Mamoe Idaudia Bona Gwauhamata Matamatana

“Idau bese taudia bema egu . . . , Sabati Dina do idia badinaia, do idia hadikaia lasi, bona bema egu gwauhamata taravatuna idia kamonai henia neganai, inai taudia be lau ese egu ororo helagana dekenai do lau hakaua.”​—⁠ISAIA 56:​6, 7.

1. (a) Ioane ena matahanai hegeregerena, lai edia toa dalana, Iehova ena hahemaoro henia karana unai, idia koua lalonai, dahaka gaukara ia haorea? (b) Ioane ese edena hutuma idauna ia itaia?

APOKALUPO bukana ena matahanai namba 4 lalonai, aposetolo Ioane ia itaia lai edia toa dalana, Iehova ena hahemaoro henia karana unai, idia koua ela bona “Dirava ena Israela” oreana taudia ibounai makaia gaukarana ia ore. Idia be Iesu, Aberahamo ena garana badana tauna, ese ia hanamoa taudia ginigunadia. (Galatia 6:​16; Genese 22:18; Apokalupo 7:​1-4) Unai matahanai tamona lalonai, Ioane ese “hutuma bada herea, tau ta ese ia duahidia diba lasi, bese idauidau bona iduhu idauidau bona kopina idauidau bona gado idauidau amo” (NW) ia itaia. “Idia boiboi badabada, idia gwau, ‘Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.’ ” (Apokalupo 7:​9, 10) Idia gwau “taunimanima hamauria siahuna be . . . Mamoe ena Natuna” neganai, hutuma bada herea taudia idia hahedinaraia Aberahamo ena Garana amo hahenamo idia abia danu.

2. Hutuma bada herea oreana be edena nega ai ia hedinarai, bona edena dala ai ia hedinarai?

² Lagani 1935 ai, idia diba unai hutuma bada herea oreana be daidia, bona hari ena namba be milioni ima ia hanaia. Iena orea taudia be hisihisi badana amo idia roho mauri totona maka idia abia, bona Iesu ese “mamoe” be “nanigosi” amo ia hapararaia neganai, unai taudia do ia hapararaia mauri hanaihanai totona. Iesu ese ena haheitalai, mamoe edia magu ena haheitalaina lalonai, hutuma bada herea Keristani taudia be unai “mamoe idaudia” taudia. Edia helaro be tanobada paradaisona dekenai do idia mauri noho ela bona hanaihanai.​—⁠Mataio 25:​31-​46; Ioane 10:16; Apokalupo 21:​3, 4.

3. Gwauhamata matamatana ita laloa neganai, horoa Keristani taudia bona mamoe idaudia taudia be edena dala ai idia idau?

³ Unai 144,000 taudia dekenai, Aberahamo gwauhamatana ena hahenamo be gwauhamata matamatana amo idia abia. Idia be unai gwauhamata matamatana lalonai dainai, idia be “Dirava ena hariharibada” bona “Keriso ena Taravatu” henunai. (Roma 6:​15; 1 Korinto 9:​21) Unai dainai, Dirava ena Israela taudia 144,000 sibona ese Iesu ena mase laloatao hebouna, Memorial, ai paraoa idia ania bona uaina idia inua mai edia maoro ida, bona Iesu ese Basileia gwauhamatana be idia sibona ida ia karaia. (Luka 22:​19, 20, 29) Hutuma bada herea taudia be unai gwauhamata matamatana lalonai lasi. To, Dirava ena Israela taudia idia bamoa bona idia danu edia “tano” dekenai idia noho. (Isaia 66:⁠8, NW) Unai dainai ita gwau diba idia danu be Iehova ena hariharibada henunai bona Keriso ena taravatu henunai idia noho. Ena be gwauhamata matamatana lalonai idia noho lasi, to ia amo namo idia davaria.

“Idau Bese Taudia” Bona “Dirava Ena Israela”

4, 5. (a) Isaia ia gwau edena orea be Iehova do idia hesiai henia? (b) Edena dala ai Isaia 56:​6, 7 ena anina be ia vara hutuma bada herea taudia dekenai?

⁴ Peroveta tauna Isaia ia gwau: “Idau bese taudia bema egu bese ena orea lalonai idia vareai, lau do idia tomadiho henia totona, bona lau Lohiabada egu ladana do idia lalokau henia, bona egu hesiai gaukara do idia karaia, bona Sabati Dina do idia badinaia, do idia hadikaia lasi, bona bema egu gwauhamata taravatuna idia kamonai henia neganai, inai taudia be lau ese egu ororo helagana dekenai do lau hakaua, bona egu guriguri rumana dekenai lau ese moale do lau henidia. Edia gabua bouboudia bona edia boubou gaudia idauidau be, egu boubou patana ena latanai do lau abidia dae.” (Isaia 56:​6, 7) Israela dekenai, unai ena anina be “idau bese taudia,” Israela lasi taudia, ese Iehova do idia tomadiho henia​—⁠iena ladana do idia ura henia, Taravatu gwauhamatana ena hahegani do idia kamonai henia, Sabati do idia badinaia, bona Dirava ena “guriguri rumana,” o dubu helagana ai, boubou gaudia do idia henia.​—⁠Mataio 21:⁠13.

⁵ Hari inai nega ai, ‘Iehova ena orea lalonai idia vareai idau bese taudia’ be hutuma bada herea taudia. Idia be Dirava ena Israela taudia ida Iehova idia hesiai henia. (Sekaraia 8:​23) Dirava ena Israela taudia bamona, Dirava ia abia dae bouboudia idia henia danu. (Heberu 13:​15, 16) Dirava ena lauma dubuna, iena “guriguri rumana” dekenai idia tomadiho. (Apokalupo 7:​15 itaia.) Pura ta ta amo Sabati dinana idia badinaia, a? Horoa taudia bona mamoe idaudia ese unai bamona hahegani idia abia lasi. (Kolose 2:​16, 17) To, Paulo be horoa Heberu Keristani taudia dekenai ia gwau: “Dirava ena taudia edia [“sabati,” NW] laga-ani be ia do noho. . . . Dirava ena laga-ani dekenai ia vareai tauna ese iena gaukara dekena amo ia laga-ani noho. Ia laga-ani, Dirava ese iena gaukara dekena amo ia laga-ani bamona.” (Heberu 4:​9, 10) Unai Heberu taudia be “Dirava ese taunimanima ia gwauraidia maoromaoro” dalana idia badinaia bona Taravatu ena gaukaradia dekena amo idia sibona ese unai maoromaoro tahua karana amo idia laga-ani neganai, unai ‘sabati laga-ani’ dekenai idia vareai. (Roma 10:​3, 4) Horoa Iuda Lasi Keristani taudia ese Iehova ena maoromaoro dalana idia abia dae neganai unai laga-ani idia moalelaia danu. Hutuma bada herea taudia be idia ida unai laga-ani dekenai.

⁶ Danu, mamoe idaudia be unai gwauhamata matamatana henunai, idaunega idau bese taudia be Taravatu gwauhamatana henunai idia noho hegeregerena. Edena dala ai? Unai gwauhamata taravatuna lalonai idia vareai lasi, to ena taravatu idia badinaia bona ena dala badinaia amo namo idia davaria. (Ieremia 31:​33, 34 itaia.) Idia bamoa horoa taudia hegeregerena, mamoe idaudia ‘edia kudouna lalonai’ Iehova ena taravatu ia noho. Iehova ena hahegani bona hakaua herevadia idia ura henia bada bona idia badinaia. (Salamo 37:31; 119:97) Horoa Keristani taudia bamona, Iehova idia diba. (Ioane 17:⁠3) To kopina utua karana be edena bamona? Lagani 1,500 idia do noho ela bona gwauhamata matamatana idia haginia neganai, Mose ese Israela taudia ia hagoadaia, namona be kopina utua bamona karana idia karaia edia kudouna dekenai. (Deuteronomi 10:​16, NW; Ieremia 4:⁠4, NW) Ena be Taravatu ia ore neganai kopina utua karana korikorina ena taravatu ia ore danu, to horoa taudia bona mamoe idaudia taudia be “kopina utua kara” idia karaia edia kudouna dekenai be gau badana. (Kolose 2:​11) Vadaeni, Iehova ese mamoe idaudia taudia edia kerere ia gwauatao, Iesu ese gwauhamata taravatuna ena “rara” ia bubua dainai. (Mataio 26:28; 1 Ioane 1:9; 2:⁠2) Idia be Dirava ena heubu natudia memero lasi, unai 144,000 taudia be ena heubu natudia memero bamona. To Dirava ese mamoe idaudia taudia ia gwauraia maoromaoro dalana be Aberahamo Ia gwauraia maoromaoro bona Iena turana ai ia halaoa dalana hegeregerena.​—⁠Mataio 25:46; Roma 4:​2, 3; Iamesi 2:​23.

7. Edena helaro ia noho mamoe idaudia taudia, Aberahamo bamona Dirava ese ia gwauraia maoromaoro taudia, totona hari?

⁷ Unai 144,000 taudia ia gwauraia maoromaoro dainai, dala ia kehoa, edia helaro be guba Basileia lalonai Iesu ida do idia lohia totona. (Roma 8:​16, 17; Galatia 2:​16) Dirava ese mamoe idaudia ia gwauraia maoromaoro bona ena turadia ai ia halaoa dainai, edia helaro be tanobada paradaisona dekenai mauri hanaihanai do idia abia​—⁠unai hutuma bada herea oreana huanai Aramagedono amo do idia roho mauri eiava ‘kara maoromaoro taudia edia toreisi lou’ amo do idia abia karana dainai. (Kara 24:15) Unai bamona helaro ita abia bona guba bona tanobada edia Pavapava ena turana ai ita lao, bona ‘iena palai dekenai ita noho’ be hahenamo bada hereana ta! (Salamo 15:​1, 2, NW) Oibe, horoa taudia bona mamoe idaudia danu be Iesu, Aberahamo ena Garana, dekena amo dala namona ai hahenamo idia abia.

Kara Dika Ena Davana Karaia Dinana Badana

8. Taravatu henunai, Kara Dika ena Davana Karaia Dinana ai idia karaia bouboudia ese dahaka idia laulaulaia?

⁸ Paulo ese gwauhamata matamatana ia herevalaia neganai, duahia taudia dekenai Taravatu henunai lagani ta ta ai idia karaia Kara Dika ena Davana Karaia Dinana ia gwauraia lou. Unai dina ai, boubou idaudia rua idia henia​—⁠ta be hahelaga taudia edia iduhu Levi totona bona ma ta be hahelaga taudia lasi iduhu oredia 12 totona. Lagani momo lalodiai vadaeni ita gwau unai ese Iesu ena boubou badana ia laulaulaia, guba dekenai do idia lao 144,000 taudia bona tanobada dekenai do idia noho taudia milioni momo ia hanamoa boubouna.a Paulo ese ia hahedinaraia unai dina ena anina ia guguru neganai, unai gwauhamata matamatana henunai idia karaia Kara Dika ena Davana Karaia Dinana Badana amo, Iesu ena boubou ia havaraia gau namodia do idia henia. Unai dina badana ena Hahelaga Tauna Badana, Iesu, ese maino karaia boubouna bamona ena mauri goevadaena ia henia, taunimanima be “mauri hanaihanai” idia abia totona.​—⁠Heberu 9:​11-​24.

⁹ Aposetolo taudia edia nega ai, Heberu Keristani taudia momo be “Mose ena taravatu idia badinaia namonamo noho.” (Kara 21:20) Unai dainai ia maoro Paulo ese idia hadibaia lou, ia gwau: “Keriso ese taravatu matamatana ia haginia, bona taunimanima durua totona ia be Dirava ena vairanai ia gini noho. Keriso ia mase, taunimanima do ia hamauria totona, bona edia kerere, taravatu gunana lalonai idia karaia gaudia do ia kokia totona. Unai dainai Dirava ena boiboi idia kamonai henia taudia ibounai ese, Dirava ia gwauhamatalaia mauri hanaihanai do idia abia. Inai gwauhamata ese Dirava ena natuna ibounai do ia hanamoa, ela bona hanaihanai.” (Heberu 9:​15) Gwauhamata matamatana ese Heberu Keristani taudia ia ruhaia edia kara dika ia hahedinaraia gwauhamata gunana amo. Unai gwauhamata matamatana dainai, idia ese “Dirava ia gwauhamatalaia mauri hanaihanai [guba dekenai] do idia abia.”

10. Dahaka dainai horoa taudia bona mamoe idaudia taudia be Dirava idia tanikiu henia?

¹⁰ Dirava ena “Natuna” idia “abidadama henia taudia ibounai” be unai mauri davalaia boubouna amo namo do idia davaria. (Ioane 3:​16, 36) Paulo ia gwau: “Keriso ese nega tamona sibona iena mauri Dirava dekenai ia henia, taunimanima momo edia kara dika kokia totona. To gabeai, nega iharuana do ia mai hedinarai lou. Unai be kara dika kokia totona do ia mai lasi, to ia idia naria noho taudia do ia hamauria totona do ia mai.” (Heberu 9:​28) Hari inai negai, Iesu idia naria noho taudia be Dirava ena Israela taudia, tanobada ai idia do mauri noho horoa Keristani taudia unai, bona noho hanaihanai ahuna do idia abia danu hutuma bada herea taudia milioni momo. Unai orea rua be Dirava idia tanikiu henia unai gwauhamata matamatana bona ena mauri henia gaudia namodia dainai, unai hahenamo be Kara Dika ena Davana Karaia Dinana Badana bona Hahelaga Tauna Badana, Iesu, ena hesiai gaukara Helaga Herea gabuna guba ai.

Hesiai Gaukara Helagana Goadalaia

¹¹ Ena revareva Heberu Keristani taudia dekenai, Paulo ese gwauhamata matamatana lalonai Iesu ese ia henia boubouna be gwauhamata gunana henunai idia henia bouboudia ida ia hahegeregerea neganai, ia hahedinaraia goevagoeva Iesu ena boubou ena namo be hereadae. (Heberu 9:​13-​15) Iesu ena boubou hereadaena ese “iseda lalona do ia hagoevaia anina lasi boubou karadia dekena amo. Vadaeni Mauri Diravana ena hesiai gaukara do ita karaia diba.” Heberu Keristani taudia dekenai, “anina lasi boubou karadia” be “edia kerere, taravatu gunana lalonai idia karaia gaudia.” To hari inai negai Keristani taudia dekenai, unai gaudia be guna idia karaia kara dikadia, to idia helalo-kerehai bona Dirava ese ia gwauatao vadaeni gaudia. (1 Korinto 6:​9-​11) Mai edia lalona goevadia ida, horoa Keristani taudia ese “Mauri Diravana ena hesiai gaukara” idia karaia. Hutuma bada herea taudia ese idia karaia danu. Edia lalona “idia huria vadaeni Mamoe ena Natuna ena rarana lalonai” dainai, Dirava ena lauma dubuna badana ai idia noho bona “dina bona hanuaboi idia ese Dirava ena hesiai gaukara idia karaia noho.”​—⁠Apokalupo 7:​14, 15.

12. Edena dala ai ita hahedinaraia Dirava “ita abidadama henia momokani”?

¹² Danu, Paulo ia gwau: “Ia ese iena rarana iseda kudouna dekenai ia atoa, vadaeni iseda lalona idia goeva, bona kara dika ena mamina danu do ita abia lasi. Iseda tauanina danu be ranu namona dekena amo ia ese idia ia huria goevagoeva. Unai dainai iseda lalona dekena amo koikoi ibounai do ita negea, bona mai laloa maoromaoro danu Dirava ena vairanai do ita noho. Ma namona be ita ese Dirava do ita abidadama henia momokani, bona ia kahirakahira dekenai do ita noho.” (Heberu 10:​22) Edena dala ai ita hahedinaraia Dirava “ita abidadama henia momokani”? Paulo ese Heberu Keristani taudia ia hagoadaia, ia gwau: “Ita diba momokani Dirava ese iena gwauhamata do ia badinaia. Unai dainai namona be iseda abidadama [guba helarona] ita dogoatao goada noho. Ita gwauraia noho abidadama be unai. Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Heberu 10:​23-​25) Bema iseda abidadama ia mauri noho, ita danu be ‘guriguri hebou karana do ita hadokoa lasi.’ Iseda tadikaka do ita hagoadaia bona ita do idia hagoadaia lalokau bona kara namodia ita karaia totona neganai do ita moale, bona iseda helaro, herevana ia be guba o tanobada helarona, harorolaia gaukara, mai anina bada gaukarana unai, do ita karaia mai eda goada ida.​—⁠Ioane 13:⁠35.

“Noho Hanaihanai Gwauhamata”

13, 14. Edena daladia ai gwauhamata matamatana be ia noho hanaihanai gauna?

¹³ Dahaka do ia vara 144,000 taudia ginigabena ena guba helarona ia guguru neganai? Gwauhamata matamatana do ia ore, a? Unai neganai, Dirava ena Israela taudia oreana ena memba ta lasi be tanobada dekenai do ia noho. Gwauhamata taravatuna lalonai idia noho taudia ibounai be Iesu ida “Dirava ena Basileia lalonai.” (Mataio 26:29) To Paulo ena revareva lalonai, Heberu taudia dekenai ia torea herevadia ita laloatao: “Dirava . . . ese iseda Lohiabada Iesu mase dekena amo ia hatorea isi lou. Iesu be Mamoe Naria Tauna Badana, badina be ia ese Dirava ena noho hanaihanai gwauhamata ia hamomokania vadaeni.” (Heberu 13:20; Isaia 55:⁠3) Edena dala ai unai gwauhamata matamatana be noho hanaihanai gauna?

¹⁴ Gau ginigunana be, ia be Taravatu gwauhamatana bamona lasi, badina ma gwauhamata taravatuna be ena gabu do ia abia lasi. Gau iharuana be, ia dainai idia vara gaudia be do idia noho hanaihanai, Iesu ena king dagina bamona. (Luka 1:​33 be 1 Korinto 15:​27, 28 ida oi hahegeregerea.) Iehova ena ura lalonai, guba Basileiana be mai ena gabu ta ela bona hanaihanai. (Apokalupo 22:⁠5) Bona gau ihatoina be, mamoe idaudia be unai gwauhamata matamatana ia havaraia namo do idia abia noho. Keriso ena Lagani 1,000 Lohia Negana lalonai, abidadama taudia ese “dina bona hanuaboi idia ese Dirava ena hesiai gaukara” do idia karaia noho, hari idia karaia hegeregerena. Iehova ese edia kara dika gunadia do ia gwauraia lou lasi, Iesu ia henia ‘gwauhamata taravatuna ena rara’ dainai ia gwauatao vadaeni. Mai edia maoromaoro ida edia turana Iehova vairanai do idia gini noho, bona iena taravatu be edia kudouna dekenai do ia noho.

¹⁵ Unai neganai Iehova ese unai hesiai taudia do ia gwauraia diba, ‘Lau be edia Dirava, bona idia be egu bese taudia,’ a? Oibe. “Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho.” (Apokalupo 21:⁠3) Idia be “Dirava ena helaga taudia edia kamepa” ai do idia lao, tanobada dekenai idia be “Dirava ese ia lalokau henia hanuana,” Iesu Keriso ena guba headava matamata oreana, ena gwaukau taudia. (Apokalupo 14:1; 20:⁠9; 21:⁠2) Unai ibounai do ia vara badina Iesu ia bubua ‘gwauhamata taravatuna ena rara’ idia abidadama henia bona guba dekenai idia noho king bona hahelaga taudia, guna tanobada dekenai idia be Dirava ena Israela taudia unai, henunai idia noho dainai.​—⁠Apokalupo 5:​10.

¹⁶ Tanobada dekenai mase amo do idia toreisi lou taudia be edena bamona? (Ioane 5:​28, 29) Idia danu do idia boiria Aberahamo ena Garana, Iesu, amo “hanamoa” idia abia totona. (Genese 22:18) Danu, namona be Iehova ena ladana idia ura henia bada, ia idia hesiai henia, boubou maorodia idia henia, bona iena guriguri rumana lalonai hesiai gaukara helagana idia karaia. Unai idia karaia taudia be Dirava ena laga-ani lalonai do idia vareai. (Isaia 56:​6, 7) Lagani 1,000 idia ore neganai, abidadama taudia ibounai be goevadae taudia ai idia lao vadaeni, Iesu Keriso bona ma hahelaga taudia 144,000 edia gaukara dainai. Hari Dirava ese ia gwauraidia maoromaoro bona ena turadia ai ia halaoa, to unai neganai idia be maoromaoro. Do idia “mauri lou,” Adamu amo idia abia kara dika bona mase be do idia ore vaitani. (Apokalupo 20:5; 22:⁠2) Unai be hahenamo bada hereana ta! Iseda laloa dalana hari be, unai neganai Iesu bona 144,000 taudia ese edia hahelaga gaukarana do idia haorea. Kara Dika ena Davana Karaia Dinana badana ena hahenamo ibounai edia anina do idia guguru momokani vadaeni. Danu, Iesu ese “Basileia be Tamana Dirava ena imana dekenai do ia atoa.” (1 Korinto 15:24) Taunimanima dekenai hahetoho ginigabena do ia vara, bena Satani bona ena demoni do idia hadikaia ore vaitani.​—⁠Apokalupo 20:​7, 10.

17. Do ita davaria moale ita laloa neganai, namona be ita ta ta be iseda lalona ita hadaia dahaka do ita karaia?

¹⁷ Unai neganai do idia vara matamaia gaudia momo dekenai “noho hanaihanai gwauhamata” be mai anina, eiava ia be mai anina lasi? Ai gwauraia lasi be namo. Iehova ia hahedinaraia vadaeni gaudia be hegeregere hari. Unai gaudia dainai ita hoa dikadika. Mani oi laloa​—⁠mauri hanaihanai unai “guba matamata bona tanobada matamata” dekenai! (2 Petero 3:​13) Namona be unai gwauhamata abia urana idia hamanokaia gaudia ibounai ita dadaraia. Ita gini goada noho be do ia auka. Paulo ia gwau: “Metau lalonai do umui gini goada, do umui haheauka, vadaeni Dirava ena ura do umui karaia diba. Unai neganai Dirava ia gwauhamatalaia davana namona do umui abia.” (Heberu 10:36) Namona be ita laloatao, herevana edena bamona hekwakwanai eiava dagedage ita davaria, bema iseda hekwarahi be do ita abia moale ida ita hahegeregerea neganai, ia be gau ta lasi bamona. (2 Korinto 4:​17) Unai dainai, namona be ita ta lasi be “Dirava ena dala do ita rakatania.” To, namona be ita hamomokania “ita be boio taudia lasi. Lasi, to ita be abidadama taudia dainai, mauri do ita abia.” (Heberu 10:39) Namona be ita ibounai be Iehova, gwauhamata taravatudia ia karaia Diravana, ita abidadama henia momokani, bona ita ta ta ibounai ese noho hanaihanai hahenamo do ita abia.

[Footnote]

Inai Oi Lalo-Pararalaia, A?

◻ Horoa Keristani taudia sibona lasi, to daidia danu be Aberahamo ena Garana amo hahenamo idia abia?

◻ Gwauhamata matamatana amo hahenamo idia abia dainai, edena dala ai mamoe idaudia taudia be gwauhamata gunana henunai idia noho Iuda tomadiho idia abia dae taudia bamona?

◻ Kara Dika ena Davana Karaia Dinana badana amo, mamoe idaudia taudia be edena dala ai hahenamo idia abia?

◻ Dahaka dainai Paulo ia gwau gwauhamata matamatana be “noho hanaihanai gwauhamata”?

6. Hari inai negai, edena dala ai mamoe idaudia be gwauhamata matamatana henunai idia noho?

9. Idia be gwauhamata matamatana lalonai dainai, horoa Heberu Keristani taudia ese dahaka idia abia diba?

11. Edia lalona be Iesu ena boubou ese ia hagoevaia dainai, horoa taudia bona mamoe idaudia taudia ese dahaka kara idia karaia mai edia moale ida?

15. Iehova bona tanobada matamata dekenai ia idia tomadiho henia taudia edia hetura karana mani oi gwauraia.

16. (a) Tanobada dekenai do idia toreisi lou taudia ese dahaka gaudia do idia abia diba? (b) Lagani 1,000 idia ore neganai, dahaka hahenamo do idia vara?

[Box on page 21]

HESIAI GAUKARA HELAGANA DUBU DEKENAI

Hutuma bada herea taudia be horoa Keristani taudia danu tomadiho henia karana idia karaia Iehova ena lauma dubu badana ena tanobada ariara gabuna ai. (Apokalupo 7:​14, 15; 11:⁠2) Badina ta ia noho lasi ita laloa idia be ariara gauna idauna ta, Idau Bese taudia edia Ariara Gabuna, dekenai idia noho. Iesu be tanobada dekenai ia noho neganai, dubu dekenai Idau Bese taudia edia Ariara Gabuna ta ia noho. To, Solomona bona Esekiela edia dubu edia palani be Dirava ese ia havaraia, bona Idau Bese taudia edia Ariara Gabuna ta be lasi. Solomona ena dubu dekenai, magu ia koua lasi ariara gabuna ta ia noho, Israela taudia bona Iuda tomadiho idia abia dae taudia, tatau bona hahine, idia tomadiho hebou gabuna. Unai ese lauma dubuna ena tanobada ariara gabuna ia laulaulaia, bona Ioane ia itaia hutuma bada herea taudia be hesiai gaukara helagana idia karaia unuseniai.

To, hahelaga taudia bona Levi taudia sibona be magu ia koua ariara gabuna, patapata badana ia noho gabuna, ai idia vareai diba; hahelaga taudia sibona be Helaga Gabuna ai idia vareai diba; bona hahelaga tauna badana sibona be Helaga Herea Gabuna ai ia vareai. Ita laloa unai magu ia koua ariara gabuna bona Helaga Gabuna ese tanobada dekenai idia do noho horoa Keristani taudia be lauma dalanai edia noho idauna ta idia laulaulaia. Bona Helaga Herea Gabuna ese guba ia laulaulaia, unuseniai horoa Keristani taudia be mase diba lasi maurina idia abia edia guba Hahelaga Tauna Badana ida.​—⁠Heberu 10:​19, 20.

[Picture on page 23]

Do ita abia moalena dainai, namona be ‘ita be abidadama taudia, mauri do ita abia totona’