Kara Maoromaoro Tanobadana Oi Ura Dikadika, A?

LAGATOI ta mai ena autubua toi bona floa rua be hari idia gwauraia Cape Cod, Massachusetts, U.S.A., konena dekenai ia heau lao. Lagatoi ena gaukara taudia bona guia taudia 101 be davara dekenai dina 66 idia noho dainai idia hesiku bada herea. Tomadiho dainai idia dagedage henidia bona edia mauri ia auka dainai, idia heau mauri, bona mai hekwarahi bada ida Atlantic Davarana idia hanaia.

Unai lagatoi, Mayflower, dekenai idia guia taudia be November 11, 1620 ai tano idia itaia neganai, mauri matamatana ena helaro dainai edia matana idia diaridiari. Idia ura tanobada namona ena badina idia haginia dainai, dina rua murinai, lagatoi idia guia tatau badadia ese Mayflower Compact idia sainia. Ia lalonai idia abia dae, “unai tano matamatana dekenai idia noho taudia ibounai edia namo” totona, “kara maoromaoro bona kara hegeregere taravatudia” do idia karaia. Idia ura tanobadana, ibounai be mauri goeva bona dala maoro idia badinaia tanobadana​—⁠kara maoromaoro tanobadana​—⁠be ia vara momokani, a?

Ena be taunimanima idia gwau Mayflower dekenai idia sainia Compact be America ena gavamani ena badina nadina ta, unai tano dekenai kara gageva ia vara momo, tanobada hegegemadai ia vara bamona. Hegeregere, tau ta oi laloa ia be sitoa ta ena kohu ia henaoa bona sitoa biaguna ia pidia murinai ia heau gwauraia neganai, pulisi ese idia pidia. Ia ese pulisi bona New York siti ia abidia lao kota bona moni milioni momo ia abia.

Haheitalai ma ta mani oi laloa. Pasadena, California ai, taravatu idia stadilaia stiuden taudia be edia loea gaukarana idia karaia diba totona eksam idia karaia noho lalonai, idia ta be gorere ia abia bona ia moru. Ia badinai idia helai tau bona hahine ese karaharaga idia durua ena kudouna bona baragi idia gaukara noho totona ela bona medikol taudia idia ginidae. Idia ruaosi be miniti 40 ai unai tau idia durua. To miniti 40 idia noia edia eksam idia haorea totona neganai, eksam ia naria tauna ese ia henia lasi.

Taravatu idia makohia taudia panisia karana danu ita laloa. Ed Rubenstein, moni gaukaralaia dalana ia tahua tauna, ia gwau: “Taravatu idia makohia taudia momo be pulisi ese ia dogoa tao lasi. Idia dogoa tao taudia momo be idia panisidia lasi. Dibura taudia momo be gwauhamata haida henunai idia ruhaia. Taravatu ia makohia tauna ia diba ia abia be maoro panisi be reana do ia abia lasi.” Hadibaia herevadia henaohenao kara dekenai ia gaukaralaia neganai, ia gwau henaohenao tauna “be nega 98 pesen bamona dibura lao karana ia reaia.” Nega momo panisi idia henia lasi dainai taravatu makohia karadia idia bada bona dika idia davaria taudia idia momo.​—⁠Hadibaia Tauna 8:⁠11.

Tano momo dekenai taga taudia haida be edia kohu idia habadaia bona ogogami taudia momo be mauri aukana idia noholaia. Unai bamona kara gageva ia vara bema taunimanima be edia kopina ena kala, edia bese, edia gado, idia be tau eiava hahine, eiava edia tomadiho dainai idia be dala lasi edia noho dalana idia hanamoa eiava sibona idia naria totona. Hegeregere, The New York Times ia gwau, “Hindu tomadiho idia badinaia taudia South Asia tanodia ai​—⁠idia momo be India bona Nepal dekenai​—⁠be taunimanima ese idia dadaraia iduhuna ai idia vara bona idia mase. Unai dainai ogogami, hitolo, bona gorere ese taunimanima milioni momo idia hadikaia. Idia vara negana amo ela bona idia mase edia mauri be kara gageva amo ia honu.

Taunimanima ese idia koua diba lasi kara gageva be dahaka dahaka? Mai edia dika ida idia vara beibi oi laloa​—⁠idia mata kepulu, idia kavakava, eiava edia tauanina idia dika. Bema hahine ta ena beibi be ia vara neganai ena aena ia dika eiava ia mase, to kahirakahira idia noho hahine ma haida be gorere lasi beibi idia rosiadia, ia ese kara gageva ena mamina ia abia, ani?

Madi, kara gageva bona ia havaraia gaudia​—⁠hisihisi bada herea bona maino, moale, bona laloa hegeregere be lasi​—⁠be nega momo idia vara. Idia itaia eiava idia mamia kara gageva dainai idia badu taudia momo ese dagedage karadia idia karaia, to unai ese taunimanima edia hisihisi ia habadaia sibona. Idia noho kara gageva dainai tuari momo idia vara.

Dahaka dainai taunimanima be idia kwalimu lasi kara maoromaoro tanobadana idia havaraia totona? Unai bamona tanobada be nihi sibona, a?

[Picture Credit Line on page 3]

Corbis-Bettmann

[Picture on page 4]

Mayflower Compact idia sainia

[Credit Line]

Corbis-Bettmann