Edia Hairai Korikorina Oi Matauraia, A?

AFRICA taudia korikoridia be animal bamona idia gogoa, bona miro bona bonana dikana lalonai kohu bamona America dekenai bouti amo idia abidia lao. Abidia taudia idia diba, lao henia gabuna dekenai do idia ginidae neganai, idia guia taudia 50 pesen do idia mase vadaeni. Mai dagedage ida famili taudia idia hapararaia, bena do idia hedavari heheni lasi. Taunimanima ese ma taunimanima idia kara dika henia karadia huanai, igui hesiai taudia hoihoilaia karana be dika herea. Unai bamona karadia ma haida be tano ta taudia ese idia davaria tano matamata taudia korikoridia, sibona idia gimaia diba lasi taudia, be mai edia dagedage ida idia guidia neganai idia vara.

Tau ta ena hairai korikorina hadikaia ena hisihisi ese ena tauanina botaia ena hisihisi ia hereaia diba. Unai kara ese taunimanima edia lalona ena goada ia hadikaia momokani. Ena be tano momo dekenai igui hesiai gaukarana idia hadokoa, to kara hehunidia amo taunimanima edia hairai korikorina idia hadikaia noho.

To Keristani taudia momokanidia ese Iesu Keriso ena sisiba idia badinaia toho bona edia dekena taudia idia ‘lalokau henia, sibona idia lalokau henia hegeregerena.’ Unai dainai, sibona dekenai idia henanadai, ‘Ma haida edia hairai korikorina lau matauraia, a?’​—Luka 10:27.

Mai Ena Hairai Korikorina

Diksenari ta ia gwau hairai korikorina (dignity) ena anina be ta ia hegeregere eiava ta ena noho ia hegeregere do idia hanamoa, idia matauraia, eiava idia lalo-namo henia. Unai ese Guba bona Tanobada edia Lohia Badana, Iehova Dirava, ena noho ia gwauraia namo herea! Momokani, Baibel ese hanaihanai Iehova bona ena lohia siahuna be hairai korikorina ida ia hakapua. Mose, Isaia, Esekiela, Daniela, aposetolo Ioane, bona ma haida be hahenamo idia abia, Dirava ena lauma amo idia matahanai neganai, Atai Herea Diravana bona guba dekenai ena lohia gabuna idia itaia, bona hanaihanai idia torea gaudia ese ena lohia siahuna bona ena hairai korikorina idia hahedinaraia. (Esodo 24:​9-​11; Isaia 6:1; Esekiela 1:​26-​28; Daniela 7:9; Apokalupo 4:​1-3) Hanamoa gurigurina ai, King Davida ia gwau: “Lohiabada e, goada bona siahu bona hairai bona kwalimu, bona King ena toana be oiemu. Guba bona tanobada dekenai idia noho gaudia ibounai be oiemu.” (1 Sivarai 29:11) Oibe, Iehova Dirava ia hegeregere momokani iboudiai ese do idia hanamoa bona matauraia.

Iehova ese sibona ena toana hegeregerena taunimanima ia havaraia neganai, edia mauri be mai anina, sibona idia matauraia diba, bona edia hairai korikorina ia henidia. (Genese 1:​26) Unai dainai, ma haida ita kara henia neganai, idia ta ta ita matauraia be maoro. Unai ita karaia neganai, taunimanima edia hairai korikorina ia henia Tauna, Iehova Dirava, ita abia dae.​—Salamo 8:​4-9.

Famili Lalonai Hairai Korikorina Laloa

Dirava ena lauma helaga ese ia hakaua lalonai, aposetolo Petero, headava tauna ta, ese idia headava Keristani tatau dekenai sisiba ia henia, edia adavadia ‘be goada herea lasi dainai, do idia naria namonamo bona idia matauraia.’ (1 Petero 3:7; Mataio 8:​14) Aposetolo Paulo danu ia gwau: “Hahine danu ese iena adavana do ia matauraia.” (Efeso 5:33) Unai dainai, headava lalonai ta ese ena adavana ena hairai korikorina ia matauraia be Baibel ena taravatu ta. Edena dala ai unai ita hahedinaraia diba?

Bema tau bona ena adavana ese taunimanima vairadiai bona sibodia idia noho neganai, hereva namodia idia gwauraia bona kara namodia idia hahedinaraia, unai ese edia turana karana ia hagoadaia, ranu ese tubutubu gauna ia hagoadaia hegeregerena. To, hereva auka, hadikaia herevadia, eiava hahemaraia herevadia, nega momo televisen ena program lalodiai ita kamonai herevadia unai, ese dika idia havaraia. Idia dainai ta ia laloa diba ia be anina lasi, do ia lalo-metau, bona ia badu; ena hemami idia hadikaia momokani diba bena gabeai idia hanamoa lou be auka.

Danu, ma haida edia hairai korikorina ita matauraia ena anina be idia noho bamona idia ita abia dae, iseda lalona ai ita itaia tauna ta bamona ai idia ita haidaua toho lasi eiava ma haida ida idia ita hahegeregerea lasi. Unai be mai anina bada tau bona ena adavana huanai. Dala namona ai idia herevahereva bona lalohadai idia gwauraia bona idia gari lasi ta ese do ia gwauraia dika eiava ia gwau henia neganai, edia turana karana do ia namo herea. Bema headava lalonai tau bona hahine be sibona edia kara korikorina idia hahedinaraia diba, edia noho rumana be dagedage tanobadana dikana amo heau mauri gabuna ai do ia lao.

Baibel ese natudia ia sisiba henia edia tama sina do idia matauraia bona idia kamonai henia. To danu, aonega bona lalokau idia hahedinaraia tama sina ese idia abia dae edia natudia be mai edia hairai korikorina. Natudia edia kara namodia dainai idia hanamodia, bona bema matahakani idia abia be namo neganai mai edia haheauka ida idia henia, ‘Iehova ena lalona biagua karana ai do idia naridia’ namonamo. Bema hanaihanai natudia edia kara idia gwauraia dika, mai badu ida idia boiboi, bona hadikaia herevadia hegeregere “kavakava” eiava “anina lasi” amo idia gwauraidia, unai ese natudia idia habadua.​—Efeso 6:4, NW.

Keristani elda bona tamana ta, natuna memero toi bona kekeni toi ia hadibaia noho tauna, ia gwau: “Kingdom Hall ai, bema matahakani idia abia be namo, hehuni dalanai ai henia. Nega momo, sisina ai dogoatao eiava ai raraia sibona be hegeregere. Bema matahakani aukana idia abia be namo, emai noho rumana dekenai natudia ma haida ese idia itaia lasi neganai ai henia. Hari natudia idia tubu vadaeni neganai, matahakani ena anina be idia ta ta edia dabu hegeregerena Dirava ena Hereva amo sisiba be mai aonega bona mai lalokau ida ai henia. Unai gaudia be ma haida dekenai ai gwauraia hedinarai lasi, unai dala amo natudia ta ta edia maoro unai gaudia dekenai bona edia hairai korikorina ai matauraia.”

Namona be ita laloaboio lasi famili lalonai hemataurai herevadia bona karadia ita hahedinaraia be gau badana. Namo lasi famili taudia be ta ta idia diba namonamo dainai inai hereva, “mani emu kara,” “ekskius,” bona “sori” idia gwauraia lasi. Hemataurai karadia be mai anina bada ita sibona eda hairai korikorina ita naria bona ma haida edia ita matauraia totona.

Keristani Kongregesen Lalonai

Iesu ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.” (Mataio 11:28) Hisihisi idia ania taudia, lalo-metau taudia, bona natudia maragidia danu, idia ura Iesu dekenai idia lao. Unai negai hekokoroku bona sibona edia maoromaoro idia laloa bada dubu gunalaia taudia bona lohia taudia ese idia matauraidia lasi. To idia davaria Iesu ese edia hairai korikorina hegeregerena ia kara henidia.

Iesu ita tohotohoa dainai, ita ura iseda tadikaka ese ita amo goada idia abia. Unai dainai dala ita tahua iseda hereva bona kara amo ita hagoadadia totona. Nega ibounai iseda herevahereva lalonai hebogahisi hereva namodia ita gwauraia be maoro. (Roma 1:​11, 12; 1 Tesalonika 5:​11) Ita gwauraia herevadia bona hereva daladia ita naria namonamo karana amo ita hahedinaraia ma haida edia hemami ita laloa bada. (Kolose 4:6) Keristani heboudia dekenai bema iseda dabua bona kara be namo, unai amo ita hahedinaraia iseda Dirava ena hairai, ena tomadiho karana, bona iseda tadikaka ita matauraia bada.

Iesu ese taunimanima ia durua neganai danu, edia hairai korikorina ia matauraia. Nega ta lasi sibona ia abia isi totona ma haida ia hahemaraia. Lepera tauna ta be ena gorere hanamoa totona Iesu dekenai ia mai neganai, ia miro bona dika dainai ia lulua lasi, danu ia ese kara badana amo taunimanima edia lalona ia veria lasi ia idia laloa totona. To, unai lepera tauna ese Iesu ia noia, “Lohiabada e, bema oi ura, lau do oi hagoevaia diba” neganai, Ia ese unai lepera tauna ena hairai korikorina ia laloa bada bona ia gwau, “Lau ura.” (Luka 5:12, 13) Bema heduru idia ura taudia ita durua sibona lasi to ita hamaorodia danu ita dekenai metau idia henia lasi to idia ita ura henidia bona ita lalokau henidia, unai be namo herea! Nega momo tanobada dekenai hemarai taudia, lalo-metau taudia, bona tauanina dika taudia idia laloa lasi, idia dadaraia, eiava idia hahemaraia. To namona be edia Keristani tadikaka bona taihu bogaraginai turana bona heabidae karadia momokanidia idia mamia. Unai ia vara totona ita ese iseda kahana ita huaia be namo.

Ena be Iesu ena hahediba taudia edia kerere bona kara be idauidau, to ia ese “sibona ena lalokau taudia” bamona idia ia ura henia bona “ia lalokau henidia, ia lao bona dokona.” (Ioane 13:1) Ia itaia edia kudouna be goeva bona edia lalona ibounai ida ena Tamana idia badinaia. Unai hegeregerena, iseda tadikaka ena lalohadai korikori ita gwauraia dika lasi, badina iseda gaukara dalana idia badinaia lasi eiava edia kara ma haida ese ita idia habadua. Iseda tadikaka edia hairai korikorina ita matauraia dainai, idia noho hegeregerena ita lalokau henidia bona ita abidia dae, mai abidadama ida ita laloa idia danu ese Iehova idia lalokau henia bona badina maorona dainai ia idia hesiai henia.​—1 Petero 4:​8-​10.

Namona be elda taudia idia naria namonamo orea lalonai idia noho taudia edia lalona idia hahisia kava garina. (1 Petero 5:​2, 3) Elda taudia be kongregesen tauna ta, ia kara dika tauna, ida idia hebou neganai, namona be mai edia hebogahisi ida idia hereva bona hemarai idia havaraia henanadai idia henia kava lasi. (Galatia 6:1) Ena be sisiba aukana idia henia be namo, to kara dika tauna ena hairai korikorina bona sibona ia matauraia karana maorona idia matauraia.​—1 Timoteo 5:​1, 2.

Sibona Eda Hairai Korikorina Ita Naria

Dirava ese ena toana bamona ita ia karaia dainai, dina ta ta ai, ita karaia diba hegeregerena, ena kara namodia​—ena hairai danu​—ita hahedinaraia. (Genese 1:​26) Unai hegeregerena, inai sisiba “oiemu badibadinai tauna dekenai oi lalokau henia, oi sibona oi lalokau henia bamona” ese ia hahedinaraia dala maorona ai sibona dekenai eda hairai korikorina bona hemataurai ita henia be namo. (Mataio 22:39) Momokani, bema ita ura ma haida ese ita idia matauraia bona eda hairai korikorina idia laloa bada, namona be ita hahedinaraia ita be hegeregere unai do ita abia.

Sibona ita matauraia totona bona sibona eda hairai korikorina ita naria totona, iseda lalona ia goeva noho be gau badana. Bema iseda lalona ia miro bona ita ia botaia noho, karaharaga do ita laloa diba ita be anina lasi, do ita badu, bona do ita lalo-metau. Unai dainai, bema ta ese kara dika badana ia karaia, namona be maoromaoro ia helalo-kerehai bona lauma dalanai elda taudia edia heduru ia tahua, unai amo ‘Iehova ese goada matamata do ia henidia.’ Unai goada matamata ia abia neganai, sibona ena hairai korikorina ia abia lou bona sibona ia matauraia lou diba.​—Kara 3:​19.

To unai ia hereaia karana be hanaihanai ita hekwarahi iseda lalona, Baibel ese ia hadibaia lalona unai, ita naria namonamo, gau ta ese ia hamiroa eiava ia hamanokaia garina. Bema dina ta ta iseda mauri ibounai lalonai​—ita aniani, ita inuinu, bisinesi o moale karadia ita karaia, tatau bona hahine ita kara henidia neganai​—sibona eda ura ita biagua karana ese ita do ia durua, iseda lalona do ia goeva bona eda mauri lalonai Dirava ena hairai ita hahedinaraia totona.​—1 Korinto 10:31.

Edena bamona bema iseda kerere dainai ita abia lalohisihisi ia ore lasi? Eiava bema guna ta ese ita ia hadikaia dainai hisihisi ita ania noho? Unai gaudia ese iseda hairai korikorina idia hadikaia diba bona reana do ita daradoko. King Davida ena hereva Salamo 34:18 ai ese ita idia hagoadaia diba, ia gwau: “Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho”! Iehova ena hesiai taudia bema idia daradoko bona idia laloa noho idia be anina lasi neganai, Ia be mai ena ura ida idia do ia durua. Ia ita guriguri henia bona lauma dalanai idia goada taudia, hegeregere Keristani tama sina, elda taudia, bona kongregesen lo taudia ma haida edia heduru ita tahua be dala badana sibona ita matauraia lou bona sibona eda hairai korikorina ita abia lou totona.​—Iamesi 5:​13-​15.

To namona be ita naria namonamo, ita sibona eda hairai korikorina ena hetoana ita hanaia bona ita hekokoroku garina. Baibel ena sisiba ia gwau: “Oi hekokoroku lasi. Oi ese sibona oiemu maka do oi diba, bona inai maka do oi hanaia lasi, do oi laloa lasi oi be bada momokani. Umui ibounai emui diba ena maka do umui laloa maoromaoro, Dirava ese umui ta ta dekenai abidadama ia henia hegeregerena.” (Roma 12:3) Ena be sibona ita matauraia be maoro, to ita ura lasi sibona eda namo ita habadaia kava. Danu ita ura lasi taunimanima edia hairai korikorina ita laloa kerere bena ita laloa ta be sibona ia laloa bada dainai taunimanima vairanai ladana bada ia abia noho totona ia hekwarahi bada hegeregerena.

Oibe, ma ta ena hairai korikorina ita matauraia be Keristani kara badana. Iseda famili taudia bona iseda Keristani tadikaka iboudiai idia hegeregere iseda hemataurai bona lalo-namo idia abia. Namona be ita lalo-parara Iehova ese ita ta ta dekenai eda hairai korikorina bona hahenamo ia henia bona idia ita naria be namo. To mai anina bada gauna be, iseda guba Tamana, Iehova Dirava, ena hairai, ta ese ia hereaia diba lasi gauna, bona ena dagi siahuna ita matauraia bada.

[Picture on page 31]

Matamata taudia ese tauanina dika taudia idia matauraia diba