Iehova—Hunia Gaudia Ia Hahedinaraia Diravana
“Guba dekenai be Dirava ta ia noho, hunia gaudia ia hedinaraia diba.”—DANIELA 2:28.
IEHOVA, tanobada bona guba edia lalokau Atai Herea Diravana, bona Havaraia Tauna tamona, be aonega bona hahemaoro henia Diravana. Iena kara toana, ena gaukara, bona ena ura ia hunia lasi. Ia abia hidi negana ai bona mai aonega ida, ena ura ia hahedinaraia. Unai dala amo ena Inai Tauna, Satani Diabolo, amo ia idau. Satani ia ura ena kara toana korikorina bona ena ura korikorina ia hunia.
2 Iehova bona Satani edia kara be idau hegeregerena, idia tomadiho henia taudia edia kara danu idia idau. Satani murinai idia raka taudia edia kara badana be koikoi. Diari toana idia hahedinaraia, to dibura karadia idia karaia. Paulo ese Korinto Keristani taudia ia hamaoroa namona be unai idia hoalaia lasi, ia gwau: “Unai taudia be aposetolo koikoidia, gaukara koikoi taudia, Keriso ena aposetolo momokani lasi. To unai be hoa gauna lasi. Badina be Satani sibona ese iena kara ia senisia diba, bona ia ese diari aneruna ena kopina ia atoa diba.” (2 Korinto 11:13, 14) To, Keristani taudia edia Hakaua Tauna be Keriso. Tanobada ai, ena Tamana, Iehova Dirava, ena kara ia hahedinaraia goevagoeva. (Heberu 1:1-3) Unai dainai Keristani taudia be Keriso murinai idia raka neganai, Iehova, hereva momokani, ena kara ia hunia lasi, bona diari Diravana, idia tohotohoa. Edia kara toana, edia gaukara, bona edia ura idia hunia lasi danu.—Efeso 4:17-19; 5:1, 2.
3 Iehova ia diba nega namodia ai, ia ese ena ura bona nega vairai gaudia, taunimanima be guna idia diba lasi gaudia, ia hahedinaraia. Unai dala dekenai ia be hunia gaudia ia hahedinaraia Diravana. Unai dainai, Dirava idia ura hesiai henia taudia ia boiria—oibe, ia hagoadaia momokani—ia hahedinaraia gaudia idia dibaia totona. Lagani 1994 ai, Witness taudia 145,000 bamona Europe ena tano ta ai idia henanadai henia, bona idia davaria Witness tauna o hahinena ai idia do lao lasi neganai, idia ta ta edia averes be lagani toi lalodiai idia sibodia ese Iehova ena Witness taudia edia hahediba herevadia idia tahua namonamo guna. Mai edia ura kwalimu ida, ma ta ia doria dainai lasi, idia abia hidi idia be Witness ta ai do idia lao. Bona unai murinai, dahaka idia ura idia karaia be mai edia ura kwalimu ida idia karaia diba noho. Hegeregere, Keristani taudia edia kara maoromaoro taravatudia idia ura lasi idia badinaia noho dainai, idia haida be gabeai idia laloa idia ura lasi Witness taudia ai do idia noho. To, idia ore lagani ima lalodiai, unai Witness taudia gunadia momo herea be kara haida idia karaia edia tadikaka idia bamoa lou bona Witness gaukarana idia karaia matamaia lou totona.
4 To momokani, Witness taudia gunadia ibounai idia giroa lou lasi, bona guna idia haida be mai edia dagi badana Keristani kongregesen lalonai. To unai ita hoalaia lasi, badina be Iesu murinai ia raka momokani tauna ta, aposetolo tauna Iuda, ese hereva momokani ia rakatania. (Mataio 26:14-16, 20-25) To unai be badina ta Keristani maurina lalo-hekwarahilaia momo totona, a? Bona unai dainai, Iehova ena Witness taudia idia karaia hadibaia gaukarana amo ia vara namo be anina lasi, a? Lasi. Iuda Iskariote, Iesu ia hadikaia tauna, ena kara ese Iehova ena ura ia koua diba lasi hegeregerena.
Siahu Ibounai Bona Lalokau Diravana
5 Iehova be lalokau Diravana. Taunimanima ia ura henia. (1 Ioane 4:7-11) Ia be ataiai momokani, to ia ura taunimanima ia tura henia. Baibel ese ena idaunegai hesiai tauna ta ia herevalaia, ia gwau: “ ‘Aberahamo ese Dirava ia abidadama henia, bona iena abidadama dainai Dirava ia gwau ia be maoromaoro vadaeni.’ Unai dainai idia gwau Aberahamo be Dirava ena turana.” (Iamesi 2:23; 2 Sivarai 20:7; Isaia 41:8) Tanobada taudia be edia turadia dekenai edia hehuni herevadia idia hahedinaraia hegeregerena, Iehova ese ena turadia dekenai ia karaia danu. Unai dala amo Iesu ese ena Tamana ia tohotohoa, ena hahediba taudia ia tura henia bona idia dekenai hehuni herevadia ia hahedinaraia. Idia dekenai ia gwau: “Harihari ia lao, umui be hesiai taudia do lau gwauraia lasi, badina hesiai tauna be iena biaguna ena kara ia diba lasi. To umui be lauegu turana do lau gwauraia, badina be lauegu Tamana dekena amo lau kamonai herevadia ibounai umui dekenai lau hamaoroa vadaeni.” (Ioane 15:15) Iehova, ena Natuna, bona edia turadia sibodia idia diba gaudia, eiava “hunia herevadia” ese idia hatamonadia, bona ta ese edia lalokau bona badinaia heheni karana ia hamakohia diba lasi.—Kolose 3:14.
6 Ladana Iehova ena anina be “Ia ese Ia Halaoa.” Unai ese ia hahedinaraia dahaka ai ia lao gwauraia be ia lao diba, iena ura ia hagugurua totona. Iehova be taunimanima bamona lasi, ma haida ese do idia koua garina dainai ena ura ia hunia lasi. Ia lusi diba lasi, unai dainai ena Hereva, Baibel, lalonai ia hahedinaraia goevagoeva dahaka do ia karaia. Ia gwauhamata: “Lau ese lau gwauraia hereva, . . . lau dekenai do ia giroa kava lasi. Lau siaia totona gaukarana be do ia karaia momokani.”—Isaia 55:11.
7 Gwau-edeede karana be Eden umana lalonai ia vara murinai, Iehova ese hereva kwadogina amo ia hahedinaraia gabeai dahaka do ia vara ia bona iena Inai Tauna, Satani, huanai ia vara hepapahuahu dekenai. Dirava ia gwauhamatalaia Garana ia abia berona ta ese ia hahisia to ia haorea lasi, to Satani do ia abia berona ese ia do ia haorea vaitani. (Genese 3:15, NW) Lagani 33 C.E. ai, Diabolo ese Garana, Iesu Keriso, ia haberoa, Iesu ena mase havaraia karana amo. Unai dala amo Satani ese peroveta herevadia ia hagugurua bona Iehova be hereva momokani Diravana ia hamomokania, herevana unai be Satani ena ura lasi. Ia ese hereva momokani bona kara maoromaoro ia inai henia, ia hekokoroku, bona ia helalo-kerehai lasi dainai, Dirava ia peroveta vadaeni karadia ia karaia. Oibe, hereva momokani idia dagedage henia taudia ibounai, Satani danu, dekenai inai hereva be momokani: “Ita be hegeregere lasi hereva momokani do ita hadikaia. Lasi momokani. Hereva momokani ita durua diba sibona.”—2 Korinto 13:8.
8 Dirava ena Basileia, iseda matana amo ita itaia lasi Basileiana, ia haginia laganina 1914 ai ema bona hari, Apokalupo 12:12 be ia vara noho: “Guba e, bona guba lalonai noho taudia e! Unai kara dainai do umui moale bada! To tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” To, Satani ia diba ena nega ia kwadogi dainai, ena kara do ia haidaua, a? Lasi, badina ia ura lasi ia hahedinaraia ia kerere bona Iehova be hereva momokani Diravana bona Atai Herea Pavapava dainai ia sibona be hegeregere tomadiho abia totona. Ena be Diabolo ese unai gaudia ia diba, to ia ura lasi ia abia dae ia lusi vadaeni.
9 Keriso ia mai, Satani ena tanobada oromana do ia hahemaoro henia totona neganai, Iehova ia hahedinaraia goevagoeva dahaka do ia vara. (Mataio 24:29-31; 25:31-46) Iena Hereva ese tanobada ena lohia taudia edia hereva ia herevalaia, ia gwau: “Inai bamona hereva, ‘Maino bona gari lasi ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae! Rogorogo hahine ese mara ena hisihisi ia davaria haraga bamona unai hisihisi be do ia ginidae.” (1 Tesalonika 5:3) Satani ena haheitalai idia badinaia taudia ese unai hadibaia hereva goevagoevana idia kamonai lasi. Edia kudou dikadia dainai idia matakepulu, bona unai dainai edia kara dika dalana bona Iehova ena ura hadikaia palanina idia rakatania lasi.
10 Lagani 1986, United Nations ese idia gwauraia Tanobada Ibounai Maino Laganina amo ema bona hari, tanobada dekenai maino bona gari lasi negana idia herevalaia momo. Taunimanima idia hekwarahi tanobada ai maino ia noho totona, bona nega haida idia kwalimu. Tesalonika ena peroveta herevana ia guguru vadaeni a, eiava hadibaia herevana badana ma ta ese do ia hagugurua momokani? Iehova be ena nega korikorina ai unai do ia hahedinaraia. Hari, gau badana be lauma dalanai ita noga noho, bona ‘Dirava ena Dina do ita naria noho.’ (2 Petero 3:12) Nega ia heau noho bona maino bona noho namona idia herevalaia noho lalonai, reana unai hereva idia diba, to idia dadaraia taudia haida ese edia lalona do idia hadaia Iehova ese ena hereva do ia hagugurua lasi, eiava ia hagugurua diba lasi. (Hadibaia Tauna 8:11-13 itaia; 2 Petero 3:3, 4.) To Keristani momokani taudia idia diba Iehova ese ena ura do ia hagugurua!
Iehova Ia Gaukaralaia Oreadia Ita Matauraia
11 King Nebukanesa, Babulonia Basileiana lohia tauna, ese ia laloatao diba lasi nihi ta ia lalo-hekwarahilaia dainai, heduru ia noia. Iena pris taudia, toa bona hoa karadia idia karaia taudia danu ese unai nihi bona nihi ena anina idia gwauraia hedinarai diba lasi. To, Dirava ena hesiai tauna Daniela ese ia karaia diba, ena be ia gwau haraga unai nihi bona ena anina hahedinaraia be sibona ena aonega dainai lasi. Daniela ia gwau: “Guba dekenai be Dirava ta ia noho, hunia gaudia ia hedinaraia diba. Ia ese vaira nega dekenai do idia vara gaudia be oi dekenai ia hedinaraia vadaeni.” (Daniela 2:1-30) Lagani handred haida gunanai, Iosepa, Dirava ena peroveta tauna ma ta, ese ia davaria Iehova be hehuni herevadia Hahedinaraia Tauna.—Genese 40:8-22; Amosa 3:7, 8.
12 Tanobada ai Iehova ia hesiai henia peroveta tauna badana be Iesu. (Kara 3:19-24) Paulo ia gwau: “Idaunegai Dirava ese dala idauidau momo dekena amo iseda sene taudia dekenai ia hereva henidia, peroveta taudia dekena amo. To inai dina dokodia neganai ia ese iena Natuna dekena amo ita ia hereva henia. Iena Natuna dekena amo Dirava ese tanobada ibounai ia karaia. Bona Dirava ese iena Natuna ia abia hidi, vadaeni inai nega dokona neganai, gau ibounai be ia ese ia biagua noho.”—Heberu 1:1, 2.
13 Iehova be Keristani taudia ginigunadia ia hereva henia iena Natuna, Iesu, amo; Dirava ena hehuni herevadia be idia dekenai ia hahedinaraia. Iesu ese ia hamaorodia: “Umui be lalona kehoa Dirava ese ia henia umui dekenai vadaeni, Dirava ena Basileia ena hunia herevadia do umui diba totona.” (Luka 8:10) Gabeai Paulo ese horoa Keristani taudia ia gwauraia “Keriso ena hesiai taudia, bona ai ese Dirava ena hunia hereva ai naria namonamo taudia.” (1 Korinto 4:1) Hari inai nega ai, horoa Keristani taudia ese unai gaukara idia karaia noho. Idia be hesiai tauna mai ena kamonai bona mai ena kara maoromaoro oreana ena Hakaua Oreana amo lauma aniani be nega korikori ai idia henia noho. (Mataio 24:45-47) Bema Dirava ena idaunegai peroveta taudia, Dirava ena Natuna danu, ita matauraia bada, namona be Iehova ia gaukaralaia tanobada oreana, inai nega dikana lalonai Baibel ena anina bada herevadia be ena taunimanima dekenai idia hahedinaraia taudia unai, ita matauraia bada danu, ani?—2 Timoteo 3:1-5, 13.
Hunia o Hunia Lasi?
14 Iehova be hunia gaudia ia gwauraia hedinarai dainai, ena anina be Keristani taudia be nega idauidau ibounai idia dibaia gaudia ibounai do idia gwauraia hedinarai, a? Keristani taudia ese Iesu ena sisiba ena aposetolo taudia dekenai idia badinaia, idia “aonega, gaigai bamona,” bona idia “dagedage lasi, pune manu bamona.” (Mataio 10:16) Bema ta ia gwau Keristani taudia edia lalona ena mamina hegeregerena Dirava do idia tomadiho henia diba lasi, idia ese ‘Dirava do idia kamonai henia noho,’ badina idia diba taunimanima edia oreadia ta be mai ena gwaumaoro lasi Iehova tomadiho henia karana koua totona. (Kara 5:29) Iesu ese unai hereva ena maoro ia hahedinaraia. Ita duahia: “Unai murinai Iesu be Galilea dekenai ia lao loaloa. Ia ura lasi Iudea dekenai ia lao, badina Iuda taudia ese ia idia alaia mase dalana idia tahua noho. Iuda taudia edia Au Raurau Ruma Maragidia aria dinana be ia kahirakahira. Vadaeni Iesu ia haere idia dekenai [ena abidadama lasi tadidia korikori unai], ia gwau, . . . ‘Umui be do umui daekau, unai aria dekenai do umui vareai, to lau be do lau daekau lasi, badina lauegu nega be do ia ginidae lasi.’ Ia ese unai bamona ia hereva idia dekenai, vadaeni Galilea dekenai ia do noho. Iesu ena tadina sibona idia daekau, aria totona idia lao. Gabeai Iesu danu ia daekau hunia dekenai.”—Ioane 7:1, 2, 6, 8-10.
Hamaoroa Eiava Hamaoroa Lasi?
15 Nega haida, gau ta hunia be aonega karana sibona lasi to ia be lalokau karana danu. Hegeregere, Iosepa, Iesu ena ubua tamana, ese dahaka ia karaia ia davaria Maria be ia rogorogo neganai? Ita duahia: “Maria ena maoheni Iosepa be kara maoromaoro tauna, bona hahine dekenai hemarai henia karana ia ura lasi, unai dainai hunia dala dekenai ia negea gwauraia.” (Mataio 1:18, 19) Bema taunimanima vairanai ia karaia, unai be hebogahisi lasi karana!
16 Ma haida do idia hahemaraia o hahisia diba hehuni herevadia be gwaumaoro idia abia lasi taudia dekenai oi hahedinaraia lasi. Keristani elda taudia ese unai idia laloa noho, sisiba o heduru herevadia idia henia Keristani taudia ma haida dekenai, eiava Iehova idia kara dika henia bada taudia idia sisiba henia neganai danu. Baibel ia hedinarai dalanai idia karaia be gau badana; unai hekwakwanai lalonai idia noho lasi taudia dekenai unai sivarai ena hunia herevadia idia hamaoroa be namo lasi bona ia be lalokau lasi karana. Keristani kongregesen taudia ese elda taudia dekena amo hunia herevadia do idia tahua lasi, to elda edia maduna, hunia gaudia herevalaia lasi maduna unai, do idia matauraia. Aonega Herevadia 25:9 ia gwau: “Oiemu badibadinai tauna sibona danu, emui hepapahuahu do umui herevalaia hebou, bona tau ta dekenai, oiemu badibadinai tauna ena hunia hereva do oi hamaoroa lasi.”
17 Famili lalonai eiava turadia namodia bogaraginai unai hakaua herevana be maoro. Lalohadai kereredia bona hetura hadikaia karadia koua totona, gau haida oi herevalaia lasi be gau badana. “Lahara ese medu ia mailaia noho, bona hereva dikana ese badu ia havaraia noho.” (Aonega Herevadia 25:23) To momokani, Iehova bona ena hakaua hereva maoromaorodia ita badinaia dainai, bona kerere taudia ita lalokau henia danu dainai, nega haida tama sina, Keristani elda taudia, eiava unai gauna idia diba be maoro taudia ma haida dekenai hunia herevadia do ita hahedinaraia.a To kahirakahira nega ibounai, Keristani taudia ese ma haida edia hehuni herevadia do idia herevalaia lasi, to idia gimaia idia edia bamona.
18 Hereva dokona be, Keristani tauna ese Iehova ia tohotohoa dalana be, ia maoro neganai gau haida do ia hunia; nega maorona ai sibona, do ia herevalaia. Edena gaudia do ia herevalaia bona edena do ia herevalaia lasi ia abia hidi neganai, inai kara ese ia do idia hakaua: manau, abidadama, bona lalokau. Manau ese ta ena hekokoroku karana do ia koua, hegeregere ma haida ese ia do idia lalo-namo henia totona, ia diba gaudia ibounai do ia herevalaia lasi, eiava do ia gwauraia diba lasi hunia herevadia be idia dekenai do ia heagilaia lasi, idia ia hauraia totona. Iehova ena Hereva bona Keristani kongregesen ia abidadama henia dainai, Baibel ena hereva ia harorolaia, to do ia naria namonamo ena hamatamaia hereva be taunimanima habadua haraga lasi herevana. Oibe, lalokau dainai, Dirava idia abia isi bona taunimanima do idia hamauria herevadia ia hunia lasi. To ia diba nega momo ma haida edia hunia herevadia do ia gwauraia hedinarai diba lasi, badina unai be lalokau lasi karana.
19 Unai laloa namonamo karana be Keristani momokani taudia edia toana ta. Dirava ena kara toana korikorina bona ladana korikorina idia hunia lasi Toi Tamona ena daradara havaraia hahediba herevana ta amo. Tomadiho koikoi oreadia edia toana be edia dirava idauidau idia diba namonamo lasi, to tomadiho momokanina be idau. (Kara 17:22, 23 itaia.) Iehova ena horoa Witness taudia be ‘Dirava ena hunia hereva naria namonamo taudia,’ bona unai hahenamo idia laloa bada. Unai hunia herevadia be ma haida dekenai idia hahedinaraia goevagoeva neganai, kudou namo taudia idia durua Iehova ena tura henia karana idia tahua totona.—1 Korinto 4:1; 14:22-25; Sekaraia 8:23; Malaki 3:18.
[Footnotes]
a “Do Not Share in the Sins of Others” herevana be The Watchtower, November 15, 1985 gauna, ai oi itaia.
Edena Bamona Do Oi Haere?
◻ Dahaka dainai Iehova be ena ura ia hunia lasi?
◻ Iehova be daika dekenai ena hunia gaudia ia hahedinaraia?
◻ Keristani taudia ese ma haida edia hunia herevadia idia diba neganai, edia maduna be dahaka?
◻ Edena kara toi ese Keristani taudia do idia durua, dahaka do idia herevalaia bona dahaka do idia herevalaia lasi abia hidi totona?
[Study Questions]
1, 2. (a) Iehova be edena dala ai ena Inai Tauna badana amo ia idau? (b) Tanobada taudia be edena dala ai unai idau idia hahedinaraia?
3. Dahaka ita gwau diba bema taunimanima haida idia gwau Iehova ena Witness ai idia lao taudia be ma haida ese idia fosia dainai “hehuni orena” ai idia vareai?
4. Abidadama Keristani taudia ese dahaka gauna idia lalo-hekwarahilaia lasi, bona dahaka dainai?
5. Dahaka dainai ita diba Iehova bona Iesu ese taunimanima idia lalokau henia, bona edena dala ai unai lalokau idia hahedinaraia?
6. Dahaka dainai Iehova ese ena ura ia hunia lasi?
7. (a) Eden umana lalonai, Iehova be dahaka ia perovetalaia, bona edena dala ai Satani be Dirava ena hereva ia hamomokania? (b) Edena dala ai 2 Korinto 13:8 ena hereva be nega ibounai ia momokani?
8, 9. (a) Satani be dahaka ia diba, to unai diba dainai Iehova ena ura do ia guguru lasi, a? (b) Iehova idia dadaraia taudia be edena hadibaia herevana idia dadaraia, bona dahaka dainai?
10. (a) Tesalonika Ginigunana 5:3 be reana edena dala ai ia guguru vadaeni, to Iehova ena taunimanima be dahaka idia laloa be namo? (b) Nega vairai, dahaka dainai abidadama lasi taudia edia dagedage karana Dirava ena taunimanima dekenai do ia bada ia lao?
11. Daniela bona Iosepa idia davaria Iehova be edena bamona Tauna?
12, 13. (a) Dirava ena peroveta tauna badana be daika, bona dahaka dainai unai bamona oi haere? (b) Hari iseda nega ai, daidia be ‘Dirava ena hunia hereva idia naria namonamo taudia,’ bona edena bamona idia ita laloa be namo?
14. Keristani taudia be edena nega ai hunia dalanai edia gaukara idia karaia, unai amo daika ena haheitalai idia tohotohoa?
15. Iosepa be edena bamona ia hahedinaraia nega haida hehuni herevana hahedinaraia lasi be lalokau karana?
16. Elda taudia bona kongregesen ena memba taudia ibounai be ma haida edia hehuni herevadia idia diba neganai, edia maduna be dahaka?
17. Dahaka dainai Keristani taudia be nega momo hunia gaudia idia diba neganai, idia herevalaia lasi, to dahaka dainai nega haida idia herevalaia?
18. Edena Keristani karadia toi ese ita idia durua, edena gaudia do ita herevalaia bona edena gaudia do ita herevalaia lasi abia hidi totona?
19. Edena kara be Keristani momokani taudia edia toana ta, bona ia dainai dahaka ia vara?
[Picture on page 8]
Iehova ese ena Hereva amo hunia gaudia ia hahedinaraia