Abidadama be Ia Noho Lou Diba!

ENA be hari inai negai abidadama lasi karana be “nega ena dokona” ena toana, lagani tausen haida gunanai abidadama lasi karana be ia hedinarai danu. (2 Timoteo 3:⁠1) Ita laloa lasi gabuna lalonai ia hedinarai guna​—paradaiso ta lalonai. Baibel be unai gabu ia herevalaia, ia gwau: “Dirava ese uma ta dina ia daekau kahana dekenai ia karaia, ladana Eden, bona unai gabu dekenai, ia karaia vadaeni tauna ia atoa, unuseni ia noho. Lohiabada Dirava ese tano dekena amo toana namo au ibounai ia havaraia, bona aniani idia atoa audia danu. Ma Dirava ese uma ena huana dekenai mauri ena au, bona kara namo bona kara dika hadibaia auna danu ia havaraia.”​—Genese 2:​8, 9.

Unai murinai idia noho siri ese inai negai abidadama be lasi ena badina idia hahedinaraia. Ita duahia, ia gwau: “Lohiabada Dirava ese unai tau dekenai taravatu ia atoa, ia gwau, ‘Uma gabu dekenai gini au ibounai edia huahua oi ania diba, idia be taravatu lasi, to kara namo bona kara dika hadibaia au ena huahua oi ania lasi, badina be inai huahua oi ania dina dekenai do oi mase momokani.’ ” (Genese 2:​16, 17) Adamu ese Iehova ena hereva ia daradaralaia be mai ena badina, a?

Ita duahia noho: “Gaigai be kerere ena aonega dekenai ia honu momokani. Lohiabada Dirava ia karaia mauri gaudia ibounai edia aonega be gaigai ese ia hanaia. Ia ese hahine dekenai ia henanadai, ia gwau, ‘Momokani, uma gabu ena au huahua ta ania lasi taravatu Dirava ese ia atoa o lasi?’ Hahine ese gaigai dekenai ia haere, ia gwau, ‘Uma gabu dekenai idia gini au edia huahua ibounai ai ania be ia namo, to uma gabu ena huana dekenai au ta ia gini, ena huahua dekenai Dirava ia gwau, “Unai au ena huahua umui ania lasi, bona dogoatao lasi, umui mase garina.” ’ To gaigai ese hahine dekenai ia gwau, ‘Inai be momokani lasi, dohore umui mase lasi. Dirava be inai bamona ia hereva badina ia diba, umui ania neganai aonega do umui davaria, bona Dirava hegeregere do umui noho, kara namona bona kara dikana do umui diba.’ Hahine ese ia itaia, unai au ena toana be namo herea, bona ena au huahua ia itaia be aniani gauna namona, bona au ena aonega ia ura abia. Vadaeni, unai au ena huahua ia abia, bona ia ania. Ma iena tau dekenai ia henia danu, bona ia danu ia ania.”​—Genese 3:​1-6.

Adamu bona Heva ese Dirava ena hadibaia hereva namona idia dadaraia neganai, idia hahedinaraia Iehova idia abidadama henia lasi. Dirava ena inai tauna Satani, gaigai korikorina amo Heva ia hereva henia tauna, ena kara idia hahedinaraia. Satani ese Dirava ena lohia dalana ia abidadama henia lasi. Unai kara dainai bona ena kudouna dekenai ia hekokoroku bona dagi badana ia tahua dainai, Dirava ia gwau-edeede henia bona taunimanima ia hakaua kerere unai idia karaia totona. Dirava idia abidadama henia lasi totona edia lalona ia veria.

Dahaka Ia Vara? Tura Karana Ia Hadikaia

Reana oi itaia, ma haida idia abidadama henia lasi taudia dekenai, tura karana idia karaia noho be ia auka. Lagani 100 B.C.E. murinai Latin gado ai ia torea tauna Publilius Syrus ia gwau: “Turadia ia hatamonaia gauna tamona be abidadama sibona.” Edia gwau-edeede karana amo, Adamu bona Heva ese idia hahedinaraia Dirava idia abidadama henia lasi. Unai dainai, Dirava be mai ena badina lasi idia ia abidadama henia totona. Abidadama be ia ore dainai, unai taunimanima ginigunadia ese edia tura karana Dirava ida idia haboioa. Toana be Iehova ese edia gwau-edeede karana ia gwauraia dika murinai, idia ia hereva henia lou lasi.

Adamu bona Heva edia tura karana be ia dika ia lao danu. Iehova ese Heva ia hadibaia, ia gwau: “Oiemu rogorogo ena hekwarahi, do lau habadaia, bona oiemu hisihisi mara neganai. To oiemu adavana do oi ura henia noho, bona ia ese oi do ia biagua.” (Genese 3:16) The Jerusalem Bible ia gwau: “Oi do ia lohiaia.” Hari, Adamu be Dirava ena ura hegeregerena mai lalokau ida ena kwara dagina ia gaukaralaia lasi, to ena adavana ena biaguna ai ia lao, bona ia lohiaia.

Kara dika idia karaia murinai, Adamu ia gwau kerere be ena adavana ena. Ia laloa ena adavana ena kara dainai, Dirava ese uma gabu goevadaena amo ia luludia bena ia do hegaegae lasi gabuna dekenai idia ia negea, bona do idia hekwarahi bada ela bona kahu dekenai idia giroa lou. (Genese 3:​17-19) Ita laloa diba unai be edia hekwakwanai momo edia badina. Reana Adamu be ia badu kava bona ia gwau Heva ena hereva do ia kamonai henia lou lasi. Reana ia laloa mai maoro ida ia gwau diba ‘Inai nega murinai, lau be biaguna!’ To, reana Heva ese ia itaia Adamu be ena kwara dagina ia gaukaralaia kerere, bona hari ia abidadama henia diba lasi. Taunimanima ese Dirava idia abidadama henia lasi dainai, edia tura karana ia ida idia haboioa bona edia tura heheni karana idia hadikaia danu.

Daika Ita Abidadama Henia Diba?

Adamu bona Heva edia haheitalai ese ia hahedinaraia bamona, iboudiai ita abidadama henia be maoro lasi. Edena bamona ita diba daika ita abidadama henia be maoro bona daika ita abidadama henia be maoro lasi?

Salamo 146:3 ese ita ia hadibaia, ia gwau: “King taudia do umui abidadama henia lasi, badina taunimanima ese umui do idia hamauria diba lasi.” Bona Ieremia 17:​5-7 ia gwau: “Bema tau ta ese taunimanima ia abidadama henia, ma taunimanima be iena goada ena badina ia halaoa, bona ia ese lau Lohiabada ia rakatania neganai, lau ese unai tau do lau hadikaia momokani.” To danu ia gwau: “To lau Lohiabada ia abidadama henia noho tauna be namo. Iena laloa goada be lau dekena amo ia abia tauna, be do lau hanamoa.”

Momokani, nega ibounai lasi taunimanima abidadama henia karana be kerere. Unai Baibel siri ese idia hahedinaraia nega ibounai Dirava abidadama henia karana be maoro, to nega haida goevadae lasi taudia abidadama henia karana ese hekwakwanai ia havaraia diba. Hegeregere, taunimanima be Dirava sibona ia henia diba gaudia​—hahemauri, maino korikori, bona noho namo​—idia abia totona, taunimanima idia abidadama henia neganai, do idia lalohisihisi.​—Salamo 46:9; 1 Tesalonika 5:⁠3.

Momokani, taunimanima bona edia orea ita abidadama henia diba, Dirava ena ura bona ena hakaua herevadia idia badinaia ena bada hegeregerena. Unai dainai, ma haida ese ita idia abidadama henia totona, gau badana be ita hereva momokani, ita koikoi lasi, bona ita hahedinaraia ita dekenai idia tabekau diba. (Aonega Herevadia 12:19; Efeso 4:25; Heberu 13:18) Baibel ena hakaua herevadia ita badinaia neganai sibona, taunimanima ese ita do idia abidadama henia diba bona unai ese ita bona idia do ia hagoadaia.

Abidadama Havaraia Lou

Iehova ena Witness taudia ese badina namona dainai, Dirava idia abidadama henia bona ma haida idia hagoadaia unai idia karaia totona. Iehova be sibona ena hereva ia badinaia, ita diba momokani ia ese hanaihanai ia gwauraia karadia do ia karaia, badina “Dirava ia koikoi diba lasi.” Nega ta lasi, lalokau Diravana ita abidadama henia neganai do ita lalohisihisi.​—Heberu 6:18; Salamo 94:14; Isaia 46:​9-11; 1 Ioane 4:⁠8.

Iehova abidadama henia karana dekenai idia lalo-tamona bona ena hakaua herevadia idia badinaia taudia ese mai edia ura bada ida idia abidadama heheni danu. Abidadama lasi tanobadana lalonai ita abidadama henia diba taudia ita davaria be moale gauna! Bema taunimanima edia hereva ibounai bona edia kara ibounai ita abidadama henia diba inai tanobada be do ia idau vaitani! Dirava ese ia gwauhamatalaia tanobada matamatana lalonai unai be do ia vara. Ma nega ta lasi, abidadama lasi karana do ia vara!

Oi ura unai nega ai do oi noho, a? Bema oibe, Iehova ena Witness taudia ese oi idia boiria, mauri oi abia totona oi karaia karadia oi dibaia karana amo oiemu abidadama Dirava bona ena gwauhamata dekenai oi hagoadaia totona. Baibel stadi karana ese ia hamomokania Dirava ia noho, taunimanima edia namo ia laloa bada, bona kahirakahira ena Basileia amo tanobada ena hekwakwanai do ia hamaoromaoroa. Taunimanima milioni momo be Dirava bona ena Hereva, Baibel, abidadama henia karana idia dibaia vadaeni. Iehova ena Witness taudia be mai moale ida taunimanima ia durua davana lasi Baibel stadi kosina oi dekenai do idia hahedinaraia. Eiava inai magasin idia torea taudia oi tore henia ma heduru herevadia oi abia totona.

[Blurb on page 5]

Dirava abidadama henia lasi karana ese taunimanima edia tura karana ia hadikaia

[Blurb on page 6]

Dirava ena hakaua herevadia idia badinaia hegeregerena, taunimanima ita abidadama henia diba