Ita be Abidadama Taudia
Fiji Motumotuna Dekenai Dirava Ena Basileia Idia Harorolaia
IESU KERISO be nega ta dala rua ia herevalaia. Dala ta be lababa herea bona mase gabuna ia lao henia. Dala iharuana be ia maragi, to mauri gabuna ia lao henia. (Mataio 7:13, 14) Taunimanima be dala maorona idia abia hidi totona, Iehova Dirava ia ura tanobada hegegemadai Basileia ena sivarai namona idia harorolaia. (Mataio 24:14) Unai dainai, tanobada ibounai dekenai taunimanima ese Basileia ena sivarai idia kamonai, bona haida be ‘abidadama taudia ai idia lao dainai, mauri’ idia abia hidi. (Heberu 10:39) Oi ai noia Fiji bona ia kahirakahira idia noho South Pacific motumotudia ma haida dekenai, mauri idia abia hidi taudia haida edia sivarai oi duahia totona.
Iehova Idia Abidadama Henia
Lagani 1964 ai, Mere be ia sikuli noho neganai, nega ginigunana Basileia ena sivarai ia kamonai. Motumotu daudauna dekenai ia noho dainai, Iehova ena Witnes taudia ia davaria be auka. To, gabeai Baibel ena diba maoromaoro ia abia. Unai negai, ia adavaia tauna be ena hanua ena iduhu kwarana ta. Mere be Baibel ena hakaua herevadia badinaia karana ia abia hidi dainai, iena adavana bona adavana ena varavara ese idia dagedage henia, bona hanua taudia ese idia dadaraia. To, lagani 1991 ai, bapatiso ia abia.
Nega daudau lasi murinai, Mere ena adavana, Josua, ese ena lalona ia hamanaua, bona Mere bona edia natudia edia Baibel herevalaia karana lalonai ia helai vareai matamaia. Bena Josua be Metodis Dubu ia lao henia karana ia hadokoa. To, ia be lohia tauna ta dainai, pura iboudiai idia karaia hanua heboudia ia gunalaia. Fiji hanua taudia edia mauri lalonai, Metodis Dubu be mai anina bada, to idia itaia Josua be unai ia badinaia noho lasi. Unai dainai, hanua ena pasto tauna ese Josua ia hamaoroa iena tomadiho gunana ia lou henia totona.
Josua be mai gari lasi ida ia gwau, ia bona ena ruma bese taudia be edia ura idia abia hidi bona edia lalona idia hadaia “lauma bona momokani” ai Iehova Dirava do idia tomadiho henia. (Ioane 4:24) Hanua ena hebou ta lalonai, lohia tauna badana ese Josua bona iena ruma bese taudia ia hamaorodia hanua do idia rakatania. Dina 7 idia henia motumotu bona edia ruma, tano, bona uma aniani—oibe, edia mauri dalana ibounai—do idia rakatania.
To, ma motumotu ta amo Josua bona iena ruma bese taudia be heduru idia abia, edia lauma tadikakadia ese tano ta idia henia, edia noho gabuna bona uma idia karaia diba totona. Hari, Josua bona iena natuna mero roboana be idia bapatiso vadaeni, bona natuna merona ma ta be sivarai namona ia harorolaia bapatiso lasi pablisa ta. Vanegai, Mere be regula painia (Basileia ia harorolaia hanaihanai tauna) ena gaukara ia hamatamaia. Iehova tomadiho henia karana idia abia hidi dainai, dagi bada bona kohu idia haboioa, to aposetolo Paulo bamona, idia laloa idia abia gauna ese idia haboioa gauna ia hanaia momokani.—Filipi 3:8.
Lalona Ena Mamina be mai Anina Bada Oi Abia Hidi Gauna Dekenai
Baibel amo ita hadibaia lalona ena mamina ita badinaia totona, abidadama bona haheauka be mai anina bada. Kiribati ena motumotu ta ladana Tarawa ai, bapatiso matamata hahinena ena ladana Suraang dekenai unai be momokani. Hospital dekenai, Suraang be sista gaukara ia karaia bona gwaumaoro ia noia gaukara haida do ia karaia lasi. To, iena noinoi idia moalelaia lasi, unai dainai motumotu daudauna ta ena hospital maragina ta dekenai idia siaia lao, iena abidadama tamona taudia amo ia daudau unai.
Unai motumotu dekenai, kastom ta be nega ginigunana hanua idia vadivadi henia taudia ibounai be hanua ena “lauma” dekenai boubou gaudia do idia henia. Taunimanima idia laloa, unai kara ia karaia lasi tauna be do ia mase. Suraang ia ura lasi ia bona ia idia bamoa taudia totona unai kaivakuku tomadiho henia karana idia karaia dainai, hanua taudia idia naria, badu laumana ese Suraang do ia hamasea totona. To, Suraang eiava ia idia bamona taudia dekenai dika ta ia vara lasi neganai, dala momo idia kehoa ia haroro totona.
To, Suraang ena hahetoho ia doko lasi. Unai motumotu ena tatau matamata haida idia laloa, vadivadi hahinedia edia lalona idia veria diba be kara badana ta. To, Suraang ese edia lalona veria karana ia dadaraia vaitani bona Dirava dekenai ia kara maoromaoro noho. Momokani, herevana sista gaukara be dina ena hora 24 lalonai ia karaia, to regula painia gaukara ia karaia diba.
Suraang ese unai motumotu do ia rakatania dainai aria ta idia karaia gwauraia neganai, hanua tau badadia idia gwau, ia be idia ia vadivadi henia misinari korikori hahinena ginigunana. Baibel ena hakaua herevadia ia badinaia goadagoada dainai, unai motumotu dekenai haida ese Basileia ena sivarai idia abia dae.
Tauanina Dalanai Idia Vara Hekwakwanai
Hanua haida be daudau herea dainai, anina be Iehova ena taunimanima be haroro gaukara idia karaia bona Keristani hebou idia lao henia totona idia hekwarahi bada. Mani Witnes bapatiso taudia hani—tau ta bona hahine toi—edia haheitalai ita laloa, idia be hora momo idia haorea hebou idia lao henia bona giroa lou totona. Idia lao bona giroa lou lalonai, sinavai toi idia hanaia. To, sinavai ena ranu ia bada daekau neganai, tadikaka be ia nahu hanai guna, bona edia baegae, buka bona hebou dabuadia be uro badana ta lalonai ia abia hanai. Bena ma ia nahu giroa lou, bona taihu toi ia durua.
Kiribati ena motumotu daudauna ta ladana Nonouti dekenai, hebou idia lao henia grup ma ta danu be hekwakwanai idauna ta ia davaria. Hebou idia karaia rumana dekenai be taunimanima 7 eiava 8 sibona idia helai diba. Unai dainai, hebou idia mai taudia haida be murimuri dekenai idia helai bona waea amo idia karaia haba murimurina amo hebou idia itaia diba. Unai hebou gabuna ia hedinarai momokani dainai, hanua taudia be edia dubu mai hairaidia idia lao henia bona idia giroa lou neganai idia itaia. Oibe, Iehova ena hesiai taudia idia lalo-parara, Dirava ena vairana ai ruma lasi, to taunimanima be kohu namodia momokani. (Hagai 2:7) Unai motumotu dekenai bapatiso ia abia taihu tamona be ia buruka bona gabu daudau ia raka diba lasi. To, hahine matamata ta, bapatiso lasi pablisa ta, ese haroro gaukara ai ia durua, bona patapata ta mai ena uili rua dekenai ia toia loaloa. Hereva momokani idia laloa bada karana idia hahedinaraia unai!
Fiji dekenai, pablisa taudia 2,100 mai kahana be edia lalona idia hadaia vadaeni Dirava ena Basileia ena sivarai namona do idia harorolaia noho. Bona idia diba momokani taunimanima ma haida danu “be abidadama taudia” ai do idia lao bona “mauri do [idia] abia.”
[Map on page 8]
(For fully formatted text, see publication)
Australia
Fiji