Hahemauri Dika Negana Ai — Gima Kohorona INTANET LAIBRI

Hahemauri Dika Negana Ai

SEOUL, Korea ai, sitoa badana ta mai ena foloa ima be ia moru haraga neganai, taunimanima handred momo ia koudia! Durua gaukarana idia karaia taudia be dina bona hanuaboi idia gaukara, taunimanima momo hamauridia totona. Dina haida idia ore vadaeni neganai, toana be idia makohi auri bona semensi bogaraginai mauri taudia ma haida do idia davaria lasi.

Bena edia helaro ia doko neganai, hoa gauna ta ia vara. Idia makohi gaudia henunai amo taitai maragina ta idia kamonai. Durua taudia be edia imadia amo momoru idia kokia, lagani 19 hahinena ta, dina 16 lalonai unai momoru henunai ia mauri noho hahinena, idia hamauria totona. Elevator ena kahana ta be ia noho gabuna latanai ia moru, bena guhi bamona ia ese ia moru semenisi ton momo ia koua. Ena be hahine ena tauanina dekenai ranu bada ia ore vadaeni bona ena kopina be mai ena bero momo, to mase amo ia roho mauri!

Hari inai negai, kahirakahira hua iboudiai dika ta ena sivarai ita kamonai, hegeregere tano ia mareremarere, lai gubana ta, ororo ta ia pou, aksiden ta o hitolo bada. Bona hahemauri bona roho mauri sivaraidia nius ai idia halasia be taunimanima milioni momo ese idia hoalaia. To, do ia mai hisihisi ta ena sivarai—dika gunadia iboudiai do ia hereaia gauna—be taunimanima momo ese idia laloa lasi. (Mataio 24:21) Baibel ese unai do ia mai hisihisina be inai bamona ia gwauraia: “Kamonai! Dika be basileia ta dekena amo, ela bona ma basileia ta dekenai ia lao noho. Lai guba badana momokani be ia toa hamatamaia noho, tanobada ena dokona gabudia daudaudia dekena amo. Unai neganai Lohiabada ese ia alaia ore vadaeni taudia edia tauanidia be tanobada ena dokona gabuna ela bona tanobada ena dokona gabuna dekenai do idia hekure noho. Tau ta ese idia dainai do ia taitai lasi, bona tau ta ese idia do ia haboua lasi, bona tau ta ese idia do ia guria lasi. Idia be tano ena kopina dekenai do idia noho, boromakau ena kukuri hegeregerena.”—⁠Ieremia 25:32, 33.

Hoa herevadia unai! To unai dika be tano mareremarere, lai gubana, bona aksiden amo ia idau, ia ese taunimanima do ia hamasedia ore kava lasi. Momokani, roho mauri dalana—oiemu roho mauri dalana—⁠be ia noho!

Karaharaga Negana

Ta ese unai ena anina do ia diba vaitani totona, unai dika be tanobada ibounai dekenai do ia vara ena badina ia diba be namo. Momokani, ia be taunimanima edia hekwakwanai kokidia gauna korikorina tamona. Hari inai negai taunimanima haida sibona be noho namo mamina idia abia. Ena be saiens taudia idia gaukara goada, to daihanai goreredia ese taunimanima momo idia hadikaia noho. Tomadiho, bese, bona politikol oreadia be idauidau dainai idia vara tuaridia ese taunimanima tausen momo idia hamasedia. Hitolo ese kerere lasi taudia, tatau, hahine, bona natudia edia hisihisi ia habadaia. Kara dika ese taunimanima ia hakererea; natudia danu ia hakererea.

Baibel ena peroveta herevana ta, lagani 1,900 idia lao vadaeni ta ese ia torea herevana, ese iseda noho toana ia gwauraia goevagoeva. Ia gwau: “Namona be oi diba dina gabedia ai nega ibounai dika do ia vara noho.”—⁠2 Timoteo 3:1, The New Testament in Modern English, J. B. Phillips ese ia torea; Mataio 24:3-22 itaia.

Oi laloa lalokau Diravana ese iseda hisihisi ia laloaboio diba, a? Baibel ia gwau: “Lohiabada . . . ese tanobada ia karaia, bona tanobada ena toana, be Dirava ese ia henia. . . . Ia ese tano do ia noho kava totona ia karaia lasi, to tano mai anina namona, taunimanima idia noholaia diba gabuna, ia karaia.” (Isaia 45:18) Oibe, Dirava ese kara ta do ia karaia, bena inai tanobada mai hairaina do idia hadikaia lasi bona noholaia taudia ibounai do idia ore lasi. To henanadai be, Edena bamona do ia karaia?

Mauri Oi Abia Hidi!

Baibel ena haere be Salamo 92:7 ai: “Kara dika taudia be do idia tubu daekau, ava idia tubu daekau bamona. Bona kerere idia karaia taudia, be kohu momo bona noho namo idia abia diba, to oi ese idia do oi hadikaia ore.” Dirava ese tanobada ena hekwakwanai do ia kokidia dalana be kara dika do ia haorea vaitani. To taunimanima ibounai do ia haoredia lasi. Salamo 37:34 ese ita ia hadibaia: “Lohiabada dekenai do oi naria, iena dala dekenai do oi raka. Unai neganai ia ese oi dekenai ia henia tano, be do oi dogoatao diba, bona Lohiabada ese tau dikadia do ia hadikaia ore neganai, oi ese inai kara do oi itaia.”

Unai hereva ese idia hahedinaraia taunimanima dekenai do ia vara hisihisi bada hereana amo do ita roho mauri dalana ia noho. Ita abia hidi diba dalana be Dirava ese ia kehoa. Mose ena hagoadaia herevana, Israela taudia be Gwauhamata Tanona ai idia vareai gwauraia neganai, be mai anina ita dekenai hari inai negai, ia gwau: “Lau be mauri bona mase, hanamoa kara bona hadikaia kara, umui emui vairana dekenai lau atoa, do umui abia hidi totona. Unai dainai mauri do umui abia hidi, vadaeni umui bona emui natudia do umui mauri noho.” (Deuteronomi 30:19) To edena bamona ta ese ‘mauri ia abia hidi’ bona Dirava ese ia hamauria? Hahemauri momokani ena anina korikorina be dahaka?

[Picture Credit Line on page 2]

[Picture Credit Line on page 3]

Yunhap News Agency/Sipa Press