro henidia totona. Unai bamona aena be unai taunimanima ena toana. Unai dainai Basileia sivarai namona idia kamonai bona idia abia dae taudia dekenai, unai haroro tauna ena aena be mai hairaina.—1/15, rau 13.
◻ ‘Sivarai Namona harorolaia’ gaukarana lalonai dahaka gaukara mai ena kahana rua ia noho? (1 Korinto 9:16)
Ginigunana be, Dirava ena Basileia sivaraina namona do ita harorolaia. Gaukara ena kahana iharuana be unai Basileia harorolaia karana idia abia dae taudia ita hadibaia.—1/15, rau 23.
◻ Kongregesen hebouhebou dekenai ita ta ta ese Basileia ena ane abia karana amo dahaka namo ita davaria?
Iseda lalohadai ita ia karaia Diravana dekenai be ane amo ita hahedinaraia diba. (Salamo 149:1, 3) Kongregesen lalonai bema ane ita abia mai eda lalona ibounai ida, unai dainai iseda darana bona iseda lalona do idia hegaegae, bena program ena hereva do ita kamonai namonamo bona do ita ura Iehova tomadiho henia karana do ita goadalaia.—2/1, rau 28.
◻ Edena bamona ita gwau diba mase dinana ena namo ese vara dinana ena namo ia hereaia? (Hadibaia Tauna 7:1)
Ta ena mase dinana ena namo ese ena vara dinana ena namo ia hereaia bema ladana namona ia abia vadaeni Iehova vairanai, idia mase vadaeni abidadama taudia ia hatorea isi lou diba Diravana. (Ioane 11:25)—2/15, rau 12.
◻ Dahaka dainai Hadibaia Tauna bukana ese ita ta ta ia durua diba?
Ita ta ta ia durua diba iseda lalohadai mauri dekenai bona ita laloa bada gaudia dekenai idia maoromaoro totona. (Hadibaia Tauna 7:2; 2 Timoteo 3:16, 17)—2/15, rau 16.
◻ Iehova ena Witness taudia be fundamentalism taudia, a?
Lasi. Idia ese edia tomadiho dalana idia dogoatao auka, to idia be hari inai nega ena fundamentalism taudia bamona lasi. Idia ese edia lalohadai idia dadaraia taudia idia dagedage henidia lasi. Idia ese edia Gunalaia Tauna, Iesu Keriso, idia tohotohoa.—3/1, rau 6.
◻ Ita diba lasi Iesu be edena negai Dirava ena davana henia karana do ia karaia dainai, unai ena anina Keristani taudia dekenai be dahaka?
Ita gima noho bona dina ta ta ita be mai eda dala do ita hahedinaraia Iehova ita hesiai henia neganai ita be sibona eda ura ita tahua lasi.—3/1, rau 13.
◻ Dahaka ita laloa guna be namo bema ita ura iseda tadikaka ta be kota dekenai ita abia lao iseda moni ia haboioa dainai?
Namona be unai ena anina ita dekenai, unai tau o taudia dekenai, kongregesen dekenai, bona murimuri taudia dekenai be do ita laloa namonamo. (1 Korinto 6:7)—3/15, rau 22.
◻ Moale korikori be edena bamona ita abia diba?
Moale korikori be iseda lalona ai ia vara; ena badina be abidadama momokani bona Iehova Dirava tura henia namonamo karana. (Mataio 5:3, NW)—3/15, rau 23.
◻ Diuri gaukara totona Keristani tauna ta idia boiria neganai dahaka ia karaia?
Diuri gaukara idia karaia Keristani taudia ta ta be Baibel amo idia abia dibana bona sibona edia lalona hegeregerena edia lalona do idia hadaia edena dala do idia abia hidi. (Galatia 6:5)—4/1, rau 29.