“Ena Hereva be mai Siahuna Bona Ia ese Lalona Ia Veria Goadagoada”

IEHOVA ena Witness tauna ta France amo ia torea, ia gwau: “Kerukeru amo haroro gaukara lalonai ia do lau gaukaralaia noho, badina ena hereva be mai siahuna bona ia ese lalona ia veria goadagoada.” United States amo Witness tauna ta ia gwau: “Maoromaoro ia lau duahia bona haroro gaukara lalonai lau ura dikadika do lau gaukaralaia, badina ai davaria taudia momo herea be idia lalo-hesiku bona Baibel idia abidadama henia lasi.” Dahaka idia herevalaia? Idia ese lagani 1997/98 ai, “Dirava Ena Hereva Abidadama Henia” Distrik Hebouheboudia dekenai, Watch Tower Society ese ia halasia rau 32 buklet ladana A Book for All People idia herevalaia.

Unai buklet be sikuli bada to Baibel idia diba sisina sibona taudia totona idia karaia. Unai bamona taudia momo be mai edia lalohadai goadadia Baibel dekenai, ena be nega ta idia duahia lasi. Unai buklet idia karaia ena badina be duahia tauna ena lalona do ia veria momokani Baibel ia tahua be namo. Unai buklet ese duahia tauna ia doria lasi, Baibel be Dirava ese ena lauma amo ia havaraia lalohadaina ia abia dae totona. To, ia lalonai idia noho gaudia idia hegeregere unai lalohadai do idia hamomokania. Ena hereva be auka lasi to ia be goevagoeva bona maoromaoro.

Ataiai idia noho herevadia ese idia hahedinaraia hegeregerena, hebouhebou dekenai idia noho taudia idia ura bada haroro gaukara lalonai unai buklet do idia gaukaralaia. Hegeregere, France dekenai, August 23 bona 24 ai, tanobada kahana idauidau amo idia vadivadi matamata taudia handred tausen momo be World Youth Day totona Paris dekenai idia hebou neganai, haroro gaukara badana ta idia karaia. Witness taudia 2,500 (idia momo edia mauri lagani be 16 ia lao 30) ese buklet 18,000 idia hariharilaia English, France, Germany, Italy, Poland, bona Spain gadodia ai.

Namona be inai buklet, A Book for All People, ita gaukaralaia iseda haroro gaukarana lalonai. Iseda ura be unai buklet ese lalo-maoro taudia ia hagoadaia bena do idia abia dae idia sibona ese Baibel idia tahua be namo.