Ura Kwalimu Lalonai Keristani Gwauhamatana Oi Hamomokania
‘Bema Iehova ena lauma be tau ta dekenai ia noho, ia dekenai ura kwalimu ia noho.’—2 KORINTO 3:17.
1. Iehova ena Witness taudia be daika dekenai edia mauri idia gwauhamatalaia, bona dahaka dainai gaukara oreadia idia gaukaralaia?
IEHOVA ena Witness taudia idia abia dae edia tomadiho be do ia noho hanaihanai. Unai dainai edia lalohadai be “mai Lauma bona mai momokani danu” Dirava do idia hesiai henia ela bona hanaihanai. (Ioane 4:23, 24) Unai Keristani taudia be ura kwalimu taudia, idia ese Iehova Dirava dekenai edia mauri ibounai idia gwauhamatalaia bona edia lalona idia hadaia unai gwauhamata do idia hamomokania. Unai idia karaia totona, Dirava ena Hereva bona ena lauma helaga ena heduru dekenai idia tabekau. Dirava ia henia ura kwalimu lalonai mai edia kudouna ibounai ida edia Keristani gwauhamatana idia hamomokania neganai, Witness taudia ese idia hahedinaraia “gavamani” ena gaukara idia matauraia bona dala maorona ai hahemaoro daladia bona edia heduru idia gaukaralaia. (Roma 13:1; Iamesi 1:25) Hegeregere, Watch Tower Society be Witness taudia ese taravatu hegeregerena ai idia gaukaralaia gaukara oreana—tano idauidau ai idia noho oreadia momo amo ia be ta—unai amo edia gaukara idia hagugurua diba, hegeregere taunimanima idia durua, bona idia durua dalana badana be lauma dalanai. To Witness taudia ese Dirava dekenai edia mauri idia gwauhamatalaia, gaukara oreana ta dekenai lasi, bona edia gwauhamata Iehova dekenai be do ia noho hanaihanai.
2. Dahaka dainai Iehova ena Witness taudia idia laloa Watch Tower Society bona unai bamona gaukara oreadia ma haida be mai edia anina bada?
2 Iehova ena Witness taudia be Dirava dekenai edia mauri idia gwauhamatalaia taudia, unai dainai edia maduna be Iesu ena hereva do idia badinaia, ia gwau: “Bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia.” (Mataio 28:19, 20) Unai gaukara be do idia karaia ela bona tanobada ena dokona, badina Iesu be ma ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:3, 14) Lagani ta ta ai, Watch Tower Society bona unai bamona gaukara oreadia ma haida edia printa gabudia dekenai Baibel, buka, buklet, bona magasin milioni momo idia karaia, Iehova ena Witness taudia ese edia tanobada hegegemadai haroro gaukarana lalonai idia gaukaralaidia totona. Unai gaukara oreadia be mai edia anina bada, badina idia ese Dirava ena gwauhamata hesiai taudia idia durua Ia dekenai edia gwauhamata idia hamomokania totona.
3. Edena dala ai Iehova ena Witness taudia ese guna inai hereva “Society” idia gaukaralaia?
3 Reana haida idia gwau, Witness taudia ese Watch Tower Society—eiava nega momo “Society” sibona—idia herevalaia dalana ese ia hahedinaraia idia laloa unai be gaukara oreana ta sibona lasi. Idia laloa tomadiho dalana dekenai ia abia hidi gauna idia badinaia be mai anina bada, ani? Jehovah’s Witnesses—Proclaimers of God’s Kingdom bukana ese unai ia gwauraia hedinarai namo herea, ia gwau: “Gima Kohorona [June 1, 1938 gauna] ese inai hereva ‘Society’ ia gwauraia neganai, ena anina be, gaukara oreana ta sibona lasi, to unai gaukara oreana idia haginia bona idia gaukaralaia horoa Keristani taudia.” Unai dainai unai hereva amo “hesiai tauna mai ena kamonai, bona mai ena kara maoromaoro” ia gwauraia.a (Mataio 24:45) Witness taudia ese guna nega momo unai dala ai inai hereva “Society” idia gaukaralaia. To momokani, gaukara oreana bona “hesiai tauna mai ena kamonai, bona mai ena kara maoromaoro” edia anina be tamona lasi. Watch Tower Society ena dairekta taudia be vouti amo idia abia hidi, “hesiai tauna mai ena kamonai” oreana ena Witness taudia be Iehova ese ena lauma helaga amo ia horoa.
4. (a) Witness taudia momo be lalohadai kereredia idia koua totona, edena bamona edia hereva idia gwauraia? (b) Dahaka dainai ita gaukaralaia herevadia be dala maorona ai ita laloa be namo?
4 Iehova ena Witness taudia be idia hereva neganai, idia naria namonamo, lalohadai kereredia idia havaraia garina. Witness taudia momo be inai hereva, “Society ese ia hadibaia” idia gwauraia lasi, to inai bamona hereva, “Baibel ia gwau” eiava “lau lalo-parara Baibel ese ita ia hadibaia” idia gaukaralaia. Unai dala ai idia hahedinaraia Witness tauna ta ese Baibel ena hahediba herevadia ia abia dae neganai, sibona ena ura hegeregerena ia kara, danu unai amo inai lalohadai kererena, Witness taudia be tomadiho orea idauna ena siahu henunai idia noho lalohadaina idia koua. To momokani, namo lasi ita gaukaralaia herevadia ita hepapahuahulaia. Ita gaukaralaia herevadia be mai anina, lalohadai kereredia koua totona sibona. Keristani dala maorona ai idia ita laloa be namo. Baibel ese ita ia sisiba henia ‘anina lasi hereva ita hepapahuahulaia lasi.’ (2 Timoteo 2:14, 15) Baibel ese inai hakaua herevana ia gwauraia danu: “Bema umui emui hereva anina be idia hedinaraia lasi, daika ese hereva ena mamina do ia abia?”—1 Korinto 14:9.
Dirava Ena Lauma Dainai Taravatu be Haida Sibona
5. Korinto Ginigunana 10:23 ena anina be dahaka?
5 Aposetolo Paulo ia gwau: “Gau ibounai be taravatu lasi ita dekenai, to namo lasi ita laloa gau ibounai be namo ita dekenai.” Ma ia gwau: “Gau ibounai be taravatu lasi ita dekenai, to namo lasi ita laloa gau ibounai ese ita do idia hagoadaia.” (1 Korinto 10:23) Ita diba Paulo ia gwau lasi Dirava ena Hereva ese ia gwauraia dika gaudia be taravatu lasi ita dekenai. To bema Keristani tauna ena mauri idia biagua taravatudia be idaunegai Israela dekenai Dirava ia henia taravatu 600 mai kahana ida ita hahegeregerea, ita itaia idia be haida sibona. Unai dainai, ta be sibona ena lalona hegeregerena ia abia hidi diba gaudia be momo. Dirava ena lauma ese Iehova dekenai ena mauri ia gwauhamatalaia tauna ia hakaua bona unai dainai ura kwalimu ia moalelaia. Keristani tauna ese hereva momokani ia abia dae vaitani dainai, sibona ena lalona, Baibel amo ia hadibaia gauna, ena hemami ia badinaia bona Dirava ena lauma helaga ena heduru dekenai ia tabekau. Unai heduru dainai gwauhamata Keristani tauna ese “hagoadaia” bona “namo” gaudia ia abia hidi diba. Ia lalo-parara ia abia hidi gaudia be mai edia siahu ia gwauhamata henia Diravana ia tura henia karana dekenai.
6. Keristani heboudia dekenai, edena kara amo ita hahedinaraia hereva momokani ita abia dae vaitani?
6 Witness tauna ta ese Keristani heboudia dekenai ia haere karana amo ia hahedinaraia hereva momokani ia abiadae vaitani. Matamanai, reana stadi bukana o magasin ena hereva ia gwauraia lou. To gabeai, ia goada ia lao bona sibona ena hereva amo Baibel ena hahediba herevadia do ia gwauraia. Unai amo ia hahedinaraia ena laloa dalana ia habadaia noho bona ma haida idia gwauraia herevadia ia gwauraia lou sibona lasi. Lalohadai idauidau be sibona ena hereva amo bona hereva momokani be ena kudouna amo ia gwauraidia neganai, moale ia abia bona ia hahedinaraia sibona ena lalona ai ia daradara lasi.—Hadibaia Tauna 12:10; ma danu Roma 14:5b itaia.
7. Iehova ena hesiai taudia ese dahaka kara haida be edia ura dainai idia abia hidi?
7 Iehova ena Witness taudia edia kara ena badina be idia ese Dirava bona taunimanima idia lalokau henidia. (Mataio 22:36-40) Momokani, Keriso ena lalokau bamona lalokauna ese idia ia hakapua hebou bena tanobada ibounai oreana lalonai tadikaka bamona idia noho. (Kolose 3:14; 1 Petero 5:9) To idia be ura kwalimu taudia, bona idia ta ta ese idia abia hidi Dirava ena Basileia ena sivarai namona do idia harorolaia, politikol karadia amo do idia gini siri, rara do idia dadaraia, moale karadia haida do idia karaia lasi, bona Baibel ena hakaua herevadia do idia badinaia. Ta ese ia doridia lasi unai kara idia karaia totona. Unai kara be Witness taudia ai idia lao gwauraia taudia ese Keristani gwauhamatana idia do karaia lasi neganai, sibona edia ura dainai idia abia hidi mauri dalana ena kahana haida.
Hakaua Oreana Dekenai Edia Kara Ena Badina Idia Gwauraia, A?
8 Baibel ia hahedinaraia goevagoeva Keristani taudia momokanidia be Dirava idia hesiai henia ta ese idia ia doria dainai lasi. Ia gwau, ‘Iehova be Lauma; bona bema Iehova ena lauma be tau ta dekenai ia noho, ia dekenai ura kwalimu ia noho.’ (2 Korinto 3:17) To unai hereva momokanina be “hesiai tauna mai ena kamonai, bona mai ena kara maoromaoro” bona ena Hakaua Oreana dekenai edena bamona ita hakapua diba?—Mataio 24:45-47.
9, 10. (a) Keristani kongregesen lalonai, kwara dagina be edena bamona ita badinaia? (b) Aposetolo taudia edia negai Keristani kongregesen lalonai kwara dagina idia badinaia totona dahaka idia karaia?
9 Unai henanadai ita haerelaia totona, namona be Baibel ena kwara dagina ena hakaua herevana ita laloa. (1 Korinto 11:3) Efeso 5:21-24 ese ia hahedinaraia “Keriso be ekalesia ena kwarana,” bona “ekalesia ese Keriso ia kamonai henia.” Iehova ena Witness taudia idia lalo-parara hesiai tauna mai ena kamonai bona mai ena kara maoromaoro oreana taudia be Iesu ena lauma tadikaka. (Heberu 2:10-13) Unai hesiai oreana mai ena kamonai ena gaukara be Dirava ena taunimanima “edia aniani neganai” lauma aniani ia henidia. Inai dokona negana lalonai, Keriso ese unai hesiai oreana dekenai “iena kohu ibounai naria” gaukarana ia henia. Unai dagi dainai, sibodia Keristani taudia idia gwauraia taudia ibounai ese idia matauraia be namo.
10 Kwara dagina be mai anina lalo-tamona ia noho totona bona ‘gaukara ibounai karaia namonamo, mai dala maorona, bona karaia kava lasi’ totona. (1 Korinto 14:40) Aposetolo taudia edia negai unai idia karaia totona, hesiai tauna mai ena kamonai bona mai ena kara maoromaoro oreana amo horoa Keristani taudia haida idia abia hidi, bona unai orea ibounai ena ladana ai do idia gaukara. Unai murinai idia vara gaudia idia hamomokania, unai aposetolo taudia edia negai gaukara ia naria hakaua oreana ese Iehova ena lalo-namo bona hahenamo ia abia. Unai negai idia noho Keristani taudia ese mai edia moale ida unai dala idia abia dae. Momokani, ia havaraia anina namona idia abia dae bona idia dainai idia tanikiu bada.—Kara 15:1-32.
11. Hari Hakaua Oreana be edena bamona ita laloa be namo?
11 Unai dala ena namo be ia do noho. Hari, Iehova ena Witness taudia edia Hakaua Oreana lalonai be horoa Keristani taudia 10 idia gaukara, bona idia ibounai be lagani momo lalonai Keristani dalana idia badinaia taudia. Idia ese lauma dalanai Iehova ena Witness taudia idia durua, aposetolo taudia edia nega ena hakaua oreana ia karaia hegeregerena. (Kara 16:4) Hakaua Oreana tadikakadia ese tomadiho dalana maorona totona Baibel amo heduru idia henia neganai, Witness taudia ese mai edia moale ida unai idia abia dae, Keristani taudia ginigunadia idia karaia hegeregerena. Ena be Hakaua Oreana taudia be Iehova bona Keriso edia hesiai taudia, edia Keristani tadikaka bamona, to Baibel ese ita ia hadibaia, ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. . . . Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.”—Heberu 13:17.
12. Keristani taudia ta ta be daika dekenai edia kara ena badina idia gwauraia be namo?
12 Baibel ese Hakaua Oreana dekenai ia henia naria gaukarana ena anina be Iehova ena Witness taudia ta ta ese edia kara ena badina be ia dekenai idia gwauraia, a? Lasi, Paulo ena hereva Roma Keristani taudia dekenai ese unai ia hahedinaraia, ia gwau: “To oi, dahaka dainai oiemu varavara tauna oi gwauraia kerere? Bona oi, dahaka dainai oiemu varavara oi gwauraia ia be anina lasi? Badina be ita ibounai Dirava ena Kota henia gabuna ena vairana dekenai do ita gini. . . . Badina be ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.”—Roma 14:10-12.
13. Dahaka dainai Iehova ena Witness taudia ese edia haroro gaukarana idia ripotilaia?
13 To, idia gwau gau badana be Witness taudia ibounai ese edia haroro gaukarana idia ripotilaia, ani? Oibe, to unai ena badina be Witness taudia edia buka ta lalonai idia gwauraia hedinarai, ia gwau: “Iesu Keriso murinai idia raka taudia ginigunadia be haroro gaukara ena tubu daekau ripoti idia ura kamonai henidia. (Mar. 6:30) Unai gaukara ia bada ia lao neganai, ripoti idia karaia bona haroro gaukara idia karaia taudia edia ekspiriens namodia idia toredia danu. . . . (Kara 2:5-11, 41, 47; 6:7; 1:15; 4:4) . . . Unai Keristen gaukara taudia be gaukara sivaraina ena ripoti idia kamonai neganai goada idia davaria! . . . Unai idia karaia bamona, hari inai negai Iehova ena orea ese gaukara ena ripoti idia torea namonamo, badina unai gaukara be Mataio 24:14 ena hereva ia hagugurua.”
14 Hakaua Oreana be heduru gauna namona ta bona ia lalonai idia gaukara taudia edia abidadama ita tohotohoa be namo. (Filipi 3:17; Heberu 13:7) Keriso bona ena haheitalai idia badinaia dainai, idia be Paulo ena hereva idia gwauraia diba, ia gwau: “Ai ese umui emui abidadama ai biagua lasi. Ai diba umui emui abidadama lalonai umui gini goada noho. Unai dainai ai be umui danu ita gaukara hebou, emui moale do ai havaraia totona.” (2 Korinto 1:24) Hakaua Oreana ese momo idia badinaia daladia idia itaia namonamo dainai, Baibel ena sisiba ita badinaia ena namo bona Baibel ena taravatu bona hakaua herevadia ita badinaia daladia ia hahedinaraia, dika idia havaraia hunia gaudia dainai sisiba ia henia, bona “gaukara hebou” taudia dekenai hagoadaia hereva ia henia. Unai dala ai ena hesiai gaukarana ia hagugurua, tadikaka idia moale noho totona ia durudia, bona idia gini goada totona edia abidadama ia hagoadaia.—1 Korinto 4:1, 2; Tito 1:7-9.
14, 15. (a) Edena dala ai 2 Korinto 1:24 be mai ena anina Hakaua Oreana dekenai? (b) Namona be Keristani taudia ta ta ese dahaka hegeregerena gau ta idia abia hidi, bona unai idia karaia neganai dahaka idia diba momokani?
15 Bema Witness tauna ta ese Hakaua Oreana ia henia Baibel sisibana hegeregerena gau ta ia abia hidi, unai be ia sibona ena ura dainai ia karaia badina sibona ena Baibel stadi amo ia diba namonamo unai be dala maorona. Dirava ena Hereva ese Witness taudia ta ta ia veria, Hakaua Oreana ia henia Baibel sisibana ia badinaia totona, bona ia diba momokani ia abia hidi gaudia be mai edia siahu ia gwauhamata henia Diravana ia tura henia karana dekenai.—1 Tesalonika 2:13.
Stiuden Taudia Bona Tuari Taudia
16. Ena be ta ese ena ura hegeregerena kara ta ia abia hidi diba, to dahaka dainai haida be orea murimuri ai idia atoa?
16 To bema ta ese ena ura hegeregerena kara ta ia abia hidi diba, dahaka dainai Iehova ena Witness taudia haida be orea murimuri ai idia atoa? Ta ese ena diba hegeregerena ia abia hidi lasi kara dikana ta dainai ta be orea murimuri ai do idia atoa. To, unai kara be Baibel ese ia gwauraia karana, ta ese ena kara dika rohorohona, hegeregere Korinto Ginigunana ena karoa 5 ai idia noho kara dikadia, amo ia helalo-kerehai lasi neganai idia karaia. Unai dainai, ta be ia sihari kava dainai orea murimuri ai idia atoa diba, to unai do ia vara bema ia ese lauma dalanai naria taudia mai edia lalokau edia heduru ia dadaraia murinai sibona. Iehova ena Witness taudia sibona lasi ese unai Keristani karana idia badinaia. The Encyclopedia of Religion ia gwau: “Orea iboudiai idia gwau idia be mai edia maoro ena taravatu idia badinaia lasi memba taudia ese momo edia namo idia hadikaia karana amo orea idia naria. Tomadiho oreadia lalonai unai maoro ena anina idia habadaia, badina idia laloa unai kara [murimuri ai atoa karana] dainai ta be Dirava ena vairanai do ia maoro lou diba.”
17, 18. Orea murimuri ai atoa karana ena maoro be edena bamona ita hahedinaraia diba?
17 Iehova ena Witness taudia be Baibel stiuden taudia. (Iosua 1:8; Salamo 1:2; Kara 17:11) Hakaua Oreana ese ia karaia Baibel hadibaia program be edukeisini naria oreana ta ese ia karaia sikuli sediual ta ida ita hahegeregerea diba. Ena be unai sikuli oreana ese idia hadibaia gaudia ia torea lasi, to ia ese sediual ia karaia, hadibaia dalana ia abia hidi, bona hakaua herevadia ia gwauraia. Bema ta ese sikuli ena taravatu ia dadaraia momokani, stiuden taudia ma haida edia mauri ia hadikaia, eiava sikuli ena ladana namona ia hadikaia, sikuli amo idia atoa siri diba. Sikuli ena siahu taudia be mai edia maoro stiuden taudia ibounai edia namo totona kara ta idia karaia.
18 Iehova ena Witness taudia be stiuden taudia sibona lasi, idia be Iesu Keriso ena tuari taudia danu, bona idia hadibadia abidadama ena tuari namona do idia karaia. (1 Timoteo 6:12, NW; 2 Timoteo 2:3) Vaia, bema hanaihanai ta ena kara be Keristani tuari tauna ena kara hegeregerena lasi, Dirava ese do ia lalo-namo henia lasi. Keristani tuari tauna ese abia hidi karana ena ura kwalimu ia dogoatao dainai, ena ura hegeregerena dala ia abia hidi diba, to ia abia hidi dalana ena davana do ia abia danu. Paulo ia gwau: “Tuari tauna ese inai tanobada mauri ena gaukara idauidau bona tuari danu nega tamona ia karaia diba lasi. Lasi, to ia be tuari gaukara sibona do ia karaia, iena tuari biaguna do ia hamoalea totona. Tau ta danu gadara gabuna ia goada helulu neganai, bema gadara taravatu ia badinaia lasi neganai, ia ese kwalimu ahuna ia abia diba lasi.” (2 Timoteo 2:4, 5) Lo Keristani taudia, Hakaua Oreana taudia danu, be sibodia idia henia edia Gunalaia Tauna, Iesu Keriso, ena ura idia karaia totona, bona “gadara taravatu” idia badinaia danu mauri hanaihanai ena ahuna do idia abia totona.—Ioane 17:3; Apokalupo 2:10.
19. Keristani gwauhamatana ita stadilaia murinai, dahaka ita diba momokani?
19 Inai hereva momo ese idia hahedinaraia Iehova ena Witness taudia be Dirava ena hesiai taudia, taunimanima edia hesiai taudia lasi, ani? Idia be Keriso ese idia ia ruhaia ena ura kwalimu idia moalelaia gwauhamata Keristani taudia, bona idia ura Dirava ena lauma bona ena Hereva ese edia mauri idia biagua, Dirava ena kongregesen lalonai edia tadikaka danu mai edia lalo-tamona ida hesiai gaukara idia karaia neganai. (Salamo 133:1) Taunimanima ese unai idia itaia dainai, edia goada ena badina idia daradaralaia lasi danu. Idia ese salamo ia torea tauna ida ane idia abia diba: “Lohiabada be egu goada bona egu kesi. Lau ese ia lau abidadama henia noho. Ia ese lau ia durua noho, bona egu kudouna ia hamoalea noho. Mai moale danu, ane dekena amo Lohiabada do lau hanamoa.”—Salamo 28:7.
[Footnote]
a Lagani 1993 ai, Watchtower Bible and Tract Society of New York, Inc. ese ia halasia.
Edena Bamona Do Oi Haere?
◻ Edena dala ai Watch Tower Society bona unai bamona gaukara oreadia ma haida ese Iehova ena Witness taudia idia durua?
◻ Edena dala ai Keristani taudia ese Iehova ena Witness taudia edia Hakaua Oreana ena gaukara amo namo idia davaria?
◻ Dahaka dainai Iehova ena taunimanima ese edia haroro gaukarana idia ripotilaia?
◻ Edena negai gwauhamata Keristani tauna be orea murimuri ai idia atoa be maoro?
8. Edena henanadai ita laloa namonamo be namo?
[Picture on page 19]
Aposetolo taudia edia negai, hakaua oreana ese ia hamomokania edia hahediba herevadia be tamona
[Picture on page 23]
Tanobada hegegemadai Iehova ena Witness taudia be Iesu ese idia ia ruhaia ena ura kwalimu idia moalelaia