Iehova Ena Siahu be Taunimanima Edia Manoka amo Ia Hedinarai Badabada

“Taunimanima ibounai idia laloa lau be ful-taim hesiai tauna mai egu moale bona goada. Mai edia hekwakwanai taudia be lau ese lau durudia. To, unai nega tamona lalonai danu, egu hemami be egu lalona ai lau mase bamona. Lalo-metau bona lalo-hekwarahi ese lau idia hahisia. Lau mamia matamaia lau be taunimanima edia amo lau siri vadaeni. Egu ura tamona be ruma dekenai do lau hekure sibona. Hua momo lalodiai, Iehova lau noia do lau mase totona.”​—⁠Vanessa.

ATAIAI ai torea sivaraina hegeregerena, vaia nega haida Iehova ena hesiai taudia be inai “metau dikadia momo” negana ai ita noho ena hisihisi do idia mamia. (2 Timoteo 3:⁠1) Haida be reana do idia lalo-metau. (Filipi 2:​25-​27) Bema lalo-manoka mamina ia noho daudau, iseda goada ia haorea diba, badina Baibel ia gwau: “Bema hekwakwanai neganai oi manoka neganai, oiemu goada be maragimaragi momokani.” (Aonega Herevadia 24:10) Oibe, ita lalo-manoka neganai, siahu ita abia be namo​—⁠reana aposetolo Paulo ese ia gwauraia “siahu badana” unai.​—⁠2 Korinto 4:⁠7.

Iehova Dirava be ia ore diba lasi siahuna ena badina. Ia karaia gaudia ita itaia neganai unai idia hahedinaraia. (Roma 1:​20) Mani dina ita laloa. Tanobada ese dina amo ia mai siahuna 240 trilioni horsepower ia abia loulou noho. To, bema dina ena siahu ibounai ita haria kahana maragidia bilioni dekenai, unai namba be unai kahana maragina tamona ena kahana ta sibona. Bona dina danu be maragi momokani bema hisiu badadia ida ita hahegeregerea neganai. Idia ta be Rigel, Orion hisiu oreana lalonai. Unai hisiu ese dina ena bada be nega 50 amo ia hanaia bona dina ena siahu be nega 150,000 amo ia hanaia!

Unai guba ena siahu bada gaudia Havaraia Tauna ena “siahu be bada herea” momokani. (Isaia 40:26; Salamo 8:​3, 4) Momokani, peroveta tauna Isaia ia gwau Iehova be ia “manoka o hesiku diba lasi.” Bona Dirava ia ura iena siahu be, taunimanima edia manoka dainai, ia hesiku tauna do ia henia. (Isaia 40:​28, 29) Ia karaia dalana be aposetolo Paulo ena sivarai ese ia hahedinaraia.

Hekwakwanai Haheaukalaia

Paulo ese Korinto taudia dekenai ia haheaukalaia hekwakwanai ta ia gwauraia. Ia ese ia gwauraia “ginigini ta.” (2 Korinto 12:⁠7) Reana unai “ginigini” be tauanina gorerena ta, reana ia itaia namonamo lasi. (Galatia 4:​15; 6:​11) Eiava Paulo be reana iena aposetolo dagina bona gaukara idia hepapahuahulaia aposetolo koikoidia bona maumau taudia ma haida ia herevalaia. (2 Korinto 11:​5, 6, 12-​15; Galatia 1:​6-9; 5:​12) Herevana unai “ginigini” be dahaka, to Paulo ia hahisia bada, bona ia guriguri loulou do ia ore totona.​—⁠2 Korinto 12:⁠8.

To, Iehova ese Paulo ia noia karana ia karaia lasi. To, Paulo ia hamaoroa: “Lauegu hariharibada be oi dekenai ia hegeregere momokani vadaeni.” (2 Korinto 12:⁠9) Iehova ena hereva anina be dahaka? Bema Paulo ese guna Keristani taudia ia hahisia karana ita laloa neganai, ita itaia Iehova ena hariharibada karana sibona amo Paulo be Dirava ida ia turana diba​—⁠ma danu aposetolo dagi ai hesiai gaukara ia karaia!a (Sekaraia 2:8; Apokalupo 16:​5, 6 itaia danu.) Reana Iehova ese Paulo ia hadibaia Iena hahediba tauna ai ia lao hahenamona be “hegeregere momokani vadaeni.” Unai hahenamo ia henia neganai, hoa dalanai sibona ena mauri hekwakwanaidia ia kokia lasi. Momokani, hekwakwanai haida do idia vara hahenamo ma haida ia abia dainai. (2 Korinto 11:​24-​27; 2 Timoteo 3:​12) Dala badana tamona be Paulo ese ena “ginigini” do ia haheaukalaia sibona.

Iehova ese unai dala amo Paulo ia dadaraia lasi mai ena hebogahisi lasi ida. Lasi, to ia hamaoroa, ia gwau: “Lauegu siahu be manokamanoka tauna lalonai ia hedinarai momokani.” (2 Korinto 12:⁠9) Oibe, Iehova ese mai ena lalokau ida Paulo dekenai goada do ia henia iena hisihisi do ia haheaukalaia totona. Unai amo, Paulo ena “ginigini” be hadibaia gauna ta ai ia lao. Ia hadibaia Iehova ena goada dekenai do ia tabekau, ia sibona ena goada dekenai lasi. Paulo be unai ia dibaia namonamo, badina be lagani haida murinai Filipi taudia ia tore henidia, ia gwau: “Lauegu ogogami lau maumauraia lasi, badina be lau manada vadaeni. Bona lau dekenai ia noho gauna dekenai lau moale vadaeni. Keriso ese lau ia hasiahua, vadaeni gau ibounai lau goadalaia diba.”​—⁠Filipi 4:​11, 13.

Oi be edena bamona? “Ginigini” bamona gauna ta oi haheaukalaia noho a, reana gorere ta eiava emu mauri lalonai lalo-hekwarahi ia havaraia gauna ta, a? Bema oi dekenai unai be momokani, oi lalo-metau lasi. Reana Iehova ese hoa dalanai oiemu hisihisi do ia kokia lasi, to aonega bona lalo-goada do ia henia oi haheaukalaia totona, emu mauri lalonai Basileia oi atoa guna lalonai.​—⁠Mataio 6:⁠33.

Bema gorere eiava buruka ese oi ia koua dainai Keristani gaukara lalonai oi ura karaia gaudia oi hagugurua lasi, oi lalohisihisi lasi. Oi laloa lasi oiemu hekwakwanai ese Iehova hesiai henia dalana ia koua, to namona be oi laloa ia be oiemu tabekau karana ia dekenai oi habadaia dalana ta ia hedinarai. Oi laloatao danu, Keristani tauna ena namo be iena gaukara ena bada amo ita hahetohoa diba lasi, to ena abidadama bona ena lalokau ena dobu amo. (Mareko 12:​41-​44 itaia.) Iehova oi lalokau henia mai emu lalona ibounai ida ena anina be oiemu goada ena bada hegeregerena amo ia oi hesiai henia​—⁠ma ta ena amo lasi.​—⁠Mataio 22:37; Galatia 6:​4, 5.

Bema oiemu “ginigini” be emu mauri lalonai lalohisihisi gauna ta ia vara, hegeregere oiemu lalokau tauna ta ia mase, Baibel ena hagoadaia sisibana oi badinaia: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” (Salamo 55:22) Keristani hahinena ta ladana Sylvia be unai bamona ia karaia. Lagani haida sibona lalodiai, ena adavana ia mase lagani 50 idia headava murinai bona ena ruma bese taudia 9 danu idia mase​—⁠ena tubuna maragidia rua danu. Sylvia ia gwau: “Bema Iehova ese lau ia durua lasi, egu lalohisihisi do lau biagua diba lasi. To guriguri amo goada lau abia. Egu herevahereva karana Iehova ida lau hadokoa lasi. Lau diba ia ese lau dekenai goada ia henia lau haheauka totona.”

Ita diba “durua ibounai ia henia Diravana” ese idia lalohisihisi taudia dekenai siahu ia henia diba dainai ita lalo-goada momokani! (2 Korinto 1:⁠3; 1 Tesalonika 4:​13) Unai ita abia dae dainai, Paulo ena hereva dokona ita lalo-pararalaia. Ia gwau: “Unai dainai Keriso dainai lau gaukara lalonai, bema lau manoka, o haida ese lau idia hadikaia, o metau, o hisihisi, o dagedage, o hekwarahi lau davaria neganai do lau moalelaia. Badina be lau manoka neganai, unai be Dirava ena goada lau abia.”​—⁠2 Korinto 12:⁠10.

Goevadae Lasi Maurina Haheaukalaia

Ita ibounai be goevadae lasi maurina ita abia hanai iseda tamana bona sinana ginigunadia edia amo. (Roma 5:​12) Unai dainai ita be iseda tauanina ena ura dikadia ita tuari henia noho. Bema ita laloa “mauri gunana” do ita negea vaitani to ita davaria ena kara haida ese ita ia do veria noho, do ita lalo-manoka diba! (Efeso 4:​22-24) Unai bamona negadia ai, iseda mamina be aposetolo Paulo ena bamona, ia gwau: “Momokani, egu kudouna be Dirava ena Taravatu dekenai ia moale bada. To lau davaria, egu lalona dekenai taravatu idauna ta ia gaukara noho. Inai taravatu ese egu lalona ia ura henia Taravatuna ia tuari henia noho. Vadaeni inai taravatu, egu lalona dekenai kara dika ia havaraia gauna ese lau ia guia noho.”​—⁠Roma 7:​22, 23.

Unai neganai danu, Iehova ena siahu ita tahua diba. Bema oi sibona emu manoka gauna ta oi hekwarahilaia noho, Iehova guriguri henia karana oi hadokoa lasi, mai emu momokani ida oi noia emu dika ia gwauatao totona, herevana unai hekwakwanai tamona dainai do oi hereva henia loulou. Iehova be “oiemu lalona gaudia ia tohoa noho” bona oiemu ura korikori ia itaia diba Diravana, ena hariharibada dainai, oi do ia durua lalona goevana oi abia totona. (Aonega Herevadia 21:⁠2) Iena lauma helaga amo, Iehova ese oi dekenai goada ia henia diba emu tauanina ena manoka gaudia oi hanaia totona.​—⁠Luka 11:⁠13.

Ma haida edia goevadae lasi karadia ita haheaukalaia totona Iehova ena amo goada ita abia be namo. Hegeregere, Keristani tadikaka ta ese reana mai laloa namonamo lasi ida ita ia hereva henia “tuari kaia ia gwadaia noho bamona.” (Aonega Herevadia 12:18) Bema ita laloa ia gwauraia tauna be ia diba ena kara be kerere to ia karaia neganai, unai ese ita do ia hahisia bada. Reana do ita lalohisihisi momokani. Haida be unai lalohisihisi karana dainai Iehova idia rakatania​—⁠kerere bada hereana unai!

To laloa namonamo karana ese ita do ia durua dala maorona ai haida edia manoka karadia ita laloa totona. Goevadae lasi taudia edia amo kara goevadaedia ita tahua diba lasi. Aonega tauna Solomona ese ita ia hadibaia “dika ia karaia lasi tauna ta be lasi.” (1 King Taudia 8:​46) Lagani 70 lalodiai mai ena kamonai ida Iehova ena hesiai ia lao henia horoa Keristani tauna ta, Arthur, ia gwau: “Iseda hesiai tadikakadia edia manoka gaudia be dala ia kehoa iseda lalo-maoromaoro ita hamomokania totona, bona iseda Keristani gini goada karana ia tohoa. Bema taunimanima edia hereva eiava kara ese Iehova ena hesiai ita lao henia karana ia hadikaia, ita be taunimanima edia hesiai ita lao henia noho. Bona, iseda tadikaka be Iehova idia lalokau henia danu. Bema idia edia kara namodia ita tahua, do ita davaria ena be idia be mai edia manoka gaudia to idia be taunimanima dikadia lasi.”

Haroro Siahuna

Iesu be guba dekenai ia do daekau lasi neganai, ena hahediba taudia ia hamaorodia ia gwau: “To, umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.”​—⁠Kara 1:⁠8.

Iesu ena hereva hegeregerena, hari inai negai Iehova ena Witness taudia ese unai gaukara idia karaia noho tanobada hegegemadai, tano ibounai 233 lalonai. Lagani ta ta ai idia iboudiai ese hora bilioni ta mai kahana idia haorea ma haida idia durua Iehova idia diba totona. Nega haida unai gaukara karaia be mai ena hekwarahi. Tano haida dekenai Basileia harorolaia gaukarana idia taravatua o idia koua. Unai gaukara karaia taudia mani oi laloa danu​—⁠idia be manoka bona goevadae lasi taudia, ta ta be mai ena hekwakwanai bona lalo-hekwarahi danu. To unai gaukara ia heau noho, unai dainai, idia hanaia lagani toi lalodiai, taunimanima milioni ta mai kahana ese edia mauri idia gwauhamatalaia bona ranu bapatiso amo idia hamomokania. (Mataio 28:​18-​20) Momokani, inai gaukara be Iehova ena goada sibona amo idia hagugurua noho. Iehova ese peroveta tauna Sekaraia amo ia gwau: “Goada dekena amo lasi, bona siahu dekena amo lasi, to egu Lauma dekena amo do oi kwalimu.”​—⁠Sekaraia 4:⁠6.

Bema oi be sivarai namona harorolaia tauna ta, oi be kahana ta oi karaia​—⁠herevana ena toana be maragi​—⁠unai gaukara hagugurua karana badana lalonai. Ena be “ginigini” momo do oi haheaukalaia, to oi abia dae momokani diba Iehova ese iena ladana dekenai oi karaia “kara namodia do ia laloaboio lasi,” bona ia laloaboio lasi oi ese oi “lalokau henia.” (Heberu 6:10) Unai dainai heduru abia totona siahu ibounai Havaraia Tauna dekenai oi tabekau noho. Oi laloatao, Iehova ena goada sibona amo do ita haheauka diba; iena siahu be iseda manoka amo ia hahedinaraia goevagoeva.

[Footnotes]

[Picture on page 26]

Haroro gaukara ia guguru noho Iehova ena siahu sibona amo