Haida Oi Sisiba Henidia Neganai Oi Matauraidia, A?

HEMATAURAI kara amo ta ese sisiba ia henia neganai namo ia havaraia! Edward ia gwau: “Ta ese hebogahisi amo ia sisiba bona oi ia laloa neganai, hetura kara namona ia havaraia.” Warren ia gwau: “Mamina oi abia, oi ia sisiba henia tauna ia ura oi ia kamonai henia, oi ia matauraia bona oi ia laloa bada neganai, ia auka lasi sisiba oi abia dae.” Norman ia gwau: “Sisiba henia tauna ese lau ia matauraia neganai, lau gari lasi ia lau hereva henia bona iena sisiba lau tahua totona.”

Taunimanima Matauraidia be Maoro

Mai hebogahisi bona mai lalokau ida ta ese ita ia sisiba henia karana ita ura henia. Oi ura henia dalana amo ta ese oi ia sisiba henia hegeregerena ai, oi ese ma haida danu oi sisiba henidia, bena unai ese namo do ia havaraia. (Mataio 7:12) Sisiba ia henia namonamo tauna ese nega ia atoa ia kamonai totona, bona ia ura ia sisiba henia tauna ena lalona ia diba​—iena lalohadai, iena kara, bona iena mamina danu ia diba​—ia ura lasi kerere ia tahua bona ia samania.​—Hereva Lada-isidia 18:13.

Hari inai nega lalonai, namona be sisiba idia henia taudia, Keristen elda taudia danu, be sisiba idia henia neganai dala idia tahua ma haida idia matauraidia totona. Badina be dahaka? Badina taunimanima momo be ma haida idia matauraidia lasi. Taunimanima ese unai bamona kara idia tohotohoa haraga. Reana oi laloa diba momo taudia, tomadiho gunalaia taudia, eiava ma haida ese hemataurai kara do idia hahedinaraia; to nega momo idia karaia lasi. Hegeregere inai bamona, gaukara gabuna dekenai, gaukara amo ta idia hadokoa neganai be lalo-hekwarahi bona lalo-metau negana biaguna bona gaukara amo ia hadokoa tauna dekenai. Unai neganai gaukara amo ia doko tauna be sibona ia laloa maragi diba, bema gaukara biaguna be hemataurai lasi dalanai ia hadokoa neganai unai ia vara diba. The Vancouver Sun ia gwau, namona be unai bamona idia karaia biaguna taudia be “hereva idia gwauraia hedinarai namonamo, idia hereva momo lasi, edia dagi hegeregerena idia karaia, bona gaukara amo idia hadokoa tauna idia matauraia.” Oibe, taunimanima iboudiai ita matauraidia be namo.

General Assembly of the United Nations ena hereva be inai: “Taunimanima iboudiai be ruhaia mauri namona dekenai idia vara, bona iboudiai idia hegeregere hemataurai heheni kara ai bona taravatu ai be namo. Iboudiai idia laloa namonamo diba, bona iboudiai be mai edia lalona ena mamina, bona tadikaka bamona idia kara heheni be namo.” Taunimanima matauraidia karana ia dika diba dainai, United Nations ena Taravatu bona Universal Declaration of Human Rights ena hamatamaia herevana dekenai unai kara idia gwauraia. Idia gwau, “taunimanima edia maoro daladia, bona taunimanima matauraidia karana bona edia namo” idia abia dae be anina bada gaudia.

Iehova ese Taunimanima Ia Karaia Neganai Hemataurai Karana Ia Henia

Iehova be hemataurai Diravana. Iena lauma amo ia torea Herevana dekenai ia hereva maoro, ia gwau: “Hemataurai bona hairai be ia vairanai,” bona “[Iena] hairai be guba atai ai idia herevalaia.”​—1 Sisiga 16:27; Salamo 8:1.

Ia be mai ena hemataurai Diravana bona ia be Gau Ibounai Ataiai Ia Lohia Tauna dainai, guba ai bona tanobada ai ia havaradia gaudia iboudiai ia matauraidia. Idia matauraia taudia iboudiai amo ia matauraia bada tauna be hairai ia abia bona ia lohia Natuna, King, Keriso Iesu. David be peroveta hereva dalanai inai bamona ia torea, ia gwau: “Oi matauraia bona oi hahairaia.”​—Salamo 21:5; Daniel 7:14.

Madi, histori ese ia hahedinaraia taunimanima be unai kara idia hadikaia momo. Mai ena siahu aneruna ta be sibona ena kara dainai Satana Diabolo ai ia lao, bona ia gwau Dirava ia lohia be ia maoro lasi, ia gwau Dirava be kara maoromaoro lasi, bona namo lasi Dirava ia lohia. Unai ia karaia neganai Iehova ena lohia dalana bona Iena ladana badana ia hadikaia, bona Ia lohia ena maoro ia gwau-edeede henia. Hekokoroku dalana ai Satana be sibona ia matauraia momo. Diabolo bamona, siahu bada tanobada lohia taudia, Baibel ena nega lalonai Nebukadnesara bamona, be sibodia edia ‘siahu bona hairai’ idia heagilaia. Iehova idia matauraia lasi, to sibodia matauraia karana idia habadaia momo. (Daniel 4:30) Satana ena dagedage lohia dalana, taunimanima ia hametaudia neganai, ese guna taunimanima matauraidia dalana ia hadikaia bona hari danu ia do hadikaia noho.

Nega ta oi idia matauraia lasi, a? Nega ta sisiba oi abia neganai, sisiba henia dalana dainai oi laloa oi kerere bada, oi hemarai momokani, emu ladana idia hadikaia, eiava oi laloa oi maragi momokani bamona, a? André ia gwau: “Egu mamina be lau idia laloa lasi, lau idia hebogahisi henia lasi, bona lau idia matauraia lasi. Lau idia kara henia lau be anina lasi bamona. Unai dainai lau badu bona lau lalo-hekwarahi bada, bona lau lalo-metau danu.” Laura ia gwau: “Bema oi laloa ta ese emu namo ia laloa lasi, iena sisiba oi abia dae be auka.”

Unai dainai, Keristen naria taudia be sisiba idia abia Dirava ena mamoe taudia idia matauraidia bona idia kara namo henidia totona. (1 Petero 5:​2, 3) Bema nega haida ma haida oi sisiba henidia be maoro bona unai amo namo do idia abia diba, edena bamona tanobada taudia edia lalohadai bona kara, taunimanima matauraidia lasi karana, oi tohotohoa lasi? Dahaka ese oi do ia durua emu Keristen tadikaka, bona oi sibona danu, oi matauraia noho totona?​—Hereva Lada-isidia 27:6; Galatia 6:1.

Hemataurai Idia Habadaia Haheganidia

Dirava ena Hereva be mai ena hereva hemataurai karana dekenai. Diba momo sisiba henia tauna be Dirava ena Hereva ena sisiba do ia tabekau henia momokani, ia be tanobada ena aonega do ia tahua lasi. Toretore Helagadia lalodiai anina bada sisiba herevadia idia noho. Tadikaka idia badinadia neganai, sisiba karaia tauna bona ia sisiba henia tauna be hemataurai idia abia. Unai dainai, Paulo ese Keristen naria tauna Timoteo ia hadibaia, ia gwau: “Tau badana do oi gwau henia lasi. To mai manau danu do oi hereva henia, ia be oiemu tamana bamona. Eregabe taudia do oi hereva henia, idia be oiemu tadikaka bamona. Hahine badadia do oi hereva henia, idia be oiemu sinana bamona. Kekeni taudia do oi hereva henia, oiemu taihuna do oi hereva henia bamona, mai oiemu laloa goevagoeva danu.” (1 Timoteo 5:​1, 2) Unai taravatu bema ita badinaia neganai, lalo-dika, hisihisi, bona hemarai do ita koua diba!

Oi itaia, sisiba namona henia dalana be ita sisiba henia tauna ita matauraia, bona ita diba ita kara henia mai hemataurai bona ita laloa bada be namo. Keristen elda taudia, loaloa naria taudia danu, be inai sisiba idia badinaia toho be namo. Ena lalona idia hamaoromaoroa toho tauna ena laloa bona kara ena badina idia tahua. Namona be idia ura iena lalohadai idia kamonai. Dala iboudiai dekenai idia ura lasi idia durua tauna idia hahemaraia, ena dagi idia hamaragia, eiava ena ladana idia gwauraia dika.

Oi be elda dainai, emu tadikaka oi hamaoroa oi laloa bada bona oi ura iena hekwakwanai dekenai oi durua. Doketa namona ta oi vadivadi henia bona emu tauanina ia sekea neganai, unai bamona ia karaia. Reana oi hemarai, keru daiutuna lalonai emu dabua oi kokia neganai. Oi ia matauraia bona emu gorere ena badina ia tahua totona dabua ta amo emu tauanina ia koua doketa tauna dekenai oi moale! Unai hegeregerena, Keristen sisiba henia tauna be ta ia matauraia neganai ena be ia sisiba goada, to ia hebogahisi henia hegeregerena dabua amo ia koua bamona. (Apokalupo 2:13, 14, 19, 20) To sisiba aukana, vaira auka, bona hebogahisi lasi amo ia henia neganai unai be hegeregere tauanina amo emu dabua ia kokia bamona, bona oi hemarai bada badina oi ia matauraia lasi bamona.

Haroro School naria taudia idia naria namonamo mai hemataurai ida sisiba idia henia totona. Buruka taudia idia sisiba henidia neganai, edia tama sina idia lalokau henidia hegeregerena sisiba idia henia. Idia durudia, idia moale henidia, bona idia hebogahisi henidia. Namona be idia sisiba henia tauna ena mamina idia laloa bada. Unai neganai sisiba henia bona sisiba abia dae dala maorodia idia karaia diba.

Elda taudia e, namona be umui laloatao, sisiba namona ese taunimanima ia abidia isi, ia hagoadadia, ia durudia, bona gau namodia ia habadaia. Efeso 4:29 ia gwau: “Hereva mirodia do umui gwauraia lasi, hereva namodia sibona. Vadaeni emui hereva idia kamonai taudia ese durua bona namo do idia davaria, bona emui hereva dekena amo manoka taudia do umui hagoadaia.”

Namo lasi hereva aukadia amo, gado aukana amo, eiava lalo-auka herevadia oi henia. To namona be unai tauna oi matauraia, bona oi ura ia lalo-goada, bona sibona ia laloa namo, ia gaukara namonamo totona hagoadaia hereva dalanai oi durua. Emu hereva oi hamatamaia neganai, iena kara namodia dainai oi hanamoa, namo lasi emu hereva dainai ia lalo-hekwarahi bona ia laloa ia be anina lasi. Bema oi be elda gaukara oi karaia, emu ‘siahu oi gaukaralaia haida oi hagoadaia’ totona.​—2 Korinto 10:8.

Oibe, namona be Keristen naria taudia edia sisiba ese taunimanima ia hagoadadia, ia durudia. Namo lasi sisiba dainai idia lalo-manoka eiava sisiba ese idia ia “hagaria.” (2 Korinto 10:9) Ena be ta ese kara dika badana ia karaia, to ita matauraia be namo. Namona be sisiba oi henia neganai, mai hebogahisi bona mai hereva goadadia danu oi henia, ia helalo-kerehai totona.​—Salamo 44:15; 1 Korinto 15:34.

Anina bada gauna be inai, Dirava ena Taravatu Israel taudia dekenai be mai ena hahegani unai kara dekenai danu. Idia sisiba henia diba, bona tauanina kwadia danu idia karaia diba, to dala ia do noho unai tauna idia matauraia totona. “Ena kerere metauna hegeregerena” idia kwadia diba, to unai namba idia hanaia diba lasi. Nega hida idia kwadia ena namba idia makaia, bena unai bamona kara dika tauna do idia “hadikaia” lasi.​—Deuteronomi 25:​2, 3.

Iesu ena kara be helalo-kerehai kara dika taudia edia mamina ia laloa danu. Isaia ese ia perovetalaia, ia gwau: “Siriho pou do ia hamakohia lasi; bona lahi maragina do ia habodoa lasi. Hahemaoro maoromaoro be mai momokanina ida do ia karaia.”​—Isaia 42:3; Mataio 12:​17, 20; Luka 7:​37, 38, 44-50.

Ita hebogahisi be mai anina bada be Iesu ese ia gwauraia lou Ororo dekenai ia haroro neganai, ia gwau: “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” (Mataio 7:12) Taunimanima idia kara namo heheni karana habadaia totona unai hahegani be mai anina bada, unai dainai idia gwauraia Taravatu Hereadaena. Bema oi be Keristen elda ta, ma haida oi sisiba henidia mai hebogahisi ida bona mai hemataurai ida neganai edena bamona oi ia durua?

Namona be oi laloatao oi danu oi kerere diba. Iakobo ia hereva bamona, “ita ibounai ese nega momo kerere ita karaia.” (Iakobo 3:2) Unai oi laloatao neganai, oi ia durua ma haida edia kerere be idia ida do oi herevalaia neganai emu hereva do ia auka lasi bona emu lalohadai do oi biagua. Namona be oi diba edena gaudia dainai idia gari. Unai amo edia kerere do oi tahua momo lasi, edia kerere maragidia do oi laloa bada lasi. Iesu ese unai ia herevalaia bada, ia gwau: “Umui emui lalona dekenai taunimanima umui gwauraia kerere lasi, vadaeni Dirava ese umui do ia gwauraia kerere lasi. Badina be umui gwauraia kerere karana hegeregerena Dirava ese umui do ia gwauraia kerere. Taunimanima dekenai umui kara henia hegeregerena be Dirava ese danu umui dekenai do ia kara henia.”​—Mataio 7:​1, 2.

Ma Haida Matauraidia—Diabolo Oi Inai Henia

Satana ena kara be ia ura oi sibona oi matauraia karana ia kokia, ia ura oi laloa oi be hegeregere lasi bona anina lasi, bona ia ura emu lalo-goada ia haorea. Satana ese tanobada tauna ta ia gaukaralaia abidadama tauna Iobu ia doria sibona ia laloa maragi totona. Koikoi tauna Elifasa ia gwau: “[Iehova] ese ena hesiai taudia ia abidadama henidia lasi, bona iena hereva idia abia loaloa taudia [aneru helagadia] edia kerere ia itaia. Unai dainai raro rumadia ai idia noho taudia [kara dika tanobada taudia] be unai bamona danu, edia badina be kahu! Kaubebe idia moia haraga bamona, idia danu ia moidia.” (Iobu 4:​18, 19) Ia laloa, Dirava dekenai Iobu be anina bada lasi kaubebe bamona. Momokani, Elifasa bona ena turadia edia sisiba ese Iobu ia hagoadaia lasi, bona Iobu be guna nega namodia bema ia laloaboio diba. Idia dekenai, iena abidadama kara gunadia, iena ruma bese biagua dalana, iena turana karana Dirava ida, bona iena hebogahisi harihari gaudia be anina lasi.

Hari inai negai danu, idia helalo-kerehai kara dika taudia be unai bamona idia laloa haraga diba, bona dika gauna be edia ‘lalohisihisi ese edia abidadama do ia haorea diba.’ Elda taudia e, namona be unai bamona taudia oi sisiba henidia neganai, oi matauraidia dalana amo “emui lalokau [idia] dekenai do umui hedinarai henia lou.” (2 Korinto 2:​7, 8) William ia gwau: “Bema ta ese ita ia matauraia lasi, ia auka sisiba ita abia dae totona.” Namona be oi hagoadadia, idia laloa Dirava ena matana dekenai idia be mai anina. Namona be oi hadibadia lou, idia hanai laganidia lalodiai Iehova be idia karaia abidadama hesiai gaukarana ia laloa bona ia be “maoromaoro momokani. Unai dainai ia ese emui kara namodia do ia laloaboio lasi.”​—Heberu 6:10.

Sisiba oi henidia neganai, dahaka gaudia ese oi idia durua ma haida oi matauraidia totona? Namona be oi diba taunimanima iboudiai be mai edia maoro ita matauraidia totona, badina Dirava ese iena toana dekenai ia havaradia. Iehova Dirava bona Iesu Keriso dekenai idia be mai anina bada; mauri davana boubouna bona toreisi lou dalana idia karaia dainai unai ia hamomokania. Ma danu, Iehova ese Keristen taudia ia matauraidia bada, badina idia dekenai ‘gaukara ia henidia,’ ia gaukaralaidia uru dikana idia boiridia Dirava ida maino idia karaia totona.​—1 Timoteo 1:12.

Elda taudia e, namona be umui laloatao emui Keristen tadikaka momo be do ia goeva tanobadana ai do idia vareai taudia. Idia be unai bamona anina bada taudia dainai, umui matauraidia be namo. Sisiba oi henia neganai, namona be umui laloatao, Iehova bona Iesu Keriso ese idia lalodia bada, bona umui gaukara goada emui tadikaka be umui durudia Satana ia henidia hahetoho negadiai sibodia do idia matauraia noho bona sibodia idia laloa bada totona.​—2 Petero 3:13; 1 Petero 3:7 itaia danu.

[Box on page 29]

Taunimanima Matauraidia Karana amo Sisiba Henia Dalana

(1) Namona be mai momokani ida umui hanamodia. (Apokalupo 2:​2, 3)

(2) Oi kamonai namonamo. Hekwakwanai bona sisiba ena badina be hebogahisi amo oi gwauraidia namonamo. (2 Samuel 12:1-14; Hereva Lada-isidia 18:13; Apokalupo 2:4)

(3) Namona be Revareva Helagadia amo emu sisiba oi henia. Oi lalo-goada, oi laloa namonamo, bona oi hagoadaia, hebogahisi oi hahedinaraia. Oi sisiba henia tauna oi matauraia ia hemarai lasi totona. (2 Timoteo 3:16; Tito 3:2; Apokalupo 2:​5, 6)

(4) Oi sisiba henia tauna oi hadibaia sisiba ia abia dae bona ia badinaia neganai, hahenamo do ia abia. (Heberu 12:​7, 11; Apokalupo 2:7)

[Picture on page 26]

Sisiba idia henia neganai, namona be Keristen elda taudia ese unai taudia haida idia matauraidia