Epafra—“Keriso Ena Hesiai Tauna Namona Ta”

DAIKA ese Keristani kongregesen ia haginia Korinto, Efeso, bona Filipi ai? Reana karaharaga do oi gwau: ‘ “Iuda lasi taudia totona aposetolo gaukara” ia karaia tauna, Paulo, ese.’ (Roma 11:13) Oiemu haere be maoro.

To, daika ese Kolose, Hierapolis, bona Laodikea kongregesen ia haginidia? Toana be tau ta, ena ladana be Epafra, ese ia haginidia. Reana oi ura unai evanelia tauna oi dibaia, badina Baibel ia gwau ia be “Keriso ena hesiai tauna namona ta.”​—Kolose 1:7.

Evanelia Tauna Lycus Kourana Ai

Ladana Epafrodito oi hakwadogia neganai, ladana Epafra oi gaukaralaia diba. To Filipi tauna Epafrodito ai herevalaia lasi, ai gwauraia tauna Epafra be Kolose tauna. Kolose be Asia Minor ai, Lycus Sinavai ena koura dekenai idia noho kongregesen hanuadia toi amo ia be ta. Kolose be kilomita 18 Laodikea amo, bona kilomita 19 Hierapolis amo, idaunegai Perigia distrik dekenai.

Baibel ese edena dala ai Dirava ena Basileia ena sivarai namona Perigia dekenai ia lao be ia gwauraia lasi. To, Pentekoste dinana lagani 33 C.E. ai, Perigia taudia idia noho Ierusalema ai, reana idia haida be Kolose amo. (Kara 2:​1, 5, 10) Paulo be Efeso dekenai ia haroro negana lalonai (lagani 52-​55 C.E. ai bamona), idia ese taunimanima momo herea idia haroro henidia mai edia goada ida bona idia karaia namonamo dainai, Efeso taudia sibona lasi to “Asia tano dekenai idia noho taudia, Iuda taudia bona Helene taudia, ibounai ese Lohiabada ena hereva idia kamonai.” (Kara 19:10) Toana be Paulo be sivarai namona ia harorolaia lasi Lycus Koura ena gabu ibounai lalonai, badina be Keristani ai idia lao Lycus taudia momo ese Paulo idia itaia lasi.​—Kolose 2:1.

Paulo ia gwau, Kolose taudia dekenai “Dirava ena hariharibada ena Sivarai namona” ia hadibaia tauna be Epafra. Paulo ese unai gaukara hebou tauna ia gwauraia “Keriso ena hesiai tauna namona ta” dainai, ia hahedinaraia Epafra be evanelia tauna goadana unai gabu ai.​—Kolose 1:​6, 7.

Aposetolo Paulo bona evanelia tauna Epafra ese Lycus Koura tadikakadia edia namo lauma dalanai idia laloa bada. Paulo be “Iuda lasi taudia totona aposetolo gaukara” ia karaia dainai, lauma dalanai idia tubu daekau sivaraina ia kamonai neganai, ia moale. Vaia, Paulo be Epafra amo Kolose taudia edia sivarai ia kamonai.​—Kolose 1:​4, 8.

Epafra Ena Ripoti

Kolose taudia be hekwakwanai badadia idia davaria dainai Epafra be daudau gabuna Roma dekenai ia lao, Paulo ida unai hekwakwanai idia herevalaidia totona. Epafra ena ripoti dainai, Paulo ese revareva rua ia siaia ia do hedavari henia lasi tadikakadia dekenai. Revareva ta be Kolose taudia dekenai ia siaia. Revareva ma ta, hari ia boio revarevana, be Laodikea taudia dekenai ia siaia. (Kolose 4:​16) Unai revareva rua ese Epafra ena lalohadai, unai Keristani taudia be dahaka do idia abia be namo idia herevalaia. Edena bamona gaudia ia laloa idia abia be namo? Unai gaudia idia hahedinaraia Epafra be edena bamona tauna?

Kolose taudia idia abia revarevana ia hahedinaraia Epafra ia lalo-hekwarahi unai Keristani taudia be tomadiho koikoi taudia edia lalohadai, hegeregere moale gaudia dadaraia vaitani lalohadai, meamea karana, bona kaivakuku gari henia karadia ese edia lalona idia veria. Danu, kongregesen taudia haida be reana Iuda taudia edia kara, aniani haida dadaraia bona dina haida hahelagaia karadia, idia badinaia.​—Kolose 2:​4, 8, 16, 20-​23.

Paulo ena revareva idia hahedinaraia Epafra ia noga bona ia ese ena Keristani tadikaka idia abia be namo gaudia ia laloa. Ia ura lauma dalanai idia goada bona edia noho gabuna ena dika idauidau ia lalo-pararalaia. Epafra ese Paulo ena sisiba ia tahua, unai ese ia hahedinaraia ia be manau tauna. Reana ia ura ia manada vadaeni tadikakana ena sisiba ia kamonaia. Epafra be mai ena aonega ida ia kara.​—Aonega Herevadia 15:22.

Guriguri Ia Laloa Bada Tauna Ta

Paulo ena revareva Kolose Keristani taudia dekenai ena dokona kahanai, ia gwau: “Epafra, Keriso Iesu ena hesiai tauna ese umui ia hanamoa henia inai. Nega ibounai umui dainai ia guriguri goada. Dirava ia noia, do umui gini goada, Keriso do umui abidadama henia, mai maoromaoro, bona momokani danu. Bona ia noinoi, Dirava ena ura ibounai, be do umui diba namonamo, bona kamonai henia. Umui lau hamaoroa momokani, Epafra be umui totona, Laodikea taudia totona, bona Hieropoli taudia totona danu, ia hekwarahi bada noho.”​—Kolose 4:​12, 13.

Oibe, Roma ai ia be Paulo “danu dibura ruma lalonai ia noho” neganai, Epafra ese ia lalokau henia tadikakadia Kolose, Laodikea, bona Hieropoli dekenai ia laloa noho bona idia totona ia guriguri. (Filemona 23) Guriguri amo idia totona ‘ia hekwarahi.’ Diba bada tauna D. Edmond Hiebert ia gwau idia gaukaralaia Greek herevana ena anina be “hekwarahi bada karana ta,” ia be Iesu Keriso ese ia mamia “hisihisi bada” hegeregerena, Getesemane dekenai ia guriguri neganai. (Luka 22:44) Epafra ia ura ena tadikaka bona taihu edia noho ia namo bona lauma dalanai idia lo momokani. Kongregesen lalonai lauma gaudia ia laloa bada tadikakana ta ia noho be mai ena hahenamo bada!

Epafra idia gwauraia ‘aiemai lalokau tauna, hesiai tauna namona ta danu’ dainai, ita diba ena Keristani tadikaka ese ia idia lalokau henia. (Kolose 1:7) Dala ia noho neganai, namona be kongregesen taudia ibounai ese edia lalokau idia hahedinaraia mai edia ura ida. Hegeregere, gorere taudia, buruka taudia, bona hekwakwanai idia davaria tadikakadia ma haida ita durua diba. Kongregesen gaukara idauidau ita karaia diba, eiava tiokratik gaukara idauna ta, konstraksen gaukara ita durua diba.

Epafra ia karaia karana, ma haida totona ia guriguri, be ita ibounai ese ita karaia diba helaga karana ta. Unai bamona guriguri lalodiai, Iehova idia tomadiho henia taudia edia namo ita laloa bada herevadia ita gwauraia diba badina lauma dalanai o tauanina dalanai dika bona hekwakwanai idia davaria. Bema unai dala ai ita hekwarahi bada, Epafra ita tohotohoa. Ita ta ta be Iehova ena kamonai hesiai taudia edia bese lalonai ‘lalokau tauna, hesiai tauna namona’ ai ita lao diba, bona unai be iseda hahenamo bona ita ia hamoalea gauna.