Iehova Ena Orea ese Oiemu Haroro Gaukara Ia Durua
“Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai.”—APOKALUPO 14:6.
1. Iehova ena Witness taudia ese edena bamona hahetoho idia davaria, bona dahaka dainai idia roho mauri?
BADINA be dahaka Iehova ena guba oreana ese Keristani haroro gaukarana ia durua dalana ita lalo-pararalaia be gau badana? Inai tanobada ese Iehova ena Witness taudia ia dagedage henia lalonai, bema Iehova ena guba anerudia ese Witness taudia idia durua lasi, idia ese tanobada hegegemadai Dirava ena Basileia ena sivarai namona idia harorolaia diba, a? Idia hanaia laganidia 100 bamona lalonai, bese abia isi karana ia bada, mai edia siahu bada politikol oreadia idia noho, tanobada ibounai tuaridia bona hisihisi idauidau idia vara, bona unai negana lalonai, Witness taudia ese haroro gaukara idia karaia. Bema Iehova ese ia durudia lasi, Witness taudia ese idia davaria lalo-dika henia kava karadia, kara gageva, bona dagedage badadia momo amo idia roho mauri diba, a?—Salamo 34:7.
Tanobada Hegegemadai Idia Dagedage Henidia to Idia Mauri Noho
2. Edena dala ai Keristani taudia ginigunadia bona hari inai negai idia noho Keristani taudia idia hegeregere?
2 Idia hanaia laganidia 100 bamona lalonai, Iehova ena inai taudia, tomadiho bona politikol taudia, ese taravatu daladia ai bona ma dala haida ai, Iehova ena gaukara idia koua toho. Keristani tadikaka bona taihu idia dagedage henia, koikoi herevadia idia halasia bona idia printaia, bona idia samania koikoi—momo idia hamasea danu—bona nega momo, Babulonia Badana ena pasto bona pris taudia ese taunimanima edia lalona idia veria dainai, unai idia karaia. Keristani taudia ginigunadia idia herevalaia bamona, ita gwau diba ‘gabu ibounai lalonai inai orea idia gwauraia dika.’ Keriso ena negai, iena haroro gaukara idia hadokoa totona Iuda tomadiho gunalaia taudia idia gaukara goadagoada hegeregerena, hari dubu gunalaia taudia bona hereva momokani negea taudia ese edia politikol turadia ida Iehova ena taunimanima edia hadibaia gaukarana badana idia koua toho.—Kara 28:22; Mataio 26:59, 65-67.
3. Henryka Żur ena lalo-maoromaoro karana amo dahaka ita dibaia diba?
3 Haheitalai ta, March 1, 1946 ai, Poland dekenai ia vara gauna, mani oi laloa. Henryka Żur, lagani 15 Witness kekenina Chełm kahirakahira amo, ese Witness tadikaka ta ia bamoa, daudau lasi hanuana dekenai kamonai taudia idia vadivadi henia totona. Katolik tuari oreana ladana Narodowe Siły Zbrojne (Nesenel Tuari Oreana) taudia ese idia dogodiatao. Unai tadikaka idia dadabaia dikadika to ia heau mauri. To Henryka ia heau mauri lasi. Hora momo lalonai, dala dika hereana ai ia idia hahisia, idia doria toho Katolik taudia edia korosi toana ia karaia totona. Ia idia hahisia taudia ta ia gwau: “Dahaka oi ura oi laloa, oi laloa diba, to Katolik taudia edia korosi toana oi karaia. Bema oi karaia lasi oi do ai pidia!” Ena lalo-maoromaoro karana ia rakatania, a? Lasi. Unai dubu taudia dikadia be kahirakahira ia noho uda dekenai ia idia veria bona idia pidia. To, ia kwalimu! Ena lalo-maoromaoro karana idia hadikaia diba lasi.a—Roma 8:35-39.
4. Edena dala ai politikol taudia bona dubu taudia ese Basileia haroro gaukarana idia koua toho?
4 Lagani handred mai kahana ai, taunimanima ese Dirava ena hesiai taudia idia kara dika henia bona idia matauraia lasi. Iehova ena Witness taudia be Satani ena dubu badadia ta lasi bona idia ura lasi edia kahana ta ai idia lao dainai, lalohadai kereredia idia abia dae bona idia gwauraidia dika taudia eiava idia dagedage henia goadagoada taudia idia laloa Witness taudia idia kara dika henia be maoro. Politikol taudia ese idia dagedage henidia dikadika. Witness taudia momo be edia abidadama dainai idia mase. Idia gwauraia demokratik gavamanidia danu ese sivarai namona harorolaia gaukarana idia koua toho. Guna vadaeni, lagani 1917 lalonai, Canada bona United States dekenai, pasto bona pris taudia ese Bible Student taudia, Witness taudia edia ladana unai negai, idia samania idia gwau gavamani idia dagedage henia. Watch Tower Society ena hakaua taudia be koikoi herevadia dainai dibura rumadia dekenai idia atoa, to gabeai sibona idia gwau idia be mai edia kerere lasi bona idia ruhaia.—Apokalupo 11:7-9; 12:17.
5 Satani ese dala iboudiai ia gaukaralaia, Keriso ena tadikaka bona edia bamodia mai edia kamonai edia haroro gaukarana ia hadokoa totona. To, sivarai momo ese idia hahedinaraia bamona, gari idia havaraia herevadia o karadia, dagedage karadia, dibura rumadia, dibura kamepadia, bona mase ese Iehova ena Witness taudia idia koua diba lasi. Bona gunaguna amo ema bona hari unai be momokani. Elisaia ena hereva ese goada ia henia loulou, ia gwau: “Oi gari lasi, badina be ita idia durua taudia be momo, to unai orea idia durua taudia be momo lasi.” Unai ena badina ta be aneru taudia mai edia kamonai edia namba ese Diabolo ena demoni edia namba ia hanaia!—2 King Taudia 6:16; Kara 5:27-32, 41, 42.
Iehova ese Haroro Goadagoada Gaukarana Ia Hanamoa
6, 7. (a) Guna edena dala ai sivarai namona idia harorolaia? (b) Lagani 1943 ai, dahaka kara idia haidaua bona unai ese namo ia havaraia?
6 Idia hanaia laganidia 100 bamona lalonai, Iehova ena Witness taudia ese taunimanima idia karaia gaudia bona dala matamatadia momo idia gaukaralaia, dokona ia do mai lasi neganai, haroro gaukara badana idia karaia totona. Lagani 1914 ai, Pasto Russell, Watch Tower Bible and Tract Society ena presiden ginigunana, ia ura slaid piksa bona muvini piksa idia gaukaralaia, bona nega tamona ai Baibel herevadia rekodi idia gadaralaia, hora 8 Baibel program “The Photo-Drama of Creation” idia hahedinaraia totona. Unai nega lalonai, tano momo dekenai unai drama dainai taunimanima momo idia hoa. Gabeai, lagani 1930 ia lao 1950 bamona lalonai, momo idia diba Witness taudia ese edia ruma-ta-ruma-ta haroro gaukara idia karaia totona rekoda masini idia gaukaralaia, bona J. F. Rutherford, Society ena presiden iharuana, ena Baibel herevadia be rekodi amo idia halasia.
7 Lagani 1943 ai, Nathan H. Knorr, Society ena presiden ihatoina, ese gari lasi karana ta ia gunalaia, kongregesen iboudiai dekenai haroro taudia edia sikuli ia haginia. Witness taudia idia hadibaia ruma ta ruma ta ai do idia haroro bona hadibaia gaukarana do idia karaia, to rekoda masini do idia gaukaralaia lasi. Unai nega amo ema bona hari, sikuli ma haida idia haginia misinari taudia, ful-taim painia taudia, kongregesen elda taudia, bona Watch Tower Society ena brens opesi dekenai gaukara idia naria taudia idia hadibaia totona. Unai amo dahaka ia vara?
8. Lagani 1943 ai, edena dala ai Witness taudia ese edia abidadama goadana idia hahedinaraia?
8 Guna, lagani 1943 ai, Tanobada Ibounai Tuarina Iharuana lalonai, Witness taudia 129,000 be tano 54 dekenai idia gaukara. To, edia abidadama bona lalo-goada dainai, idia abia dae momokani dokona be ia do mai lasi neganai, Mataio 24:14 ena hereva do ia guguru. Idia diba momokani, inai tanobada ena oromana dikana idia haorea gaudia idia do vara lasi neganai, Iehova ese mai anina hadibaia gaukarana do ia karaia guna. (Mataio 24:21; Apokalupo 16:16; 19:11-16, 19-21; 20:1-3) Edia hekwarahi dainai namo ia vara, a?
9. Dahaka gaudia idia hahedinaraia haroro gaukara ese namo ia havaraia?
9 Hari tano 13 ta ta lalonai, Witness taudia 100,000 mai kahana idia gaukara. Unai tano momo be Katolik Dubu ese ia gunalaia tanodia. To, mani inai oi laloa. Brazil dekenai sivarai namona harorolaia taudia be 450,000, bona lagani 1997 ai, Keriso ena mase ena Memorial dekenai idia mai taudia edia namba be 1,200,000 ia hanaia. Mexico be haheitalai ma ta, unuseniai Witness taudia be kahirakahira 500,000 bona Memorial ariana dekenai idia mai taudia be 1,600,000 mai kahana. Ma Katolik tanodia haida be Italy (Witness taudia be 225,000 bamona), France (125,000 bamona), Spain (105,000 ia hanaia), bona Argentina (115,000 mai kahana). United States dekenai, Protestan, Katolik, bona Iuda dubudia be bada, to unuseniai Witness taudia be 975,000 bamona bona 2,000,000 mai kahana be Memorial dekenai idia lao. Momokani, hutuma bada herea be Babulonia Badana, tanobada ena tomadiho orea koikoidia ibounai mai ena hahediba hereva idaudia, idia rakatania bona Dirava ia gwauhamatalaia “guba matamata bona tanobada matamata,” do ia guguru momokani gwauhamata namona, idia abia dae.—2 Petero 3:13; Isaia 2:3, 4; 65:17; Apokalupo 18:4, 5; 21:1-4.
Gaukara Daladia Haidaua Taunimanima Durua Totona
10. Hari inai negai gabu haida dekenai edena gaudia idia idau?
10 Iesu Keriso amo Iehova dekenai idia giroa taudia momo be ruma-ta-ruma-ta gaukarana lalonai idia davaria. (Ioane 3:16; Kara 20:20) To dala ma haida idia gaukaralaia danu. Hari inai nega be idau, bona moni be bada lasi dainai hahine momo be moni gaukara idia karaia. Nega momo, Monday ia lao Friday taunimanima haida sibona be ruma dekenai idia noho. Unai dainai, Iehova ena Witness taudia ese edia gaukara daladia idia haidaua. Iesu bona ena hahediba taudia ginigunadia bamona, taunimanima idia davaria diba negadia ai, idia noho gabudia dekenai idia lao.—Mataio 5:1, 2; 9:35; Mareko 6:34; 10:1; Kara 2:14; 17:16, 17.
11. Hari inai negai, Iehova ena Witness taudia be edeseniai idia haroro, bona unai amo dahaka ia vara?
11 Witness taudia ese mai edia aonega ida motuka rakatania gabudia badadia, sitoa momo idia noho rumadia, faktori, opesi bona bisinesi gabudia, sikuli, pulisi steiseni, petrol steiseni, hotel bona aniani gabudia, bona dala dekenai taunimanima idia haroro henidia. Momokani, taunimanima idia davaria diba gabudia ibounai dekenai idia haroro henidia. Bona taunimanima be ruma dekenai idia noho neganai, Witness taudia be unuseniai idia vadivadi henidia noho. Unai bamona dala idauidau ai idia gaukara goadagoada dainai, idia hariharilaia Baibel buka bona magasin edia namba ia bada daekau. Mamoe bamona taudia idia davaria. Baibel stadi matamatadia idia hamatamaia. Volantia haroro taudia milioni ima mai kahana ese mai edia lalo-goada ida taunimanima edia histori ibounai lalonai ia vara hadibaia gaukara bada hereana idia karaia! Oi be idia ta, a?—2 Korinto 2:14-17; 3:5, 6.
Dahaka ese Iehova Ena Witness Taudia Edia Lalona Ia Doria?
12. (a) Edena dala ai Iehova ese ena taunimanima ia hadibaia? (b) Unai hadibaia karana amo dahaka ia vara?
12 Unai ibounai dekenai, guba oreana ena anina be dahaka? Isaia ia peroveta, ia gwau: “Emu natuna memerodia iboudiai be Iehova ese do ia hadibaia, bona emu natuna memerodia edia maino do ia bada.” (Isaia 54:13, NW) Iehova ese ena tanobada oreana amo tanobada hegegemadai tadikaka oreana ia hadibaia—Kingdom Hall ai, bona sekit bona distrik hebouheboudia ai. Unai amo lalo-tamona bona maino idia vara. Iehova ese ena taunimanima ia hadibaia dainai, idia be idau, idia lalokau heheni bona edia dekena taudia idia lalokau henia sibona idia lalokau henia hegeregerena. Herevana edeseniai idia noho ia parara tanobadana ai, to edia dekena taudia idia inai henia lasi.—Mataio 22:36-40.
13. Dahaka dainai ita diba momokani aneru ese haroro gaukarana idia hakaua?
13 Lalokau ese Iehova ena Witness taudia ia doria dainai, ena be taunimanima ese idia kamonai lasi eiava idia dagedage henidia, to Witness taudia idia haroro noho. (1 Korinto 13:1-8) Apokalupo 14:6 ia hahedinaraia hegeregerena, idia diba edia hahemauri gaukarana be guba anerudia ese idia hakaua. Aneru ese idia hakaua lalonai, dahaka sivarai idia harorolaia? “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada, bona davara, bona ranu guridia ibounai ia karaia Diravana do umui tomadiho henia.” Basileia ena sivarai namona harorolaia gaukarana ese Iehova ena ladana ia abia isi. Taunimanima idia boiria, Havaraia Tauna, Dirava, idia hanamoa totona, ia havaraia gaudia eiava evolusen lalohadaina idia hanamoa totona lasi. Bona haroro gaukara idia karaia haraga ena badina be dahaka? Ena badina be kota henia negana ia ginidae—Babulonia Badana bona Satani ena tanobada ena kahana idauidau kota henia negana unai.—Apokalupo 14:7; 18:8-10.
14. Daidia ese inai hadibaia gaukarana badana idia karaia?
14 Unai haroro gaukara be edia mauri idia gwauhamatalaia vadaeni Keristani taudia ibounai edia maduna. Lauma dalanai idia goada elda taudia ese kongregesen ena haroro gaukarana idia gunalaia. Idia hadibaia vadaeni painia taudia ese unai gaukara idia goadalaia. Mai edia lalo-goada ida Basileia ena sivarai idia harorolaia pablisa taudia, herevana hua ta lalonai hora haida eiava hora momo idia haroro diba, be tanobada ena kahana ibounai dekenai unai sivarai idia harorolaia.—Mataio 28:19, 20; Heberu 13:7, 17.
15. Dahaka ese ia hahedinaraia taunimanima ese Iehova ena Witness taudia edia haroro gaukarana idia itaia?
15 Tanobada taudia ese unai gaukara idia itaia, a? Oibe, bona nega momo televisen program bona niuspepa dekenai Iehova ena Witness taudia idia herevalaia karana ese unai ia hamomokania. Nega momo idia hahedinaraia ita be mai eda lalo-goada ida ita haheauka noho taunimanima iboudiai ita davaria totona. Oibe, iseda lalo-goada bona nega ibounai ita idia itaia dainai, ita idia laloa, herevana taunimanima momo ese unai sivarai bona unai sivarai idia harorolaia taudia idia dadaraia!
Ita Ura Bada Iseda Haroro Gaukara Ita Karaia Haorea
16. Hari ia noho nega kwadogina lalonai, edena bamona ita laloa be namo?
16 Inai tanobada ena oromana ena dokona be edena negai ita diba lasi, bona bema lalohadai maorona dainai Iehova ita hesiai henia, unai ita diba lasi be herevana. (Mataio 24:36; 1 Korinto 13:1-3) To inai ita diba, Iehova ena lalokau, siahu, bona hahemaoro do idia hedinarai totona, sivarai namona ita harorolaia “guna” be gau badana. (Mareko 13:10) Unai dainai, herevana lagani hida inai dika, gageva, bona dagedage tanobadana ena dokona be mai eda ura bada ida ita naria vadaeni, gau badana be mai eda ura bada ida iseda goada hegeregerena iseda gwauhamata do ita badinaia. Reana ita buruka eiava ita gorere, to guna ita matamata eiava ita goada negana ai mai eda lalo-goada ida ita gaukara hegeregerena, hari danu ita gaukara diba. Reana guna bamona hora momo lalonai ita haroro diba lasi, to Iehova idia hanamoa herevadia namodia ita gwauraia noho diba.—Heberu 13:15.
17. Ita ibounai ia durua diba ekspiriens namona ta mani oi gwauraia.
17 Unai dainai, herevana ita be matamata eiava buruka, to namona be iseda lalo-goada ita hahedinaraia bona tanobada matamatana ena sivarai namona be ita davaria taudia ibounai dekenai ita harorolaia. Australia ai, ena sinana ida sitoa dekenai ia lao lagani 7 hemarai kekenina ta bamona ita laloa be namo. Kingdom Hall dekenai ia kamonai ita ibounai ita haroro be gau badana, unai dainai ia ese ena baege lalonai Baibel buklet rua ia atoa. Sitoa dekenai ena sinana ia bisi neganai, unai kekeni maragina ia boio. Ena sinana ese ia tahua neganai, ia davaria ia ese hahine ta dekenai buklet ta ia hariharilaia! Sinana be unai hahine dekenai ia lao, reana ena kekeni ese ia havaraia hekwakwanai dainai, ena sori herevana ia gwauraia. To unai hahine be mai ena moale ida unai buklet ia abia dae vadaeni. Sinana be ena kekeni ida ia noho neganai, ena kekeni ia nanadaia, edena bamona ia be mai gari lasi ida ia diba lasi hahinena ia hereva henia diba. Kekeni ia gwau: “Sibona dekenai lau gwau, Gini, Hegaegae, Lao! Bena lau lao!”
18. Lalohadai namona be edena bamona ita hahedinaraia diba?
18 Ita ibounai ese unai Australia kekenina bamona ita laloa be namo, bona ita diba lasi taudia eiava gavamani taudia dekenai sivarai namona ita harorolaia neganai, unai bamona ita laloa be gau badana. Reana ita do idia dadaraia garina ita gari. Namona be Iesu ena hereva ita laloaboio lasi, ia gwau: “Emui lalona do idia hekwarahi lasi, edena bamona do umui haere, o edena bamona do umui hereva. Badina be, unai neganai do umui gwauraia herevadia, be Lauma Helaga ese do ia hadibaia umui dekenai.”—Luka 12:11, 12.
19. Oiemu hesiai gaukara be edena bamona oi laloa?
19 Dala namona ai, taunimanima dekenai sivarai namona oi harorolaia neganai, Dirava ena lauma ena heduru oi abidadama henia be namo. Taunimanima milioni momo ese idia hegeregere lasi tatau bona hahine, hari idia noho to kerukeru do idia noho lasi taudia, idia abidadama henia. Ita be Iehova bona ena guba oreana—Keriso Iesu, aneru helagadia, bona idia toreisi lou horoa Keristani taudia—hanaihanai do idia mauri noho taudia ita abidadama henia! Unai dainai, oi laloaboio lasi: “Ita idia durua taudia be momo, to unai orea idia durua taudia be momo lasi”!—2 King Taudia 6:16.
[Footnote]
a Haheitalai ma haida davaria totona, 1994 Yearbook of Jehovah’s Witnesses, rau 217-20 itaia.
Edena Bamona Do Oi Haere?
◻ Dirava ena guba oreana ese dahaka ia karaia, Iehova ena taunimanima idia roho mauri totona?
◻ Idia hanaia laganidia 100 bamona lalonai, politikol oreadia bona tomadiho oreadia ese Iehova ena Witness taudia idia dagedage henia daladia be dahaka dahaka?
◻ Hari inai nega be idau dainai, Iehova ena Witness taudia ese edia gaukara daladia be edena bamona idia haidaua?
◻ Dahaka ese oi ia doria dainai oi haroro?
5. Edena hereva ese Iehova ena hesiai taudia ia hagoadaia?
[Picture on page 17]
Henryka Żur
[Pictures on page 18]
Japan
Martinique
United States
Kenya
United States
Iehova ena Witness taudia be taunimanima idia davaria negadia ai bona idia noho gabudia dekenai idia haroro
[Picture on page 20]
Lagani 1900 murinai, Basileia ena sivarai halasia totona rekoda masini idia gaukaralaidia