Taunimanima Edia Eiava Dirava Ena Hesiai Taudia?

“IEHOVA ena Witness taudia ita laloa bada diba.” Germany gado bukana ladana Seher, Grübler, Enthusiasten (Matahanai Taudia, Lalohadai Taudia, Lalo-Goada Taudia) be unai bamona ia hereva. Ena be Witness taudia ia maumauraia kava danu, to ia gwau: “Idia be kerere lasi taudia bona idia momo be mai edia taga bada lasi. Idia gaukara goadagoada mai edia momokani ida, gavamani ena taravatu idia badinaia, bona takisi moni maorona idia henia. Idia ese moni bona kohu idia tahua goadagoada lasi. . . . Hebouhebou lalodiai edia kara dainai, idia ita hanamodia be namo. Sibona edia ura idia dadaraia karana be tomadiho oreadia ma haida hegeregerena; to hesiai gaukara dekenai idia ese iboudiai idia hereaia. To hari iseda negai idia noho Keristani dubu bona orea ibounai idia hereaia dalana be noho daladia iboudiai bona dika idia davaria diba negadiai danu edia hahediba herevadia harorolaia gaukarana idia karaia noho.”a

Ena be haida ese unai bamona hanamoa herevadia amo Iehova ena Witness taudia idia gwauraia, to haida ese lalohadai idauna idia hahedinaraia toho. Tanobada hegegemadai, tano momo dekenai, Witness taudia ese lagani momo herea lalonai, taunimanima vairadiai edia tomadiho hesiai gaukarana idia karaia bona ta ese ia koudia lasi. Taunimanima milioni momo be Witness taudia idia diba, idia matauraidia, bona idia laloa idia be mai edia maoro edia tomadiho idia badinaia totona. Vadaeni, dahaka dainai haida idia daradara Iehova ena Witness taudia be daidia?

Reana badina ta be, vanegai tomadiho oreadia momo be natudia hadikaia karana, taunimanima hutuma be nega tamona sibodia idia hamasea karana, bona dagedage karadia idia karaia dainai. Momokani, unai bamona dika badadia be gabu ibounai dekenai idia vara, tomadiho ta idia badinaia taudia bogaraginai sibona lasi. To, taunimanima momo ese tomadiho idia daradaralaia, haida ese idia dadaraia.

Taunimanima Murinai Raka Karana Ena Dika

“Tomadiho orea idauna (sect)” ena anina be “hahediba herevana ta eiava gunalaia tauna ta badinaia oreana.” Unai hegeregerena, “hehuni oreana (cult)” taudia ese “tau ta, lalohadai ta, eiava gau ta idia badinaia goadagoada.” Bema tomadiho ta ena memba taudia ese edia gunalaia taudia bona edia lalohadai idia badinaia goadagoada, idia be taunimanima edia hesiai taudia ai idia lao haraga. Orea gunalaia tauna laloa bada karana ese hemami bona tomadiho dalana ai tau ta tabekau henia karana kererena ia havaraia diba. Unai dika ia bada ia lao diba bema tau ta be ia maragi negana amo tomadiho orea idauna ta bogaraginai ia tubu.

Namona be tomadiho ta dekenai unai bamona idia gari taudia ese diba maorona idia abia. Reana haida ese idia hamaorodia Witness taudia edia orea ese ena memba taudia ia guidia, ia biagudia auka, edia ura-kwalimu ia koua, bona mauri dala idauna ai ia hakaudia.

Iehova ena Witness taudia idia diba unai hereva idia maoro lasi. Unai dainai oi idia boiria, oi sibona ese unai gauna do oi itaia totona. Oi laloa namonamo murinai, sibona emu lalona oi hadaia. Idia gwau bamona, Witness taudia be Dirava ena hesiai taudia, eiava idia be taunimanima edia hesiai taudia? Edia goada ena badina be dahaka? Rau 12 ia lao 23 ai idia noho herevadia rua ese unai henanadai dekenai haere maorodia do idia henia.

[Footnote]