Oi Laloatao, A?

Vanegai idia halasia Gima Kohorona magasin edia namo oi abia, a? Vadaeni, mani inai henanadai amo sibona oi tohoa dahaka oi laloatao diba:

◻ “Lohiabada ena Dina” bona “Iehova ena Dina” edia idau be dahaka? (Apokalupo 1:​10; Ioela 2:​11)

“Lohiabada ena Dina” be Apokalupo karoa 1 ia lao 22 dekenai idia herevalaia matahanai 16 edia anina bona Iesu ia perovetalaia gaudia, ena hahediba taudia edia henanadai do ia giroa mai ena toana be dahaka idia haerelaia gaudia ibounai, do idia vara. Iehova ese Satani ena tanobada dikana ia hahemaoro henia neganai, Iehova ena gari havaraia dinana do ia hamatamaia. Unai be Lohiabada ena dina ena kahana badana. (Mataio 24:​3-​14; Luka 21:11)​—12/15, rau 11.

◻ Makarios Baibel ena gau badadia haida be dahaka dahaka?

Inai ladana, Iehova, be Makarios Baibel lalonai nega 3,500 mai kahana ia hedinarai. Russia gado ai idia torea tomadiho bukadia ia stadilaia tauna ia gwau: “[Unai] hahanaia gaukara be Heberu toretore ia badinaia, bona gado be ia goeva bona ia maoro.”​—12/15, rau 27.

◻ Iesu ia gwauraia “hereva momokani,” ita do ia ruhaia gauna, be dahaka? (Ioane 8:32)

Iesu ese ia gwauraia “hereva momokani” ena anina be Dirava ena lauma amo Baibel lalonai ia halasia gaudia—mai anina bada gauna be Dirava ena ura.​—1/1, rau 3.

◻ Hari inai negai Iehu bona Iehonadaba be daidia?

Iehu be Iesu ia laulaulaia, bona tanobada dekenai Iesu ena hereva idia gwauraia taudia be horoa Keristani taudia, “Dirava ena Israela” taudia. (Galatia 6:​16; Apokalupo 12:17) Iehonadaba ia lao Iehu ida ia hedavari totona hegeregerena, bese idauidau amo “hutuma bada herea” taudia idia mai tanobada ai Iesu ena hereva idia gwauraia taudia idia durua totona. (Apokalupo 7:​9, 10, NW; 2 King Taudia 10:15)​—1/1, rau 13.

◻ ‘Dirava ida raka noho’ karana ena anina be dahaka? (Genese 5:​24; 6:9)

Ena anina be unai bamona idia karaia taudia, hegeregere Enoka bona Noa, be edia kara amo idia hamomokania edia abidadama Dirava dekenai be ia goada. Iehova ia oda henia gaudia idia karaia bona ena kara taunimanima dekenai idia dibaia bona unai diba hegeregerena idia mauri noho.​—1/15, rau 13.

◻ Dahaka dainai ta ese ena mase negana totona ia hegaegae be namo?

Dala ta ai, unai bamona ta ia hegaegae be harihari gauna ena ruma bese taudia dekenai. Lalokau ia hahedinaraia. Ia hahedinaraia ta ia ura iena ‘ruma bese taudia ia ubua’ idia ida ia do noho lasi neganai danu. (1 Timoteo 5:8)​—1/15, rau 22.

◻ “Gwauhamata gunana” ese dahaka ia hagugurua? (2 Korinto 3:​14)

Ia ese gwauhamata matamatana ena kahana haida ia hahedinaraia, bona idia karaia loulou boubou karadia amo ia hahedinaraia taunimanima ese kara dika bona mase amo idia do ia ruhaia dalana idia davaria be namo. Ia ese taunimanima ia hakaua lao Iesu dekenai. (Galatia 3:​24)​—2/1, rau 14.

◻ Edena daladia ai gwauhamata matamatana be noho hanaihanai gauna? (Heberu 13:20)

Gau ginigunana be, ia be Taravatu gwauhamatana bamona lasi, badina ma gwauhamata taravatuna be ena gabu do ia abia lasi. Gau iharuana be, ia dainai idia vara gaudia do idia noho hanaihanai. Bona gau ihatoina be, Dirava ena Basileia henunai do idia noho tanobada taudia be Keriso ena Lagani 1,000 Lohia Negana lalonai unai gwauhamata matamatana ia havaraia namo do idia abia noho.​—2/1, rau 22.

◻ Tanikiu henia karana ese dahaka namo ia havaraia?

Ta ese ena kudouna amo tanikiu karana ia hahedinaraia dainai, moale bona maino ia davaria. (Aonega Herevadia 15:13, 15 itaia.) Tanikiu karana be kara namona dainai, ia ese kara dikadia, hegeregere badu, mama, bona moale lasi karadia amo ta ia gimaia.​—2/15, rau 4.

◻ Lauma helaga amo Dirava ena natudia ai idia lao taudia be edena gwauhamata taravatudia lalonai idia vareai?

Gwauhamata matamatana, Iehova ese lauma Israela taudia ida ia karaia gauna, bona Basileia gwauhamatana, Iesu ese ena aena gabunai idia raka horoa taudia ida ia karaia gauna. (Luka 22:20, 28-​30)​—2/15, rau 16.

◻ Israela taudia idia hagania dahaka aria badadia toi dekenai idia lao?

Hatubua Lasi Paraoa Ariana, Nisan 14 ena Pasova murinai maoromaoro idia karaia; Pura Edia Aria, dina namba 50 ai Nisan 16 murinai idia karaia; Uma Ena Anina Oredia Haboua Ariana, eiava Au Raurau Ruma Maragidia Ariana, hua namba 7 ai idia karaia. (Deuteronomi 16:​1-​15)​—3/1, rau 8, 9.

◻ Dahaka dainai Keristani taudia ida ita hebou be hahenamo ta?

Iesu ia gwau: “Bema lauegu ladanai tau rua o toi idia hebou gabu ta dekenai, lau danu be idia dekenai lau noho.” (Mataio 18:20; 28:20) Ma danu, lauma aniani ita abia dalana badana be kongregesen heboudia bona ma hebou badadia. (Mataio 24:45)​—3/1, rau 14.

◻ Ladana Nimiroda be edena bamona ia vara?

Diba bada taudia momo idia laloa unai ladana Nimiroda be ia vara neganai ia abia ladana lasi. To, idia laloa ena dagedage karana ia hedinarai murinai, unai kara hegeregerena ladana idia henia.​—3/15, rau 25.

◻ Ruma bese ena anina taunimanima dekenai be edena bamona?

Ruma bese be mai anina bada taunimanima dekenai. Histori ia hahedinaraia ruma bese oreana ia manoka ia lao neganai, hanua bona tano idia manoka idia lao danu. Unai dainai ia be mai anina bada taunimanima edia noho bona edia natudia bona edia tubudia edia namo dekenai.​—4/1, rau 6.

◻ Dahaka gaudia toi ese idia hamomokania Baibel be Dirava ena Hereva?

(1) Saiens dalanai iena hereva be maoro; (2) ia lalonai be noho hanaihanai hakaua herevadia, bona hari iseda noho dalana dekenai idia be do mai anina; (3) ia lalonai idia guguru peroveta herevadia idia noho, histori ese ia hamomokania vadaeni gaudia.​—4/1, rau 15.