Oi be mai Emu ‘Ginigini ta Oiemu Kopina Dekenai,’ A?
1 Ita ura dikadika ita abia gaukarana, sivarai namona ita harorolaia gaukarana, ita karaia namonamo sibona eda goada bona diba hegeregerena. To, iseda tadikaka bona taihu momo idia hekwarahi bada unai gaukara ibounai idia karaia totona, badina edia tauanina idia goada lasi eiava idia gorere dainai, idia ura karaia gaudia ibounai idia karaia diba lasi. Haroro gaukara idia karaia goadagoada taudia idia itaia neganai, reana edia lalo-hisihisi idia haheaukalaia be auka.—1 Kor. 9:16.
2 Ita Tohotohoa Haheitalai Ta: Aposetolo Paulo ese ‘ginigini ta ena kopina dekenai’ ia haheaukalaia. Ia ese nega toi Iehova ia noia ia ia hahisia bada gauna ia kokia. Ia gwau unai gauna be “Satani ena hesiai tauna bamona” iena kopina ia gwadaia noho. Ena be unai gauna ia noho, to Paulo ia haheauka bona ena hesiai gaukara ia karaia noho. Ia be sibona ia hebogahisi henia lasi eiava maumau momo tauna ai ia lao lasi. Iena goada ibounai ia henia. Ia haheauka mai kwalimu ida badina inai gwauhamata ia abia Dirava amo: “Lauegu hariharibada be oi dekenai ia hegeregere momokani vadaeni. Badina be lauegu siahu be manokamanoka tauna lalonai ia hedinarai momokani.” Paulo be iena hekwakwanai ia abia dae bona ia haheauka totona Iehova bona lauma helaga tabekau henia karana ia dibaia neganai, iena manoka be iena goada ai ia lao.—2 Kor. 12:7-10.
3 Oi Haheauka Diba Dalana: Oiemu tauanina ia manoka dainai, oi ia koua Dirava ena hesiai gaukara lalonai, a? Bema unai be momokani, namona be Paulo ena lalohadai oi tohotohoa. Ena be oiemu gorere eiava oi ia hahisia gauna be hari inai negai oi koua diba lasi, to Iehova oi abidadama henia vaitani diba, badina ia ese oiemu ura gaudia ia diba bona “siahu badana” do ia henia. (2 Kor. 4:7) Kongregesen lalonai ia noho heduru oi abia dae, sibona do oi noho be namo lasi. (Aon. 18:1) Bema oi davaria ruma-ta-ruma-ta gaukara karaia be auka oi dekenai, ma dala namodia oi tahua taunimanima haida oi haroro henia totona eiava telefon amo oi haroro.
4 Ena be ginigini ta emu kopina dekenai dainai hesiai gaukara ibounai oi karaia diba lasi, to namo lasi oi laloa oi be gau ta oi karaia lasi. Paulo hegeregerena, oi danu be ‘Dirava ena hariharibada Sivarai Namona do oi gwauraia hedinarai’ diba, emu goada bona emu noho dalana hegeregerena. (Kara 20:24) Oiemu hesiai gaukara oi karaia totona oi hekwarahi bada neganai, namona be oi diba Iehova ia moale bada.—Heb. 6:10.