Hunia Gaudia be Momo, Dahaka Dainai?

“MA GAU ta ese hunia herevana ena metau ia hereaia lasi.” France taudia edia aonega herevana be unai. Reana unai hereva be momokani dainai, hunia herevana ita diba neganai ita moale, to bema ita herevalaia diba lasi iseda lalonai ia hametaua, ani? To, idia lao lagani handred lalodiai, taunimanima momo idia ura kara haida idia karaia hehuni, unai dainai hehuni oreadia idia karaia, gau ta idia tahua hebou totona.

Idaunegai hehuni oreadia idia noho Aigupito, Greece, bona Roma ai. Gabeai unai grup haida be edia tomadiho karadia amo idia siri sisina bona politikol, moni tahua, o taunimanima durua karadia idia karaia matamaia danu. Unai hegeregerena, idaunegai Europe dekenai hoihoi taudia bona ima gaukara taudia edia oreadia idia karaia neganai, edia memba taudia ese hehuni daladia idia gaukaralaia, edia kohu idia gimaia totona.

Hari iseda nega ai idia noho hehuni oreadia momo edia tahua gaudia be namo. Encyclopædia Britannica ia gwau reana “taunimanima durua totona” bona idia ura “taunimanima dekenai moni o edukeisini program henia totona idia karaia.” Orea haida, hegeregere matamata taudia edia oreadia, gadara oreadia, bona grup ma haida idia karaia hehuni eiava edia kara haida idia herevalaia momo lasi. Nega momo, unai bamona grup edia kara ia dika lasi, edia hehuni karana be gadara bamona idia dekenai. Vareai karadia hehunidia idia ura henia bada bona idia ese tura heheni bona lalo-tamona mamina idia hagoadaia. Memba taudia edia hemami be idia be unai orea ena kahana ta bona idia laloa edia mauri be mai ena anina. Unai bamona hehuni oreadia ese memba lasi taudia edia mauri idia hadikaia lasi. Memba lasi taudia ese edia hunia karadia idia diba lasi be gau badana lasi.

Hunia Karana Ia Dika Neganai

Hehuni oreadia edia hunia karana edia bada be tamona lasi. To, Encyclopædia Britannica ia gwau “hunia karadia lalonai gau ma haida idia hunia” neganai, dika ia vara diba. Ma ia gwau “ladana idaudia, kara idaudia, eiava matahanai herevadia amo,” ena dagi bada taudia be “sibodia idia abia isi” bona unai amo “dagi bada lasi taudia” idia ha-uraia “idia hekwarahi dagi bada abia totona.” Unai bamona orea edia dika ita itaia goevagoeva diba. Dagi bada lasi taudia ese edia orea ena tahua gaudia korikori idia diba namonamo lasi, badina edia dagi ia do hegeregere lasi unai diba idia abia totona. Unai dainai orea ta lalonai idia vareai, ena be ena tahua gaudia davaria daladia iboudiai idia itaia lasi, bona reana idia ura lasi. To unai bamona orea ia vareai vadaeni tauna be gabeai do ia davaria unai orea ia rakatania be auka; hehuni oreana ena taravatu be seini bamona, ia idia kwatua dainai.

To, orea ta be taravatu utua o raskol karadia ia karaia dainai ena noho ia hunia, unai be dika momokani. Eiava bema orea ta be ena noho bona ia tahua gaudia badadia idia hunia lasi, to reana ena memba taudia edia ladadia bona harihari ia karaia palanidia ia hunia. Dagedage oreadia, edia lalohadai idia badinaia goadagoada oreadia unai, ese unai hunia dalana idia gaukaralaia, bona nega ta ta tanobada taudia ese idia hoalaia dagedage dika herea idia karaia.

Oibe, hunia karana be mai ena dika, taunimanima ta ta dekenai bona taunimanima ibounai dekenai. Matamata taudia edia raskol orea hehunidia mani oi laloa, dika idia havaraia lasi taudia idia dagedage henia. Hehuni dagedage orea badadia, hegeregere Mafia, kopi kurokuro taudia abia isi oreana Ku Klux Klan,a bona tanobada hegegemadai idia noho dagedage oreadia momo be inai tanobada ena maino bona noho namona idia hadikaia noho.

Dahaka Idia Karaia Hari?

Lagani 1950 murinai, America bona Russia edia inai heheni karana dainai, Western Europe tanodia haida lalonai hehuni oreadia idia hegaegaelaia, bona bema Russia taudia ese Western Europe idia halusia toho neganai, unai taudia ese do idia tuari henia. Unai hegeregerena, Germany ena nius magasin Focus ia gwau, unai nega lalonai, “tuari kohu haboua hehuni gabudia 79” idia haginia Austria dekenai. Europe tanodia momo idia diba lasi unai oreadia idia noho. Lagani 1990 murinai, nius magasin ta ena ripoti, ia gwau: “Ita diba lasi hari inai negai unai oreadia hida idia do noho, bona dahaka idia karaia hari.”

Oibe, daika ia hegeregere dika idia havaraia diba hehuni oreadia edia namba bona idia havaraia dika ena bada ia diba?

[Footnotes]