Basileia Haroro Ripoti
Iehova Ena Tiokratik Oreana Dekenai Heau Lao
IDAUNEGAI peroveta tauna Isaia be ena lalona amo ia gwau: “Kone dekenai noho taudia danu ese, Lohiabada, Israela ena Dirava do idia hanamoa bada.” (Isaia 24:15) Iehova ena Witness taudia idia itaia kone gabudia edia motumotu be taunimanima idia noholaia “tanobada ibounai” ena kahana, Iesu ia gwau ‘Basileia ena Sivarai Namona do idia harorolaia’ kahana ta unai.—Mataio 24:14; Mareko 13:10.
Marquesas Motumotudia be kilomita 1,400 bamona Tahiti ena notist kahana amo. Idia be gabu daudau ai idia noho South Pacific motumotudia, bona edia orea ladana idia gwauraia French Polynesia. Edia volcano tano ena namo be bada herea bona edia gabu be siahu bona medu gabuna dainai, unai motumotu dekenai tubutubu gaudia idia tubu namonamo. To, Marquesas motumotudia ai huahua idauna ta ia tubu noho. Mani Hiva Oa motumotu dekenai ruma bese ta ese Basileia ena sivarai idia abia dae sivaraina ita laloa.
Jean bona ena hahine, Nadine, be edia noho gabuna, Western Europe, ena taga maurina idia moalelaia lasi. Unai dainai edia lalona idia hadaia unai bisi bada herea maurina do idia rakatania bona mai edia natuna mero ida do idia lao Marquesas Motumotudia dekenai. Edia ruma matamatana, baubau amo idia karaia gauna, be gabu daudau ai ia noho kourana ta ai idia haginia. Edia dekena taudia dekenai idia lao totona, hora rua lalonai ororo mai ena dala aukadia do idia hanaia. Edia dekena hanuana mai ena doketa ta, sikuli, bona sitoa ena daudau be hora toi bema jipi motuka amo do idia heau.
Jean bona Nadine be tomadiho idia laloa bada lasi. To, idia be mauri ia hamatamaia dalana idia herevalaia. Nega momo, evolusen herevadia aukadia idia herevalaia. To unai hereva dekenai edia lalona ia hegeregere lasi.
Lagani 6 lalonai sibodia idia noho murinai, Iehova ena Witness taudia rua ese idia vadivadi henidia neganai idia hoa. Jean bona Nadine edia dekena hanua taudia edia amo unai Witness taudia ese idia edia noho gabuna idia dibaia. Idia herevahereva bena evolusen idia herevalaia. Idia ruaosi idia moale badina Witness taudia ese Life—How Did It Get Here? By Evolution or by Creation? bukana ena kopi ta idia abia lao; Iehova ena Witness taudia ese idia halasia bukana. Jean bona Nadine ese unai buka idia abia dainai idia moale badina mauri ia hamatamaia dalana ia herevalaia namonamo.
Daudau lasi murinai, Baibel stadi idia hamatamaia. Lagani toi lalonai idia goada idia lao. Idia lalo-parara kahirakahira tanobada ibounai be paradaiso ai do ia lao. Gabeai edia natudia be toi dainai ruma bese ia bada neganai, Keristani heboudia totona hora hani idia heau be hekwarahi bada gauna ta. To unai ese edia hebou lao henia karana ia koua lasi. Gabeai Jean bona Nadine ese Iehova dekenai edia mauri idia gwauhamatalaia bona bapatiso amo idia hahedinaraia. Unai gabu ena hanua badana ai hebouhebou idia karaia neganai idia bapatiso, bona unai neganai taunimanima 38 idia hebou!
Unai Basileia harorolaia taudia edia orea maragina durua totona, unai ruma bese ese edia ruma, gabu daudauna ai, be idia rakatania. Idia lao hanua ta, ena taunimanima be 1,000 bamona, bona hari Jean be unuseniai Iehova ena Witness taudia edia kongregesen ena hesiai tauna ta. Unai ruma bese, taga maurina idia rakatania bona motumotu dekenai idia lao ruma besena, idia gwau hahemauri gabuna momokanina tamona, Iehova ena tiokratik oreana, idia davaria be hahenamo ta.