Basileia Haroro Ripoti

Demoni Edia Siahu amo Idia Raka Oho

TAUNIMANIMA milioni momo edia mauri lalonai lauma dikadia edia ura tahua karana be gau badana. To unai amo oi raka oho diba! Idaunegai hanua Efeso ena taunimanima momo ese unai idia karaia. Baibel ena sivarai ia gwau, “meamea taudia momo ese edia buka idia mailaia, idia haboua, bona idia gabua . . . Inai bamona dala, mai siahu danu, Lohiabada ena hereva ia bada daekau bona ia kwalimu.”​—⁠Kara 19:​19, 20.

Hari inai negai danu, Keristani oreana ia bada daekau. Efeso kongregesen hegeregerena, idia abia dae taudia huanai be guna demoni tomadiho henia karadia idia karaia taudia. Inai ekspiriens, Zimbabwe amo, ese unai ia hahedinaraia.

Taunimanima momo idia diba Gogo (Tubuna Hahine) Mthupha be lauma dikadia edia siahu ia gaukaralaia. Taunimanima be daudau gabudia Zambia, Botswana, bona South Africa amo idia mai, bona uda amo ia abia muramura ia gaukaralaia idia ia durua totona. Gogo Mthupha ese n’anga, o babalau tauna ai ia lao dalana be ma haida dekenai ia hadibaia danu. Bona nega haida ma haida dekenai meamea karana ta ia karaia!

Sunday daba ta ai, Iehova ena Witness taudia be ruma-ta-ruma-ta gaukara idia karaia neganai, Gogo Mthupha idia vadivadi henia. Baibel ena gwauhamata, tanobada matamata lalonai dika do ia noho lasi vaitani negana idia herevalaia, bona ia moalelaia bada. Ia ese Mauri Hanaihanai Paradaiso Lalonai bukaa ta ia abia bona Baibel stadi ia abia dae. Stadi idia karaia nega toi sibona murinai, hebou ia lao henia matamaia.

Ena Baibel stadi amo, Gogo Mthupha ia dibaia ena siahu idauna be guna Iehova ena lohia siahuna idia dadaraia lauma dikadia ese idia henia. (2 Petero 2:4; Iuda 6) Ia dibaia danu unai demoni idia gaukara goadagoada taunimanima ibounai idia veria Iehova bona ena tomadiho goevana idia rakatania totona. Ena moni gaukara be lauma dikadia tahua gaukarana, unai dainai dahaka do ia karaia?

Gogo Mthupha ia gwau ena meamea bona babalau gaudia ibounai ia ura ia negea. Idia ta be kwara gauna idauna ta bona “boromakau ena doana, ia hereva diba gauna,” ena n’anga hanamoa karadia lalonai ia gaukaralaia gauna. Gogo Mthupha ia ura unai gaudia ia negea, ia mauri noho Dirava momokanina tamona Iehova do ia tomadiho henia totona.

Ena varavara haida idia ura lasi unai kara ia rakatania badina ia amo moni idia abia. Ia idia noia ena meamea kohu bona siahu be idia dekenai ia henia, unai amo moni do idia abia noho diba. To, Gogo Mthupha ese edia noinoi ia abia dae lasi.

Ena gabu ai ia noho Iehova ena Witness kongregesen ena heduru ida, ena meamea kohu be baege toi lalonai ia gogoa bona idia ia gabua ore. Lahi ese ena demoni tomadiho henia gaudia ia araia neganai, Gogo Mthupha ia gwau: “Itaia! Unai doana ese sibona ia hamauria diba lasi.”

Gabeai, Gogo Mthupha ese ena gwauhamata Iehova dekenai be mai moale ida ia hamomokania ranu bapatiso amo. Hari ena mauri durua gaudia be edena dalana amo ia abia? Uma aniani ia hoihoilaia amo. Oibe, Dirava ena Hereva ena siahu amo, ta ese demoni tomadiho henia karana amo ia raka oho diba. Gogo Mthupha ia gwau: “Ura kwalimu ena mamina lau abia momokani hari.”

[Footnote]