“Ginigini ta” Oi Haheaukalaia
“Lauegu hariharibada be oi dekenai ia hegeregere momokani vadaeni.”—2 KORINTO 12:9.
1, 2. (a) Hahetoho bona hekwakwanai idauidau ita davaria neganai dahaka dainai ita daradara lasi be namo? (b) Dahaka dainai ita diba momokani hahetoho idauidau lalonai do ita gini goada diba?
“KERISO IESU danu idia hakapua dainai, Dirava badinaia idia ura taudia ibounai ese dagedage ena hisihisi do idia abia.” (2 Timoteo 3:12) Dahaka dainai? Badina Satani ia gwau taunimanima ese sibodia edia ura gaudia abia totona Dirava idia hesiai henia, bona ia ura momokani unai ia hamomokania. Nega ta Iesu ese ena kamonai aposetolo taudia ia hadibaia, ia gwau: “Satani ese gwaumaoro ia abia vadaeni, emui abidadama do ia tohoa, hegeregere uiti idia botaia, iena momoru kokia totona.” (Luka 22:31) Iesu ia diba, Satani ese hisihisi idia havaraia hekwakwanai amo ita ia tohoa karana be Dirava ese ia koua lasi. To momokani, ita gwau lasi mauri lalonai ita abia hekwakwanai ibounai be Satani eiava ena demoni amo idia mai. (Hadibaia Taudia 9:11) To Satani ia ura bada dala idauidau ibounai ia gaukaralaia, iseda abidadama ia hadikaia totona.
2 Baibel ese ita ia hamaoroa iseda hahetoho ita daradaralaia lasi be namo. Herevana dahaka ita davaria, ia be gau idauna lasi. (1 Petero 4:12) Oibe, iseda “Keristani varavara taudia tanobada kahana ibounai dekenai, be hisihisi inai bamona idia abia noho.” (1 Petero 5:9) Hari inai negai, Satani ese Dirava ena hesiai taudia ibounai dekenai metau bada ia atoa noho. Diabolo ia moale bema ia itaia ginigini bamona hekwakwanai momo ese ita idia hahisia. Unai ia karaia totona, ena tanobada ia gaukaralaia, iseda tauanina dekenai idia noho “ginigini” iboudiai edia hisihisi ia habadaia totona. (2 Korinto 12:7) To namo lasi Satani ena hahetoho idauidau ese iseda abidadama idia hadikaia. Hedibagani ita haheaukalaia totona Iehova ese “dala ta do ia kehoa” hegeregerena, ginigini bamona hekwakwanai ita davaria neganai unai bamona do ia karaia danu.—1 Korinto 10:13.
Ginigini Haheaukalaia Dalana
3. Paulo ese ena tauanina dekenai ia noho ginigini kokia totona Iehova ia noia neganai, ena haere be dahaka?
3 Aposetolo Paulo ese Dirava ia noia, ia dekenai ia noho ginigini ia kokia totona. “Nega toi Lohiabada dekenai lau guriguri, lau noia ia ese inai hisihisi do ia kokia.” Paulo ena noinoi dekenai Iehova ena haere be dahaka? “Lauegu hariharibada be oi dekenai ia hegeregere momokani vadaeni. Badina be lauegu siahu be manokamanoka tauna lalonai ia hedinarai momokani.” (2 Korinto 12:8, 9) Namona be unai haere ita tahua namonamo bona ita itaia edena bamona ita ia durua diba, ita idia hahisia ginigini bamona hekwakwanai ita haheaukalaia totona.
4. Edena dala idauidau ai Paulo ese Iehova ena hariharibada amo namo ia abia?
4 Mani oi itaia Dirava ese Paulo ia hagoadaia, Ia ese Keriso amo ia dekenai ia hahedinaraia vadaeni lalokauna ia laloa bada be namo. Momokani, Paulo be dala idauidau momo amo hahenamo ia abia. Ena be ia ese Iesu ena murinai idia raka taudia ia dagedage henia bada, to Iehova be mai lalokau ida ia dekenai dala ia kehoa, hahediba tauna ai ia lao totona. (Kara 7:58; 8:3; 9:1-4) Unai murinai Iehova be Paulo dekenai hesiai gaukara ena hahenamo idauidau ia henia. Unai amo ita dibaia gaudia be idia hedinarai goevagoeva. Nega dikadia ai danu, ita abia hahenamo momo dainai ita moale be namo. Namo lasi iseda hahetoho dainai Iehova ese ita dekenai ia hahedinaraia kara namodia ita laloaboio.—Salamo 31:19.
5, 6. (a) Edena dala ai Iehova ese Paulo ia hadibaia Iena “siahu be manokamanoka tauna lalonai ia hedinarai momokani”? (b) Edena dala ai Paulo ena haheitalai ese ia hamomokania Satani be koikoi tauna?
5 Iehova ena hariharibada be ma dala ta ai ia hegeregere danu. Dirava ena siahu be bada herea, ita ia durua namonamo diba, eda hahetoho ita haheaukalaia totona. (Efeso 3:20) Iehova ese Paulo ia hadibaia Iena “siahu be manokamanoka tauna lalonai ia hedinarai momokani.” Edena dala ai? Mai ena lalokau ida Paulo dekenai siahu ibounai ia henia, hahetoho ia haheaukalaia diba totona. Paulo ena haheauka bona Iehova abidadama henia momokani karana dainai, Keristani taudia ibounai idia itaia Dirava ena siahu be inai manoka bona kara dika tauna dekenai anina namona ia havaraia. Unai kara ena anina Diabolo dekenai mani oi laloa, ia gwau taunimanima ese Dirava idia hesiai henia bema edia mauri ia namo bona hekwakwanai be lasi. Paulo ena Dirava badinaia karana ese unai ladana hadikaia tauna ena vairana ia pataia bamona!
6 Guna, Paulo ese Satani ia durua Dirava ia tuari henia totona, Keristani taudia ia dagedage henia, ia be Farisea tauna goadana, bona kohu momo maurina ia moalelaia badina taga ruma besena lalonai ia vara. To hari Paulo ese Iehova bona Keriso ia hesiai henia bona ‘aposetolo ibounai ese ia idia hereaia.’ (1 Korinto 15:9) Mai manau ida Keristani ginigunadia edia nega lalonai ia noho hakaua oreana ena siahu henunai ia gaukara. Bona ena be ia be mai ena ginigini ta ena tauanina dekenai, to mai abidadama ida ia haheauka. Mauri ena hahetoho ese Paulo ena ura goadana idia hamaragia lasi, bona unai ese Satani ia habadua bada. Paulo ese ena helaro, Keriso ena guba Basileiana lalonai do ia noho, be ia laloaboio lasi. (2 Timoteo 2:12; 4:18) Hisihisi bada ia havaraia ginigini ta danu ese Paulo ena ura goadana ia hamaragia lasi. Namona be iseda ura danu ia goada noho! Hahetoho idauidau ai ita ia durua karana amo Iehova ese ita dekenai hahenamo badana ia henia, unai be ita hamomokania diba Satani be koikoi tauna.—Aonega Herevadia 27:11.
Iehova Ia Henia Gaudia be mai Anina Bada
7, 8. (a) Hari inai negai, Iehova ese ena hesiai taudia be dahaka amo ia hasiahua? (b) Dahaka dainai dina ta ta Baibel duahiduahi karana bona stadi be mai anina bada, ita dekenai ia noho ginigini ita haheaukalaia totona?
7 Hari inai negai, Iehova ese ena lauma helaga, ena Hereva, bona eda Keristani tadikaka oreana amo, abidadama Keristani taudia ia hagoadaia. Aposetolo Paulo hegeregerena, guriguri amo iseda hekwakwanai be Iehova dekenai ita gwauraia diba. (Salamo 55:22) Ena be Dirava ese iseda hahetoho ia kokidia lasi, to ita dekenai aonega ia henia diba hahetoho badadia danu, ita haheaukalaia totona. Iehova ese ita dekenai lalo-goada ia henia diba danu—ita dekenai “siahu badana” ia henia—ita haheauka totona.—2 Korinto 4:7.
8 Unai bamona heduru be edena dala ai ita abia diba? Namona be Dirava ena Hereva ita stadilaia goadagoada, badina unuseniai ena hagoadaia herevadia ita davaria. (Salamo 94:19) Dirava ena hesiai taudia ese iena heduru totona idia noinoi neganai idia gwauraia kudouna hamarerea herevadia be Baibel lalonai ita duahia. Nega momo Iehova ena haere idia dekenai be hagoadaia herevadia bona idia ita laloa dobu be namo. Stadi ese ita do ia hagoadaia bona unai amo ‘inai siahu badana be Dirava sibona dekena amo, ita dekena amo ia mai lasi.’ Iseda tauanina hagoadaia totona dina ibounai aniani ita ania hegeregerena, Dirava ena hereva amo sibona ita ubua hanaihanai be namo. Unai bamona ita karaia, a? Bema unai bamona ita karaia, unai “siahu badana” ese ita do ia durua, laulau dalanai ita idia hahisia noho ginigini ita haheaukalaia totona.
9. Elda taudia ese edena dala ai hekwakwanai idia haheaukalaia noho taudia idia durua diba?
9 Dirava idia gari henia Keristani elda taudia be hisihisi ena “lai koua gabuna” bamona, bona hekwakwanai edia “guba bada ia toa neganai hunia gabudia namodia hegeregere.” Idia ura unai Dirava ena lauma amo ia vara hereva bamona idia karaia elda taudia ese mai manau bona momokani ida Iehova idia noia, idia dekenai ‘dahaka do idia hereva ia hadibaia’ totona, unai amo hisihisi idia abia taudia dekenai hereva maorodia gwauraia dalana idia diba. Elda taudia edia hereva be medu namona bamona, mauri ena nega aukadia lalonai, iseda lalona idia hanamoa bona hagoadaia. Elda taudia ese ‘lalo-metau taudia idia gado namo henidia’ karana amo edia tauanina dekenai ia noho ginigini ta dainai idia hesiku eiava idia lalohisihisi tadikaka bona taihu idia durua momokani.—Isaia 32:2; 50:4; 1 Tesalonika 5:14, NW.
10, 11. Edena dala ai Dirava ena hesiai taudia ese hahetoho badadia idia davaria taudia idia hagoadaia diba?
10 Iehova ena hesiai taudia ibounai be iena Keristani ruma besena lalonai idia noho. Oibe, ita be “taunimanima mai iseda gaukara idauidau, to ita gaukara hebou,” bona ita be mai iseda maduna “ita ta ta dekenai do ita lalokau henia.” (Roma 12:5; 1 Ioane 4:11) Edena bamona unai maduna ita hagugurua diba? Petero Ginigunana 3:8 ena hereva hegeregerena, unai ita karaia diba bema iseda abidadama tamona taudia ‘ita lalokau henia, tadikaka bamona. Bona ita bogahisihisi henidia.’ Bona hisihisi bada ia havaraia ginigini idia haheaukalaia taudia, herevana idia be matamata eiava idia buruka, to ita ibounai ese idia dekenai hebogahisi ita hahedinaraia diba. Edena dala ai?
11 Namona be ita hekwarahi idia abia hisihisi ita mamia totona. Bema ita be mai eda hebogahisi lasi, hemami lasi, bona idia ita laloa lasi, reana edia hisihisi ita habadaia. Edia hahetoho ita diba dainai, ita gwauraia hereva, ita gwauraia dalana, bona iseda kara ita naria namonamo. Iseda lalohadai namona bona hagoadaia herevadia ese heduru idia henia, idia ia hahisia noho ginigini ena hisihisi ita hamaragia totona. Unai amo idia ita hagoadaia diba.—Kolose 4:11.
Haida be mai Kwalimu ida Idia Haheauka Dalana
12-14. (a) Keristani ta ese dahaka ia karaia kensa gorerena ia haheaukalaia totona? (b) Unai taihu ena lauma tadikaka bona taihu ese edena bamona ia idia durua bona hagoadaia?
12 Dina gabedia ena dokona ia kahirakahira lalonai, dina ta ta ai “hisihisi” ia bada ia lao. (Mataio 24:8) Unai dainai, hahetoho ese tanobada ai idia noho taudia ibounai do idia hahisia, bona Iehova ena abidadama hesiai taudia, iena ura idia karaia taudia, ese hisihisi momo do idia davaria. Hegeregere, ful-taim hesiai gaukara ia karaia Keristani taihu ta mani oi laloa. Ia be kensa gorerena ia abia bona ia dekenai opereisen idia karaia, ena kanudi havaraia gland bona gland ma haida idia kokia totona. Ia bona ena adavana be ena gorere idia diba neganai, maoromaoro mai momokani ida nega daudau lalonai Iehova idia guriguri henia. Gabeai ia gwau maino bada ena mamina idia abia. To, nega dikadia ia haheaukalaia, bona ia abia muramura ese ia havaraia dika idauidau idia auka.
13 Iena hekwakwanai durua totona, unai taihu ese kensa gorerena dekenai hereva haida ia tahua, bona gau momo ia dibaia. Iena doketa taudia ia itaia. Gima Kohorona bona Awake!, bona Keristani bukadia ma haida lalonai, unai gorere idia haheaukalaia taudia haida edia sivarai ia davaria. Bona Iehova ese nega aukadia lalonai ena taunimanima ia durua Baibel siri namodia ia itaia, bona heduru herevadia ma haida danu.
14 Hereva ta ese lalo-metau haheaukalaia karana dekenai inai aonega herevana ia gwauraia: “Ia sibona ia noho, turana lasi tauna, ese sibona ena ura mo ia tahua noho.” (Aonega Herevadia 18:1) Unai dainai unai hereva ese inai sisiba ia henia: “Sibona noho karana dadaraia.”a Unai taihu ia gwau: “Momo ese lau idia hamaoroa lau totona idia guriguri; ma haida ese lau idia ringi henia. Elda taudia rua idia mai hanaihanai, lau idia itaia totona. Flaoaflaoa bona kadi momo herea lau abia. Haida ese aniani idia hegaegaelaia. Danu, momo be lau idia abia lao, egu muramura lau abia totona.”
15-17. (a) Keristani taihu ta be aksiden amo ia abia metau idauidau be edena bamona ia haheaukalaia? (b) Kongregesen lalonai idia noho taudia ese dahaka heduru idia henia?
15 New Mexico, U.S.A. ai, nega daudau lalonai Iehova ia hesiai henia hahinena ta be nega rua motuka dekenai aksiden ia abia. Iena aiona bona pagana ia haberoa, bona unai ese lagani 25 lalonai ia haheaukalaia arthritis gorerena ia habadaia. Ia gwau: “Lau hekwarahi bada egu kwarana lau abia isi bona edia metau be kilogram rua ia hanaia gaudia lau huaia totona. To Iehova guriguri henia goadagoada karana ese lau ia durua bada. Gima Kohorona dekenai ita stadilaia herevadia danu ese lau idia durua. Stadi herevana ta ese Mika 6:8 ia gwauraia, ia gwau mai manau danu Dirava ida raka karana ena anina be ta ese ena hetoana ia diba. Unai ese lau ia durua dainai lau abia dae, ena be lau gorere, bona haroro gaukara dekenai lau gaukaralaia nega be ia bada lasi, to namo lasi lau lalo-manoka. Mai ura namona ida ia ita hesiai henia be mai anina bada.”
16 Ia gwau danu: “Elda taudia be nega momo lau idia hanamoa badina hebou dekenai lau lao bona haroro gaukara karaia totona lau hekwarahi. Matamata taudia ese lau idia hanamoa neganai, idia rosia danu. Painia taudia ese egu kara idia haheaukalaia bona lau gorere bada negadiai, nega momo edia sediual idia haidaua. Medu bada bona keru negadiai, lau idia hakaua lao edia lou henia dekenai eiava lau idia boiria, edia Baibel stadi dekenai do lau helai. Bona haroro gaukara totona lau lao negadiai, egu buka baege lau huaia diba lasi dainai, pablisa ma haida ese egu buka bona magasin be edia baege lalonai idia udaia.”
17 Kongregesen ena elda taudia bona tadikaka bona taihu be unai taihu rua ese edia ginigini bamona gorere idia haheaukalaia totona idia durua daladia mani oi laloa. Mai hebogahisi ida heduru idia henia unai taihu rua be lauma, tauanina, bona hemami dalanai idia durua totona. Unai ese oi ia hagoadaia hekwakwanai idia davaria noho tadikaka bona taihu dekenai heduru do oi henia totona, ani? Umui matamata taudia danu ese emui kongregesen lalonai edia tauanina dekenai ginigini idia hekwarahilaia taudia umui durua diba.—Aonega Herevadia 20:29.
18. Gima Kohorona bona Awake! magasin lalonai idia halasia mauri sivaraidia be edena bamona ita idia hagoadaia?
18 Gima Kohorona bona Awake! magasin ese mauri ena hekwakwanai idia haheaukalaia vadaeni, bona idia do haheaukalaia noho, Witnes taudia edia mauri sivarai bona ekspiriens momo idia halasia. Hanaihanai unai bamona sivarai oi duahia neganai, do oi itaia emu tadikaka bona taihu momo tanobada hegegemadai ese moni ena hekwakwanai, idia vara kava dika dekenai edia lalokau taudia idia mase, bona tuari, idia haheaukalaia. Ma haida be mai edia gorere danu idia noho. Momo ese mauri lalonai gorere lasi taudia ese idia karaia gau maragidia danu idia karaia diba lasi. Idia ura bada Keristani gaukara idia karaia badabada, to unai bamona idia karaia lasi neganai, edia gorere ese idia ia tohoa bada. Edia tadikaka bona taihu, herevana idia be matamata eiava buruka, ese idia dekenai idia henia heduru idia laloa bada!
Haheauka ese Moale Ia Mailaia
19. Dahaka dainai Paulo ia moale, ena be ginigini bamona hekwakwanai bona manoka gaudia ia davaria?
19 Dirava ese Paulo ia hamoalea ia itaia neganai ia moale. Ia gwau: “Unai dainai, lauegu manoka do lau heagilaia mai moale danu, vadaeni Keriso ena siahu lau dekenai do ia noho. Unai dainai Keriso dainai lau gaukara lalonai, bema lau manoka, o haida ese lau idia hadikaia, o metau, o hisihisi, o dagedage, o hekwarahi lau davaria neganai do lau moalelaia. Badina be lau manoka neganai, unai be Dirava ena goada lau abia.” (2 Korinto 12:9, 10) Paulo dekenai idia vara gaudia dainai, mai ena lalo-goada ida ia gwau diba: “Lauegu ogogami lau maumauraia lasi, badina be lau manada vadaeni. Bona lau dekenai ia noho gauna dekenai lau moale vadaeni. Ogogami dekenai lau manada vadaeni, kohu momo ena mauri dekenai danu lau manada vadaeni. Mauri mai lalo namo ena dalana lau davaria vadaeni. Unai dainai gabu ibounai, nega ibounai, lau boga kunu o lau hitolo, be lau laloa momo lasi. Bona lauegu gau be momo, o hegeregere lasi neganai, egu lalona ia namo noho. Keriso ese lau ia hasiahua, vadaeni gau ibounai lau goadalaia diba.”—Filipi 4:11-13.
20, 21. (a) Dahaka dainai ita “itaia lasi” gaudia laloa dobu karana amo moale do ita davaria? (b) Edena gaudia haida, ita “itaia lasi” gaudia unai, oi ura tanobada Paradaisona dekenai do oi itaia?
20 Unai dainai, laulau dalanai iseda tauanina ai ia noho ginigini ita haheaukalaia karana amo moale bada do ita davaria, badina taunimanima ibounai dekenai ita hahedinaraia diba Iehova ena siahu be iseda manoka dekenai ia goevadae. Paulo ia gwau: “Ai be hesiku diba lasi, . . . to aiemai lauma be dina ibounai idia matamata lao noho. Badina be hari ai abia noho hisihisi be metau lasi gaudia, bona do idia noho nega daudau lasi. Oibe, inai hisihisi maragi idia ore murinai, Dirava ese ai do ia hanamoa bada herea momokani . . . ela bona hanaihanai. Unai dainai matana dekenai ita itaia . . . lasi gaudia do ita laloa. Badina matana dekenai ita itaia lasi gaudia be nega hanaihanai do idia noho.”—2 Korinto 4:16-18.
21 Iehova ena taunimanima momo hari inai negai idia ura tanobada Paradaisona dekenai do idia noho bona ia ese ia gwauhamatalaia hahenamo idauidau do idia moalelaia. Unai bamona hahenamo be reana hari inai negai ita “itaia lasi.” To nega ia mai kahirakahira noho, unai hahenamo idauidau be iseda matana amo do ita itaia, bona do ita moalelaia ela bona hanaihanai. Unai bamona hahenamo ta be ginigini bamona hekwakwanai do ita davaria lou lasi! Dirava ena Natuna ese “Satani ena kara dika do ia haorea momokani” bona “mase ia biagua tauna, Satani ena siahu ia hadikaia ore diba.”—1 Ioane 3:8; Heberu 2:14.
22. Dahaka ita diba bona ita karaia be namo?
22 Unai dainai, herevana hari dahaka ginigini ese ita ia hahisia noho, namona be unai ita haheaukalaia noho. Paulo hegeregerena, unai bamona ita karaia diba, badina Iehova ese mai hebogahisi ida ita dekenai siahu ia henia. Tanobada Paradaisona lalonai ita noho neganai, dina ibounai lalonai Iehova iseda Dirava do ita hanamoa, ita totona ia karaia gaudia ibounai dainai.—Salamo 103:2.
[Footnote]
a May 8, 2000, Awake! ena hereva ta ladana “The Bible’s Viewpoint: How to Cope With Despair” itaia.
Edena Bamona Do Oi Haere?
• Dahaka dainai bona edena dala ai Diabolo ia ura Keristani taudia momokanidia edia abidadama ia hadikaia?
• Iehova ena siahu be edena bamona “manokamanoka tauna lalonai ia hedinarai momokani”?
• Edena dala ai elda taudia bona ma haida be hekwakwanai ese idia hahisia taudia idia hagoadaia diba?
[Picture on page 18]
Paulo be nega toi Dirava ia noia, ena tauanina dekenai ia noho ginigini ia kokia totona